ශ්රී රාම ආපදුද්ධාරක ස්තෝත්රම්

ආපදාමපහර්තාරං දාතාරං සර්වසංපදාම් ।
ලෝකාභිරාමං ශ්රීරාමං භූයෝ භූයෝ නමාම්යහම් ॥

නමඃ කෝදංඩහස්තාය සංධීකෘතශරාය ච ।
දංඩිතාඛිලදෛත්යාය රාමායාපන්නිවාරිණේ ॥ 1 ॥

ආපන්නජනරක්ෂෛකදීක්ෂායාමිතතේජසේ ।
නමෝऽස්තු විෂ්ණවේ තුභ්යං රාමායාපන්නිවාරිණේ ॥ 2 ॥

පදාංභෝජරජස්ස්පර්ශපවිත්රමුනියෝෂිතේ ।
නමෝऽස්තු සීතාපතයේ රාමායාපන්නිවාරිණේ ॥ 3 ॥

දානවේංද්රමහාමත්තගජපංචාස්යරූපිණේ ।
නමෝऽස්තු රඝුනාථාය රාමායාපන්නිවාරිණේ ॥ 4 ॥

මහිජාකුචසංලග්නකුංකුමාරුණවක්ෂසේ ।
නමඃ කල්යාණරූපාය රාමායාපන්නිවාරිණේ ॥ 5 ॥

පද්මසංභව භූතේශ මුනිසංස්තුතකීර්තයේ ।
නමෝ මාර්තාංඩවංශ්යාය රාමායාපන්නිවාරිණේ ॥ 6 ॥

හරත්යාර්තිං ච ලෝකානාං යෝ වා මධුනිෂූදනඃ ।
නමෝऽස්තු හරයේ තුභ්යං රාමායාපන්නිවාරිණේ ॥ 7 ॥

තාපකාරණසංසාරගජසිංහස්වරූපිණේ ।
නමෝ වේදාංතවේද්යාය රාමායාපන්නිවාරිණේ ॥ 8 ॥

රංගත්තරංගජලධිගර්වහෘච්ඡරධාරිණේ ।
නමඃ ප්රතාපරූපාය රාමායාපන්නිවාරිණේ ॥ 9 ॥

දාරෝපහිතචංද්රාවතංසධ්යාතස්වමූර්තයේ ।
නමඃ සත්යස්වරූපාය රාමායාපන්නිවාරිණේ ॥ 10 ॥

තාරානායකසංකාශවදනාය මහෞජසේ ।
නමෝऽස්තු තාටකාහංත්රේ රාමායාපන්නිවාරිණේ ॥ 11 ॥

රම්යසානුලසච්චිත්රකූටාශ්රමවිහාරිණේ ।
නමඃ සෞමිත්රිසේව්යාය රාමායාපන්නිවාරිණේ ॥ 12 ॥

සර්වදේවහිතාසක්ත දශානනවිනාශිනේ ।
නමෝऽස්තු දුඃඛධ්වංසාය රාමායාපන්නිවාරිණේ ॥ 13 ॥

රත්නසානුනිවාසෛක වංද්යපාදාංබුජාය ච ।
නමස්ත්රෛලෝක්යනාථාය රාමායාපන්නිවාරිණේ ॥ 14 ॥

සංසාරබංධමෝක්ෂෛකහේතුධාමප්රකාශිනේ ।
නමඃ කලුෂසංහර්ත්රේ රාමායාපන්නිවාරිණේ ॥ 15 ॥

පවනාශුග සංක්ෂිප්ත මාරීචාදි සුරාරයේ ।
නමෝ මඛපරිත්රාත්රේ රාමායාපන්නිවාරිණේ ॥ 16 ॥

දාංභිකේතරභක්තෞඝමහදානංදදායිනේ ।
නමඃ කමලනේත්රාය රාමායාපන්නිවාරිණේ ॥ 17 ॥

ලෝකත්රයෝද්වේගකර කුංභකර්ණශිරශ්ඡිදේ ।
නමෝ නීරදදේහාය රාමායාපන්නිවාරිණේ ॥ 18 ॥

කාකාසුරෛකනයනහරල්ලීලාස්ත්රධාරිණේ ।
නමෝ භක්තෛකවේද්යාය රාමායාපන්නිවාරිණේ ॥ 19 ॥

භික්ෂුරූපසමාක්රාංත බලිසර්වෛකසංපදේ ।
නමෝ වාමනරූපාය රාමායාපන්නිවාරිණේ ॥ 20 ॥

රාජීවනේත්රසුස්පංද රුචිරාංගසුරෝචිෂේ ।
නමඃ කෛවල්යනිධයේ රාමායාපන්නිවාරිණේ ॥ 21 ॥

මංදමාරුතසංවීත මංදාරද්රුමවාසිනේ ।
නමඃ පල්ලවපාදාය රාමායාපන්නිවාරිණේ ॥ 22 ॥

ශ්රීකංඨචාපදළනධුරීණබලබාහවේ ।
නමඃ සීතානුෂක්තාය රාමායාපන්නිවාරිණේ ॥ 23 ॥

රාජරාජසුහෘද්යෝෂාර්චිත මංගළමූර්තයේ ।
නම ඉක්ෂ්වාකුවංශ්යාය රාමායාපන්නිවාරිණේ ॥ 24 ॥

මංජුලාදර්ශවිප්රේක්ෂණෝත්සුකෛකවිලාසිනේ ।
නමඃ පාලිතභක්තාය රාමායාපන්නිවාරිණේ ॥ 25 ॥

භූරිභූධර කෝදංඩමූර්ති ධ්යේයස්වරූපිණේ ।
නමෝऽස්තු තේජෝනිධයේ රාමායාපන්නිවාරිණේ ॥ 26 ॥

