ශ්රී ලලිතා ත්රිශති ස්තෝත්රම්

අස්ය ශ්රීලලිතා ත්රිශතීස්තෝත්ර මහාමංත්රස්ය, භගවාන් හයග්රීව ඍෂිඃ, අනුෂ්ටුප් ඡංදඃ, ශ්රීලලිතාමහාත්රිපුරසුංදරී දේවතා, ඓං බීජං, සෞඃ ශක්තිඃ, ක්ලීං කීලකං, මම චතුර්විධපුරුෂාර්ථඵලසිද්ධ්යර්ථේ ජපේ විනියෝගඃ ।
ඓමිත්යාදිභිරංගන්යාසකරන්යාසාඃ කාර්යාඃ ।

ධ්යානම් ।
අතිමධුරචාපහස්තා-
-මපරිමිතාමෝදබාණසෞභාග්යාම් ।
අරුණාමතිශයකරුණා-
-මභිනවකුලසුංදරීං වංදේ ।

ශ්රී හයග්රීව උවාච ।
කකාරරූපා කල්යාණී කල්යාණගුණශාලිනී ।
කල්යාණශෛලනිලයා කමනීයා කලාවතී ॥ 1 ॥

කමලාක්ෂී කල්මෂඝ්නී කරුණාමෘතසාගරා ।
කදංබකානනාවාසා කදංබකුසුමප්රියා ॥ 2 ॥

කංදර්පවිද්යා කංදර්පජනකාපාංගවීක්ෂණා ।
කර්පූරවීටිසෞරභ්යකල්ලෝලිතකකුප්තටා ॥ 3 ॥

කලිදෝෂහරා කංජලෝචනා කම්රවිග්රහා ।
කර්මාදිසාක්ෂිණී කාරයිත්රී කර්මඵලප්රදා ॥ 4 ॥

ඒකාරරූපා චෛකාක්ෂර්යේකානේකාක්ෂරාකෘතිඃ ।
ඒතත්තදිත්යනිර්දේශ්යා චෛකානංදචිදාකෘතිඃ ॥ 5 ॥

ඒවමිත්යාගමාබෝධ්යා චෛකභක්තිමදර්චිතා ।
ඒකාග්රචිත්තනිර්ධ්යාතා චෛෂණාරහිතාදෘතා ॥ 6 ॥

ඒලාසුගංධිචිකුරා චෛනඃකූටවිනාශිනී ।
ඒකභෝගා චෛකරසා චෛකෛශ්වර්යප්රදායිනී ॥ 7 ॥

ඒකාතපත්රසාම්රාජ්යප්රදා චෛකාංතපූජිතා ।
ඒධමානප්රභා චෛජදනේකජගදීශ්වරී ॥ 8 ॥

ඒකවීරාදිසංසේව්යා චෛකප්රාභවශාලිනී ।
ඊකාරරූපා චේශිත්රී චේප්සිතාර්ථප්රදායිනී ॥ 9 ॥

ඊදෘගිත්යවිනිර්දේශ්යා චේශ්වරත්වවිධායිනී ।
ඊශානාදිබ්රහ්මමයී චේශිත්වාද්යෂ්ටසිද්ධිදා ॥ 10 ॥

ඊක්ෂිත්රීක්ෂණසෘෂ්ටාංඩකෝටිරීශ්වරවල්ලභා ।
ඊඩිතා චේශ්වරාර්ධාංගශරීරේශාධිදේවතා ॥ 11 ॥

ඊශ්වරප්රේරණකරී චේශතාංඩවසාක්ෂිණී ।
ඊශ්වරෝත්සංගනිලයා චේතිබාධාවිනාශිනී ॥ 12 ॥

ඊහාවිරහිතා චේශශක්තිරීෂත්ස්මිතානනා ।
ලකාරරූපා ලලිතා ලක්ෂ්මීවාණීනිෂේවිතා ॥ 13 ॥

ලාකිනී ලලනාරූපා ලසද්දාඩිමපාටලා ।
ලලංතිකාලසත්ඵාලා ලලාටනයනාර්චිතා ॥ 14 ॥

ලක්ෂණෝජ්ජ්වලදිව්යාංගී ලක්ෂකෝට්යංඩනායිකා ।
ලක්ෂ්යාර්ථා ලක්ෂණාගම්යා ලබ්ධකාමා ලතාතනුඃ ॥ 15 ॥

