ශිව සහස්ර නාම ස්තෝත්රම්

පූර්වපීඨිකා ॥

වාසුදේව උවාච ।
තතඃ ස ප්රයතෝ භූත්වා මම තාත යුධිෂ්ඨිර ।
ප්රාංජලිඃ ප්රාහ විප්රර්ෂිර්නාමසංග්රහමාදිතඃ ॥ 1 ॥

උපමන්යුරුවාච ।
බ්රහ්මප්රෝක්තෛරෘෂිප්රෝක්තෛර්වේදවේදාංගසංභවෛඃ ।
සර්වලෝකේෂු විඛ්යාතං ස්තුත්යං ස්තෝෂ්යාමි නාමභිඃ ॥ 2 ॥

මහද්භිර්විහිතෛඃ සත්යෛඃ සිද්ධෛඃ සර්වාර්ථසාධකෛඃ ।
ඍෂිණා තංඩිනා භක්ත්යා කෘතෛර්වේදකෘතාත්මනා ॥ 3 ॥

යථෝක්තෛඃ සාධුභිඃ ඛ්යාතෛර්මුනිභිස්තත්ත්වදර්ශිභිඃ ।
ප්රවරං ප්රථමං ස්වර්ග්යං සර්වභූතහිතං ශුභම් ॥ 4 ॥

ශ්රුතෛඃ සර්වත්ර ජගති බ්රහ්මලෝකාවතාරිතෛඃ ।
සත්යෛස්තත්පරමං බ්රහ්ම බ්රහ්මප්රෝක්තං සනාතනම් ॥ 5 ॥

වක්ෂ්යේ යදුකුලශ්රේෂ්ඨ ශෘණුෂ්වාවහිතෝ මම ।
වරයෛනං භවං දේවං භක්තස්ත්වං පරමේශ්වරම් ॥ 6 ॥

තේන තේ ශ්රාවයිෂ්යාමි යත්තද්බ්රහ්ම සනාතනම් ।
න ශක්යං විස්තරාත්කෘත්ස්නං වක්තුං සර්වස්ය කේනචිත් ॥ 7 ॥

යුක්තේනාපි විභූතීනාමපි වර්ෂශතෛරපි ।
යස්යාදිර්මධ්යමංතං ච සුරෛරපි න ගම්යතේ ॥ 8 ॥

කස්තස්ය ශක්නුයාද්වක්තුං ගුණාන් කාර්ත්ස්න්යේන මාධව ।
කිං තු දේවස්ය මහතඃ සංක්ෂිප්තාර්ථපදාක්ෂරම් ॥ 9 ॥

ශක්තිතශ්චරිතං වක්ෂ්යේ ප්රසාදාත්තස්ය ධීමතඃ ।
අප්රාප්ය තු තතෝऽනුජ්ඤාං න ශක්යඃ ස්තෝතුමීශ්වරඃ ॥ 10 ॥

යදා තේනාභ්යනුජ්ඤාතඃ ස්තුතෝ වෛ ස තදා මයා ।
අනාදිනිධනස්යාහං ජගද්යෝනේර්මහාත්මනඃ ॥ 11 ॥

නාම්නාං කිංචිත්සමුද්දේශං වක්ෂ්යාම්යව්යක්තයෝනිනඃ ।
වරදස්ය වරේණ්යස්ය විශ්වරූපස්ය ධීමතඃ ॥ 12 ॥

ශෘණු නාම්නාං ච යං කෘෂ්ණ යදුක්තං පද්මයෝනිනා ।
දශනාමසහස්රාණි යාන්යාහ ප්රපිතාමහඃ ॥ 13 ॥

තානි නිර්මථ්ය මනසා දධ්නෝ ඝෘතමිවෝද්ධෘතම් ।
ගිරේඃ සාරං යථා හේම පුෂ්පසාරං යථා මධු ॥ 14 ॥

ඝෘතාත්සාරං යථා මංඩස්තථෛතත්සාරමුද්ධෘතම් ।
සර්වපාපාපහමිදං චතුර්වේදසමන්විතම් ॥ 15 ॥

ප්රයත්නේනාධිගංතව්යං ධාර්යං ච ප්රයතාත්මනා ।
මාංගළ්යං පෞෂ්ටිකං චෛව රක්ෂෝඝ්නං පාවනං මහත් ॥ 16 ॥

