গীতগোবিংদং সপ্তমঃ সর্গঃ – নাগর নারযণঃ

॥ সপ্তমঃ সর্গঃ ॥
॥ নাগরনারাযণঃ ॥

অত্রাংতরে চ কুলটাকুলবর্ত্মপাত-সংজাতপাতক ইব স্ফুটলাংছনশ্রীঃ ।
বৃংদাবনাংতরমদীপযদংশুজালৈ-র্দিক্সুংদরীবদনচংদনবিংদুরিংদুঃ ॥ 40 ॥

প্রসরতি শশধরবিংবে বিহিতবিলংবে চ মাধবে বিধুরা ।
বিরচিতবিবিধবিলাপং সা পরিতাপং চকারোচ্চৈঃ ॥ 41 ॥

॥ গীতং 13 ॥

কথিতসময়েঽপি হরিরহহ ন যয়ৌ বনম্ ।
মম বিফলমিদমমলরূপমপি যৌবনম্ ॥
যামি হে কমিহ শরণং সখীজনবচনবংচিতা ॥ 1 ॥

যদনুগমনায় নিশি গহনমপি শীলিতম্ ।
তেন মম হৃদযমিদমসমশরকীলিতম্ ॥ 2 ॥

মম মরণমেব বরমতিবিতথকেতনা ।
কিমিহ বিষহামি বিরহানলচেতনা ॥ 3 ॥

মামহহ বিধুরযতি মধুরমধুয়ামিনী ।
কাপি হরিমনুভবতি কৃতসুকৃতকামিনী ॥ 4 ॥

অহহ কলয়ামি বলয়াদিমণীভূষণম্ ।
হরিবিরহদহনবহনেন বহুদূষণম্ ॥ 5 ॥

কুসুমসুকুমারতনুমতনুশরলীলয়া ।
স্রগপি হৃদি হংতি মামতিবিষমশীলয়া ॥ 6 ॥

অহমিহ নিবসামি নগণিতবনবেতসা ।
স্মরতি মধুসূদনো মামপি ন চেতসা ॥ 7 ॥

হরিচরণশরণজযদেবকবিভারতী ।
বসতু হৃদি যুবতিরিব কোমলকলাবতী ॥ 8 ॥

তত্কিং কামপি কামিনীমভিসৃতঃ কিং বা কলাকেলিভি-র্বদ্ধো বংধুভিরংধকারিণি বনোপাংতে কিমু ভ্রাম্যতি ।
কাংতঃ ক্লাংতমনা মনাগপি পথি প্রস্থাতুমেবাক্ষমঃ সংকেতীকৃতমংজুবংজুললতাকুংজেঽপি যন্নাগতঃ ॥ 42 ॥

অথাগতাং মাধবমংতরেণ সখীমিয়ং বীক্ষ্য় বিষাদমূকাম্ ।
বিশংক্মানা রমিতং কয়াপি জনার্দনং দৃষ্টবদেতদাহ ॥ 43 ॥

॥ গীতং 14 ॥

স্মরসমরোচিতবিরচিতবেশা ।
গলিতকুসুমদরবিলুলিতকেশা ॥
কাপি মধুরিপুণা বিলসতি যুবতিরধিকগুণা ॥ 1 ॥

হরিপরিরংভণবলিতবিকারা ।
কুচকলশোপরি তরলিতহারা ॥ 2 ॥

বিচলদলকললিতাননচংদ্রা ।
তদধরপানরভসকৃততংদ্রা ॥ 3 ॥

চংচলকুংডলদলিতকপোলা ।
মুখরিতরসনজঘনগলিতলোলা ॥ 4 ॥

দয়িতবিলোকিতলজ্জিতহসিতা ।
বহুবিধকূজিতরতিরসরসিতা ॥ 5 ॥

বিপুলপুলকপৃথুবেপথুভংগা ।
শ্বসিতনিমীলিতবিকসদনংগা ॥ 6 ॥

শ্রমজলকণভরসুভগশরীরা ।
পরিপতিতোরসি রতিরণধীরা ॥ 7 ॥

শ্রীজযদেবভণিতহরিরমিতম্ ।
কলিকলুষং জনযতু পরিশমিতম্ ॥ 8 ॥

বিরহপাংডুমুরারিমুখাংবুজ-দ্য়ুতিরিয়ং তিরযন্নপি চেতনাম্ ।
বিধুরতীব তনোতি মনোভুবঃ সহৃদয়ে হৃদয়ে মদনব্যথাম্ ॥ 44 ॥

॥ গীতং 15 ॥

সমুদিতমদনে রমণীবদনে চুংবনবলিতাধরে ।
মৃগমদতিলকং লিখতি সপুলকং মৃগমিব রজনীকরে ॥
রমতে যমুনাপুলিনবনে বিজয়ী মুরারিরধুনা ॥ 1 ॥