ලලාමරාජදලිකා ලංබිමුක්තාලතාංචිතා ।
ලංබෝදරප්රසූර්ලභ්යා ලජ්ජාඪ්යා ලයවර්ජිතා ॥ 16 ॥

හ්රීං‍කාරරූපා හ්රීං‍කාරනිලයා හ්රීං‍පදප්රියා ।
හ්රීං‍කාරබීජා හ්රීං‍කාරමංත්රා හ්රීං‍කාරලක්ෂණා ॥ 17 ॥

හ්රීං‍කාරජපසුප්රීතා හ්රීං‍මතී හ්රීං‍විභූෂණා ।
හ්රීං‍ශීලා හ්රීං‍පදාරාධ්යා හ්රීං‍ගර්භා හ්රීං‍පදාභිධා ॥ 18 ॥

හ්රීං‍කාරවාච්යා හ්රීං‍කාරපූජ්යා හ්රීං‍කාරපීඨිකා ।
හ්රීං‍කාරවේද්යා හ්රීං‍කාරචිංත්යා හ්රීං හ්රීං‍ශරීරිණී ॥ 19 ॥

හකාරරූපා හලධෘක්පූජිතා හරිණේක්ෂණා ।
හරප්රියා හරාරාධ්යා හරිබ්රහ්මේංද්රවංදිතා ॥ 20 ॥

හයාරූඪාසේවිතාංඝ්රිර්හයමේධසමර්චිතා ।
හර්යක්ෂවාහනා හංසවාහනා හතදානවා ॥ 21 ॥

හත්යාදිපාපශමනී හරිදශ්වාදිසේවිතා ।
හස්තිකුංභෝත්තුංගකුචා හස්තිකෘත්තිප්රියාංගනා ॥ 22 ॥

හරිද්රාකුංකුමාදිග්ධා හර්යශ්වාද්යමරාර්චිතා ।
හරිකේශසඛී හාදිවිද්යා හාලාමදාලසා ॥ 23 ॥

සකාරරූපා සර්වජ්ඤා සර්වේශී සර්වමංගලා ।
සර්වකර්ත්රී සර්වභර්ත්රී සර්වහංත්රී සනාතනා ॥ 24 ॥

සර්වානවද්යා සර්වාංගසුංදරී සර්වසාක්ෂිණී ।
සර්වාත්මිකා සර්වසෞඛ්යදාත්රී සර්වවිමෝහිනී ॥ 25 ॥

සර්වාධාරා සර්වගතා සර්වාවගුණවර්ජිතා ।
සර්වාරුණා සර්වමාතා සර්වභූෂණභූෂිතා ॥ 26 ॥

කකාරාර්ථා කාලහංත්රී කාමේශී කාමිතාර්ථදා ।
කාමසංජීවනී කල්යා කඨිනස්තනමංඩලා ॥ 27 ॥

කරභෝරූඃ කලානාථමුඛී කචජිතාංබුදා ।
කටාක්ෂස්යංදිකරුණා කපාලිප්රාණනායිකා ॥ 28 ॥

කාරුණ්යවිග්රහා කාංතා කාංතිධූතජපාවලිඃ ।
කලාලාපා කංබුකංඨී කරනිර්ජිතපල්ලවා ॥ 29 ॥

කල්පවල්ලීසමභුජා කස්තූරීතිලකාංචිතා ।
හකාරාර්ථා හංසගතිර්හාටකාභරණෝජ්ජ්වලා ॥ 30 ॥

හාරහාරිකුචාභෝගා හාකිනී හල්යවර්ජිතා ।
හරිත්පතිසමාරාධ්යා හඨාත්කාරහතාසුරා ॥ 31 ॥

හර්ෂප්රදා හවිර්භෝක්ත්රී හාර්දසංතමසාපහා ।
හල්ලීසලාස්යසංතුෂ්ටා හංසමංත්රාර්ථරූපිණී ॥ 32 ॥

හානෝපාදානනිර්මුක්තා හර්ෂිණී හරිසෝදරී ।
හාහාහූහූමුඛස්තුත්යා හානිවෘද්ධිවිවර්ජිතා ॥ 33 ॥

