శ్రీ మధ్వాచార్య కృత ద్వాదశ స్తోత్ర – ప్రథమస్తోత్రం

॥ ద్వాదశ స్తోత్రాణి॥

అథ ప్రథమస్తోత్రం

వందే వంద్యం సదానందం వాసుదేవం నిరంజనమ్ ।
ఇందిరాపతిమాద్యాది వరదేశ వరప్రదమ్ ॥ 1॥

నమామి నిఖిలాధీశ కిరీటాఘృష్టపీఠవత్ ।
హృత్తమః శమనేఽర్కాభం శ్రీపతేః పాదపంకజమ్ ॥ 2॥

జాంబూనదాంబరాధారం నితంబం చింత్యమీశితుః ।
స్వర్ణమంజీరసంవీతం ఆరూఢం జగదంబయా ॥ 3॥

ఉదరం చింత్యం ఈశస్య తనుత్వేఽపి అఖిలంభరమ్ ।
వలిత్రయాంకితం నిత్యం ఆరూఢం శ్రియైకయా ॥ 4॥

స్మరణీయమురో విష్ణోః ఇందిరావాసముత్తమైః । వర్
ఇందిరావాసమీశితుః ఇందిరావాసముత్తమం
అనంతం అంతవదివ భుజయోరంతరంగతమ్ ॥ 5॥

శంఖచక్రగదాపద్మధరాశ్చింత్యా హరేర్భుజాః ।
పీనవృత్తా జగద్రక్షా కేవలోద్యోగినోఽనిశమ్ ॥ 6॥

సంతతం చింతయేత్కంఠం భాస్వత్కౌస్తుభభాసకమ్ ।
వైకుంఠస్యాఖిలా వేదా ఉద్గీర్యంతేఽనిశం యతః ॥ 7॥

స్మరేత యామినీనాథ సహస్రామితకాంతిమత్ ।
భవతాపాపనోదీడ్యం శ్రీపతేః ముఖపంకజమ్ ॥ 8॥

పూర్ణానన్యసుఖోద్భాసిం అందస్మితమధీశితుః ।
గోవిందస్య సదా చింత్యం నిత్యానందపదప్రదమ్ ॥ 9॥

స్మరామి భవసంతాప హానిదామృతసాగరమ్ ।
పూర్ణానందస్య రామస్య సానురాగావలోకనమ్ ॥ 10॥

ధ్యాయేదజస్రమీశస్య పద్మజాదిప్రతీక్షితమ్ ।
భ్రూభంగం పారమేష్ఠ్యాది పదదాయి విముక్తిదమ్ ॥ 11॥

సంతతం చింతయేఽనంతం అంతకాలే । (అంత్యకాలే విశేషతః)
నైవోదాపుః గృణంతోఽంతం యద్గుణానాం అజాదయః ॥ 12॥

ఇతి శ్రీమదానందతీర్థభగవత్పాదాచార్య విరచితం
ద్వాదశస్తోత్రేషు ప్రథమస్తోత్రం సంపూర్ణం