ඉදං භක්තාය දාතව්යං ශ්රද්දධානාස්තිකාය ච ।
නාශ්රද්දධානරූපාය නාස්තිකායාජිතාත්මනේ ॥ 17 ॥

යශ්චාභ්යසූයතේ දේවං කාරණාත්මානමීශ්වරම් ।
ස කෘෂ්ණ නරකං යාති සහ පූර්වෛඃ සහාත්මජෛඃ ॥ 18 ॥

ඉදං ධ්යානමිදං යෝගමිදං ධ්යේයමනුත්තමම් ।
ඉදං ජප්යමිදං ජ්ඤානං රහස්යමිදමුත්තමම් ॥ 19 ॥

යං ජ්ඤාත්වා අංතකාලේපි ගච්ඡේත පරමාං ගතිම් ।
පවිත්රං මංගළං මේධ්යං කල්යාණමිදමුත්තමම් ॥ 20 ॥

ඉදං බ්රහ්මා පුරා කෘත්වා සර්වලෝකපිතාමහඃ ।
සර්ව ස්තවානාං රාජත්වේ දිව්යානාං සමකල්පයත් ॥ 21 ॥

තදා ප්රභෘති චෛවායමීශ්වරස්ය මහාත්මනඃ ।
ස්තවරාජ ඉති ඛ්යාතෝ ජගත්යමරපූජිතඃ ॥ 22 ॥

බ්රහ්මලෝකාදයං ස්වර්ගේ ස්තවරාජෝऽවතාරිතඃ ।
යතස්තංඩිඃ පුරා ප්රාප තේන තංඩිකෘතෝऽභවත් ॥ 23 ॥

ස්වර්ගාච්චෛවාත්ර භූර්ලෝකං තංඩිනා හ්යවතාරිතඃ ।
සර්වමංගළමාංගළ්යං සර්වපාපප්රණාශනම් ॥ 24 ॥

නිගදිෂ්යේ මහාබාහෝ ස්තවානාමුත්තමං ස්තවම් ।
බ්රහ්මණාමපි යද්බ්රහ්ම පරාණාමපි යත්පරම් ॥ 25 ॥

තේජසාමපි යත්තේජස්තපසාමපි යත්තපඃ ।
ශාංතානාමපි යඃ ශාංතෝ ද්යුතීනාමපි යා ද්යුතිඃ ॥ 26 ॥

දාංතානාමපි යෝ දාංතෝ ධීමතාමපි යා ච ධීඃ ।
දේවානාමපි යෝ දේව ඍෂීණාමපි යස්ත්වෘෂිඃ ॥ 27 ॥

යජ්ඤානාමපි යෝ යජ්ඤඃ ශිවානාමපි යඃ ශිවඃ ।
රුද්රාණාමපි යෝ රුද්රඃ ප්රභා ප්රභවතාමපි ॥ 28 ॥

යෝගිනාමපි යෝ යෝගී කාරණානාං ච කාරණම් ।
යතෝ ලෝකාඃ සංභවංති න භවංති යතඃ පුනඃ ॥ 29 ॥

සර්වභූතාත්මභූතස්ය හරස්යාමිතතේජසඃ ।
අෂ්ටෝත්තරසහස්රං තු නාම්නාං ශර්වස්ය මේ ශෘණු ।
යච්ඡ්රුත්වා මනුජව්යාඝ්ර සර්වාන්කාමානවාප්ස්යසි ॥ 30 ॥

ධ්යානම් ।
ශාංතං පද්මාසනස්ථං ශශිධරමුකුටං පංචවක්ත්රං ත්රිනේත්රං
ශූලං වජ්රං ච ඛඩ්ගං පරශුමභයදං දක්ෂභාගේ වහංතම් ।
නාගං පාශං ච ඝංටාං ප්රළයහුතවහං සාංකුශං වාමභාගේ
නානාලංකාරයුක්තං ස්ඵටිකමණිනිභං පාර්වතීශං නමාමි ॥

ස්තෝත්රම් ।
ඕං ස්ථිරඃ ස්ථාණුඃ ප්රභුර්භීමඃ ප්රවරෝ වරදෝ වරඃ ।
සර්වාත්මා සර්වවිඛ්යාතඃ සර්වඃ සර්වකරෝ භවඃ ॥ 1 ॥

