Amrita Sanjeevani Dhanvantari Stotram

athāparamahaṃ vakṣyē’mṛtasañjīvanaṃ stavam ।
yasyānuṣṭhānamātrēṇa mṛtyurdūrātpalāyatē ॥ 1 ॥

asādhyāḥ kaṣṭasādhyāścha mahārōgā bhayaṅkarāḥ ।
śīghraṃ naśyanti paṭhanādasyāyuścha pravardhatē ॥ 2 ॥

śākinīḍākinīdōṣāḥ kudṛṣṭigrahaśatrujāḥ ।
prētavētālayakṣōtthā bādhā naśyanti chākhilāḥ ॥ 3 ॥

duritāni samastāni nānājanmōdbhavāni cha ।
saṃsargajavikārāṇi vilīyantē’sya pāṭhataḥ ॥ 4 ॥

sarvōpadravanāśāya sarvabādhāpraśāntayē ।
āyuḥ pravṛddhayē chaitat stōtraṃ paramamadbhutam ॥ 5 ॥

bālagrahābhibhūtānāṃ bālānāṃ sukhadāyakam ।
sarvāriṣṭaharaṃ chaitadbalapuṣṭikaraṃ param ॥ 6 ॥

bālānāṃ jīvanāyaitat stōtraṃ divyaṃ sudhōpamam ।
mṛtavatsatvaharaṇaṃ chirañjīvitvakārakam ॥ 7 ॥

mahārōgābhibhūtānāṃ bhayavyākulitātmanām ।
sarvādhivyādhiharaṇaṃ bhayaghnamamṛtōpamam ॥ 8 ॥

alpamṛtyuśchāpamṛtyuḥ pāṭhādasyaḥ praṇaśyati ।
jalā’gniviṣaśastrāri na hi śṛṅgi bhayaṃ tathā ॥ 9 ॥

garbharakṣākaraṃ strīṇāṃ bālānāṃ jīvanapradam ।
mahārōgaharaṃ nṝṇāmalpamṛtyuharaṃ param ॥ 10 ॥

bālā vṛddhāścha taruṇā narā nāryaścha duḥkhitāḥ ।
bhavanti sukhinaḥ pāṭhādasya lōkē chirāyuṣaḥ ॥ 11 ॥

asmātparataraṃ nāsti jīvanōpāya aihikaḥ ।
tasmāt sarvaprayatnēna pāṭhamasya samācharēt ॥ 12 ॥

ayutāvṛttikaṃ vātha sahasrāvṛttikaṃ tathā ।
tadardhaṃ vā tadardhaṃ vā paṭhēdētachcha bhaktitaḥ ॥ 13 ॥

kalaśē viṣṇumārādhya dīpaṃ prajvālya yatnataḥ ।
sāyaṃ prātaścha vidhivat stōtramētat paṭhēt sudhīḥ ॥ 14 ॥

sarpiṣā haviṣā vā’pi saṃyāvēnātha bhaktitaḥ ।
daśāṃśamānatō hōmaṃ kuryāt sarvārthasiddhayē ॥ 15 ॥

atha stōtram
namō namō viśvavibhāvanāya
namō namō lōkasukhapradāya ।
namō namō viśvasṛjēśvarāya
namō namō muktivarapradāya ॥ 1 ॥

namō namastē’khilalōkapāya
namō namastē’khilakāmadāya ।
namō namastē’khilakāraṇāya
namō namastē’khilarakṣakāya ॥ 2 ॥

namō namastē sakalārtihartrē
namō namastē virujaḥ prakartrē ।
namō namastē’khilaviśvadhartrē
namō namastē’khilalōkabhartrē ॥ 3 ॥

sṛṣṭaṃ dēva charācharaṃ jagadidaṃ brahmasvarūpēṇa tē
sarvaṃ tatparipālyatē jagadidaṃ viṣṇusvarūpēṇa tē ।
viśvaṃ saṃhritayē tadēva nikhilaṃ rudrasvarūpēṇa tē
saṃsichyāmṛtaśīkarairhara mahāriṣṭaṃ chiraṃ jīvaya ॥ 4 ॥

yō dhanvantarisañjñayā nigaditaḥ kṣīrābdhitō niḥsṛtō
hastābhyāṃ janajīvanāya kalaśaṃ pīyūṣapūrṇaṃ dadhat ।
āyurvēdamarīrachajjanarujāṃ nāśāya sa tvaṃ mudā
saṃsichyāmṛtaśīkarairhara mahāriṣṭaṃ chiraṃ jīvaya ॥ 5 ॥

strīrūpaṃ varabhūṣaṇāmbaradharaṃ trailōkyasammōhanaṃ
kṛtvā pāyayati sma yaḥ suragaṇān pīyūṣamatyuttamam ।
chakrē daityagaṇān sudhāvirahitān sammōhya sa tvaṃ mudā
saṃsichyāmṛtaśīkarairhara mahāriṣṭaṃ chiraṃ jīvaya ॥ 6 ॥

chākṣuṣōdadhisamplāva bhūvēdapa jhaṣākṛtē ।
siñcha siñchāmṛtakaṇaiśchiraṃ jīvaya jīvaya ॥ 7 ॥

