ශ්රීමද්භගවද්ගීතා මූලම් – දශමෝऽධ්යායඃ

ඕං ශ්රීපරමාත්මනේ නමඃ
අථ දශමෝऽධ්යායඃ ।
විභූතියෝගඃ

ශ්රීභගවානුවාච
භූය ඒව මහාබාහෝ ශෘණු මේ පරමං වචඃ ।
යත්තේऽහං ප්රීයමාණාය වක්ෂ්යාමි හිතකාම්යයා ॥ 1 ॥

න මේ විදුඃ සුරගණාඃ ප්රභවං න මහර්ෂයඃ ।
අහමාදිර්හි දේවානාං මහර්ෂීණාං ච සර්වශඃ ॥ 2 ॥

යෝ මාමජමනාදිං ච වේත්ති ලෝකමහේශ්වරම් ।
අසංමූඪඃ ස මර්ත්යේෂු සර්වපාපෛඃ ප්රමුච්යතේ ॥ 3 ॥

බුද්ධිර්ජ්ඤානමසංමෝහඃ ක්ෂමා සත්යං දමඃ ශමඃ ।
සුඛං දුඃඛං භවෝऽභාවෝ භයං චාභයමේව ච ॥ 4 ॥

අහිංසා සමතා තුෂ්ටිස්තපෝ දානං යශෝऽයශඃ ।
භවංති භාවා භූතානාං මත්ත ඒව පෘථග්විධාඃ ॥ 5 ॥

මහර්ෂයඃ සප්ත පූර්වේ චත්වාරෝ මනවස්තථා ।
මද්භාවා මානසා ජාතා යේෂාං ලෝක ඉමාඃ ප්රජාඃ ॥ 6 ॥

ඒතාං විභූතිං යෝගං ච මම යෝ වේත්ති තත්ත්වතඃ ।
සෝऽවිකංපේන යෝගේන යුජ්යතේ නාත්ර සංශයඃ ॥ 7 ॥

අහං සර්වස්ය ප්රභවෝ මත්තඃ සර්වං ප්රවර්තතේ ।
ඉති මත්වා භජංතේ මාං බුධා භාවසමන්විතාඃ ॥ 8 ॥

මච්චිත්තා මද්ගතප්රාණා බෝධයංතඃ පරස්පරම් ।
කථයංතශ්ච මාං නිත්යං තුෂ්යංති ච රමංති ච ॥ 9 ॥

තේෂාං සතතයුක්තානාං භජතාං ප්රීතිපූර්වකම් ।
දදාමි බුද්ධියෝගං තං යේන මාමුපයාංති තේ ॥ 10 ॥

තේෂාමේවානුකංපාර්ථමහමජ්ඤානජං තමඃ ।
නාශයාම්යාත්මභාවස්ථෝ ජ්ඤානදීපේන භාස්වතා ॥ 11 ॥

අර්ජුන උවාච
පරං බ්රහ්ම පරං ධාම පවිත්රං පරමං භවාන් ।
පුරුෂං ශාශ්වතං දිව්යමාදිදේවමජං විභුම් ॥ 12 ॥

ආහුස්ත්වාමෘෂයඃ සර්වේ දේවර්ෂිර්නාරදස්තථා ।
අසිතෝ දේවලෝ ව්යාසඃ ස්වයං චෛව බ්රවීෂි මේ ॥ 13 ॥

සර්වමේතදෘතං මන්යේ යන්මාං වදසි කේශව ।
න හි තේ භගවන්ව්යක්තිං විදුර්දේවා න දානවාඃ ॥ 14 ॥

ස්වයමේවාත්මනාත්මානං වේත්ථ ත්වං පුරුෂෝත්තම ।
භූතභාවන භූතේශ දේවදේව ජගත්පතේ ॥ 15 ॥

වක්තුමර්හස්යශේෂේණ දිව්යා හ්යාත්මවිභූතයඃ ।
යාභිර්විභූතිභිර්ලෝකානිමාංස්ත්වං ව්යාප්ය තිෂ්ඨසි ॥ 16 ॥

කථං විද්යාමහං යෝගිංස්ත්වාං සදා පරිචිංතයන් ।
කේෂු කේෂු ච භාවේෂු චිංත්යෝऽසි භගවන්මයා ॥ 17 ॥

විස්තරේණාත්මනෝ යෝගං විභූතිං ච ජනාර්දන ।
භූයඃ කථය තෘප්තිර්හි ශෘණ්වතෝ නාස්ති මේऽමෘතම් ॥ 18 ॥

ශ්රීභගවානුවාච
හංත තේ කථයිෂ්යාමි දිව්යා හ්යාත්මවිභූතයඃ ।
ප්රාධාන්යතඃ කුරුශ්රේෂ්ඨ නාස්ත්යංතෝ විස්තරස්ය මේ ॥ 19 ॥

අහමාත්මා ගුඩාකේශ සර්වභූතාශයස්ථිතඃ ।
අහමාදිශ්ච මධ්යං ච භූතානාමංත ඒව ච ॥ 20 ॥

ආදිත්යානාමහං විෂ්ණුර්ජ්යෝතිෂාං රවිරංශුමාන් ।
මරීචිර්මරුතාමස්මි නක්ෂත්රාණාමහං ශශී ॥ 21 ॥

