కృష్ణ స్తుతిః (బ్రహ్మ కృతా భాగవత పురాణ)

బ్రహ్మోవాచ ।
నౌమీడ్య తేఽభ్రవపుషే తడిదంబరాయ
గుంజావతంసపరిపిచ్ఛలసన్ముఖాయ ।
వన్యస్రజే కవలవేత్రవిషాణవేణు-
లక్ష్మశ్రియే మృదుపదే పశుపాంగజాయ ॥ 1 ॥
అస్యాపి దేవ వపుషో మదనుగ్రహస్య
స్వేచ్ఛామయస్య న తు భూతమయస్య కోఽపి ।
నేశేమహి త్వవసితుం మనసాంతరేణ
సాక్షాత్తవైవ కిముతాత్మసుఖానుభూతేః ॥ 2 ॥
జ్ఞానే ప్రయాసముదపాస్య నమంత ఏవ
జీవంతి సన్ముఖరితాం భవదీయవార్తామ్ ।
స్థానే స్థితాః శ్రుతిగతాం తనువాంమనోభిః
యే ప్రాయశోఽజిత జితోఽప్యసి తైస్త్రిలోక్యామ్ ॥ 3 ॥
శ్రేయఃస్రుతిం భక్తిముదస్య తే విభో క్లిశ్యంతి యే కేవలబోధలబ్ధయే ।
తేషామసౌ క్లేశల ఏవ శిష్యతే నాన్యద్యథా స్థూలతుషావఘాతినామ్ ॥ 4 ॥
పురేహ భూమన్ బహవోఽపి యోగినస్త్వదర్పితేహా నిజకర్మలబ్ధయా ।
విబుధ్య భక్త్యైవ కథోపనీతయా ప్రపేదిరేఽంజోఽచ్యుత తే గతిం పరామ్ ॥ 5 ॥
తథాపి భూమన్ మహిమాఽగుణస్య తే విబోద్ధుమర్హత్యమలాంతరాత్మభిః ।
అవిక్రియాత్స్వానుభవాదరూపతో హ్యనన్యబోధ్యాత్మతయా న చాన్యథా ॥ 6 ॥
గుణాత్మనస్తేఽపి గుణాన్ విమాతుం హితావతీర్ణస్య క ఈశిరేఽస్య ।
కాలేన యైర్వా విమితాః సుకల్పైర్భూపాంసవః ఖే మిహికా ద్యుభాసః ॥ 7 ॥
తత్తేఽనుకంపాం సుసమీక్షమాణో భుంజాన ఏవాత్మకృతం విపాకమ్ ।
హృద్వాగ్వపుర్భిర్విదధన్నమస్తే జీవేత యో ముక్తిపదే స దాయభాక్ ॥ 8 ॥
పశ్యేశ మేఽనార్యమనంత ఆద్యే పరాత్మని త్వయ్యపి మాయిమాయిని ।
మాయాం వితత్యేక్షితుమాత్మవైభవం హ్యహం కియానైచ్ఛమివార్చిరగ్నౌ ॥ 9 ॥
అతః క్షమస్వాచ్యుత మే రజోభువో హ్యజానతస్త్వత్పృథగీశమానినః ।
అజావలేపాంధతమోఽంధచక్షుష ఏషోఽనుకంప్యో మయి నాథవానితి ॥ 10 ॥
క్వాహం తమోమహదహంఖచరాగ్నివార్భూసంవేష్టితాండఘటసప్తవితస్తకాయః ।
క్వేదృగ్విధావిగణితాండపరాణుచర్యావాతాధ్వరోమవివరస్య చ తే మహిత్వమ్ ॥ 11 ॥
ఉత్క్షేపణం గర్భగతస్య పాదయోః కిం కల్పతే మాతురధోఽక్షజాగసే ।
కిమస్తి నాస్తివ్యపదేశభూషితం తవాస్తి కుక్షేః కియదప్యనంతః ॥ 12 ॥
జగత్త్రయాంతోదధిసంప్లవోదే నారాయణస్యోదరనాభినాలాత్ ।
వినిర్గతోఽజస్త్వితి వాంన వై మృషా కిం త్వీశ్వరత్వాన్న వినిర్గతోఽస్మి . ।
