Brahma Gnanavali Mala

sakṛchChravaṇamātrēṇa brahmajñānaṃ yatō bhavēt ।
brahmajñānāvalīmālā sarvēṣāṃ mōkṣasiddhayē ॥ 1॥

asaṅgō’hamasaṅgō’hamasaṅgō’haṃ punaḥ punaḥ ।
sachchidānandarūpō’hamahamēvāhamavyayaḥ ॥ 2॥

nityaśuddhavimuktō’haṃ nirākārō’hamavyayaḥ ।
bhūmānandasvarūpō’hamahamēvāhamavyayaḥ ॥ 3॥

nityō’haṃ niravadyō’haṃ nirākārō’hamuchyatē ।
paramānandarūpō’hamahamēvāhamavyayaḥ ॥ 4॥

śuddhachaitanyarūpō’hamātmārāmō’hamēva cha ।
akhaṇḍānandarūpō’hamahamēvāhamavyayaḥ ॥ 5॥

pratyakchaitanyarūpō’haṃ śāntō’haṃ prakṛtēḥ paraḥ ।
śāśvatānandarūpō’hamahamēvāhamavyayaḥ ॥ 6॥

tattvātītaḥ parātmāhaṃ madhyātītaḥ paraḥ śivaḥ ।
māyātītaḥ parañjyōtirahamēvāhamavyayaḥ ॥ 7॥

nānārūpavyatītō’haṃ chidākārō’hamachyutaḥ ।
sukharūpasvarūpō’hamahamēvāhamavyayaḥ ॥ 8॥

māyātatkāryadēhādi mama nāstyēva sarvadā ।
svaprakāśaikarūpō’hamahamēvāhamavyayaḥ ॥ 9॥

guṇatrayavyatītō’haṃ brahmādīnāṃ cha sākṣyaham ।
anantānantarūpō’hamahamēvāhamavyayaḥ ॥ 10॥

antaryāmisvarūpō’haṃ kūṭasthaḥ sarvagō’smyaham ।
paramātmasvarūpō’hamahamēvāhamavyayaḥ ॥ 11॥

niṣkalō’haṃ niṣkriyō’haṃ sarvātmādyaḥ sanātanaḥ ।
aparōkṣasvarūpō’hamahamēvāhamavyayaḥ ॥ 12॥

dvandvādisākṣirūpō’hamachalō’haṃ sanātanaḥ ।
sarvasākṣisvarūpō’hamahamēvāhamavyayaḥ ॥ 13॥

prajñānaghana ēvāhaṃ vijñānaghana ēva cha ।
akartāhamabhōktāhamahamēvāhamavyayaḥ ॥ 14॥

nirādhārasvarūpō’haṃ sarvādhārō’hamēva cha ।
āptakāmasvarūpō’hamahamēvāhamavyayaḥ ॥ 15॥

tāpatrayavinirmuktō dēhatrayavilakṣaṇaḥ ।
avasthātrayasākṣyasmi chāhamēvāhamavyayaḥ ॥ 16॥

dṛgdṛśyau dvau padārthau staḥ parasparavilakṣaṇau ।
dṛgbrahma dṛśyaṃ māyēti sarvavēdāntaḍiṇḍimaḥ ॥ 17॥

ahaṃ sākṣīti yō vidyādvivichyaivaṃ punaḥ punaḥ ।
sa ēva muktaḥ sō vidvāniti vēdāntaḍiṇḍimaḥ ॥ 18॥

ghaṭakuḍyādikaṃ sarvaṃ mṛttikāmātramēva cha ।
tadvadbrahma jagatsarvamiti vēdāntaḍiṇḍimaḥ ॥ 19॥

brahma satyaṃ jaganmithyā jīvō brahmaiva nāparaḥ ।
anēna vēdyaṃ sachChāstramiti vēdāntaḍiṇḍimaḥ ॥ 20॥

antarjyōtirbahirjyōtiḥ pratyagjyōtiḥ parātparaḥ ।
jyōtirjyōtiḥ svayañjyōtirātmajyōtiḥ śivō’smyaham ॥ 21॥

iti śrīmatparamahaṃsaparivrājakāchāryasya
śrīgōvindabhagavatpūjyapādaśiṣyasya
śrīmachChaṅkarabhagavataḥ kṛtau
brahmajñānāvalīmālā sampūrṇā ॥