ජටී චර්මී ශිඛංඩී ච සර්වාංගඃ සර්වභාවනඃ ।
හරශ්ච හරිණාක්ෂශ්ච සර්වභූතහරඃ ප්රභුඃ ॥ 2 ॥

ප්රවෘත්තිශ්ච නිවෘත්තිශ්ච නියතඃ ශාශ්වතෝ ධ්රුවඃ ।
ශ්මශානවාසී භගවාන් ඛචරෝ ගෝචරෝऽර්දනඃ ॥ 3 ॥

අභිවාද්යෝ මහාකර්මා තපස්වී භූතභාවනඃ ।
උන්මත්තවේෂප්රච්ඡන්නඃ සර්වලෝකප්රජාපතිඃ ॥ 4 ॥

මහාරූපෝ මහාකායෝ වෘෂරූපෝ මහායශාඃ ।
මහාත්මා සර්වභූතාත්මා විශ්වරූපෝ මහාහනුඃ ॥ 5 ॥

ලෝකපාලෝऽංතර්හිතාත්මා ප්රසාදෝ හයගර්දභිඃ ।
පවිත්රං ච මහාංශ්චෛව නියමෝ නියමාශ්රිතඃ ॥ 6 ॥

සර්වකර්මා ස්වයංභූත ආදිරාදිකරෝ නිධිඃ ।
සහස්රාක්ෂෝ විශාලාක්ෂඃ සෝමෝ නක්ෂත්රසාධකඃ ॥ 7 ॥

චංද්රඃ සූර්යඃ ශනිඃ කේතුර්ග්රහෝ ග්රහපතිර්වරඃ ।
අත්රිරත්ර්යා නමස්කර්තා මෘගබාණාර්පණෝऽනඝඃ ॥ 8 ॥ [ආද්යංතලයකර්තා ච]

මහාතපා ඝෝරතපා අදීනෝ දීනසාධකඃ ।
සංවත්සරකරෝ මංත්රඃ ප්රමාණං පරමං තපඃ ॥ 9 ॥

යෝගී යෝජ්යෝ මහාබීජෝ මහාරේතා මහාබලඃ ।
සුවර්ණරේතාඃ සර්වජ්ඤඃ සුබීජෝ බීජවාහනඃ ॥ 10 ॥

දශබාහුස්ත්වනිමිෂෝ නීලකංඨ උමාපතිඃ ।
විශ්වරූපඃ ස්වයං ශ්රේෂ්ඨෝ බලවීරෝ බලෝ ගණඃ ॥ 11 ॥

ගණකර්තා ගණපතිර්දිග්වාසාඃ කාම ඒව ච ।
මංත්රවිත්පරමෝ මංත්රඃ සර්වභාවකරෝ හරඃ ॥ 12 ॥

කමංඩලුධරෝ ධන්වී බාණහස්තඃ කපාලවාන් ।
අශනී ශතඝ්නී ඛඩ්ගී පට්ටිශී චායුධී මහාන් ॥ 13 ॥

ස්රුවහස්තඃ සුරූපශ්ච තේජස්තේජස්කරෝ නිධිඃ ।
උෂ්ණීෂී ච සුවක්ත්රශ්ච උදග්රෝ විනතස්තථා ॥ 14 ॥

දීර්ඝශ්ච හරිකේශශ්ච සුතීර්ථඃ කෘෂ්ණ ඒව ච ।
සෘගාලරූපඃ සිද්ධාර්ථෝ මුංඩඃ සර්වශුභංකරඃ ॥ 15 ॥

අජශ්ච බහුරූපශ්ච ගංධධාරී කපර්ද්යපි ।
ඌර්ධ්වරේතා ඌර්ධ්වලිංග ඌර්ධ්වශායී නභඃස්ථලඃ ॥ 16 ॥

ත්රිජටී චීරවාසාශ්ච රුද්රඃ සේනාපතිර්විභුඃ ।
අහශ්චරෝ නක්තංචරස්තිග්මමන්යුඃ සුවර්චසඃ ॥ 17 ॥

ගජහා දෛත්යහා කාලෝ ලෝකධාතා ගුණාකරඃ ।
සිංහශාර්දූලරූපශ්ච ආර්ද්රචර්මාංබරාවෘතඃ ॥ 18 ॥

කාලයෝගී මහානාදඃ සර්වකාමශ්චතුෂ්පථඃ ।
නිශාචරඃ ප්රේතචාරී භූතචාරී මහේශ්වරඃ ॥ 19 ॥

බහුභූතෝ බහුධරඃ ස්වර්භානුරමිතෝ ගතිඃ ।
නෘත්යප්රියෝ නිත්යනර්තෝ නර්තකඃ සර්වලාලසඃ ॥ 20 ॥