යෝගීංද්රහෘත්සරෝජාතමධුපාය මහාත්මනේ ।
නමෝ රාජාධිරාජාය රාමායාපන්නිවාරිණේ ॥ 27 ॥

භූවරාහස්වරූපාය නමෝ භූරිප්රදායිනේ ।
නමෝ හිරණ්යගර්භාය රාමායාපන්නිවාරිණේ ॥ 28 ॥

යෝෂාංජලිවිනිර්මුක්ත ලාජාංචිතවපුෂ්මතේ ।
නමඃ සෞංදර්යනිධයේ රාමායාපන්නිවාරිණේ ॥ 29 ॥

නඛකෝටිවිනිර්භින්නදෛත්යාධිපතිවක්ෂසේ ।
නමෝ නෘසිංහරූපාය රාමායාපන්නිවාරිණේ ॥ 30 ॥

මායාමානුෂදේහාය වේදෝද්ධරණහේතවේ ।
නමෝऽස්තු මත්ස්යරූපාය රාමායාපන්නිවාරිණේ ॥ 31 ॥

මිතිශූන්ය මහාදිව්යමහිම්නේ මානිතාත්මනේ ।
නමෝ බ්රහ්මස්වරූපාය රාමායාපන්නිවාරිණේ ॥ 32 ॥

අහංකාරේතරජන ස්වාංතසෞධවිහාරිණේ ।
නමෝऽස්තු චිත්ස්වරූපාය රාමායාපන්නිවාරිණේ ॥ 33 ॥

සීතාලක්ෂ්මණසංශෝභිපාර්ශ්වාය පරමාත්මනේ ।
නමඃ පට්ටාභිෂික්තාය රාමායාපන්නිවාරිණේ ॥ 34 ॥

අග්රතඃ පෘෂ්ඨතශ්චෛව පාර්ශ්වතශ්ච මහාබලෞ ।
ආකර්ණපූර්ණධන්වානෞ රක්ෂේතාං රාමලක්ෂ්මණෞ ॥ 35 ॥

සන්නද්ධඃ කවචී ඛඩ්ගී චාපබාණධරෝ යුවා ।
තිෂ්ඨන්මමාග්රතෝ නිත්යං රාමඃ පාතු සලක්ෂ්මණඃ ॥ 36 ॥

ආපදාමපහර්තාරං දාතාරං සර්වසංපදාම් ।
ලෝකාභිරාමං ශ්රීරාමං භූයෝ භූයෝ නමාම්යහම් ॥

ඵලශ්රුති
ඉමං ස්තවං භගවතඃ පඨේද්යඃ ප්රීතමානසඃ ।
ප්රභාතේ වා ප්රදෝෂේ වා රාමස්ය පරමාත්මනඃ ॥ 1 ॥

ස තු තීර්ත්වා භවාංබෝධිමාපදස්සකලානපි ।
රාමසායුජ්යමාප්නෝති දේවදේවප්රසාදතඃ ॥ 2 ॥

කාරාගෘහාදිබාධාසු සංප්රාප්තේ බහුසංකටේ ।
ආපන්නිවාරකස්තෝත්රං පඨේද්යස්තු යථාවිධිඃ ॥ 3 ॥

සංයෝජ්යානුෂ්ටුභං මංත්රමනුශ්ලෝකං ස්මරන්විභුම් ।
සප්තාහාත්සර්වබාධාභ්යෝ මුච්යතේ නාත්ර සංශයඃ ॥ 4 ॥

ද්වාත්රිංශද්වාරජපතඃ ප්රත්යහං තු දෘඪව්රතඃ ।
වෛශාඛේ භානුමාලෝක්ය ප්රත්යහං ශතසංඛ්යයා ॥ 5 ॥

ධනවාන් ධනදප්රඛ්යස්ස භවේන්නාත්ර සංශයඃ ।
බහුනාත්ර කිමුක්තේන යං යං කාමයතේ නරඃ ॥ 6 ॥

තං තං කාමමවාප්නෝති ස්තෝත්රේණානේන මානවඃ ।
යංත්රපූජාවිධානේන ජපහෝමාදිතර්පණෛඃ ॥ 7 ॥

යස්තු කුර්වීත සහසා සර්වාන්කාමානවාප්නුයාත් ।
ඉහ ලෝකේ සුඛී භූත්වා පරේ මුක්තෝ භවිෂ්යති ॥ 8 ॥