වේදාංත ඩිංඩිමඃ

වේදාංතඩිංඩිමාස්තත්වමේකමුද්ධෝෂයංති යත් ।
ආස්තාං පුරස්තාංතත්තේජෝ දක්ෂිණාමූර්තිසංජ්ඤිතම් ॥ 1

ආත්මාऽනාත්මා පදාර්ථෞ ද්වෞ භෝක්තෘභෝග්යත්වලක්ෂණෞ ।
බ්රහ්මේවාऽऽත්මාන දේහාදිරිති වේදාංතඩිංඩිමඃ ॥ 2

ජ්ඤානාऽජ්ඤානේ පදාර්ථෝං ද්වාවාත්මනෝ බංධමුක්තිදෞ ।
ජ්ඤානාන්මුක්ති නිර්බංධෝऽන්යදිති වේදාංතඩිංඩිමඃ ॥ 3

ජ්ඤාතෘ ජ්ඤේයං පදාර්ථෞ ද්වෞ භාස්ය භාසකලක්ෂණෞ ।
ජ්ඤාතා බ්රහ්ම ජගත් ජ්ඤේය මිති වේදාංතඩිංඩිමඃ ॥ 4

සුඛදුඃඛේ පදාර්ථෞ ද්වෞ ප්රියවිප්රියකාරකෞ ।
සුඛං බ්රහ්ම ජගහුඃඛ මිති වේදාංතඩිංඩිමඃ॥ 5

සමෂ්ටිව්යෂ්ටිරූපෞ ද්වෞ පදාර්ථෞ සර්වසංමතෞ ।
සමෂ්ටිරීශ්වරෝ ව්යෂ්ටිර්ජීවෝ වේදාංතඩිංඩිමඃ ॥ 6

ජ්ඤානං කර්ම පදාර්ථෞ ද්වෞ වස්තුකත්රාත්ම තංත්රකෞ ।
ජ්ඤානාන්මෝක්ෂෝ න කර්මභ්ය ඉති වේදාංතඩිංඩිමඃ ॥ 7

ශ්රෝතව්යාऽශ්රව්යරූපී ද්වෞ පදාර්ථෝං සුඛදුඃඛදෞ ।
ශ්රෝතව්යං බ්රහ්ම නෛවාऽන්ය දිති වේදාංතඩිංඩිමඃ॥ 8

චිංත්යාऽචිංත්යේ පදාථෞ ද්වෞ විශ්රාංති ශ්රාංතිදායකෞ ।
චිංත්යං බ්රහ්ම පරං නාऽන්ය දිති වේදාංතඩිංඩිමඃ॥ 9

ධ්යේයාऽධ්වේයේ පදාර්ථෞ ද්වෞ ද්වෞ ධීසමාධ්යසමාධිදෞ ।
ධ්යාතව්යං බ්රහ්ම නෛවාऽන්ය දිති වේදාංතඩිංඩිමඃ॥ 10

යෝගිනෝ භෝගිනෝ වාऽපි ත්යාගිනෝ රාගිණෝऽපි ච ।
ජ්ඤානාන්මෝක්ෂෝ න සංදේහ ඉති වේදාංතඩිංඩිමඃ ॥ 11

න වර්ණාශ්රම සංකේතෛඃ න කෝපාසනාදිභිඃ।
බ්රහ්මජ්ඤානං විනා මෝක්ෂඃ ඉති වේදාංතඩිංඩිමඃ ॥ 12

අසත්යස්සර්වසංසාරෝ රසාමාසාදිදූෂිතඃ ।
උපේක්ෂ්යෝ බ්රහ්ම විජ්ඤේය මිති වේදාංතඩිංඩිමඃ ॥ 13

වෘථා ක්රියාං වෘථාऽලාපාන් වෘථාවාදාන් මනෝරථාන් ।
ත්යත්වෛකං බ්රහ්ම විජ්ඤේය මිති වේදාංතඩිංඩිමඃ ॥ 14

