గీతగోవిందం అష్టమః సర్గః – విలక్ష్య లక్ష్మీపతిః

॥ అష్టమః సర్గః ॥
॥ విలక్ష్యలక్ష్మీపతిః ॥

అథ కథమపి యామినీం వినీయ స్మరశరజర్జరితాపి సా ప్రభాతే ।
అనునయవచనం వదంతమగ్రే ప్రణతమపి ప్రియమాహ సాభ్యసూయమ్ ॥ 49 ॥

॥ గీతం 17 ॥

రజనిజనితగురుజాగరరాగకషాయితమలసనివేశమ్ ।
వహతి నయనమనురాగమివ స్ఫుటముదితరసాభినివేశమ్ ॥
హరిహరి యాహి మాధవ యాహి కేశవ మా వద కైతవవాదం తామనుసర సరసీరుహలోచన యా తవ హరతి విషాదమ్ ॥ 50 ॥

కజ్జలమలినవిలోచనచుంబనవిరచితనీలిమరూపమ్ ।
దశనవసనమరుణం తవ కృష్ణ తనోతి తనోరనురూపమ్ ॥ 2 ॥

వపురనుహరతి తవ స్మరసంగరఖరనఖరక్షతరేఖమ్ ।
మరకతశకలకలితకలధౌతలిపిరేవ రతిజయలేఖమ్ ॥ 3 ॥

చరణకమలగలదలక్తకసిక్తమిదం తవ హృదయముదారమ్ ।
దర్శయతీవ బహిర్మదనద్రుమనవకిసలయపరివారమ్ ॥ 4 ॥

దశనపదం భవదధరగతం మమ జనయతి చేతసి ఖేదమ్ ।
కథయతి కథమధునాపి మయా సహ తవ వపురేతదభేదమ్ ॥ 5 ॥

బహిరివ మలినతరం తవ కృష్ణ మనోఽపి భవిష్యతి నూనమ్ ।
కథమథ వంచయసే జనమనుగతమసమశరజ్వరదూనమ్ ॥ 6 ॥

భ్రమతి భవానబలాకవలాయ వనేషు కిమత్ర విచిత్రమ్ ।
ప్రథయతి పూతనికైవ వధూవధనిర్దయబాలచరిత్రమ్ ॥ 7 ॥

శ్రీజయదేవభణితరతివంచితఖండితయువతివిలాపమ్ ।
శృణుత సుధామధురం విబుధా విబుధాలయతోఽపి దురాపమ్ ॥ 8 ॥

తదేవం పశ్యంత్యాః ప్రసరదనురాగం బహిరివ ప్రియాపాదాలక్తచ్ఛురితమరుణచ్ఛాయహృదయమ్ ।
మమాద్య ప్రఖ్యాతప్రణయభరభంగేన కితవ త్వదాలోకః శోకాదపి కిమపి లజ్జాం జనయతి ॥ 50 ॥

॥ ఇతి గీతగోవిందే ఖండితావర్ణనే విలక్ష్యలక్ష్మీపతిర్నామ అష్ఠమః సర్గః ॥