ඝෝරෝ මහාතපාඃ පාශෝ නිත්යෝ ගිරිරුහෝ නභඃ ।
සහස්රහස්තෝ විජයෝ ව්යවසායෝ හ්යතංද්රිතඃ ॥ 21 ॥

අධර්ෂණෝ ධර්ෂණාත්මා යජ්ඤහා කාමනාශකඃ । [මර්ෂ]
දක්ෂයාගාපහාරී ච සුසහෝ මධ්යමස්තථා ॥ 22 ॥

තේජෝපහාරී බලහා මුදිතෝऽර්ථෝऽජිතෝऽවරඃ ।
ගංභීරඝෝෂෝ ගංභීරෝ ගංභීරබලවාහනඃ ॥ 23 ॥

න්යග්රෝධරූපෝ න්යග්රෝධෝ වෘක්ෂකර්ණස්ථිතිර්විභුඃ ।
සුතීක්ෂ්ණදශනශ්චෛව මහාකායෝ මහානනඃ ॥ 24 ॥

විෂ්වක්සේනෝ හරිර්යජ්ඤඃ සංයුගාපීඩවාහනඃ ।
තීක්ෂ්ණතාපශ්ච හර්යශ්වඃ සහායඃ කර්මකාලවිත් ॥ 25 ॥

විෂ්ණුප්රසාදිතෝ යජ්ඤඃ සමුද්රෝ බඩබාමුඛඃ ।
හුතාශනසහායශ්ච ප්රශාංතාත්මා හුතාශනඃ ॥ 26 ॥

උග්රතේජා මහාතේජා ජන්යෝ විජයකාලවිත් ।
ජ්යෝතිෂාමයනං සිද්ධිඃ සර්වවිග්රහ ඒව ච ॥ 27 ॥

ශිඛී මුංඩී ජටී ජ්වාලී මූර්තිජෝ මූර්ධගෝ බලී ।
වේණවී පණවී තාලී ඛලී කාලකටංකටඃ ॥ 28 ॥

නක්ෂත්රවිග්රහමතිර්ගුණබුද්ධිර්ලයෝऽගමඃ ।
ප්රජාපතිර්විශ්වබාහුර්විභාගඃ සර්වගෝऽමුඛඃ ॥ 29 ॥

විමෝචනඃ සුසරණෝ හිරණ්යකවචෝද්භවඃ ।
මේඪ්රජෝ බලචාරී ච මහීචාරී ස්රුතස්තථා ॥ 30 ॥ [මේඝජෝ]

සර්වතූර්යනිනාදී ච සර්වාතෝද්යපරිග්රහඃ ।
ව්යාලරූපෝ ගුහාවාසී ගුහෝ මාලී තරංගවිත් ॥ 31 ॥

ත්රිදශස්ත්රිකාලධෘක්කර්මසර්වබංධවිමෝචනඃ ।
බංධනස්ත්වසුරේංද්රාණාං යුධිශත්රුවිනාශනඃ ॥ 32 ॥

සාංඛ්යප්රසාදෝ දුර්වාසාඃ සර්වසාධුනිෂේවිතඃ ।
ප්රස්කංදනෝ විභාගජ්ඤෝ අතුල්යෝ යජ්ඤභාගවිත් ॥ 33 ॥

සර්වවාසඃ සර්වචාරී දුර්වාසා වාසවෝऽමරඃ ।
හෛමෝ හේමකරෝऽයජ්ඤඃ සර්වධාරී ධරෝත්තමඃ ॥ 34 ॥ [යජ්ඤඃ]

ලෝහිතාක්ෂෝ මහාක්ෂශ්ච විජයාක්ෂෝ විශාරදඃ ।
සංග්රහෝ නිග්රහඃ කර්තා සර්පචීරනිවාසනඃ ॥ 35 ॥

මුඛ්යෝऽමුඛ්යශ්ච දේහශ්ච කාහලිඃ සර්වකාමදඃ ।
සර්වකාලප්රසාදශ්ච සුබලෝ බලරූපධෘත් ॥ 36 ॥

