ஶ்ரீ மனஸா தே³வீ ஸ்தோத்ரம் (மஹேந்த்³ர க்ருதம்)

தே³வி த்வாம் ஸ்தோதுமிச்சா²மி ஸாத்⁴வீனாம் ப்ரவராம் பராம் ।
பராத்பராம் ச பரமாம் ந ஹி ஸ்தோதும் க்ஷமோது⁴னா ॥ 1 ॥

ஸ்தோத்ராணாம் லக்ஷணம் வேதே³ ஸ்வபா⁴வாக்²யானத: பரம் ।
ந க்ஷம: ப்ரக்ருதிம் வக்தும் கு³ணானாம் தவ ஸுவ்ரதே ॥ 2 ॥

ஶுத்³த⁴ஸத்த்வஸ்வரூபா த்வம் கோபஹிம்ஸாவிவர்ஜிதா ।
ந ச ஶப்தோ முனிஸ்தேன த்யக்தயா ச த்வயா யத: ॥ 3 ॥

த்வம் மயா பூஜிதா ஸாத்⁴வீ ஜனனீ ச யதா²தி³தி: ।
த³யாரூபா ச ப⁴கி³னீ க்ஷமாரூபா யதா² ப்ரஸூ: ॥ 4 ॥

த்வயா மே ரக்ஷிதா: ப்ராணா புத்ரதா³ரா: ஸுரேஶ்வரி ।
அஹம் கரோமி த்வாம் பூஜ்யாம் மம ப்ரீதிஶ்ச வர்த⁴தே ॥ 5 ॥

நித்யம் யத்³யபி பூஜ்யா த்வம் ப⁴வேத்ர ஜக³த³ம்பி³கே ।
ததா²பி தவ பூஜாம் வை வர்த⁴யாமி புன: புன: ॥ 6 ॥

யே த்வாமாஷாட⁴ஸங்க்ராந்த்யாம் பூஜயிஷ்யந்தி ப⁴க்தித: ।
பஞ்சம்யாம் மனஸாக்²யாயாம் மாஸாந்தே வா தி³னே தி³னே ॥ 7 ॥

புத்ரபௌத்ராத³யஸ்தேஷாம் வர்த⁴ந்தே ச த⁴னானி ச ।
யஶஸ்வின: கீர்திமந்தோ வித்³யாவந்தோ கு³ணான்விதா: ॥ 8 ॥

யே த்வாம் ந பூஜயிஷ்யந்தி நிந்த³ந்த்யஜ்ஞானதோ ஜனா: ।
லக்ஷ்மீஹீனா ப⁴விஷ்யந்தி தேஷாம் நாக³ப⁴யம் ஸதா³ ॥ 9 ॥

த்வம் ஸ்வர்க³லக்ஷ்மீ: ஸ்வர்கே³ ச வைகுண்டே² கமலாகலா ।
நாராயணாம்ஶோ ப⁴க³வான் ஜரத்காருர்முனீஶ்வர: ॥ 1௦ ॥

தபஸா தேஜஸா த்வாம் ச மனஸா ஸஸ்ருஜே பிதா ।
அஸ்மாகம் ரக்ஷணாயைவ தேன த்வம் மனஸாபி⁴தா⁴ ॥ 11 ॥

மனஸா தே³வி து ஶக்தா சாத்மனா ஸித்³த⁴யோகி³னீ ।
தேன த்வம் மனஸாதே³வீ பூஜிதா வந்தி³தா ப⁴வே ॥ 12 ॥

யாம் ப⁴க்த்யா மனஸா தே³வா: பூஜயந்த்யனிஶம் ப்⁴ருஶம் ।
தேன த்வாம் மனஸாதே³வீம் ப்ரவத³ந்தி புராவித:³ ॥ 13 ॥

ஸத்த்வரூபா ச தே³வீ த்வம் ஶஶ்வத்ஸத்த்வனிஷேவயா ।
யோ ஹி யத்³பா⁴வயேன்னித்யம் ஶதம் ப்ராப்னோதி தத்ஸமம் ॥ 14 ॥

இத³ம் ஸ்தோத்ரம் புண்யபீ³ஜம் தாம் ஸம்பூஜ்ய ச ய: படே²த் ।
தஸ்ய நாக³ப⁴யம் நாஸ்தி தஸ்ய வம்ஶோத்³ப⁴வஸ்ய ச ॥ 15 ॥

விஷம் ப⁴வேத்ஸுதா⁴துல்யம் ஸித்³த⁴ஸ்தோத்ரம் யதா³ படே²த் ।
பஞ்சலக்ஷஜபேனைவ ஸித்³த⁴ஸ்தோத்ரோ ப⁴வேன்னர: ।
ஸர்பஶாயீ ப⁴வேத்ஸோபி நிஶ்சிதம் ஸர்பவாஹன: ॥ 16 ॥

இதி ஶ்ரீப்³ரஹ்மவைவர்தே மஹாபுராணே ப்ரக்ருதிக²ண்டே³ ஷட்சத்வாரிம்ஶோத்⁴யாயே மஹேந்த்³ர க்ருத ஶ்ரீ மனஸாதே³வீ ஸ்தோத்ரம் ॥

ஆஸ்தீகமுனி மந்த்ர:
ஸர்பாபஸர்ப ப⁴த்³ரம் தே க³ச்ச² ஸர்ப மஹாவிஷ ।
ஜனமேஜயஸ்ய யஜ்ஞாந்தே ஆஸ்தீகவசனம் ஸ்மர ॥