కుంతీ స్తుతిః (భాగవత పురాణ)

(శ్రీమద్భాగవత మహాపురాణే ప్రథమస్కంధే అష్టమాధ్యాయః)

కుంత్యువాచ ।

నమస్యే పురుషం త్వాద్యమీశ్వరం ప్రకృతేః పరమ్ ।
అలక్ష్యం సర్వభూతానామంతర్బహిరవస్థితమ్ ॥ 18 ॥

మాయాజవనికాచ్ఛన్నమజ్ఞాధోక్షజమవ్యయమ్ ।
న లక్ష్యసే మూఢదృశా నటో నాట్యధరో యథా ॥ 19 ॥

తథా పరమహంసానాం మునీనామమలాత్మనామ్ ।
భక్తియోగవిధానార్థం కథం పశ్యేమ హి స్త్రియః ॥ 20 ॥

కృష్ణాయ వాసుదేవాయ దేవకీనందనాయ చ ।
నందగోపకుమారాయ గోవిందాయ నమో నమః ॥ 21 ॥

నమః పంకజనాభాయ నమః పంకజమాలినే ।
నమః పంకజనేత్రాయ నమస్తే పంకజాంఘ్రయే ॥ 22 ॥

యథా హృషీకేశ ఖలేన దేవకీ కంసేన రుద్ధాతిచిరం శుచార్పితా ।
విమోచితాహం చ సహాత్మజా విభో త్వయైవ నాథేన ముహుర్విపద్గణాత్ ॥ 23 ॥

విషాన్మహాగ్నేః పురుషాదదర్శనాదసత్సభాయా వనవాసకృచ్ఛ్రతః ।
మృధే మృధేఽనేకమహాఱథాస్త్రతో ద్రౌణ్యస్త్రతశ్చాస్మ హరేఽభిరక్షితాః ॥ 24 ॥

విపదః సంతు తాః శశ్వత్తత్ర తత్ర జగద్గురో ।
భవతో దర్శనం యత్స్యాదపునర్భవదర్శనమ్ ॥ 25 ॥

జన్మైశ్వర్యశ్రుతశ్రీభిరేధమానమదః పుమాన్ ।
నైవార్హత్యభిధాతుం వై త్వామకించనగోచరమ్ ॥ 26 ॥

నమోఽకించనవిత్తాయ నివృత్తగుణవృత్తయే ।
ఆత్మారామాయ శాంతాయ కైవల్యపతయే నమః ॥ 27 ॥

మన్యే త్వాం కాలమీశానమనాదినిధనం విభుమ్ ।
సమం చరంతం సర్వత్ర భూతానాం యన్మిథః కలిః ॥ 28 ॥

న వేద కశ్చిద్భగవంశ్చికీర్షితం తవేహమానస్య నృణాం విడంబనమ్ ।
న యస్య కశ్చిద్దయితోఽస్తి కర్హిచిద్ద్వేష్యశ్చ యస్మిన్విషమా మతిర్నృణామ్ ॥ 29 ॥

జన్మ కర్మ చ విశ్వాత్మన్నజస్యాకర్తురాత్మనః ।
తిర్యంనృషిషు యాదఃసు తదత్యంతవిడంబనమ్ ॥ 30 ॥

గోప్యాదదే త్వయి కృతాగసి దామ తావద్యాతే దశాశ్రుకలిలాంజనసంభ్రమాక్షమ్ ।
వక్త్రం నినీయ భయభావనయా స్థితస్య సా మాం విమోహయతి భీరపి యద్బిభేతి ॥ 31 ॥

కేచిదాహురజం జాతం పుణ్యశ్లోకస్య కీర్తయే ।
యదోః ప్రియస్యాన్వవాయే మలయస్యేవ చందనమ్ ॥ 32 ॥

అపరే వసుదేవస్య దేవక్యాం యాచితోఽభ్యగాత్ ।
అజస్త్వమస్య క్షేమాయ వధాయ చ సురద్విషామ్ ॥ 33 ॥

భారావతారణాయాన్యే భువో నావ ఇవోదధౌ ।
సీదంత్యా భూరిభారేణ జాతో హ్యాత్మభువార్థితః ॥ 34 ॥

భవేస్మిన్క్లిశ్యమానానామవిద్యాకామకర్మభిః ।
శ్రవణస్మరణార్హాణి కరిష్యన్నితి కేచన ॥ 35 ॥

శృణ్వంతి గాయంతి గృణంత్యభీక్ష్ణశః స్మరంతి నందంతి తవేహితం జనాః ।
త ఏవ పశ్యంత్యచిరేణ తావకం భవప్రవాహోపరమం పదాంబుజమ్ ॥ 36 ॥

అప్యద్య నస్త్వం స్వకృతేహిత ప్రభో జిహాససి స్విత్సుహృదోఽనుజీవినః ।
యేషాం న చాన్యద్భవతః పదాంబుజాత్పరాయణం రాజసు యోజితాంహసామ్ ॥ 37 ॥

కే వయం నామరూపాభ్యాం యదుభిః సహ పాండవాః ।
భవతోఽదర్శనం యర్హి హృషీకాణామివేశితుః ॥ 38 ॥

నేయం శోభిష్యతే తత్ర యథేదానీం గదాధర ।
త్వత్పదైరంకితా భాతి స్వలక్షణవిలక్షితైః ॥ 39 ॥

ఇమే జనపదాః స్వృద్ధాః సుపక్వౌషధివీరుధః ।
వనాద్రినద్యుదన్వంతో హ్యేధంతే తవ వీక్షితైః ॥ 40 ॥

అథ విశ్వేశ విశ్వాత్మన్విశ్వమూర్తే స్వకేషు మే ।
స్నేహపాశమిమం ఛింధి దృఢం పాండుషు వృష్ణిషు ॥ 41 ॥

త్వయి మేఽనన్యవిషయా మతిర్మధుపతేఽసకృత్ ।
రతిముద్వహతాదద్ధా గంగేవౌఘముదన్వతి ॥ 42 ॥

శ్రీకృష్ణ కృష్ణసఖ వృష్ణ్యృషభావనిద్రుగ్రాజన్యవంశదహనానపవర్గవీర్య ।
గోవింద గోద్విజసురార్తిహరావతార యోగేశ్వరాఖిలగురో భగవన్నమస్తే ॥ 43 ॥

॥ ఇతి శ్రీమద్భాగవతే మహాపురాణే పారమహంస్యాం సంహితాయాం ప్రథమస్కంధే అష్టమేఽధ్యాయే శ్రీకుంతీకృతకృష్ణస్తుతిః సంపూర్ణా ॥