ස්ථිතෝ බ්රහ්මාත්මනා ජීවෝ බ්රහ්ම ජීවාත්මනා ස්ථිතම් ।
ඉති සංපශ්යතාං මුක්ති රිති වේදාංතඩිංඩිමඃ॥ 15

ජීවෝ බ්රහ්මාත්මනා ජ්ඤේයෝ ජ්ඤේයං ජීවාත්මනා පරම් ।
මුක්තිස්ත දෛක්යවිජ්ඤාන මිති වේදාංතඩිංඩිමඃ ॥ 16

සර්වාත්මනා පරං බ්රහ්ම ශ්රෝතුරාත්මතයා ස්ථිතම් ।
නාऽऽයාස ස්තව විජ්ඤප්තෞ ඉති වේදාංතඩිංඩිමඃ ॥ 17

ඓහිකං චාऽऽමුධ්මිකං ච තාපාංතං කර්මසංචයම් ।
ත්යත්වා බ්රහ්මෛව විජ්ඤේය මිති වේදාංතඩිංඩිමඃ ॥ 18

අද්වෛතද්වෛතවාදෞ ද්වෞ සූක්ෂ්මස්ථූලදශාං ගතෞ ।
අද්වෛතවාදාන්මෝක්ෂස්ස්යා දිති වේදාංතඩිංඩිමඃ ॥19

කර්මිණෝ විනිවර්තංතේ නිවර්තංත උපාසකාඃ।
ජ්ඤානිනෝ න නිවර්තංතේ ඉති වේදාංතඩිංඩිමඃ ॥ 20

පරෝක්ෂාऽසත්ඵලං කර්මජ්ඤානං ප්රත්යක්ෂසත්ඵලම් ।
ජ්ඤානමේවාऽභ්යසේත්තස්මාත් ඉති වේදාංතඩිංඩිමඃ ॥21

වෘථා ශ්රමෝऽයං විදුෂා වෘථාऽයං-කර්මිණාං ශ්රමඃ ।
යදි න බ්රහ්මවිජ්ඤානං ඉති ॥ වේදාංතඩිංඩිමඃ ॥ 22

අලං යාගෛරලං යෝගෛරලං භෝගෛ රලං ධනෛඃ ।
පරස්මින්බ්රහ්මණි ජ්ඤාත ඉති වේදාංතඩිංඩිමඃ ॥23

අලං වේදෛරලං ශාස්ත්රෛරලමං ස්මෘතිපුරාණකෛඃ ।
පරමාත්මනි විජ්ඤාතේ ඉති වේදාංතඩිංඩිමඃ ॥ 24

නර්චා න යජුෂෝऽර්ථෝऽස්ති න සාන්නර්ථෝऽති කශ්චන ।
ජාතේ බ්රහ්මාත්මවිජ්ඤානේ ඉති වේදාංතඩිංඩිමඃ ॥ 25

කර්මාණි චිත්තශුද්ධ්යර්ථං මෛකාග්ර්යාර්ථ මුපාසනම් ।
මෝක්ෂාර්ථං බ්රහ්මවිජ්ඤාන මිති වේදාංතඩිංඩිමඃ ॥ 26

සංචිතාගාමිකර්මාණි දහ්යංතේ ජ්ඤානකර්මණා ।
ප්රාරබ්ධානුභවාන්මෝක්ෂ ඉති වේදාංතඩිංඩිමඃ॥ 27

න පුණ්යකර්මණා වෘද්ධිඃ න හානිඃ පාපකර්මණා ।
නිත්යාසංගාත්මනිෂ්ඨානාමිති වේදාංතඩිංඩිමඃ॥ 28

දෘග්දෘශ්යෞ ද්වෞ පදාර්ථෞ තෞ පරස්පරවිලක්ෂණෞ ।
දෘග්බ්රහ්ම දෘශ්යං මායා ස්යාදිති වේදාංතඩිංඩිමඃ ॥ 29