හය්යංගවීනහෘදයා හරිගෝපාරුණාංශුකා ।
ලකාරාඛ්යා ලතාපූජ්යා ලයස්ථිත්යුද්භවේශ්වරී ॥ 34 ॥

ලාස්යදර්ශනසංතුෂ්ටා ලාභාලාභවිවර්ජිතා ।
ලංඝ්යේතරාජ්ඤා ලාවණ්යශාලිනී ලඝුසිද්ධිදා ॥ 35 ॥

ලාක්ෂාරසසවර්ණාභා ලක්ෂ්මණාග්රජපූජිතා ।
ලභ්යේතරා ලබ්ධභක්තිසුලභා ලාංගලායුධා ॥ 36 ॥

ලග්නචාමරහස්තශ්රීශාරදාපරිවීජිතා ।
ලජ්ජාපදසමාරාධ්යා ලංපටා ලකුලේශ්වරී ॥ 37 ॥

ලබ්ධමානා ලබ්ධරසා ලබ්ධසංපත්සමුන්නතිඃ ।
හ්රීං‍කාරිණී හ්රීං‍කාරාද්යා හ්රීං‍මධ්යා හ්රීං‍ශිඛාමණිඃ ॥ 38 ॥

හ්රීං‍කාරකුංඩාග්නිශිඛා හ්රීං‍කාරශශිචංද්රිකා ।
හ්රීං‍කාරභාස්කරරුචිර්හ්රීං‍කාරාංභෝදචංචලා ॥ 39 ॥

හ්රීං‍කාරකංදාංකුරිකා හ්රීං‍කාරෛකපරායණා ।
හ්රීං‍කාරදීර්ඝිකාහංසී හ්රීං‍කාරෝද්යානකේකිනී ॥ 40 ॥

හ්රීං‍කාරාරණ්යහරිණී හ්රීං‍කාරාවාලවල්ලරී ।
හ්රීං‍කාරපංජරශුකී හ්රීං‍කාරාංගණදීපිකා ॥ 41 ॥

හ්රීං‍කාරකංදරාසිංහී හ්රීං‍කාරාංභෝජභෘංගිකා ।
හ්රීං‍කාරසුමනෝමාධ්වී හ්රීං‍කාරතරුමංජරී ॥ 42 ॥

සකාරාඛ්යා සමරසා සකලාගමසංස්තුතා ।
සර්වවේදාංතතාත්පර්යභූමිඃ සදසදාශ්රයා ॥ 43 ॥

සකලා සච්චිදානංදා සාධ්යා සද්ගතිදායිනී ।
සනකාදිමුනිධ්යේයා සදාශිවකුටුංබිනී ॥ 44 ॥

සකාලාධිෂ්ඨානරූපා සත්යරූපා සමාකෘතිඃ ।
සර්වප්රපංචනිර්මාත්රී සමනාධිකවර්ජිතා ॥ 45 ॥

සර්වෝත්තුංගා සංගහීනා සගුණා සකලේෂ්ටදා ।
කකාරිණී කාව්යලෝලා කාමේශ්වරමනෝහරා ॥ 46 ॥

කාමේශ්වරප්රාණනාඩී කාමේශෝත්සංගවාසිනී ।
කාමේශ්වරාලිංගිතාංගී කාමේශ්වරසුඛප්රදා ॥ 47 ॥

කාමේශ්වරප්රණයිනී කාමේශ්වරවිලාසිනී ।
කාමේශ්වරතපඃසිද්ධිඃ කාමේශ්වරමනඃප්රියා ॥ 48 ॥

කාමේශ්වරප්රාණනාථා කාමේශ්වරවිමෝහිනී ।
කාමේශ්වරබ්රහ්මවිද්යා කාමේශ්වරගෘහේශ්වරී ॥ 49 ॥

කාමේශ්වරාහ්ලාදකරී කාමේශ්වරමහේශ්වරී ।
කාමේශ්වරී කාමකෝටිනිලයා කාංක්ෂිතාර්ථදා ॥ 50 ॥

ලකාරිණී ලබ්ධරූපා ලබ්ධධීර්ලබ්ධවාංඡිතා ।
ලබ්ධපාපමනෝදූරා ලබ්ධාහංකාරදුර්ගමා ॥ 51 ॥

ලබ්ධශක්තිර්ලබ්ධදේහා ලබ්ධෛශ්වර්යසමුන්නතිඃ ।
ලබ්ධවෘද්ධිර්ලබ්ධලීලා ලබ්ධයෞවනශාලිනී ॥ 52 ॥

