ம்ருதஸஞ்ஜீவன கவச ஸ்தோத்ரம்

ஏவமாராத்⁴ய கௌ³ரீஶம் தே³வம் ம்ருத்யுஞ்ஜயேஶ்வரம் ।
ம்ருதஸஞ்ஜீவனம் நாம்னா கவசம் ப்ரஜபேத் ஸதா³ ॥ 1 ॥

ஸாராத்ஸாரதரம் புண்யம் கு³ஹ்யாத்³கு³ஹ்யதரம் ஶுப⁴ம் ।
மஹாதே³வஸ்ய கவசம் ம்ருதஸஞ்ஜீவனாமகம் ॥ 2 ॥

ஸமாஹிதமனா பூ⁴த்வா ஶ்ருணுஷ்வ கவசம் ஶுப⁴ம் ।
ஶ்ருத்வைதத்³தி³வ்ய கவசம் ரஹஸ்யம் குரு ஸர்வதா³ ॥ 3 ॥

வராப⁴யகரோ யஜ்வா ஸர்வதே³வனிஷேவித: ।
ம்ருத்யுஞ்ஜயோ மஹாதே³வ: ப்ராச்யாம் மாம் பாது ஸர்வதா³ ॥ 4 ॥

த³தா⁴ன: ஶக்திமப⁴யாம் த்ரிமுக²ம் ஷட்³பு⁴ஜ: ப்ரபு⁴: ।
ஸதா³ஶிவோக்³னிரூபீ மாமாக்³னேய்யாம் பாது ஸர்வதா³ ॥ 5 ॥

அஷ்டாத³ஶபு⁴ஜோபேதோ த³ண்டா³ப⁴யகரோ விபு⁴: ।
யமரூபீ மஹாதே³வோ த³க்ஷிணஸ்யாம் ஸதா³வது ॥ 6 ॥

க²ட்³கா³ப⁴யகரோ தீ⁴ரோ ரக்ஷோக³ணனிஷேவித: ।
ரக்ஷோரூபீ மஹேஶோ மாம் நைர்ருத்யாம் ஸர்வதா³வது ॥ 7 ॥

பாஶாப⁴யபு⁴ஜ: ஸர்வரத்னாகரனிஷேவித: ।
வருணாத்மா மஹாதே³வ: பஶ்சிமே மாம் ஸதா³வது ॥ 8 ॥

க³தா³ப⁴யகர: ப்ராணனாயக: ஸர்வதா³க³தி: ।
வாயவ்யாம் மாருதாத்மா மாம் ஶங்கர: பாது ஸர்வதா³ ॥ 9 ॥

ஶங்கா²ப⁴யகரஸ்தோ² மாம் நாயக: பரமேஶ்வர: ।
ஸர்வாத்மாந்தரதி³க்³பா⁴கே³ பாது மாம் ஶங்கர: ப்ரபு⁴: ॥ 1௦ ॥

ஶூலாப⁴யகர: ஸர்வவித்³யானாமதி⁴னாயக: ।
ஈஶானாத்மா ததை²ஶான்யாம் பாது மாம் பரமேஶ்வர: ॥ 11 ॥

ஊர்த்⁴வபா⁴கே³ ப்³ரஹ்மரூபீ விஶ்வாத்மாத:⁴ ஸதா³வது ।
ஶிரோ மே ஶங்கர: பாது லலாடம் சந்த்³ரஶேக²ர: ॥ 12 ॥

ப்⁴ரூமத்⁴யம் ஸர்வலோகேஶஸ்த்ரினேத்ரோ லோசனேவது ।
ப்⁴ரூயுக்³மம் கி³ரிஶ: பாது கர்ணௌ பாது மஹேஶ்வர: ॥ 13 ॥

நாஸிகாம் மே மஹாதே³வ ஓஷ்டௌ² பாது வ்ருஷத்⁴வஜ: ।
ஜிஹ்வாம் மே த³க்ஷிணாமூர்திர்த³ந்தான்மே கி³ரிஶோவது ॥ 14 ॥

ம்ருத்யுஞ்ஜயோ முக²ம் பாது கண்ட²ம் மே நாக³பூ⁴ஷண: ।
பினாகி மத்கரௌ பாது த்ரிஶூலி ஹ்ருத³யம் மம ॥ 15 ॥