අවිද්යෝපාධිකෝ ජීවෝ මායෝපාධික ඊශ්වරඃ ।
මායාऽවිද්යාගුණාතීතඃ ඉති වේදාංතඩිංඩිමඃ ॥ 30

බුද්ධිපූර්වාऽබුද්ධිපූර්වකෘතානාං පාපකර්මණාම් ।
ප්රායශ්චිත්තමහෝජ්ඤාන මිති වේදාංතඩිංඩිමඃ ॥ 31

සාකාරං ච නිරාකාරං නිර්ගුණං ච ගුණාත්මකම් ।
තත්ත්වං තත්පරමං බ්රහ්ම ඉති වේදාංතඩිංඩිමඃ ॥ 32

ද්විජත්වං විධ්යනුෂ්ඨානාත් විප්රත්වං වේදපාඨතඃ ।
බ්රාහ්මණ්යං බ්රහ්මවිජ්ඤානාත් ඉති වේදාංතඩිංඩිමඃ ॥ 33

සර්වාත්මනා ස්ථිතං බ්රහ්ම සර්වං බ්රහ්මාත්මනා ස්ථිතම් ।
න කාර්යං කාරණාද්භින්න මිති වේදාංතඩිංඩිමඃ ॥ 34

සත්තාස්ඵුරණසෞඛ්යානි භාසංතේ සර්වවස්තුෂු ।
තස්මාද්බ්රහ්මමයං සර්ව මිති වේදාංතඩිංඩිමඃ ॥ 35

අවස්ථාත්රිතයං යස්ය ක්රීඩාභූමිතයා ස්ථිතම් ।
තදේව බ්රහ්ම ජානීයාත් ඉති වේදාංතඩිංඩිමඃ॥ 36

යන්නාऽऽදෞ යශ්ච නාऽස්ත්යංතේ තන්මධ්යේ භාතමප්යසත් ।
අතෝ මිථ්යා ජගත්සර්වමිති වේදාංතඩිංඩිමඃ ॥ 37

යදස්ත්යාදෞ යදස්ත්යංතේ යන්මධ්යේ භාති තත්ස්වයම් ।
ප්රෞකමිදං සත්ය මිති වේදාංතඩිංඩිමඃ ॥ 38

පුරුෂාර්ථත්රයාවිෂ්ටාඃ පුරුෂාඃ පශවෝ ධෘවම් ।
මෝක්ෂාර්ථී පුරුෂඃ ශ්රේෂ්ඨඃ ඉති වේදාංතඩිංඩිමඃ ॥ 39

ඝටකුඩ්යාදිකං සර්වං මෘත්තිකාමාත්රමේව ච ।
තථා බ්රහ්ම ජගත්සර්ව මිති වේදාංතඩිංඩිමඃ ॥ 40

ෂණ්ණිහත්ය ත්රයං හිත්වා ද්වයං භිස්වාऽඛිලාගතිම් ।
ඒකං බුද්ධාऽऽශ්රුතේ මෝක්ෂ මිති වේදාංතඩිංඩිමඃ ॥ 41

භිත්වා ෂට් පංච භිත්ත්වාऽථ භිශ්වාऽථ චතුරඛිකම් ।
ද්වයං හිත්වා ශ්රයේදේක මිති වේදාංතඩිංඩිමඃ ॥ 42

දේහෝ නාහ මහං දේහී දේහසාක්ෂීති නිශ්චයාත් ।
ජන්මමෘත්යුපහීණෝऽසෞ ඉති වේදාංතඩිංඩිමඃ ॥ 43

ප්රාණෝනාහමහං දේවඃ ප්රාණස්සාක්ෂීති නිශ්චයාත් ।
ක්ෂුත්පිපාසෝපශාංති ස්ස්යාත් ඉති වේදාංතඩිංඩිමඃ ॥ 44

මනෝ නාऽහ මහං දේවෝ මනස්සාක්ෂීති නිශ්චයාත් ।
ශෝකමෝහාපහානිරස්යාත් වේදාංතඩිංඩිමඃ ॥ 45

බුද්ධිර්නාऽහමහං දේවෝ බුද්ධිසාක්ෂීති නිශ්චයාත් ।
කර්තෘභාවනිර්වෘත්තිස්ස්යාත් ඉති වේදාංතඩිංඩිමඃ ॥ 46