ලබ්ධාතිශයසර්වාංගසෞංදර්යා ලබ්ධවිභ්රමා ।
ලබ්ධරාගා ලබ්ධපතිර්ලබ්ධනානාගමස්ථිතිඃ ॥ 53 ॥

ලබ්ධභෝගා ලබ්ධසුඛා ලබ්ධහර්ෂාභිපූරිතා ।
හ්රීං‍කාරමූර්තිර්හ්රීං‍කාරසෞධශෘංගකපෝතිකා ॥ 54 ॥

හ්රීං‍කාරදුග්ධාබ්ධිසුධා හ්රීං‍කාරකමලේංදිරා ।
හ්රීං‍කාරමණිදීපාර්චිර්හ්රීං‍කාරතරුශාරිකා ॥ 55 ॥

හ්රීං‍කාරපේටකමණිර්හ්රීං‍කාරාදර්ශබිංබිතා ।
හ්රීං‍කාරකෝශාසිලතා හ්රීං‍කාරාස්ථානනර්තකී ॥ 56 ॥

හ්රීං‍කාරශුක්තිකාමුක්තාමණිර්හ්රීං‍කාරබෝධිතා ।
හ්රීං‍කාරමයසෞවර්ණස්තංභවිද්රුමපුත්රිකා ॥ 57 ॥

හ්රීං‍කාරවේදෝපනිෂද් හ්රීං‍කාරාධ්වරදක්ෂිණා ।
හ්රීං‍කාරනංදනාරාමනවකල්පකවල්ලරී ॥ 58 ॥

හ්රීං‍කාරහිමවද්ගංගා හ්රීං‍කාරාර්ණවකෞස්තුභා ।
හ්රීං‍කාරමංත්රසර්වස්වා හ්රීං‍කාරපරසෞඛ්යදා ॥ 59 ॥

උත්තරපීඨිකා (ඵලශෘතිඃ)
හයග්රීව උවාච ।
ඉත්යේවං තේ මයාඛ්යාතං දේව්යා නාමශතත්රයම් ।
රහස්යාතිරහස්යත්වාද්ගෝපනීයං ත්වයා මුනේ ॥ 1 ॥

ශිවවර්ණානි නාමානි ශ්රීදේව්යා කථිතානි හි ।
ශක්ත්යක්ෂරාණි නාමානි කාමේශකථිතානි ච ॥ 2 ॥

උභයාක්ෂරනාමානි හ්යුභාභ්යාං කථිතානි වෛ ।
තදන්යෛර්ග්රථිතං ස්තෝත්රමේතස්ය සදෘශං කිමු ॥ 3 ॥

නානේන සදෘශං ස්තෝත්රං ශ්රීදේවීප්රීතිදායකම් ।
ලෝකත්රයේऽපි කල්යාණං සංභවේන්නාත්ර සංශයඃ ॥ 4 ॥

සූත උවාච ।
ඉති හයමුඛගීතං ස්තෝත්රරාජං නිශම්ය
ප්රගලිතකලුෂෝऽභූච්චිත්තපර්යාප්තිමේත්ය ।
නිජගුරුමථ නත්වා කුංභජන්මා තදුක්තං
පුනරධිකරහස්යං ජ්ඤාතුමේවං ජගාද ॥ 5 ॥

අගස්ත්ය උවාච ।
අශ්වානන මහාභාග රහස්යමපි මේ වද ।
ශිවවර්ණානි කාන්යත්ර ශක්තිවර්ණානි කානි හි ॥ 6 ॥

උභයෝරපි වර්ණානි කානි වා වද දේශික ।
ඉති පෘෂ්ටඃ කුංභජේන හයග්රීවෝऽවදත්පුනඃ ॥ 7 ॥

හයග්රීව උවාච ।
තව ගෝප්යං කිමස්තීහ සාක්ෂාදංබානුශාසනාත් ।
ඉදං ත්වතිරහස්යං තේ වක්ෂ්යාමි ශෘණු කුංභජ ॥ 8 ॥

ඒතද්විජ්ඤානමාත්රේණ ශ්රීවිද්යා සිද්ධිදා භවේත් ।
කත්රයං හද්වයං චෛව ශෛවෝ භාගඃ ප්රකීර්තිතඃ ॥ 9 ॥

