ப்ரஶ்னோபனிஷத்³ – ப்ரத²ம: ப்ரஶ்ன:

ப்ரத²ம: ப்ரஶ்ன:

ஓம் நம: பரமாத்மனே । ஹரி: ஓம் ॥

ஸுகேஶா ச பா⁴ரத்³வாஜ: ஶைப்³யஶ்ச ஸத்யகாம: ஸௌர்யாயணீ ச கா³ர்க்³ய: கௌஸல்யஶ்சாஶ்வலாயனோ பா⁴ர்க³வோ வைத³ர்பி⁴: கப³ந்தீ⁴ காத்யாயனஸ்தே ஹைதே ப்³ரஹ்மபரா ப்³ரஹ்மனிஷ்டா²: பரம் ப்³ரஹ்மான்வேஷமாணா: ஏஷ ஹ வை தத்ஸர்வம் வக்ஷ்யதீதி தே ஹ ஸமித்பாணயோ ப⁴க³வந்தம் பிப்பலாத³முபஸன்னா: ॥1॥

தான் ஹ ஸ ருஷிருவாச பூ⁴ய ஏவ தபஸா ப்³ரஹ்மசர்யேண ஶ்ரத்³த⁴யா ஸம்வத்ஸரம் ஸம்வத்ஸ்யத² யதா²காமம் ப்ரஶ்னான் ப்ருச்ச²த யதி³ விஜ்ஞாஸ்யாம: ஸர்வம் ஹ வோ வக்ஷாம இதி ॥2॥

அத² கப³ந்தீ⁴ காத்யாயன உபேத்ய பப்ரச்ச² ப⁴க³வன் குதோ ஹ வா இமா: ப்ரஜா: ப்ரஜாயந்த இதி ॥3॥

தஸ்மை ஸ ஹோவாச-
ப்ரஜாகாமோ வை ப்ரஜாபதி: ஸ தபோதப்யத ஸ தபஸ்தப்த்வா ஸ மிது²னமுத்பாத³யதே।
ரயிம் ச ப்ராணஞ்சேதி ஏதௌ மே ப³ஹுதா⁴ ப்ரஜா: கரிஷ்யத இதி ॥4॥

ஆதி³த்யோ ஹ வை ப்ராணோ ரயிரேவ சந்த்³ரமா: ரயிர்வா ஏதத் ஸர்வம் யன்மூர்தம் சாமூர்தம் ச தஸ்மான்மூர்திரேவ ரயி: ॥5॥

அதா²தி³த்ய உத³யன் யத் ப்ராசீம் தி³ஶம் ப்ரவிஶதி தேன ப்ராச்யான் ப்ராணான் ரஶ்மிஷு ஸன்னித⁴த்தே।
யத்³த³க்ஷிணாம் யத் ப்ரதீசீம் யது³தீ³சீம் யத³தோ⁴ யதூ³ர்த்⁴வம் யத³ந்தரா தி³ஶோ யத்ஸர்வம் ப்ரகாஶயதி தேன ஸர்வான் ப்ராணான் ரஶ்மிஷு ஸன்னித⁴த்தே ॥6॥

ஸ ஏஷ வைஶ்வானரோ விஶ்வரூப: ப்ராணோக்³னிருத³யதே।
ததே³தத்³ ருசாப்⁴யுக்தம் ॥7॥

விஶ்வரூபம் ஹரிணம் ஜாதவேத³ஸம் பராயணம் ஜ்யோதிரேகம் தபந்தம்।
ஸஹஸ்ரரஶ்மி: ஶததா⁴ வர்தமான: ப்ராண: ப்ரஜானாமுத³யத்யேஷ ஸூர்ய: ॥8॥

ஸம்வத்ஸரோ வை ப்ரஜாபதி: தஸ்யாயனே த³க்ஷிணஞ்சோத்தரம் ச।
தத்³யே ஹ வை ததி³ஷ்டாபூர்தே க்ருதமித்யுபாஸதே தே சாந்த்³ரமஸமேவ லோகமபி⁴ஜயந்தே த ஏவ புனராவர்தந்தே।
தஸ்மாதே³த ருஷய: ப்ரஜாகாமா த³க்ஷிணம் ப்ரதிபத்³யந்தே। ஏஷ ஹ வை ரயிர்ய: பித்ருயாண: ॥9॥

அதோ²த்தரேண தபஸா ப்³ரஹ்மசர்யேண ஶ்ரத்³த⁴யா வித்³யயாத்மானமன்விஷ்யாதி³த்யமபி⁴ஜயந்தே।
ஏதத்³வை ப்ராணானாமாயதனமேதத³ம்ருதமப⁴யமேதத் பராயணமேதஸ்மான்ன புனராவர்தந்த இத்யேஷ நிரோத:⁴। ததே³ஷ ஶ்லோக: ॥1௦॥

பஞ்சபாத³ம் பிதரம் த்³வாத³ஶாக்ருதிம் தி³வ ஆஹு: பரே அர்தே⁴ புரீஷிணம்।
அதே²மே அன்ய உ பரே விசக்ஷணம் ஸப்தசக்ரே ஷட³ர ஆஹுரர்பிதமிதி ॥11॥

மாஸோ வை ப்ரஜாபதிஸ்தஸ்ய க்ருஷ்ணபக்ஶ ஏவ ரயி: ஶுக்ல: ப்ராணஸ்தஸ்மாதே³த ருஷய: ஶுக்ல இஷ்டம் குர்வந்தீதர இதரஸ்மின்ன் ॥12॥

அஹோராத்ரோ வை ப்ரஜாபதிஸ்தஸ்யாஹரேவ ப்ராணோ ராத்ரிரேவ ரயி:।
ப்ராணம் வா ஏதே ப்ரஸ்கந்த³ந்தி யே தி³வா ரத்யா ஸம்யுஜ்யந்தே ப்³ரஹ்மசர்யமேவ தத்³யத்³ராத்ரௌ ரத்யா ஸம்யுஜ்யந்தே ॥13॥

அன்னம் வை ப்ரஜாபதிஸ்ததோ ஹ வை தத்³ரேதஸ்தஸ்மாதி³மா: ப்ரஜா: ப்ரஜாயந்த இதி ॥14॥

தத்³யே ஹ வை தத்ப்ரஜாபதிவ்ரதம் சரந்தி தே மிது²னமுத்பாத³யந்தே।
தேஷாமேவைஷ ப்³ரஹ்மலோகோ யேஷாம் தபோ ப்³ரஹ்மசர்யம் யேஷு ஸத்யம் ப்ரதிஷ்டி²தம் ॥15॥

தேஷாமஸௌ விரஜோ ப்³ரஹ்மலோகோ ந யேஷு ஜிஹ்மமன்ருதம் ந மாயா சேதி ॥16॥