නාජ්ඤානං ස්යාමහං දේවෝऽජ්ඤානසාක්ෂීති නිශ්චයාත් ।
සර්වානර්ථනිවෘත්තිස්යාත් ඉති වේදාංතඩිංඩිමඃ ॥ 47

අහං සාක්ෂීති යෝ විද්යාත් විවිච්යෛවං පුන: පුනඃ ।
ස ඒව මුක්තෝऽසෞ විද්වාන් ඉති වේදාංතඩිංඩිමඃ ॥ 48

නාහං මායා න තත්කාර්යං න සාක්ෂී පරමෝऽස්ම්යහම් ।
ඉති නිස්සංශයජ්ඤානාත් මුක්තිර්වේ වේදාංතඩිංඩිමඃ ॥ 49

නාऽහං සර්ව මහං සර්වං මයි සර්වමිති ස්ඵුටම් ।
ජ්ඤාතේ තත්වේ කුතෝ දුඃඛ මිති වේදාංතඩිංඩිමඃ ॥ 50

දේහාදිපංචකෝශස්ථා යා සත්තා ප්රතිභාසතේ ।
සා සත්තාස්ස්ත්මා න සංදේහ ඉති වේදාංතඩිංඩිමඃ ॥ 51

දේහාදිපංචකෝශස්ථා යා ස්ඵූර්ති රනුභූයතේ ।
සා ස්ඵූර්තිරාත්මා නෛවාऽන්ය දිති වේදාංතඩිංඩිමඃ ॥ 52

දේහාදිපංචකෝශස්ථා යා ප්රීතිරනුභූයතේ ।
සා ප්රීතිරාත්මා කූටස්ථඃ ඉති වේදාංතඩිංඩිමඃ ॥ 53

ව්යෝමාදිපංචභූතස්ථා යාසත්තා භාසතේ නෘණාම් ।
සා සත්තා පරමං බ්රහ්ම ඉති වේදාංතඩිංඩිමඃ ॥ 54

ව්යෝමාදිපංචභූතස්ථා යා චිදේකාऽනුභූයතේ ।
සා චිදේව පරං බ්රහ්ම ඉති වේදාංතඩිංඩිමඃ ॥ 55

ව්යෝමාදිපංචභූතස්ථා යා ප්රීතිරනුභූයතේ ।
සාප්රීතිරේව බ්රහ්ම ස්යාත් ඉති වේදාංතඩිංඩිමඃ ॥ 56

දේහාදිකෝශගා සත්තා යා සා ව්යෝමාදිභූතගා ।
මානෝऽභාවාන්න තද්භේදඃ ඉති වේදාංතඩිංඩිමඃ ॥ 57

දේහාවිකෝශගා ස්ඵූර්තිර්යා සා ව්යෝමාදිභූතගා ।
මානෝऽභාවා න තද්භේද ඉති වේදාංතඩිංඩිමඃ ॥ 58

දේහාදිකෝශගා ප්රීතිර්යා සා ව්යෝමාදිභූතගා ।
මානාऽභාවා න්න තද්භේද ඉති වේදාංතඩිංඩිමඃ॥ 59

සච්චිදානංදරූපත්වාත් බ්රහ්මෛවාऽත්මා න සංශයඃ।
ප්රමාණකෝටිසංඝානාත් ඉති වේදාංතඩිංඩිමඃ॥60

න ජීවබ්රහ්මණෝර්භේදඃ සත්තාරූපේණ විද්යතේ।
සත්තාභේදේ න මානං ස්යාත් ඉති වේදාංතඩිංඩිමඃ॥61

න ජීවබ්රහ්මණෝර්භේදඃ ස්ඵූර්තිරූපේණ විද්යතේ ।
ස්ඵූර්තිභේදේ න මානං ස්යාත් ඉති වේදාංතඩිංඩිමඃ ॥62

න ජීවබ්රහ්මණෝර්භේදඃ ප්රියරූපේණ විද්යතේ ।
ප්රියභේදේ න මානං ස්යාත් ඉති වේදාංතඩිංඩිමඃ ॥ 63

