నారాయణీయం దశక 49 – వృందావనప్రవేశం

భవత్ప్రభావావిదురా హి గోపాస్తరుప్రపాతాదికమత్ర గోష్ఠే ।
అహేతుముత్పాతగణం విశంక్య ప్రయాతుమన్యత్ర మనో వితేనుః ॥1॥

తత్రోపనందాభిధగోపవర్యో జగౌ భవత్ప్రేరణయైవ నూనమ్ ।
ఇతః ప్రతీచ్యాం విపినం మనోజ్ఞం వృందావనం నామ విరాజతీతి ॥2॥

బృహద్వనం తత్ ఖలు నందముఖ్యా విధాయ గౌష్ఠీనమథ క్షణేన ।
త్వదన్వితత్వజ్జననీనివిష్టగరిష్ఠయానానుగతా విచేలుః ॥3॥

అనోమనోజ్ఞధ్వనిధేనుపాలీఖురప్రణాదాంతరతో వధూభిః ।
భవద్వినోదాలపితాక్షరాణి ప్రపీయ నాజ్ఞాయత మార్గదైర్ఘ్యమ్ ॥4॥

నిరీక్ష్య వృందావనమీశ నందత్ప్రసూనకుందప్రముఖద్రుమౌఘమ్ ।
అమోదథాః శాద్వలసాంద్రలక్ష్మ్యా హరిన్మణీకుట్టిమపుష్టశోభమ్ ॥5॥

నవాకనిర్వ్యూఢనివాసభేదేష్వశేషగోపేషు సుఖాసితేషు ।
వనశ్రియం గోపకిశోరపాలీవిమిశ్రితః పర్యగలోకథాస్త్వమ్ ॥6॥

అరాలమార్గాగతనిర్మలాపాం మరాలకూజాకృతనర్మలాపామ్ ।
నిరంతరస్మేరసరోజవక్త్రాం కలిందకన్యాం సమలోకయస్త్వమ్ ॥7॥

మయూరకేకాశతలోభనీయం మయూఖమాలాశబలం మణీనామ్ ।
విరించలోకస్పృశముచ్చశృంగైర్గిరిం చ గోవర్ధనమైక్షథాస్త్వమ్ ॥8॥

సమం తతో గోపకుమారకైస్త్వం సమంతతో యత్ర వనాంతమాగాః ।
తతస్తతస్తాం కుటిలామపశ్యః కలిందజాం రాగవతీమివైకామ్ ॥9॥

తథావిధేఽస్మిన్ విపినే పశవ్యే సముత్సుకో వత్సగణప్రచారే ।
చరన్ సరామోఽథ కుమారకైస్త్వం సమీరగేహాధిప పాహి రోగాత్ ॥10॥