నారాయణస్త్వం న హి సర్వదేహినామాత్మాస్యధీశాఖిలలోకసాక్షీ ।
నారాయణోఽంగం నరభూజలాయనాత్తచ్చాపి సత్యం న తవైవ మాయా ॥ 14 ॥
తచ్చేజ్జలస్థం తవ సజ్జగద్వపుః కిం మే న దృష్టం భగవంస్తదైవ ।
కిం వా సుదృష్టం హృది మే తదైవ కిం నో సపద్యేవ పునర్వ్యదర్శి ॥ 15 ॥
అత్రైవ మాయాదమనావతారే హ్యస్య ప్రపంచస్య బహిః స్ఫుటస్య ।
కృత్స్నస్య చాంతర్జఠరే జనన్యా మాయాత్వమేవ ప్రకటీకృతం తే ॥ 16 ॥
యస్య కుక్షావిదం సర్వం సాత్మం భాతి యథా తథా ।
తత్త్వయ్యపీహ తత్సర్వం కిమిదం మాయయా వినా ॥ 17 ॥
అద్యైవ త్వదృతేఽస్య కిం మమ న తే మాయాత్వమాదర్శితం
ఏకోఽసి ప్రథమం తతో వ్రజసుహృద్వత్సాః సమస్తా అపి ।
తావంతోఽసి చతుర్భుజాస్తదఖిలైః సాకం మయోపాసితా-
స్తావంత్యేవ జగంత్యభూస్తదమితం బ్రహ్మాద్వయం శిష్యతే ॥ 18 ॥
అజానతాం త్వత్పదవీమనాత్మన్యాత్మాఽత్మనా భాసి వితత్య మాయామ్ ।
సృష్టావివాహం జగతో విధాన ఇవ త్వమేషోఽంత ఇవ త్రినేత్రః ॥ 19 ॥
సురేష్వృషిష్వీశ తథైవ నృష్వపి తిర్యక్షు యాదఃస్వపి తేఽజనస్య ।
జన్మాసతాం దుర్మదనిగ్రహాయ ప్రభో విధాతః సదనుగ్రహాయ చ ॥ 20 ॥
కో వేత్తి భూమన్ భగవన్ పరాత్మన్ యోగేశ్వరోతీర్భవతస్త్రిలోక్యామ్ ।
క్వ వా కథం వా కతి వా కదేతి విస్తారయన్ క్రీడసి యోగమాయామ్ ॥ 21 ॥
తస్మాదిదం జగదశేషమసత్స్వరూపం స్వప్నాభమస్తధిషణం పురుదుఃఖదుఃఖమ్ ।
త్వయ్యేవ నిత్యసుఖబోధతనావనంతే మాయాత ఉద్యదపి యత్సదివావభాతి ॥ 22 ॥
ఏకస్త్వమాత్మా పురుషః పురాణః సత్యః స్వయంజ్యోతిరనంత ఆద్యః ।
నిత్యోఽక్షరోఽజస్రసుఖో నిరంజనః పూర్ణోఽద్వయో ముక్త ఉపాధితోఽమృతః ॥ 23 ॥
ఏవంవిధం త్వాం సకలాత్మనామపి స్వాత్మానమాత్మాఽత్మతయా విచక్షతే ।
గుర్వర్కలబ్ధోపనిషత్సుచక్షుషా యే తే తరంతీవ భవానృతాంబుధిమ్ ॥ 24 ॥
ఆత్మానమేవాత్మతయాఽవిజానతాం తేనైవ జాతం నిఖిలం ప్రపంచితమ్ ।
జ్ఞానేన భూయోఽపి చ తత్ప్రలీయతే రజ్జ్వామహేర్భోగభవాభవౌ యథా ॥ 25 ॥
అజ్ఞానసంజ్ఞౌ భవబంధమోక్షౌ ద్వౌ నామ నాన్యౌ స్త ఋతజ్ఞభావాత్ ।
అజస్రచిత్యాఽత్మని కేవలే పరే విచార్యమాణే తరణావివాహనీ ॥ 26 ॥
త్వామాత్మానం పరం మత్వా పరమాత్మానమేవ చ ।