ශක්ත්යක්ෂරාණි ශේෂාණි හ්රීංකාර උභයාත්මකඃ ।
ඒවං විභාගමජ්ඤාත්වා යේ විද්යාජපශාලිනඃ ॥ 10 ॥

න තේෂාං සිද්ධිදා විද්යා කල්පකෝටිශතෛරපි ।
චතුර්භිඃ ශිවචක්රෛශ්ච ශක්තිචක්රෛශ්ච පංචභිඃ ॥ 11 ॥

නවචක්රෛශ්ච සංසිද්ධං ශ්රීචක්රං ශිවයෝර්වපුඃ ।
ත්රිකෝණමෂ්ටකෝණං ච දශකෝණද්වයං තථා ॥ 12 ॥

චතුර්දශාරං චෛතානි ශක්තිචක්රාණි පංච ච ।
බිංදුශ්චාෂ්ටදලං පද්මං පද්මං ෂෝඩශපත්රකම් ॥ 13 ॥

චතුරශ්රං ච චත්වාරි ශිවචක්රාණ්යනුක්රමාත් ।
ත්රිකෝණේ බෛංදවං ශ්ලිෂ්ටං අෂ්ටාරේऽෂ්ටදලාංබුජම් ॥ 14 ॥

දශාරයෝඃ ෂෝඩශාරං භූගෘහං භුවනාශ්රකේ ।
ශෛවානාමපි ශාක්තානාං චක්රාණාං ච පරස්පරම් ॥ 15 ॥

අවිනාභාවසංබංධං යෝ ජානාති ස චක්රවිත් ।
ත්රිකෝණරූපිණී ශක්තිර්බිංදුරූපපරඃ ශිවඃ ॥ 16 ॥

අවිනාභාවසංබංධං තස්මාද්බිංදුත්රිකෝණයෝඃ ।
ඒවං විභාගමජ්ඤාත්වා ශ්රීචක්රං යඃ සමර්චයේත් ॥ 17 ॥

න තත්ඵලමවාප්නෝති ලලිතාංබා න තුෂ්යති ।
යේ ච ජානංති ලෝකේऽස්මින් ශ්රීවිද්යාචක්රවේදිනඃ ॥ 18 ॥

සාමන්යවේදිනඃ සර්වේ විශේෂජ්ඤෝऽතිදුර්ලභඃ ।
ස්වයංවිද්යාවිශේෂජ්ඤෝ විශේෂජ්ඤං සමර්චයේත් ॥ 19 ॥

තස්මෛ දේයං තතෝ ග්රාහ්යමශක්තස්තස්ය දාපයේත් ।
අංධං තමඃ ප්රවිශංති යේऽවිද්යාං සමුපාසතේ ॥ 20 ॥

ඉති ශ්රුතිරපාහෛතානවිද්යෝපාසකාන්පුනඃ ।
විද්යාන්යෝපාසකානේව නිංදත්යාරුණිකී ශ්රුතිඃ ॥ 21 ॥

අශ්රුතා සශ්රුතාසශ්ච යජ්වානෝ යේऽප්යයජ්වනඃ ।
ස්වර්යංතෝ නාපේක්ෂංතේ ඉංද්රමග්නිං ච යේ විදුඃ ॥ 22 ॥

සිකතා ඉව සංයංති රශ්මිභිඃ සමුදීරිතාඃ ।
අස්මාල්ලෝකාදමුෂ්මාච්චේත්යාහ චාරණ්යකශ්රුතිඃ ॥ 23 ॥

යස්ය නෝ පශ්චිමං ජන්ම යදි වා ශංකරඃ ස්වයම් ।
තේනෛව ලභ්යතේ විද්යා ශ්රීමත්පංචදශාක්ෂරී ॥ 24 ॥

ඉති මංත්රේෂු බහුධා විද්යායා මහිමෝච්යතේ ।
මෝක්ෂෛකහේතුවිද්යා තු ශ්රීවිද්යා නාත්ර සංශයඃ ॥ 25 ॥

න ශිල්පාදිජ්ඤානයුක්තේ විද්වච්ඡබ්ධඃ ප්රයුජ්යතේ ।
මෝක්ෂෛකහේතුවිද්යා සා ශ්රීවිද්යෛව න සංශයඃ ॥ 26 ॥

