నారాయణీయం దశక 65 – గోపికానాం భగవత్సామీప్యప్రాప్తిః

గోపీజనాయ కథితం నియమావసానే
మారోత్సవం త్వమథ సాధయితుం ప్రవృత్తః ।
సాంద్రేణ చాంద్రమహసా శిశిరీకృతాశే
ప్రాపూరయో మురలికాం యమునావనాంతే ॥1॥

సమ్మూర్ఛనాభిరుదితస్వరమండలాభిః
సమ్మూర్ఛయంతమఖిలం భువనాంతరాలమ్ ।
త్వద్వేణునాదముపకర్ణ్య విభో తరుణ్య-
స్తత్తాదృశం కమపి చిత్తవిమోహమాపుః ॥2॥

తా గేహకృత్యనిరతాస్తనయప్రసక్తాః
కాంతోపసేవనపరాశ్చ సరోరుహాక్ష్యః ।
సర్వం విసృజ్య మురలీరవమోహితాస్తే
కాంతారదేశమయి కాంతతనో సమేతాః ॥3॥

కాశ్చిన్నిజాంగపరిభూషణమాదధానా
వేణుప్రణాదముపకర్ణ్య కృతార్ధభూషాః ।
త్వామాగతా నను తథైవ విభూషితాభ్య-
స్తా ఏవ సంరురుచిరే తవ లోచనాయ ॥4॥

హారం నితంబభువి కాచన ధారయంతీ
కాంచీం చ కంఠభువి దేవ సమాగతా త్వామ్ ।
హారిత్వమాత్మజఘనస్య ముకుంద తుభ్యం
వ్యక్తం బభాష ఇవ ముగ్ధముఖీ విశేషాత్ ॥5॥

కాచిత్ కుచే పునరసజ్జితకంచులీకా
వ్యామోహతః పరవధూభిరలక్ష్యమాణా ।
త్వామాయయౌ నిరుపమప్రణయాతిభార-
రాజ్యాభిషేకవిధయే కలశీధరేవ ॥6॥

కాశ్చిత్ గృహాత్ కిల నిరేతుమపారయంత్య-
స్త్వామేవ దేవ హృదయే సుదృఢం విభావ్య ।
దేహం విధూయ పరచిత్సుఖరూపమేకం
త్వామావిశన్ పరమిమా నను ధన్యధన్యాః ॥7॥

జారాత్మనా న పరమాత్మతయా స్మరంత్యో
నార్యో గతాః పరమహంసగతిం క్షణేన ।
తం త్వాం ప్రకాశపరమాత్మతనుం కథంచి-
చ్చిత్తే వహన్నమృతమశ్రమమశ్నువీయ ॥8॥

అభ్యాగతాభిరభితో వ్రజసుందరీభి-
ర్ముగ్ధస్మితార్ద్రవదనః కరుణావలోకీ ।
నిస్సీమకాంతిజలధిస్త్వమవేక్ష్యమాణో
విశ్వైకహృద్య హర మే పవనేశ రోగాన్ ॥9॥