සර්වකාමවරශ්චෛව සර්වදඃ සර්වතෝමුඛඃ ।
ආකාශනිර්විරූපශ්ච නිපාතී හ්යවශඃ ඛගඃ ॥ 37 ॥

රෞද්රරූපෝऽංශුරාදිත්යෝ බහුරශ්මිඃ සුවර්චසී ।
වසුවේගෝ මහාවේගෝ මනෝවේගෝ නිශාචරඃ ॥ 38 ॥

සර්වවාසී ශ්රියාවාසී උපදේශකරෝऽකරඃ ।
මුනිරාත්මනිරාලෝකඃ සංභග්නශ්ච සහස්රදඃ ॥ 39 ॥

පක්ෂී ච පක්ෂරූපශ්ච අතිදීප්තෝ විශාං පතිඃ ।
උන්මාදෝ මදනඃ කාමෝ හ්යශ්වත්ථෝऽර්ථකරෝ යශඃ ॥ 40 ॥

වාමදේවශ්ච වාමශ්ච ප්රාග්දක්ෂිණශ්ච වාමනඃ ।
සිද්ධයෝගී මහර්ෂිශ්ච සිද්ධාර්ථඃ සිද්ධසාධකඃ ॥ 41 ॥

භික්ෂුශ්ච භික්ෂුරූපශ්ච විපණෝ මෘදුරව්යයඃ ।
මහාසේනෝ විශාඛශ්ච ෂෂ්ටිභාගෝ ගවාං පතිඃ ॥ 42 ॥

වජ්රහස්තශ්ච විෂ්කංභී චමූස්තංභන ඒව ච ।
වෘත්තාවෘත්තකරස්තාලෝ මධුර්මධුකලෝචනඃ ॥ 43 ॥

වාචස්පත්යෝ වාජසනෝ නිත්යමාශ්රමපූජිතඃ । [නිත්යමාශ්රිතපූජිතඃ]
බ්රහ්මචාරී ලෝකචාරී සර්වචාරී විචාරවිත් ॥ 44 ॥

ඊශාන ඊශ්වරඃ කාලෝ නිශාචාරී පිනාකභෘත් ।
නිමිත්තස්ථෝ නිමිත්තං ච නංදිර්නංදිකරෝ හරිඃ ॥ 45 ॥

නංදීශ්වරශ්ච නංදී ච නංදනෝ නංදිවර්ධනඃ ।
භගහාරී නිහංතා ච කාලෝ බ්රහ්මා පිතාමහඃ ॥ 46 ॥

චතුර්මුඛෝ මහාලිංගශ්චාරුලිංගස්තථෛව ච ।
ලිංගාධ්යක්ෂඃ සුරාධ්යක්ෂෝ යෝගාධ්යක්ෂෝ යුගාවහඃ ॥ 47 ॥

බීජාධ්යක්ෂෝ බීජකර්තා අධ්යාත්මානුගතෝ බලඃ ।
ඉතිහාසඃ සකල්පශ්ච ගෞතමෝऽථ නිශාකරඃ ॥ 48 ॥

දංභෝ හ්යදංභෝ වෛදංභෝ වශ්යෝ වශකරඃ කලිඃ ।
ලෝකකර්තා පශුපතිර්මහාකර්තා හ්යනෞෂධඃ ॥ 49 ॥

අක්ෂරං පරමං බ්රහ්ම බලවච්ඡක්ර ඒව ච ।
නීතිර්හ්යනීතිඃ ශුද්ධාත්මා ශුද්ධෝ මාන්යෝ ගතාගතඃ ॥ 50 ॥

බහුප්රසාදඃ සුස්වප්නෝ දර්පණෝऽථ ත්වමිත්රජිත් ।
වේදකාරෝ මංත්රකාරෝ විද්වාන් සමරමර්දනඃ ॥ 51 ॥

මහාමේඝනිවාසී ච මහාඝෝරෝ වශීකරඃ ।
අග්නිජ්වාලෝ මහාජ්වාලෝ අතිධූම්රෝ හුතෝ හවිඃ ॥ 52 ॥

වෘෂණඃ ශංකරෝ නිත්යවර්චස්වී ධූමකේතනඃ ।
නීලස්තථාංගලුබ්ධශ්ච ශෝභනෝ නිරවග්රහඃ ॥ 53 ॥

ස්වස්තිදඃ ස්වස්තිභාවශ්ච භාගී භාගකරෝ ලඝුඃ ।
උත්සංගශ්ච මහාංගශ්ච මහාගර්භපරායණඃ ॥ 54 ॥

