ஶ்ரீ ஷோட³ஶீ (த்ரிபுர ஸுந்த³ரீ) அஷ்டோத்தர ஶத நாமா ஸ்தோத்ரம்

ப்⁴ருகு³ருவாச
சதுர்வக்த்ர ஜக³ன்னாத² ஸ்தோத்ரம் வத³ மயி ப்ரபோ⁴ ।
யஸ்யானுஷ்டா²னமாத்ரேண நரோ ப⁴க்திமவாப்னுயாத் ॥ 1 ॥

ப்³ரஹ்மோவாச
ஸஹஸ்ரனாம்னாமாக்ருஷ்ய நாம்னாமஷ்டோத்தரம் ஶதம் ।
கு³ஹ்யாத்³கு³ஹ்யதரம் கு³ஹ்யம் ஸுந்த³ர்யா: பரிகீர்திதம் ॥ 2 ॥

அஸ்ய ஶ்ரீஷோட³ஶ்யஷ்டோத்தரஶதனாமஸ்தோத்ரஸ்ய ஶம்பு⁴ர்ருஷி: அனுஷ்டுப் ச²ந்த:³ ஶ்ரீஷோட³ஶீ தே³வதா த⁴ர்மார்த²காமமோக்ஷஸித்³த்⁴யர்தே² ஜபே வினியோக:³ ।

த்ரிபுரா ஷோட³ஶீ மாதா த்ர்யக்ஷரா த்ரிதயா த்ரயீ ।
ஸுந்த³ரீ ஸுமுகீ² ஸேவ்யா ஸாமவேத³பராயணா ॥ 3 ॥

ஶாரதா³ ஶப்³த³னிலயா ஸாக³ரா ஸரித³ம்ப³ரா ।
ஶுத்³தா⁴ ஶுத்³த⁴தனு: ஸாத்⁴வீ ஶிவத்⁴யானபராயணா ॥ 4 ॥

ஸ்வாமினீ ஶம்பு⁴வனிதா ஶாம்ப⁴வீ ச ஸரஸ்வதீ ।
ஸமுத்³ரமதி²னீ ஶீக்⁴ரகா³மினீ ஶீக்⁴ரஸித்³தி⁴தா³ ॥ 5 ॥

ஸாது⁴ஸேவ்யா ஸாது⁴க³ம்யா ஸாது⁴ஸந்துஷ்டமானஸா ।
க²ட்வாங்க³தா⁴ரிணீ க²ர்வா க²ட்³க³க²ர்பரதா⁴ரிணீ ॥ 6 ॥

ஷட்³வர்க³பா⁴வரஹிதா ஷட்³வர்க³பரிசாரிகா ।
ஷட்³வர்கா³ ச ஷட³ங்கா³ ச ஷோடா⁴ ஷோட³ஶவார்ஷிகீ ॥ 7 ॥

க்ரதுரூபா க்ரதுமதீ ருபு⁴க்ஷக்ரதுமண்டி³தா ।
கவர்கா³தி³பவர்கா³ந்தா அந்தஸ்தா²னந்தரூபிணீ ॥ 8 ॥

அகாராகாரரஹிதா காலம்ருத்யுஜராபஹா ।
தன்வீ தத்த்வேஶ்வரீ தாரா த்ரிவர்ஷா ஜ்ஞானரூபிணீ ॥ 9 ॥

காலீ கராலீ காமேஶீ சா²யா ஸஞ்ஜ்ஞாப்யருந்த⁴தீ ।
நிர்விகல்பா மஹாவேகா³ மஹோத்ஸாஹா மஹோத³ரீ ॥ 1௦ ॥

மேகா⁴ ப³லாகா விமலா விமலஜ்ஞானதா³யினீ ।
கௌ³ரீ வஸுந்த⁴ரா கோ³ப்த்ரீ க³வாம் பதினிஷேவிதா ॥ 11 ॥

ப⁴கா³ங்கா³ ப⁴க³ரூபா ச ப⁴க்திபா⁴வபராயணா ।
சி²ன்னமஸ்தா மஹாதூ⁴மா ததா² தூ⁴ம்ரவிபூ⁴ஷணா ॥ 12 ॥

த⁴ர்மகர்மாதி³ரஹிதா த⁴ர்மகர்மபராயணா ।
ஸீதா மாதங்கி³னீ மேதா⁴ மது⁴தை³த்யவினாஶினீ ॥ 13 ॥

பை⁴ரவீ பு⁴வனா மாதாப⁴யதா³ ப⁴வஸுந்த³ரீ ।
பா⁴வுகா ப³க³லா க்ருத்யா பா³லா த்ரிபுரஸுந்த³ரீ ॥ 14 ॥

ரோஹிணீ ரேவதீ ரம்யா ரம்பா⁴ ராவணவந்தி³தா ।
ஶதயஜ்ஞமயீ ஸத்த்வா ஶதக்ரதுவரப்ரதா³ ॥ 15 ॥

ஶதசந்த்³ரானனா தே³வீ ஸஹஸ்ராதி³த்யஸன்னிபா⁴ ।
ஸோமஸூர்யாக்³னினயனா வ்யாக்⁴ரசர்மாம்ப³ராவ்ருதா ॥ 16 ॥

அர்தே⁴ந்து³தா⁴ரிணீ மத்தா மதி³ரா மதி³ரேக்ஷணா ।
இதி தே கதி²தம் கோ³ப்யம் நாம்னாமஷ்டோத்தரம் ஶதம் ॥ 17 ॥

ஸுந்த³ர்யா: ஸர்வத³ம் ஸேவ்யம் மஹாபாதகனாஶனம் ।
கோ³பனீயம் கோ³பனீயம் கோ³பனீயம் கலௌ யுகே³ ॥ 18 ॥

ஸஹஸ்ரனாமபாட²ஸ்ய ப²லம் யத்³வை ப்ரகீர்திதம் ।
தஸ்மாத்கோடிகு³ணம் புண்யம் ஸ்தவஸ்யாஸ்ய ப்ரகீர்தனாத் ॥ 19 ॥

படே²த்ஸதா³ ப⁴க்தியுதோ நரோ யோ
நிஶீத²காலேப்யருணோத³யே வா ।
ப்ரதோ³ஷகாலே நவமீதி³னேத²வா
லபே⁴த போ⁴கா³ன்பரமாத்³பு⁴தான்ப்ரியான் ॥ 2௦ ॥

இதி ப்³ரஹ்மயாமலே பூர்வக²ண்டே³ ஷோட³ஶ்யஷ்டோத்தரஶதனாம ஸ்தோத்ரம் ।