ఆత్మా పునర్బహిర్మృగ్య అహోఽజ్ఞజనతాఽజ్ఞతా ॥ 27 ॥
అంతర్భవేఽనంత భవంతమేవ హ్యతత్త్యజంతో మృగయంతి సంతః ।
అసంతమప్యంత్యహిమంతరేణ సంతం గుణం తం కిము యంతి సంతః ॥ 28 ॥
అథాపి తే దేవ పదాంబుజద్వయప్రసాదలేశానుగృహీత ఏవ హి ।
జానాతి తత్త్వం భగవన్ మహిమ్నో న చాన్య ఏకోఽపి చిరం విచిన్వన్ ॥ 29 ॥
తదస్తు మే నాథ స భూరిభాగో భవేఽత్ర వాన్యత్ర తు వా తిరశ్చామ్ ।
యేనాహమేకోఽపి భవజ్జనానాం భూత్వా నిషేవే తవ పాదపల్లవమ్ ॥ 30 ॥
అహోఽతిధన్యా వ్రజగోరమణ్యః స్తన్యామృతం పీతమతీవ తే ముదా ।
యాసాం విభో వత్సతరాత్మజాత్మనా యత్తృప్తయేఽద్యాపి న చాలమధ్వరాః ॥ 31 ॥
అహో భాగ్యమహో భాగ్యం నందగోపవ్రజౌకసామ్ ।
యన్మిత్రం పరమానందం పూర్ణం బ్రహ్మ సనాతనమ్ ॥ 32 ॥
ఏషాం తు భాగ్యమహిమాఽచ్యుత తావదాస్తా-
మేకాదశైవ హి వయం బత భూరిభాగాః ।
ఏతద్ధృషీకచషకైరసకృత్పిబామః
శర్వాదయోఽంఘ్ర్యుదజమధ్వమృతాసవం తే ॥ 33 ॥
తద్భూరిభాగ్యమిహ జన్మ కిమప్యటవ్యాం
యద్గోకులేఽపి కతమాంఘ్రిరజోఽభిషేకమ్ ।
యజ్జీవితం తు నిఖిలం భగవాన్ ముకుంద-
స్త్వద్యాపి యత్పదరజః శ్రుతిమృగ్యమేవ ॥ 34 ॥
ఏషాం ఘోషనివాసినాముత భవాన్ కిం దేవ రాతేతి నః
చేతో విశ్వఫలాత్ఫలం త్వదపరం కుత్రాప్యయన్ ముహ్యతి ।
సద్వేషాదివ పూతనాఽపి సకులా త్వామేవ దేవాపితా
యద్ధామార్థసుహృత్ప్రియాత్మతనయప్రాణాశయాస్త్వత్కృతే ॥ 35 ॥
తావద్రాగాదయః స్తేనాస్తావత్కారాగృహం గృహమ్ ।
తావన్మోహోఽంఘ్రినిగడో యావత్కృష్ణ న తే జనాః ॥ 36 ॥
ప్రపంచం నిష్ప్రపంచోఽపి విడంబయసి భూతలే ।
ప్రపన్నజనతానందసందోహం ప్రథితుం ప్రభో ॥ 37 ॥
జానంత ఏవ జానంతు కిం బహూక్త్యా న మే ప్రభో ।
మనసో వపుషో వాచో వైభవం తవ గోచరః ॥ 38 ॥
అనుజానీహి మాం కృష్ణ సర్వం త్వం వేత్సి సర్వదృక్ ।
త్వమేవ జగతాం నాథో జగదేతత్తవార్పితమ్ ॥ 39 ॥
శ్రీకృష్ణ వృష్ణికులపుష్కరజోషదాయిన్
క్ష్మానిర్జరద్విజపశూదధివృద్ధికారిన్ ।
ఉద్ధర్మశార్వరహర క్షితిరాక్షసధ్రుగ్
ఆకల్పమార్కమర్హన్ భగవన్ నమస్తే ॥ 40 ॥

ఇతి శ్రీమద్భాగవతమహాపురాణే దశమస్కంధే పూర్వార్ధే
చతుర్దశాధ్యాయాంతర్గతం బ్రహ్మకృతం శ్రీకృష్ణస్తుతిః సమాప్తా ।

భాగవతపురాణ . అధ్యాయ 10/14/1-40 . ।