කෘෂ්ණවර්ණඃ සුවර්ණශ්ච ඉංද්රියං සර්වදේහිනාම් ।
මහාපාදෝ මහාහස්තෝ මහාකායෝ මහායශාඃ ॥ 55 ॥

මහාමූර්ධා මහාමාත්රෝ මහානේත්රෝ නිශාලයඃ ।
මහාංතකෝ මහාකර්ණෝ මහෝෂ්ඨශ්ච මහාහනුඃ ॥ 56 ॥

මහානාසෝ මහාකංබුර්මහාග්රීවඃ ශ්මශානභාක් ।
මහාවක්ෂා මහෝරස්කෝ හ්යංතරාත්මා මෘගාලයඃ ॥ 57 ॥

ලංබනෝ ලංබිතෝෂ්ඨශ්ච මහාමායඃ පයෝනිධිඃ ।
මහාදංතෝ මහාදංෂ්ට්රෝ මහාජිහ්වෝ මහාමුඛඃ ॥ 58 ॥

මහානඛෝ මහාරෝමා මහාකේශෝ මහාජටඃ ।
ප්රසන්නශ්ච ප්රසාදශ්ච ප්රත්යයෝ ගිරිසාධනඃ ॥ 59 ॥

ස්නේහනෝऽස්නේහනශ්චෛව අජිතශ්ච මහාමුනිඃ ।
වෘක්ෂාකාරෝ වෘක්ෂකේතුරනලෝ වායුවාහනඃ ॥ 60 ॥

ගංඩලී මේරුධාමා ච දේවාධිපතිරේව ච ।
අථර්වශීර්ෂඃ සාමාස්ය ඍක්සහස්රාමිතේක්ෂණඃ ॥ 61 ॥

යජුඃ පාදභුජෝ ගුහ්යඃ ප්රකාශෝ ජංගමස්තථා ।
අමෝඝාර්ථඃ ප්රසාදශ්ච අභිගම්යඃ සුදර්ශනඃ ॥ 62 ॥

උපකාරඃ ප්රියඃ සර්වඃ කනකඃ කාංචනච්ඡවිඃ ।
නාභිර්නංදිකරෝ භාවඃ පුෂ්කරස්ථපතිඃ ස්ථිරඃ ॥ 63 ॥

ද්වාදශස්ත්රාසනශ්චාද්යෝ යජ්ඤෝ යජ්ඤසමාහිතඃ ।
නක්තං කලිශ්ච කාලශ්ච මකරඃ කාලපූජිතඃ ॥ 64 ॥

සගණෝ ගණකාරශ්ච භූතවාහනසාරථිඃ ।
භස්මශයෝ භස්මගෝප්තා භස්මභූතස්තරුර්ගණඃ ॥ 65 ॥

ලෝකපාලස්තථාऽලෝකෝ මහාත්මා සර්වපූජිතඃ ।
ශුක්ලස්ත්රිශුක්ලඃ සංපන්නඃ ශුචිර්භූතනිෂේවිතඃ ॥ 66 ॥

ආශ්රමස්ථඃ ක්රියාවස්ථෝ විශ්වකර්මමතිර්වරඃ ।
විශාලශාඛස්තාම්රෝෂ්ඨෝ හ්යංබුජාලඃ සුනිශ්චලඃ ॥ 67 ॥

කපිලඃ කපිශඃ ශුක්ල ආයුශ්චෛව පරෝ¶ඃ ।
ගංධර්වෝ හ්යදිතිස්තාර්ක්ෂ්යඃ සුවිජ්ඤේයඃ සුශාරදඃ ॥ 68 ॥

පරශ්වධායුධෝ දේවෝ හ්යනුකාරී සුබාංධවඃ ।
තුංබවීණෝ මහාක්රෝධ ඌර්ධ්වරේතා ජලේශයඃ ॥ 69 ॥

උග්රෝ වංශකරෝ වංශෝ වංශනාදෝ හ්යනිංදිතඃ ।
සර්වාංගරූපෝ මායාවී සුහෘදෝ හ්යනිලෝऽනලඃ ॥ 70 ॥

