నారాయణీయం దశక 27 – క్షీరాబ్ధిమథనం తథా కూర్మావతారం

దూర్వాసాస్సురవనితాప్తదివ్యమాల్యం
శక్రాయ స్వయముపదాయ తత్ర భూయః ।
నాగేంద్రప్రతిమృదితే శశాప శక్రం
కా క్షాంతిస్త్వదితరదేవతాంశజానామ్ ॥1॥

శాపేన ప్రథితజరేఽథ నిర్జరేంద్రే
దేవేష్వప్యసురజితేషు నిష్ప్రభేషు ।
శర్వాద్యాః కమలజమేత్య సర్వదేవా
నిర్వాణప్రభవ సమం భవంతమాపుః ॥2॥

బ్రహ్మాద్యైః స్తుతమహిమా చిరం తదానీం
ప్రాదుష్షన్ వరద పురః పరేణ ధామ్నా ।
హే దేవా దితిజకులైర్విధాయ సంధిం
పీయూషం పరిమథతేతి పర్యశాస్త్వమ్ ॥3॥

సంధానం కృతవతి దానవైః సురౌఘే
మంథానం నయతి మదేన మందరాద్రిమ్ ।
భ్రష్టేఽస్మిన్ బదరమివోద్వహన్ ఖగేంద్రే
సద్యస్త్వం వినిహితవాన్ పయఃపయోధౌ ॥4॥

ఆధాయ ద్రుతమథ వాసుకిం వరత్రాం
పాథోధౌ వినిహితసర్వబీజజాలే ।
ప్రారబ్ధే మథనవిధౌ సురాసురైస్తై-
ర్వ్యాజాత్త్వం భుజగముఖేఽకరోస్సురారీన్ ॥5॥

క్షుబ్ధాద్రౌ క్షుభితజలోదరే తదానీం
దుగ్ధాబ్ధౌ గురుతరభారతో నిమగ్నే ।
దేవేషు వ్యథితతమేషు తత్ప్రియైషీ
ప్రాణైషీః కమఠతనుం కఠోరపృష్ఠామ్ ॥6॥

వజ్రాతిస్థిరతరకర్పరేణ విష్ణో
విస్తారాత్పరిగతలక్షయోజనేన ।
అంభోధేః కుహరగతేన వర్ష్మణా త్వం
నిర్మగ్నం క్షితిధరనాథమున్నినేథ ॥7॥

ఉన్మగ్నే ఝటితి తదా ధరాధరేంద్రే
నిర్మేథుర్దృఢమిహ సమ్మదేన సర్వే ।
ఆవిశ్య ద్వితయగణేఽపి సర్పరాజే
వైవశ్యం పరిశమయన్నవీవృధస్తాన్ ॥8॥

ఉద్దామభ్రమణజవోన్నమద్గిరీంద్ర-
న్యస్తైకస్థిరతరహస్తపంకజం త్వామ్ ।
అభ్రాంతే విధిగిరిశాదయః ప్రమోదా-
దుద్భ్రాంతా నునువురుపాత్తపుష్పవర్షాః ॥9॥

దైత్యౌఘే భుజగముఖానిలేన తప్తే
తేనైవ త్రిదశకులేఽపి కించిదార్తే ।
కారుణ్యాత్తవ కిల దేవ వారివాహాః
ప్రావర్షన్నమరగణాన్న దైత్యసంఘాన్ ॥10॥

ఉద్భ్రామ్యద్బహుతిమినక్రచక్రవాలే
తత్రాబ్ధౌ చిరమథితేఽపి నిర్వికారే ।
ఏకస్త్వం కరయుగకృష్టసర్పరాజః
సంరాజన్ పవనపురేశ పాహి రోగాత్ ॥11॥