ශ්රී කාශී විශ්වනාථ ස්තෝත්රම්

කංඨේ යස්ය ලසත්කරාලගරලං ගංගාජලං මස්තකේ
වාමාංගේ ගිරිරාජරාජතනයා ජායා භවානී සතී ।
නංදිස්කංදගණාධිරාජසහිතා ශ්රීවිශ්වනාථප්රභුඃ
කාශීමංදිරසංස්ථිතෝऽඛිලගුරුර්දේයාත්සදා මංගලම් ॥ 1॥

යෝ දේවෛරසුරෛර්මුනීංද්රතනයෛර්ගංධර්වයක්ෂෝරගෛ-
ර්නාගෛර්භූතලවාසිභිර්ද්විජවරෛඃ සංසේවිතඃ සිද්ධයේ ।
යා ගංගෝත්තරවාහිනී පරිසරේ තීර්ථේරසංඛ්යෛර්වෘතා
සා කාශී ත්රිපුරාරිරාජනගරී දේයාත්සදා මංගලම් ॥ 2॥

තීර්ථානාං ප්රවරා මනෝරථකරී සංසාරපාරාපරා-
නංදා නංදිගණේශ්වරෛරුපහිතා දේවෛරශේෂෛඃ ස්තුතා ।
යා ශංභෝර්මණිකුංඩලෛකකණිකා විෂ්ණෝස්තපෝදීර්ඝිකා
සේයං ශ්රීමණිකර්ණිකා භගවතී දේයාත්සදා මංගලම් ॥ 3॥

ඒෂා ධර්මපතාකිනී තටරුහාසේවාවසන්නාකිනී
පශ්යන්පාතකිනී භගීරථතපඃසාඵල්යදේවාකිනී ।
ප්රේමාරූඪපතාකිනී ගිරිසුතා සා කේකරාස්වාකිනී
කාශ්යාමුත්තරවාහිනී සුරනදී දේයාත්සදා මංගලම් ॥ 4॥

විඝ්නාවාසනිවාසකාරණමහාගංඩස්ථලාලංබිතඃ
සිංදූරාරුණපුංජචංද්රකිරණප්රච්ඡාදිනාගච්ඡවිඃ ।
ශ්රීවිශ්වේශ්වරවල්ලභෝ ගිරිජයා සානංදකානංදිතඃ
ස්මේරාස්යස්තව ඪුංඪිරාජමුදිතෝ දේයාත්සදා මංගලම් ॥। 5॥ ।
කේදාරඃ කලශේශ්වරඃ පශුපතිර්ධර්මේශ්වරෝ මධ්යමෝ
ජ්යේෂ්ඨේශෝ පශුපශ්ච කංදුකශිවෝ විඝ්නේශ්වරෝ ජංබුකඃ ।
චංද්රේශෝ හ්යමෘතේශ්වරෝ භෘගුශිවඃ ශ්රීවෘද්ධකාලේශ්වරෝ
මධ්යේශෝ මණිකර්ණිකේශ්වරශිවෝ දේයාත්සදා මංගලම් ॥ 6॥

ගෝකර්ණස්ත්වථ භාරභූතනුදනුඃ ශ්රීචිත්රගුප්තේශ්වරෝ
යක්ෂේශස්තිලපර්ණසංගමශිවෝ ශෛලේශ්වරඃ කශ්යපඃ ।
නාගේශෝऽග්නිශිවෝ නිධීශ්වරශිවෝऽගස්තීශ්වරස්තාරක-
ජ්ඤානේශෝऽපි පිතාමහේශ්වරශිවෝ දේයාත්සදා මංගලම් ॥ 7॥

බ්රහ්මාංඩං සකලං මනෝෂිතරසෛ රත්නෛඃ පයෝභිර්හරං
ඛේලෛඃ පූරයතේ කුටුංබනිලයාන් ශංභෝර්විලාසප්රදා ।
නානාදිව්යලතාවිභූෂිතවපුඃ කාශීපුරාධීශ්වරී
ශ්රීවිශ්වේශ්වරසුංදරී භගවතී දේයාත්සදා මංගලම් ॥ 8॥