න ජීවබ්රහ්මණෝර්භේදෝ නානා රූපේණ විද්යතේ ।
නාම්නෝ රූපස්ය මිථ්යාත්වාත් ඉති වේදාංතඩිංඩිමඃ ॥ 64

න ජීවබ්රහ්මණෝර්භේදඃ පිංඩබ්රහ්මාංඩභේදතඃ ।
ව්යෂ්ටේස්සමෂ්ටේරේකත්වාත් ඉති වේදාංතඩිංඩිමඃ ॥ 65

බ්රහ්ම සත්යං ජගන්මිථ්යා ජීවෝ බ්රහ්මෛව නා¶ඃ ।
ජීවන්මුක්තස්තු තද්විද්වාන් ඉති වේදාංතඩිංඩිමඃ ॥ 66

න නාමරූපේ නියතේ සර්වත්ර ව්යභිචාරතඃ ।
අනාමරූපං සර්වං ස්යාත් ඉති වේදාංතඩිංඩිමඃ ॥ 67

අනාමරූපං සකලං සන්මයං චින්මයං පරම් ।
කුතෝ භේදඃ කුතෝ බංධඃ ඉති වේදාංතඩිංඩිමඃ ॥ 68

න තත්ත්වාත්කථ්යතේ ලෝකෝ නාමාද්යෛර්ව්යභිචාරතඃ।
වටුර්ජරඨ ඉත්යාද්යෛ රිති වේදාංතඩිංඩිමඃ ॥ 69

නාමරූපාත්මකං විශ්වමිංද්රජාලං විදුර්බුධාඃ ।
අනාමත්වාදයුක්තත්වාත් ඉති වේදාංතඩිංඩිමඃ ॥ 70

අභේදදර්ශනං මෝක්ෂඃ සංසායේ භේදදර්ශනම් ।
සර්වවේදාංතසිද්ධාංතඃ ඉති වේදාංතඩිංඩිමඃ ॥ 71

න මතාභිනිවේශිත්වාත් න භාෂාවේශමාත්රතඃ ।
මුක්ති ර්විනාऽऽත්මවිජ්ඤානාත් ඉති වේදාංතඩිංඩිමඃ ॥ 72

න කාස්යප්රතිෂිද්ධාභිඃ ක්රියාභි මෝක්ෂවාසනා ।
ඊශ්වරානුග්රහාත්සා ස්යාත් ඉති වේදාංතඩිංඩිමඃ ॥ 73

අවිජ්ඤාතේ ජන්ම නෂ්ටං විජ්ඤාතේ ජන්ම සාර්ථකම් ।
ජ්ඤාතුරාත්මා න දූරේ ස්යාත් ඉති වේදාංතඩිංඩිමඃ ॥ 74

දශමස්ය පරිජ්ඤානේනාऽऽයාසෝऽස්ති යථාඃ තථා ।
ස්වස්ථ බ්රහ්මාත්මවිජ්ඤානේ ඉති වේදාංතඩිංඩිමඃ ॥ 75

උපේක්ෂ්යෝපාධිකාන් දෝෂාන් ගෘහ්යංතේ විෂමා යථා ।
උපේක්ෂ්ය දෘශ්යං ය ද්බ්රහ්ම ඉති වේදාංතඩිංඩිමඃ ॥ 76

සුඛමල්පං බහුඃ ක්ලේශෝවිෂයමාහිණාං නෘණාම් ।
අනංතං බ්රහ්මනිෂ්ඨානාං ඉති වේදාංතඩිංඩිමඃ ॥ 77

ධනෛර්වා ධනදෛඃ පුත්රෛඃ දාරාගාරසහෝදරෛඃ ।
ධෘවං ප්රාණහරෛර්දුඃඛං ඉති වේදාංතඩිංඩිමඃ॥ 78

සුප්තේ රුත්ථාය සුප්ත්යංත්යං බ්රහ්මෛකං ප්රවිචිංත්යතාම් ।
නාතිදූරේ නෘණාං මෘත්යුඃ ඉති වේදාංතඩිංඩිමඃ ॥ 79

