నారాయణీయం దశక 72 – అక్రూరగోకులయాత్రా

కంసోఽథ నారదగిరా వ్రజవాసినం త్వా-
మాకర్ణ్య దీర్ణహృదయః స హి గాందినేయమ్ ।
ఆహూయ కార్ముకమఖచ్ఛలతో భవంత-
మానేతుమేనమహినోదహినాథశాయిన్ ॥1॥

అక్రూర ఏష భవదంఘ్రిపరశ్చిరాయ
త్వద్దర్శనాక్షమమనాః క్షితిపాలభీత్యా ।
తస్యాజ్ఞయైవ పునరీక్షితుముద్యతస్త్వా-
మానందభారమతిభూరితరం బభార ॥2॥

సోఽయం రథేన సుకృతీ భవతో నివాసం
గచ్ఛన్ మనోరథగణాంస్త్వయి ధార్యమాణాన్ ।
ఆస్వాదయన్ ముహురపాయభయేన దైవం
సంప్రార్థయన్ పథి న కించిదపి వ్యజానాత్ ॥3॥

ద్రక్ష్యామి వేదశతగీతగతిం పుమాంసం
స్ప్రక్ష్యామి కింస్విదపి నామ పరిష్వజేయమ్ ।
కిం వక్ష్యతే స ఖలు మాం క్వను వీక్షితః స్యా-
దిత్థం నినాయ స భవన్మయమేవ మార్గమ్ ॥4॥

భూయః క్రమాదభివిశన్ భవదంఘ్రిపూతం
వృందావనం హరవిరించసురాభివంద్యమ్ ।
ఆనందమగ్న ఇవ లగ్న ఇవ ప్రమోహే
కిం కిం దశాంతరమవాప న పంకజాక్ష ॥5॥

పశ్యన్నవందత భవద్విహృతిస్థలాని
పాంసుష్వవేష్టత భవచ్చరణాంకితేషు ।
కిం బ్రూమహే బహుజనా హి తదాపి జాతా
ఏవం తు భక్తితరలా విరలాః పరాత్మన్ ॥6॥

సాయం స గోపభవనాని భవచ్చరిత్ర-
గీతామృతప్రసృతకర్ణరసాయనాని ।
పశ్యన్ ప్రమోదసరితేవ కిలోహ్యమానో
గచ్ఛన్ భవద్భవనసన్నిధిమన్వయాసీత్ ॥7॥

తావద్దదర్శ పశుదోహవిలోకలోలం
భక్తోత్తమాగతిమివ ప్రతిపాలయంతమ్ ।
భూమన్ భవంతమయమగ్రజవంతమంత-
ర్బ్రహ్మానుభూతిరససింధుమివోద్వమంతమ్ ॥8॥

సాయంతనాప్లవవిశేషవివిక్తగాత్రౌ
ద్వౌ పీతనీలరుచిరాంబరలోభనీయౌ ।
నాతిప్రపంచధృతభూషణచారువేషౌ
మందస్మితార్ద్రవదనౌ స యువాం దదర్శ ॥9॥

దూరాద్రథాత్సమవరుహ్య నమంతమేన-
ముత్థాప్య భక్తకులమౌలిమథోపగూహన్ ।
హర్షాన్మితాక్షరగిరా కుశలానుయోగీ
పాణిం ప్రగృహ్య సబలోఽథ గృహం నినేథ ॥10॥

నందేన సాకమమితాదరమర్చయిత్వా
తం యాదవం తదుదితాం నిశమయ్య వార్తామ్ ।
గోపేషు భూపతినిదేశకథాం నివేద్య
నానాకథాభిరిహ తేన నిశామనైషీః ॥11॥

చంద్రాగృహే కిముత చంద్రభగాగృహే ను
రాధాగృహే ను భవనే కిము మైత్రవిందే ।
ధూర్తో విలంబత ఇతి ప్రమదాభిరుచ్చై-
రాశంకితో నిశి మరుత్పురనాథ పాయాః ॥12॥