நாராயணீயம் த³ஶக 73 – ஶ்ரீக்ருஷ்ணஸ்ய மது²ராயாத்ரா

நிஶமய்ய தவாத² யானவார்தாம் ப்⁴ருஶமார்தா: பஶுபாலபா³லிகாஸ்தா: ।
கிமித³ம் கிமித³ம் கத²ம் ந்விதீமா: ஸமவேதா: பரிதே³விதான்யகுர்வன் ॥1॥

கருணானிதி⁴ரேஷ நந்த³ஸூனு: கத²மஸ்மான் விஸ்ருஜேத³னன்யனாதா²: ।
ப³த ந: கிமு தை³வமேவமாஸீதி³தி தாஸ்த்வத்³க³தமானஸா விலேபு: ॥2॥

சரமப்ரஹரே ப்ரதிஷ்ட²மான: ஸஹ பித்ரா நிஜமித்ரமண்ட³லைஶ்ச ।
பரிதாபப⁴ரம் நிதம்பி³னீனாம் ஶமயிஷ்யன் வ்யமுச: ஸகா²யமேகம் ॥3॥

அசிராது³பயாமி ஸன்னிதி⁴ம் வோ ப⁴விதா ஸாது⁴ மயைவ ஸங்க³மஶ்ரீ: ।
அம்ருதாம்பு³னிதௌ⁴ நிமஜ்ஜயிஷ்யே த்³ருதமித்யாஶ்வஸிதா வதூ⁴ரகார்ஷீ: ॥4॥

ஸவிஷாத³ப⁴ரம் ஸயாச்ஞமுச்சை: அதிதூ³ரம் வனிதாபி⁴ரீக்ஷ்யமாண: ।
ம்ருது³ தத்³தி³ஶி பாதயன்னபாங்கா³ன் ஸப³லோக்ரூரரதே²ன நிர்க³தோபூ⁴: ॥5॥

அனஸா ப³ஹுலேன வல்லவானாம் மனஸா சானுக³தோத² வல்லபா⁴னாம் ।
வனமார்தம்ருக³ம் விஷண்ணவ்ருக்ஷம் ஸமதீதோ யமுனாதடீமயாஸீ: ॥6॥

நியமாய நிமஜ்ய வாரிணி த்வாமபி⁴வீக்ஷ்யாத² ரதே²பி கா³ந்தி³னேய: ।
விவஶோஜனி கிம் ந்வித³ம் விபோ⁴ஸ்தே நனு சித்ரம் த்வவலோகனம் ஸமந்தாத் ॥7॥

புனரேஷ நிமஜ்ய புண்யஶாலீ புருஷம் த்வாம் பரமம் பு⁴ஜங்க³போ⁴கே³ ।
அரிகம்பு³க³தா³ம்பு³ஜை: ஸ்பு²ரந்தம் ஸுரஸித்³தௌ⁴க⁴பரீதமாலுலோகே ॥8॥

ஸ ததா³ பரமாத்மஸௌக்²யஸிந்தௌ⁴ வினிமக்³ன: ப்ரணுவன் ப்ரகாரபே⁴தை³: ।
அவிலோக்ய புனஶ்ச ஹர்ஷஸிந்தோ⁴ரனுவ்ருத்த்யா புலகாவ்ருதோ யயௌ த்வாம் ॥9॥

கிமு ஶீதலிமா மஹான் ஜலே யத் புலகோஸாவிதி சோதி³தேன தேன ।
அதிஹர்ஷனிருத்தரேண ஸார்த⁴ம் ரத²வாஸீ பவனேஶ பாஹி மாம் த்வம் ॥1௦॥