පංචානාමපිකෝශානාං මායාऽනර්ථාව්යයෝචිතා ।
තත්සාක්ෂි බ්රහ්ම විජ්ඤාන මිති වේදාංතඩිංඩිමඃ ॥ 80

දශමත්වපරිජ්ඤානේ නනජ්ඤස්ය යථා සුඛම් ।
තථා ජීවස්ය සත්ප්රාප්තෞ ඉති වේදාංතඩිංඩිමඃ॥ 81

නවභ්යෝऽස්ති පරං ප්රත්යක්නස වේද පරං පරම් ।
තද්විජ්ඤානාද්භවේත්තුර්යා මුක්ති ර්වේදාංතඩිංඩිමඃ ॥ 82

නවාऽऽභාසානවජ්ඤත්වාත් නවෝපාධීන්නවාත්මනා ।
මිථ්යා ජ්ඤාත්වාऽවශිෂ්ටේ තු මෞනං වේදාංතඩිංඩිමඃ॥ 83

පරමේ බ්රහ්මණි ස්වස්මින් ප්රවිලාප්යාऽඛිලං ජගත් ।
ගායනද්වතමානංදං ආස්තේ වේදාංතඩිංඩිමඃ ॥ 84

ප්රතිලෝමානුලෝමාභ්යාං විශ්වාරෝපාපවාදයෝඃ ।
චිංතනේ ශිෂ්යතේ තත්වං ඉති වේදාංතඩිංඩිමඃ ॥ 85

නාමරූපාභිමානස්ථාත් සංසාරසර්වදේහිනාම් ।
සච්චිදානංදදෘෂ්ටිස්ත්යාත් මුක්තිර්වේදාංතඩිංඩිමඃ ॥ 86

සචිදානංදසත්යත්වේ මිථ්යාත්වේ නාමරූපයෝඃ।
විජ්ඤාතේ කිමිදං ජ්ඤේයං ඉති වේදාංතඩිංඩිමඃ ॥ 86

සාලංබනං නිරාලංබං සර්වාලංබාවලංබිතම් ।
ආලංබේනාऽඛිලාලංබ මිති වේදාංතඩිංඩිමඃ॥ 88

න කුර්යා න්න විජානීයාත් සර්වං බ්රහ්මේත්යනුස්මරන් ।
යථා සුඛං තථා තිෂ්ඨේත් ඉති වේදාංතඩිංඩිමඃ॥ 89

ස්වකර්මපාශවශගඃ ප්රාජ්ඤෝऽන්යෝ වා ජනෝ ධ්රුවම් ।
ප්රාජ්ඤස්සුඛං නයේත්කාල මිති වේදාංතඩිංඩිමඃ॥ 90

න විද්වාන් සංතපේ චිත්තං කරණාකරණේ ධ්රුවම් ।
සර්වමාත්මේති විජ්ඤානාත් ඉති වේදාංතඩිංඩිමඃ. ॥ 91

නෛවාස්ස්භාසං ස්පෘශේත්කර්මමිථ්යෝපාධිමපි ස්වයම් ।
කුතෝऽධිෂ්ඨානමත්යච්ඡමිති වේදාංතඩිංඩිමඃ॥ 92

අහෝऽස්මාක මලං මෝහෛරාත්මා බ්රහ්මේති නිර්භයම් ।
ශ්රුතිභේරීරවෝऽද්යාऽපි ශ්රූයතේ ශ්රුතිරංජනඃ ॥ 93

වේදාංතභේරීඣවාරඃ ප්රතිවාදිභයංකරඃ ।
ශ්රූයතාං බ්රාහ්මණෛඃ ශ්රීමද්දක්ෂිණාමූර්ත්යනුග්රහාත් ॥ 94

ඉති ශ්රීමත්පරමහංස පරිව්රාජකාචාර්ය ශ්රීමච්ඡංකර-
භගවත්පූජ්යපාදකෘතිෂු වේදාංතඩිංඩිමඃ॥