பஞ்சவக்த்ர: ஸ்தனௌ பாது உத³ரம் ஜக³தீ³ஶ்வர: ।
நாபி⁴ம் பாது விரூபாக்ஷ: பார்ஶ்வௌ மே பார்வதீபதி: ॥ 16 ॥

கடத்³வயம் கி³ரீஶோ மே ப்ருஷ்ட²ம் மே ப்ரமதா²தி⁴ப: ।
கு³ஹ்யம் மஹேஶ்வர: பாது மமோரூ பாது பை⁴ரவ: ॥ 17 ॥

ஜானுனீ மே ஜக³த்³த⁴ர்தா ஜங்கே⁴ மே ஜக³த³ம்பி³கா ।
பாதௌ³ மே ஸததம் பாது லோகவந்த்³ய: ஸதா³ஶிவ: ॥ 18 ॥

கி³ரிஶ: பாது மே பா⁴ர்யாம் ப⁴வ: பாது ஸுதான்மம ।
ம்ருத்யுஞ்ஜயோ மமாயுஷ்யம் சித்தம் மே க³ணனாயக: ॥ 19 ॥

ஸர்வாங்க³ம் மே ஸதா³ பாது காலகால: ஸதா³ஶிவ: ।
ஏதத்தே கவசம் புண்யம் தே³வதானாம் ச து³ர்லப⁴ம் ॥ 2௦ ॥

ம்ருதஸஞ்ஜீவனம் நாம்னா மஹாதே³வேன கீர்திதம் ।
ஸஹஸ்ராவர்தனம் சாஸ்ய புரஶ்சரணமீரிதம் ॥ 21 ॥

ய: படே²ச்ச்ருணுயான்னித்யம் ஶ்ராவயேத்ஸு ஸமாஹித: ।
ஸ காலம்ருத்யும் நிர்ஜித்ய ஸதா³யுஷ்யம் ஸமஶ்னுதே ॥ 22 ॥

ஹஸ்தேன வா யதா³ ஸ்ப்ருஷ்ட்வா ம்ருதம் ஸஞ்ஜீவயத்யஸௌ ।
ஆத⁴யோவ்யாத⁴யஸ்தஸ்ய ந ப⁴வந்தி கதா³சன ॥ 23 ॥

காலம்ருத்யுமபி ப்ராப்தமஸௌ ஜயதி ஸர்வதா³ ।
அணிமாதி³கு³ணைஶ்வர்யம் லப⁴தே மானவோத்தம: ॥ 24 ॥

யுத்³தா⁴ரம்பே⁴ படி²த்வேத³மஷ்டாவிம்ஶதிவாரகம் ।
யுத்³த⁴மத்⁴யே ஸ்தி²த: ஶத்ரு: ஸத்³ய: ஸர்வைர்ன த்³ருஶ்யதே ॥ 25 ॥

ந ப்³ரஹ்மாதீ³னி சாஸ்த்ராணி க்ஷயம் குர்வந்தி தஸ்ய வை ।
விஜயம் லப⁴தே தே³வயுத்³த⁴மத்⁴யேபி ஸர்வதா³ ॥ 26 ॥

ப்ராதருத்தா²ய ஸததம் ய: படே²த்கவசம் ஶுப⁴ம் ।
அக்ஷய்யம் லப⁴தே ஸௌக்²யமிஹலோகே பரத்ர ச ॥ 27 ॥

ஸர்வவ்யாதி⁴வினிர்முக்த: ஸர்வரோக³விவர்ஜித: ।
அஜராமரணோ பூ⁴த்வா ஸதா³ ஷோட³ஶவார்ஷிக: ॥ 28 ॥

விசரத்யகி²லான்லோகான்ப்ராப்ய போ⁴கா³ம்ஶ்ச து³ர்லபா⁴ன் ।
தஸ்மாதி³த³ம் மஹாகோ³ப்யம் கவசம் ஸமுதா³ஹ்ருதம் ॥ 29 ॥

ம்ருதஸஞ்ஜீவனம் நாம்னா தே³வதைரபி து³ர்லப⁴ம் ॥ 3௦ ॥

இதி வஸிஷ்ட² க்ருத ம்ருதஸஞ்ஜீவன கவச ஸ்தோத்ரம் ॥