තස්මාද්විද්යාවිදේවාත්ර විද්වාන්විද්වානිතීර්යතේ ।
ස්වයං විද්යාවිදේ දද්යාත්ඛ්යාපයේත්තද්ගුණාන්සුධීඃ ॥ 27 ॥

ස්වයංවිද්යාරහස්යජ්ඤෝ විද්යාමාහාත්ම්යවේද්යපි ।
විද්යාවිදං නාර්චයේච්චේත්කෝ වා තං පූජයේජ්ජනඃ ॥ 28 ॥

ප්රසංගාදිදමුක්තං තේ ප්රකෘතං ශෘණු කුංභජ ।
යඃ කීර්තයේත්සකෘද්භක්ත්යා දිව්යනාමශතත්රයම් ॥ 29 ॥

තස්ය පුණ්යමහං වක්ෂ්යේ ශෘණු ත්වං කුංභසංභව ।
රහස්යනාමසාහස්රපාඨේ යත්ඵලමීරිතම් ॥ 30 ॥

තත්ඵලං කෝටිගුණිතමේකනාමජපාද්භවේත් ।
කාමේශ්වරීකාමේශාභ්යාං කෘතං නාමශතත්රයම් ॥ 31 ॥

නාන්යේන තුලයේදේතත් ස්තෝත්රේණාන්යකෘතේන ච ।
ශ්රියඃ පරංපරා යස්ය භාවි වා චෝත්තරෝත්තරම් ॥ 32 ॥

තේනෛව ලභ්යතේ චෛතත්පශ්චාච්ඡ්රේයඃ පරීක්ෂයේත් ।
අස්යා නාම්නාං ත්රිශත්යාස්තු මහිමා කේන වර්ණ්යතේ ॥ 33 ॥

යා ස්වයං ශිවයෝර්වක්ත්රපද්මාභ්යාං පරිනිඃසෘතා ।
නිත්යං ෂෝඩශසංඛ්යාකාන්විප්රානාදෞ තු භෝජයේත් ॥ 34 ॥

අභ්යක්තාංස්තිලතෛලේන ස්නාතානුෂ්ණේන වාරිණා ।
අභ්යර්ච්ය ගංධපුෂ්පාද්යෛඃ කාමේශ්වර්යාදිනාමභිඃ ॥ 35 ॥

සූපාපූපෛඃ ශර්කරාද්යෛඃ පායසෛඃ ඵලසංයුතෛඃ ।
විද්යාවිදෝ විශේෂේණ භෝජයේත්ෂෝඩශ ද්විජාන් ॥ 36 ॥

ඒවං නිත්යාර්චනං කුර්යාදාදෞ බ්රාහ්මණභෝජනම් ।
ත්රිශතීනාමභිඃ පශ්චාද්බ්රාහ්මණාන්ක්රමශෝऽර්චයේත් ॥ 37 ॥

තෛලාභ්යංගාදිකං දත්වා විභවේ සති භක්තිතඃ ।
ශුක්ලප්රතිපදාරභ්ය පෞර්ණමාස්යවධි ක්රමාත් ॥ 38 ॥

දිවසේ දිවසේ විප්රා භෝජ්යා විංශතිසංඛ්යයා ।
දශභිඃ පංචභිර්වාපි ත්රිභිරේකේන වා දිනෛඃ ॥ 39 ॥

ත්රිංශත්ෂෂ්ටිඃ ශතං විප්රාඃ සංභෝජ්යාස්ත්රිශතං ක්රමාත් ।
ඒවං යඃ කුරුතේ භක්ත්යා ජන්මමධ්යේ සකෘන්නරඃ ॥ 40 ॥

තස්යෛව සඵලං ජන්ම මුක්තිස්තස්ය කරේ ස්ථිරා ।
රහස්යනාමසාහස්රභෝජනේऽප්යේවමේව හි ॥ 41 ॥

ආදෞ නිත්යබලිං කුර්යාත්පශ්චාද්බ්රාහ්මණභෝජනම් ।
රහස්යනාමසාහස්රමහිමා යෝ මයෝදිතඃ ॥ 42 ॥