යා දේවී මහිෂාසුරප්රමථනී යා චංඩමුංඩාපහා
යා ශුංභාසුරරක්තබීජදමනී ශක්රාදිභිඃ සංස්තුතා ।
යා ශූලාසිධනුඃශරාභයකරා දුර්ගාදිසංදක්ෂිණා-
මාශ්රිත්යාශ්රිතවිඝ්නශංසමයතු දේයාත්සදා මංගලම් ॥ 9॥

ආද්යා ශ්රීර්විකටා තතස්තු විරජා ශ්රීමංගලා පාර්වතී
විඛ්යාතා කමලා විශාලනයනා ජ්යේෂ්ඨා විශිෂ්ටානනා ।
කාමාක්ෂී ච හරිප්රියා භගවතී ශ්රීඝංටඝංටාදිකා
මෞර්යා ෂෂ්ටිසහස්රමාතෘසහිතා දේයාත්සදා මංගලම් ॥ 10॥

ආදෞ පංචනදං ප්රයාගමපරං කේදාරකුංඩං කුරු-
ක්ෂේත්රං මානසකං සරෝऽමෘතජලං ශාවස්ය තීර්ථං පරම් ।
මත්ස්යෝදර්යථ දංඩඛාංඩසලිලං මංදාකිනී ජංබුකං
ඝංටාකර්ණසමුද්රකූපසහිතෝ දේයාත්සදා මංගලම් ॥ 11॥

රේවාකුංඩජලං සරස්වතිජලං දුර්වාසකුංඩං තතෝ
ලක්ෂ්මීතීර්ථලවාංකුශස්ය සලිලං කංදර්පකුංඩං තථා ।
දුර්ගාකුංඩමසීජලං හනුමතඃ කුංඩප්රතාපෝර්ජිතඃ
ප්රජ්ඤානප්රමුඛානි වඃ ප්රතිදිනං දේයාත්සදා මංගලම් ॥ 12॥

ආද්යඃ කූපවරස්තු කාලදමනඃ ශ්රීවෘද්ධකූපෝऽපරෝ
විඛ්යාතස්තු පරාශරස්තු විදිතඃ කූපඃ සරෝ මානසඃ ।
ජෛගීෂව්යමුනේඃ ශශාංකනෘපතේඃ කූපස්තු ධර්මෝද්භවඃ
ඛ්යාතඃ සප්තසමුද්රකූපසහිතෝ දේයාත්සදා මංගලම් ॥ 13॥

ලක්ෂ්යීනායකබිංදුමාධවහරිර්ලක්ෂ්මීනෘසිංහස්තතෝ
ගෝවිංදස්ත්වථ ගෝපිකාප්රියතමඃ ශ්රීනාරදඃ කේශවඃ ।
ගංගාකේශවවාමනාඛ්යතදනු ශ්වේතෝ හරිඃ කේශවඃ
ප්රහ්ලාදාදිසමස්තකේශවගණෝ දේයාත්සදා මංගලම් ॥ 14॥

ලෝලාර්කෝ විමලාර්කමායුඛරවිඃ සංවර්තසංජ්ඤෝ රවි-
ර්විඛ්යාතෝ ද්රුපදුඃඛඛෝල්කමරුණඃ ප්රෝක්තෝත්තරාර්කෝ රවිඃ ।
ගංගාර්කස්ත්වථ වෘද්ධවෘද්ධිවිබුධා කාශීපුරීසංස්ථිතාඃ
සූර්යා ද්වාදශසංජ්ඤකාඃ ප්රතිදිනං දේයාත්සදා මංගලම් ॥ 15॥