බංධනෝ බංධකර්තා ච සුබංධනවිමෝචනඃ ।
ස යජ්ඤාරිඃ ස කාමාරිර්මහාදංෂ්ට්රෝ මහායුධඃ ॥ 71 ॥

බහුධා නිංදිතඃ ශර්වඃ ශංකරඃ ශංකරෝऽධනඃ ।
අමරේශෝ මහාදේවෝ විශ්වදේවඃ සුරාරිහා ॥ 72 ॥

අහිර්බුධ්න්යෝऽනිලාභශ්ච චේකිතානෝ හවිස්තථා । [හරි]
අජෛකපාච්ච කාපාලී ත්රිශංකුරජිතඃ ශිවඃ ॥ 73 ॥

ධන්වංතරිර්ධූමකේතුඃ ස්කංදෝ වෛශ්රවණස්තථා ।
ධාතා ශක්රශ්ච විෂ්ණුශ්ච මිත්රස්ත්වෂ්ටා ධ්රුවෝ ධරඃ ॥ 74 ॥

ප්රභාවඃ සර්වගෝ වායුරර්යමා සවිතා රවිඃ ।
උෂංගුශ්ච විධාතා ච මාංධාතා භූතභාවනඃ ॥ 75 ॥

විභුර්වර්ණවිභාවී ච සර්වකාමගුණාවහඃ ।
පද්මනාභෝ මහාගර්භශ්චංද්රවක්ත්රෝऽනිලෝऽනලඃ ॥ 76 ॥

බලවාංශ්චෝපශාංතශ්ච පුරාණඃ පුණ්යචංචුරී ।
කුරුකර්තා කුරුවාසී කුරුභූතෝ ගුණෞෂධඃ ॥ 77 ॥

සර්වාශයෝ දර්භචාරී සර්වේෂාං ප්රාණිනාං පතිඃ ।
දේවදේවඃ සුඛාසක්තඃ සදසත්සර්වරත්නවිත් ॥ 78 ॥

කෛලාසගිරිවාසී ච හිමවද්ගිරිසංශ්රයඃ ।
කූලහාරී කූලකර්තා බහුවිද්යෝ බහුප්රදඃ ॥ 79 ॥

වණිජෝ වර්ධකී වෘක්ෂෝ වකුලශ්චංදනශ්ඡදඃ ।
සාරග්රීවෝ මහාජත්රුරලෝලශ්ච මහෞෂධඃ ॥ 80 ॥

සිද්ධාර්ථකාරී සිද්ධාර්ථශ්ඡංදෝව්යාකරණෝත්තරඃ ।
සිංහනාදඃ සිංහදංෂ්ට්රඃ සිංහගඃ සිංහවාහනඃ ॥ 81 ॥

ප්රභාවාත්මා ජගත්කාලස්ථාලෝ ලෝකහිතස්තරුඃ ।
සාරංගෝ නවචක්රාංගඃ කේතුමාලී සභාවනඃ ॥ 82 ॥

භූතාලයෝ භූතපතිරහෝරාත්රමනිංදිතඃ ॥ 83 ॥

වාහිතා සර්වභූතානාං නිලයශ්ච විභුර්භවඃ ।
අමෝඝඃ සංයතෝ හ්යශ්වෝ භෝජනඃ ප්රාණධාරණඃ ॥ 84 ॥

ධෘතිමාන් මතිමාන් දක්ෂඃ සත්කෘතශ්ච යුගාධිපඃ ।
ගෝපාලිර්ගෝපතිර්ග්රාමෝ ගෝචර්මවසනෝ හරිඃ ॥ 85 ॥

හිරණ්යබාහුශ්ච තථා ගුහාපාලඃ ප්රවේශිනාම් ।
ප්රකෘෂ්ටාරිර්මහාහර්ෂෝ ජිතකාමෝ ජිතේංද්රියඃ ॥ 86 ॥

ගාංධාරශ්ච සුවාසශ්ච තපඃසක්තෝ රතිර්නරඃ ।
මහාගීතෝ මහානෘත්යෝ හ්යප්සරෝගණසේවිතඃ ॥ 87 ॥

මහාකේතුර්මහාධාතුර්නෛකසානුචරශ්චලඃ ।
ආවේදනීය ආදේශඃ සර්වගංධසුඛාවහඃ ॥ 88 ॥

තෝරණස්තාරණෝ වාතඃ පරිධී පතිඛේචරඃ ।
සංයෝගෝ වර්ධනෝ වෘද්ධෝ අතිවෘද්ධෝ ගුණාධිකඃ ॥ 89 ॥

නිත්ය ආත්මසහායශ්ච දේවාසුරපතිඃ පතිඃ ।
යුක්තශ්ච යුක්තබාහුශ්ච දේවෝ දිවිසුපර්වණඃ ॥ 90 ॥