pṛṣṭhamandaranirghūrṇanidrākṣa kamaṭhākṛtē ।
siñcha siñchāmṛtakaṇaiśchiraṃ jīvaya jīvaya ॥ 8 ॥

yāñchāchChalabalitrāsamuktanirjara vāmana ।
siñcha siñchāmṛtakaṇaiśchiraṃ jīvaya jīvaya ॥ 9 ॥

dharōddhāra hiraṇyākṣaghāta krōḍākṛtē prabhō ।
siñcha siñchāmṛtakaṇaiśchiraṃ jīvaya jīvaya ॥ 10 ॥

bhaktatrāsavināśāttachaṇḍatva nṛharē vibhō ।
siñcha siñchāmṛtakaṇaiśchiraṃ jīvaya jīvaya ॥ 11 ॥

kṣatriyāraṇyasañChēdakuṭhārakararaiṇuka ।
siñcha siñchāmṛtakaṇaiśchiraṃ jīvaya jīvaya ॥ 12 ॥

rakṣōrājapratāpābdhiśōṣaṇāśuga rāghava ।
siñcha siñchāmṛtakaṇaiśchiraṃ jīvaya jīvaya ॥ 13 ॥

bhūbhārāsurasandōhakālāgnē rukmiṇīpatē ।
siñcha siñchāmṛtakaṇaiśchiraṃ jīvaya jīvaya ॥ 14 ॥

vēdamārgaratānarhavibhrāntyai buddharūpadhṛk ।
siñcha siñchāmṛtakaṇaiśchiraṃ jīvaya jīvaya ॥ 15 ॥

kalivarṇāśramāspaṣṭadharmardhyai kalkirūpabhāk ।
siñcha siñchāmṛtakaṇaiśchiraṃ jīvaya jīvaya ॥ 16 ॥

asādhyāḥ kaṣṭasādhyā yē mahārōgā bhayaṅkarāḥ ।
Chindhi tānāśu chakrēṇa chiraṃ jīvaya jīvaya ॥ 17 ॥

alpamṛtyuṃ chāpamṛtyuṃ mahōtpātānupadravān ।
bhindhi bhindhi gadāghātaiśchiraṃ jīvaya jīvaya ॥ 18 ॥

ahaṃ na jānē kimapi tvadanyat
samāśrayē nātha padāmbujaṃ tē ।
kuruṣva tadyanmanasīpsitaṃ tē
sukarmaṇā kēna samakṣamīyām ॥ 19 ॥

tvamēva tātō jananī tvamēva
tvamēva nāthaścha tvamēva bandhuḥ ।
vidyādhanāgārakulaṃ tvamēva
tvamēva sarvaṃ mama dēvadēva ॥ 20 ॥

na mē’parādhaṃ pravilōkaya prabhō-
-‘parādhasindhōścha dayānidhistvam ।
tātēna duṣṭō’pi sutaḥ surakṣatē
dayālutā tē’vatu sarvadā’smān ॥ 21 ॥

ahaha vismara nātha na māṃ sadā
karuṇayā nijayā paripūritaḥ ।
bhuvi bhavān yadi mē na hi rakṣakaḥ
kathamahō mama jīvanamatra vai ॥ 22 ॥

daha daha kṛpayā tvaṃ vyādhijālaṃ viśālaṃ
hara hara karavālaṃ chālpamṛtyōḥ karālam ।
nijajanaparipālaṃ tvāṃ bhajē bhāvayālaṃ
kuru kuru bahukālaṃ jīvitaṃ mē sadā’lam ॥ 23 ॥

na yatra dharmācharaṇaṃ na jānaṃ
vrataṃ na yōgō na cha viṣṇucharchā ।
na pitṛgōvipravarāmarārchā
svalpāyuṣastatra janā bhavanti ॥ 24 ॥

atha mantram
klīṃ śrīṃ klīṃ śrīṃ namō bhagavatē janārdanāya sakala duritāni nāśaya nāśaya ।
kṣrauṃ ārōgyaṃ kuru kuru । hrīṃ dīrghamāyurdēhi dēhi svāhā ॥

phalaśrutiḥ
asya dhāraṇatō jāpādalpamṛtyuḥ praśāmyati ।
garbharakṣākaraṃ strīṇāṃ bālānāṃ jīvanaṃ param ॥ 1 ॥

śataṃ pañchāśataṃ śaktyā’thavā pañchādhiviṃśatim ।
pustakānāṃ dvijēbhyastu dadyāddīrghāyuṣāptayē ॥ 2 ॥

bhūrjapatrē vilikhyēdaṃ kaṇṭhē vā bāhumūlakē ।
sandhārayēdgarbharakṣā bālarakṣā cha jāyatē ॥ 3 ॥

sarvē rōgā vinaśyanti sarvā bādhāḥ praśāmyati ।
kudṛṣṭijaṃ bhayaṃ naśyēt tathā prētādijaṃ bhayam ॥ 4 ॥

mayā kathitamētattē’mṛtasañjīvanaṃ param ।
alpamṛtyuharaṃ stōtraṃ mṛtavatsatvanāśanam ॥ 5 ॥

iti sudarśanasaṃhitōktaṃ amṛtasañjīvana dhanvantari stōtram ॥