ස ශීකරාණුරත්නෛකනාම්නෝ මහිමවාරිධේඃ ।
වාග්දේවීරචිතේ නාමසාහස්රේ යද්යදීරිතම් ॥ 43 ॥

තත්ඵලං කෝටිගුණිතං නාම්නෝऽප්යේකස්ය කීර්තනාත් ।
ඒතදන්යෛර්ජපෛඃ ස්තෝත්රෛරර්චනෛර්යත්ඵලං භවේත් ॥ 44 ॥

තත්ඵලං කෝටිගුණිතං භවේන්නාමශතත්රයාත් ।
වාග්දේවීරචිතේ ස්තෝත්රේ තාදෘශෝ මහිමා යදි ॥ 45 ॥

සාක්ෂාත්කාමේශකාමේශීකෘතේऽස්මින්ගෘහ්යතාමිති ।
සකෘත්සංකීර්තනාදේව නාම්නාමස්මින් ශතත්රයේ ॥ 46 ॥

භවේච්චිත්තස්ය පර්යාප්තිර්න්යූනමන්යානපේක්ෂිණී ।
න ජ්ඤාතව්යමිතෝऽප්යන්යත්ර ජප්තව්යං ච කුංභජ ॥ 47 ॥

යද්යත්සාධ්යතමං කාර්යං තත්තදර්ථමිදං ජපේත් ।
තත්තත්ඵලමවාප්නෝති පශ්චාත්කාර්යං පරීක්ෂයේත් ॥ 48 ॥

යේ යේ ප්රයෝගාස්තංත්රේෂු තෛස්තෛර්යත්සාධ්යතේ ඵලම් ।
තත්සර්වං සිධ්යති ක්ෂිප්රං නාමත්රිශතකීර්තනාත් ॥ 49 ॥

ආයුෂ්කරං පුෂ්ටිකරං පුත්රදං වශ්යකාරකම් ।
විද්යාප්රදං කීර්තිකරං සුකවිත්වප්රදායකම් ॥ 50 ॥

සර්වසංපත්ප්රදං සර්වභෝගදං සර්වසෞඛ්යදම් ।
සර්වාභීෂ්ටප්රදං චෛව දේව්යා නාමශතත්රයම් ॥ 51 ॥

ඒතජ්ජපපරෝ භූයාන්නාන්යදිච්ඡේත්කදාචන ।
ඒතත්කීර්තනසංතුෂ්ටා ශ්රීදේවී ලලිතාංබිකා ॥ 52 ॥

භක්තස්ය යද්යදිෂ්ටං ස්යාත්තත්තත්පූරයතේ ධ්රුවම් ।
තස්මාත්කුංභෝද්භව මුනේ කීර්තය ත්වමිදං සදා ॥ 53 ॥

නාපරං කිංචිදපි තේ බෝද්ධව්යමවශිෂ්යතේ ।
ඉති තේ කථිතං ස්තෝත්රං ලලිතාප්රීතිදායකම් ॥ 54 ॥

නාවිද්යාවේදිනේ බ්රූයාන්නාභක්තාය කදාචන ।
න ශඨාය න දුෂ්ටාය නාවිශ්වාසාය කර්හිචිත් ॥ 56 ॥

යෝ බ්රූයාත්ත්රිශතීං නාම්නාං තස්යානර්ථෝ මහාන්භවේත් ।
ඉත්යාජ්ඤා ශාංකරී ප්රෝක්තා තස්මාද්ගෝප්යමිදං ත්වයා ॥ 57 ॥

ලලිතාප්රේරිතේනෛව මයෝක්තං ස්තෝත්රමුත්තමම් ।
රහස්යනාමසාහස්රාදපි ගෝප්යමිදං මුනේ ॥ 58 ॥

සූත උවාච ।
ඒවමුක්ත්වා හයග්රීවඃ කුංභජං තාපසෝත්තමම් ।
ස්තෝත්රේණානේන ලලිතාං ස්තුත්වා ත්රිපුරසුංදරීම් ।
ආනංදලහරීමග්නමානසඃ සමවර්තත ॥ 59 ॥

ඉති බ්රහ්මාංඩපුරාණේ උත්තරඛංඩේ හයග්රීවාගස්ත්යසංවාදේ ලලිතෝපාඛ්යානේ ස්තෝත්රඛංඩේ ශ්රීලලිතාත්රිශතීස්තෝත්රරත්නම් ।