ঘনচযরুচিরে রচযতি চিকুরে তরলিততরুণাননে ।
কুরবককুসুমং চপলাসুষমং রতিপতিমৃগকাননে ॥ 2 ॥

ঘটযতি সুঘনে কুচয়ুগগগনে মৃগমদরুচিরূষিতে ।
মণিসরমমলং তারকপটলং নখপদশশিভূষিতে ॥ 3 ॥

জিতবিসশকলে মৃদুভুজয়ুগলে করতলনলিনীদলে ।
মরকতবলয়ং মধুকরনিচয়ং বিতরতি হিমশীতলে ॥ 4 ॥

রতিগৃহজঘনে বিপুলাপঘনে মনসিজকনকাসনে ।
মণিমযরসনং তোরণহসনং বিকিরতি কৃতবাসনে ॥ 5 ॥

চরণকিসলয়ে কমলানিলয়ে নখমণিগণপূজিতে ।
বহিরপবরণং যাবকভরণং জনযতি হৃদি যোজিতে ॥ 6 ॥

রমযতি সদৃশং কামপি সুভৃশং খলহলধরসোদরে ।
কিমফলমবসং চিরমিহ বিরসং বদ সখি বিটপোদরে ॥ 7 ॥

ইহ রসভণনে কৃতহরিগুণনে মধুরিপুপদসেবকে ।
কলিয়ুগচরিতং ন বসতু দুরিতং কবিনৃপজযদেবকে ॥ 8 ॥

নায়াতঃ সখি নির্দয়ো যদি শঠস্ত্বং দূতি কিং দূযসে স্বচ্ছংদং বহুবল্লভঃ স রমতে কিং তত্র তে দূষণম্ ।
পশ্য়াদ্য় প্রিযসম্গমায় দয়িতস্য়াকৃষ্যমাণং গণৈ-রুত্কংঠার্তিভরাদিব স্ফুটদিদং চেতঃ স্বয়ং যাস্যতি ॥ 45 ॥

॥ গীতং 16 ॥

অনিলতরলকুবলযনযনেন ।
তপতি ন সা কিসলযশযনেন ॥
সখি যা রমিতা বনমালিনা ॥ 1 ॥

বিকসিতসরসিজললিতমুখেন ।
স্ফুটতি ন সা মনসিজবিশিখেন ॥ 2 ॥

অমৃতমধুরমৃদুতরবচনেন ।
জ্বলতি ন সা মলযজপবনেন ॥ 3 ॥

স্থলজলরুহরুচিকরচরণেন ।
লুঠতি ন সা হিমকরকিরণেন ॥ 4 ॥

সজলজলদসমুদযরুচিরেণ ।
দলতি ন সা হৃদি চিরবিরহেণ ॥ 5 ॥

কনকনিকষরুচিশুচিবসনেন ।
শ্বসতি ন সা পরিজনহসনেন ॥ 6 ॥

সকলভুবনজনবরতরুণেন ।
বহতি ন সা রুজমতিকরুণেন ॥ 7 ॥

শ্রীজযদেবভণিতবচনেন ।
প্রবিশতু হরিরপি হৃদযমনেন ॥ 8 ॥

মনোভবানংদন চংদনানিল প্রসীদ রে দক্ষিণ মুংচ বামতাম্ ।
ক্ষণং জগত্প্রাণ বিধায় মাধবং পুরো মম প্রাণহরো ভবিষ্যসি ॥ 46 ॥

রিপুরিব সখীসংবাসোঽয়ং শিখীব হিমানিলো বিষমিব সুধারশ্মির্যস্মিংদুনোতি মনোগতে ।
হৃদযমদয়ে তস্মিন্নেবং পুনর্বলতে বলাত্ কুবলযদৃশাং বামঃ কামো নিকামনিরংকুশঃ ॥ 47 ॥

বাধাং বিধেহি মলয়ানিল পংচবাণ প্রাণান্গৃহাণ ন গৃহং পুনরাশ্রয়িষ্য়ে ।
কিং তে কৃতাংতভগিনি ক্ষময়া তরংগৈ-রংগানি সিংচ মম শাম্যতু দেহদাহঃ ॥ 48 ॥

প্রাতর্নীলনিচোলমচ্য়ুতমুরস্সংবীতপীতাংবরম্
রধায়াশ্কিতং বিলোক্য় হসতি স্বৈরং সখীমংডলে ।
ব্রীডাচংচলমংচলং নযনয়োরাধায় রাধাননে
স্বাদুস্মেরমুখোঽযমস্তু জগদানংদায় নংদাত্মজঃ॥ (কস্মিংশ্চন পাঠাংতরে ইদং পদ্য়ং বিদ্যতে)

॥ ইতি গীতগোবিংদে বিপ্রলব্ধাবর্ণনে নাগনারাযণো নাম সপ্তমঃ সর্গঃ ॥