Bala Raksha (Bhagavata Purana)

śrī gaṇēśāya namaḥ ।
avyādajō’ṅghri maṇimāṃstava jānvathōrū
yajñō’chyutaḥ kaṭitaṭaṃ jaṭharaṃ hayāsyaḥ ।
hṛtkēśavastvadura īśa inastu kaṇṭhaṃ
viṣṇurbhujaṃ mukhamurukrama īśvaraḥ kam ॥ 1 ॥

chakryagrataḥ sahagadō harirastu paśchāt
tvatpārśvayōrdhanurasī madhuhājanaścha ।
kōṇēṣu śaṅkha urugāya uparyupēndras
tārkṣyaḥ kṣitau haladharaḥ puruṣaḥ samantāt ॥ 2 ॥

indriyāṇi hṛṣīkēśaḥ prāṇānnārāyaṇō’vatu ।
śvētadvīpapatiśchittaṃ manō yōgēśvarō’vatu ॥ 3 ॥

pṛśnigarbhastu tē buddhimātmānaṃ bhagavānparaḥ ।
krīḍantaṃ pātu gōvindaḥ śayānaṃ pātu mādhavaḥ ॥ 4 ॥

vrajantamavyādvaikuṇṭha āsīnaṃ tvāṃ śriyaḥ patiḥ ।
bhuñjānaṃ yajñabhukpātu sarvagrahabhayaṅkaraḥ ॥ 5 ॥

ḍākinyō yātudhānyaścha kuṣmāṇḍā yē’rbhakagrahāḥ ।
bhūtaprētapiśāchāścha yakṣarakṣōvināyakāḥ ॥ 6 ॥

kōṭarā rēvatī jyēṣṭhā pūtanā mātṛkādayaḥ ।
unmādā yē hyapasmārā dēhaprāṇēndriyadruhaḥ ॥ 7 ॥

svapnadṛṣṭā mahōtpātā vṛddhabālagrahāścha yē ।
sarvē naśyantu tē viṣṇōrnāmagrahaṇabhīravaḥ ॥ 8 ॥

॥ iti śrīmadbhāgavatē daśamaskandhē gōpīkṛtabālarakṣā samāptā ॥