నారాయణీయం దశక 84 – సమంతపంచకతీర్థయాత్రా – బంధుమిత్రాది సమాగమం

క్వచిదథ తపనోపరాగకాలే పురి నిదధత్ కృతవర్మకామసూనూ ।
యదుకులమహిలావృతః సుతీర్థం సముపగతోఽసి సమంతపంచకాఖ్యమ్ ॥1॥

బహుతరజనతాహితాయ తత్ర త్వమపి పునన్ వినిమజ్య తీర్థతోయమ్ ।
ద్విజగణపరిముక్తవిత్తరాశిః సమమిలథాః కురుపాండవాదిమిత్రైః ॥2॥

తవ ఖలు దయితాజనైః సమేతా ద్రుపదసుతా త్వయి గాఢభక్తిభారా ।
తదుదితభవదాహృతిప్రకారైః అతిముముదే సమమన్యభామినీభిః ॥3॥

తదను చ భగవన్ నిరీక్ష్య గోపానతికుతుకాదుపగమ్య మానయిత్వా।
చిరతరవిరహాతురాంగరేఖాః పశుపవధూః సరసం త్వమన్వయాసీః ॥4॥

సపది చ భవదీక్షణోత్సవేన ప్రముషితమానహృదాం నితంబినీనామ్ ।
అతిరసపరిముక్తకంచులీకే పరిచయహృద్యతరే కుచే న్యలైషీః ॥5॥

రిపుజనకలహైః పునః పునర్మే సముపగతైరియతీ విలంబనాఽభూత్ ।
ఇతి కృతపరిరంభణేత్వయి ద్రాక్ అతివివశా ఖలు రాధికా నిలిల్యే ॥6॥

అపగతవిరహవ్యథాస్తదా తా రహసి విధాయ దదాథ తత్త్వబోధమ్ ।
పరమసుఖచిదాత్మకోఽహమాత్మేత్యుదయతు వః స్ఫుటమేవ చేతసీతి ॥7॥

సుఖరసపరిమిశ్రితో వియోగః కిమపి పురాఽభవదుద్ధవోపదేశైః ।
సమభవదముతః పరం తు తాసాం పరమసుఖైక్యమయీ భవద్విచింతా ॥8॥

మునివరనివహైస్తవాథ పిత్రా దురితశమాయ శుభాని పృచ్ఛ్యమానైః ।
త్వయి సతి కిమిదం శుభాంతరైః రిత్యురుహసితైరపి యాజితస్తదాఽసౌ ॥9॥

సుమహతి యజనే వితాయమానే ప్రముదితమిత్రజనే సహైవ గోపాః ।
యదుజనమహితాస్త్రిమాసమాత్రం భవదనుషంగరసం పురేవ భేజు ః ॥10॥

వ్యపగమసమయే సమేత్య రాధాం దృఢముపగూహ్య నిరీక్ష్య వీతఖేదామ్ ।
ప్రముదితహృదయః పురం ప్రయాతః పవనపురేశ్వర పాహి మాం గదేభ్యః ॥11॥