වේදානාං සාමවේදෝऽස්මි දේවානාමස්මි වාසවඃ ।
ඉංද්රියාණාං මනශ්චාස්මි භූතානාමස්මි චේතනා ॥ 22 ॥

රුද්රාණාං ශංකරශ්චාස්මි විත්තේශෝ යක්ෂරක්ෂසාම් ।
වසූනාං පාවකශ්චාස්මි මේරුඃ ශිඛරිණාමහම් ॥ 23 ॥

පුරෝධසාං ච මුඛ්යං මාං විද්ධි පාර්ථ බෘහස්පතිම් ।
සේනානීනාමහං ස්කංදඃ සරසාමස්මි සාගරඃ ॥ 24 ॥

මහර්ෂීණාං භෘගුරහං ගිරාමස්ම්යේකමක්ෂරම් ।
යජ්ඤානාං ජපයජ්ඤෝऽස්මි ස්ථාවරාණාං හිමාලයඃ ॥ 25 ॥

අශ්වත්ථඃ සර්වවෘක්ෂාණාං දේවර්ෂීණාං ච නාරදඃ ।
ගංධර්වාණාං චිත්රරථඃ සිද්ධානාං කපිලෝ මුනිඃ ॥ 26 ॥

උච්චෛඃශ්රවසමශ්වානාං විද්ධි මාමමෘතෝද්භවම් ।
ඓරාවතං ගජේංද්රාණාං නරාණාං ච නරාධිපම් ॥ 27 ॥

ආයුධානාමහං වජ්රං ධේනූනාමස්මි කාමධුක් ।
ප්රජනශ්චාස්මි කංදර්පඃ සර්පාණාමස්මි වාසුකිඃ ॥ 28 ॥

අනංතශ්චාස්මි නාගානාං වරුණෝ යාදසාමහම් ।
පිතॄණාමර්යමා චාස්මි යමඃ සංයමතාමහම් ॥ 29 ॥

ප්රහ්ලාදශ්චාස්මි දෛත්යානාං කාලඃ කලයතාමහම් ।
මෘගාණාං ච මෘගේංද්රෝऽහං වෛනතේයශ්ච පක්ෂිණාම් ॥ 30 ॥

පවනඃ පවතාමස්මි රාමඃ ශස්ත්රභෘතාමහම් ।
ඣෂාණාං මකරශ්චාස්මි ස්රෝතසාමස්මි ජාහ්නවී ॥ 31 ॥

සර්ගාණාමාදිරංතශ්ච මධ්යං චෛවාහමර්ජුන ।
අධ්යාත්මවිද්යා විද්යානාං වාදඃ ප්රවදතාමහම් ॥ 32 ॥

අක්ෂරාණාමකාරෝऽස්මි ද්වංද්වඃ සාමාසිකස්ය ච ।
අහමේවාක්ෂයඃ කාලෝ ධාතාහං විශ්වතෝමුඛඃ ॥ 33 ॥

මෘත්යුඃ සර්වහරශ්චාහමුද්භවශ්ච භවිෂ්යතාම් ।
කීර්තිඃ ශ්රීර්වාක්ච නාරීණාං ස්මෘතිර්මේධා ධෘතිඃ ක්ෂමා ॥ 34 ॥

බෘහත්සාම තථා සාම්නාං ගායත්රී ඡංදසාමහම් ।
මාසානාං මාර්ගශීර්ෂෝऽහමෘතූනාං කුසුමාකරඃ ॥ 35 ॥

ද්යූතං ඡලයතාමස්මි තේජස්තේජස්විනාමහම් ।
ජයෝऽස්මි ව්යවසායෝऽස්මි සත්ත්වං සත්ත්වවතාමහම් ॥ 36 ॥

වෘෂ්ණීනාං වාසුදේවෝऽස්මි පාංඩවානාං ධනංජයඃ ।
මුනීනාමප්යහං ව්යාසඃ කවීනාමුශනා කවිඃ ॥ 37 ॥

දංඩෝ දමයතාමස්මි නීතිරස්මි ජිගීෂතාම් ।
මෞනං චෛවාස්මි ගුහ්යානාං ජ්ඤානං ජ්ඤානවතාමහම් ॥ 38 ॥

යච්චාපි සර්වභූතානාං බීජං තදහමර්ජුන ।
න තදස්ති විනා යත්ස්යාන්මයා භූතං චරාචරම් ॥ 39 ॥

නාංතෝऽස්ති මම දිව්යානාං විභූතීනාං පරංතප ।
ඒෂ තූද්දේශතඃ ප්රෝක්තෝ විභූතේර්විස්තරෝ මයා ॥ 40 ॥

යද්යද්විභූතිමත්සත්ත්වං ශ්රීමදූර්ජිතමේව වා ।
තත්තදේවාවගච්ඡ ත්වං මම තේජෝංऽශසංභවම් ॥ 41 ॥

අථවා බහුනෛතේන කිං ජ්ඤාතේන තවාර්ජුන ।
විෂ්ටභ්යාහමිදං කෘත්ස්නමේකාංශේන ස්ථිතෝ ජගත් ॥ 42 ॥

ඕං තත්සදිති ශ්රීමද්භගවද්ගීතාසූපනිෂත්සු බ්රහ්මවිද්යායාං යෝගශාස්ත්රේ
ශ්රීකෘෂ්ණාර්ජුනසංවාදේ විභූතියෝගෝ නාම දශමෝऽධ්යායඃ ॥10 ॥