ආද්යෝ ඪුංඪිවිනායකෝ ගණපතිශ්චිංතාමණිඃ සිද්ධිදඃ
සේනාවිඝ්නපතිස්තු වක්ත්රවදනඃ ශ්රීපාශපාණිඃ ප්රභුඃ ।
ආශාපක්ෂවිනායකාප්රෂකරෝ මෝදාදිකඃ ෂඩ්ගුණෝ
ලෝලාර්කාදිවිනායකාඃ ප්රතිදිනං දේයාත්සදා මංගලම් ॥ 16॥।

හේරංබෝ නලකූබරෝ ගණපතිඃ ශ්රීභීමචංඩීගණෝ
විඛ්යාතෝ මණිකර්ණිකාගණපතිඃ ශ්රීසිද්ධිදෝ විඝ්නපඃ ।
මුංඩශ්චංඩමුඛශ්ච කෂ්ටහරණඃ ශ්රීදංඩහස්තෝ ගණඃ
ශ්රීදුර්ගාඛ්යගණාධිපඃ ප්රතිදිනං දේයාත්සදා මංගලම් ॥ 17॥

ආද්යෝ භෛරවභීෂණස්තදපරඃ ශ්රීකාලරාජඃ ක්රමා-
ච්ඡ්රීසංහාරකභෛරවස්ත්වථ රුරුශ්චෝන්මත්තකෝ භෛරවඃ ।
ක්රෝධශ්චංඩකපාලභෛරවවරඃ ශ්රීභූතනාථාදයෝ
හ්යෂ්ටෞ භෛරවමූර්තයඃ ප්රතිදිනං දේයාත්සදා මංගලම් ॥ 18॥

ආධාතෝऽංබිකයා සහ ත්රිනයනඃ සාර්ධං ගණෛර්නංදිතාං
කාශීමාශු විශන් හරඃ ප්රථමතෝ වාර්ෂධ්වජේऽවස්ථිතඃ ।
ආයාතා දශ ධේනවඃ සුකපිලා දිව්යෛඃ පයෝභිර්හරං
ඛ්යාතං තද්වෘෂභධ්වජේන කපිලං දේයාත්සදා මංගලම් ॥ 19॥

ආනංදාඛ්යවනං හි චංපකවනං ශ්රීනෛමිෂං ඛාංඩවං
පුණ්යං චෛත්රරථං ත්වශාකවිපිනං රංභාවනං පාවනම් ।
දුර්ගාරණ්යමථෝऽපි කෛරවවනං වෘංදාවනං පාවනං
විඛ්යාතානි වනානි වඃ ප්රතිදිනං දේයාත්සදා මංගලම් ॥ 20॥

අලිකුලදලනීලඃ කාලදංෂ්ට්රාකරාලඃ
සජලජලදනීලෝ ව්යාලයජ්ඤෝපවීතඃ ।
අභයවරදහස්තෝ ඩාමරෝද්දාමනාදඃ
සකලදුරිතභක්ෂෝ මංගලං වෝ දදාතු ॥ 21॥

අර්ධාංගේ විකටා ගිරීංද්රතනයා ගෞරී සතී සුංදරී
සර්වාංගේ විලසද්විභූතිධවලෝ කාලෝ විශාලේක්ෂණඃ ।
වීරේශඃ සහනංදිභෘංගිසහිතඃ ශ්රීවිශ්වනාථඃ ප්රභුඃ
කාශීමංදිරසංස්ථිතෝऽඛිලගුරුර්දේයාත්සදා මංගලම් ॥ 22॥

යඃ ප්රාතඃ ප්රයතඃ ප්රසන්නමනසා ප්රේමප්රමෝදාකුලඃ
ඛ්යාතං තත්ර විශිෂ්ටපාදභුවනේශේංද්රාදිභිර්යත්ස්තුතම් ।
ප්රාතඃ ප්රාඞ්මුඛමාසනෝත්තමගතෝ බ්රූයාච්ඡෘණෝත්යාදරාත්
කාශීවාසමුඛාන්යවාප්ය සතතං ප්රීතේ ශිවේ ධූර්ජටි ॥ 23॥

ඉති ශ්රීමච්ඡංකරාචාර්යවිරචිතං කාශීවිශ්වනාථස්තෝත්රම් ॥