ආෂාඪශ්ච සුෂාඪශ්ච ධ්රුවෝऽථ හරිණෝ හරඃ ।
වපුරාවර්තමානේභ්යෝ වසුශ්රේෂ්ඨෝ මහාපථඃ ॥ 91 ॥

ශිරෝහාරී විමර්ශශ්ච සර්වලක්ෂණලක්ෂිතඃ ।
අක්ෂශ්ච රථයෝගී ච සර්වයෝගී මහාබලඃ ॥ 92 ॥

සමාම්නායෝऽසමාම්නායස්තීර්ථදේවෝ මහාරථඃ ।
නිර්ජීවෝ ජීවනෝ මංත්රඃ ශුභාක්ෂෝ බහුකර්කශඃ ॥ 93 ॥

රත්නප්රභූතෝ රක්තාංගෝ මහාර්ණවනිපානවිත් । [රත්නාංගෝ]
මූලං විශාලෝ හ්යමෘතෝ ව්යක්තාව්යක්තස්තපෝනිධිඃ ॥ 94 ॥

ආරෝහණෝऽධිරෝහශ්ච ශීලධාරී මහායශාඃ ।
සේනාකල්පෝ මහාකල්පෝ යෝගෝ යුගකරෝ හරිඃ ॥ 95 ॥ [යෝගකරෝ]

යුගරූපෝ මහාරූපෝ මහානාගහනෝ වධඃ ।
න්යායනිර්වපණඃ පාදඃ පංඩිතෝ හ්යචලෝපමඃ ॥ 96 ॥

බහුමාලෝ මහාමාලඃ ශශී හරසුලෝචනඃ ।
විස්තාරෝ ලවණඃ කූපස්ත්රියුගඃ සඵලෝදයඃ ॥ 97 ॥

ත්රිලෝචනෝ විෂණ්ණාංගෝ මණිවිද්ධෝ ජටාධරඃ ।
බිංදුර්විසර්ගඃ සුමුඛඃ ශරඃ සර්වායුධඃ සහඃ ॥ 98 ॥

නිවේදනඃ සුඛාජාතඃ සුගංධාරෝ මහාධනුඃ ।
ගංධපාලී ච භගවානුත්ථානඃ සර්වකර්මණාම් ॥ 99 ॥

මංථානෝ බහුලෝ වායුඃ සකලඃ සර්වලෝචනඃ ।
තලස්තාලඃ කරස්ථාලී ඌර්ධ්වසංහනනෝ මහාන් ॥ 100 ॥

ඡත්රං සුච්ඡත්රෝ විඛ්යාතෝ ලෝකඃ සර්වාශ්රයඃ ක්රමඃ ।
මුංඩෝ විරූපෝ විකෘතෝ දංඩී කුංඩී විකුර්වණඃ ॥ 101 ॥

හර්යක්ෂඃ කකුභෝ වජ්රී ශතජිහ්වඃ සහස්රපාත් ।
සහස්රමූර්ධා දේවේංද්රඃ සර්වදේවමයෝ ගුරුඃ ॥ 102 ॥

සහස්රබාහුඃ සර්වාංගඃ ශරණ්යඃ සර්වලෝකකෘත් ।
පවිත්රං ත්රිකකුන්මංත්රඃ කනිෂ්ඨඃ කෘෂ්ණපිංගළඃ ॥ 103 ॥

බ්රහ්මදංඩවිනිර්මාතා ශතඝ්නීපාශශක්තිමාන් ।
පද්මගර්භෝ මහාගර්භෝ බ්රහ්මගර්භෝ ජලෝද්භවඃ ॥ 104 ॥

ගභස්තිර්බ්රහ්මකෘද්බ්රහ්මී බ්රහ්මවිද්බ්රාහ්මණෝ ගතිඃ ।
අනංතරූපෝ නෛකාත්මා තිග්මතේජාඃ ස්වයංභුවඃ ॥ 105 ॥

ඌර්ධ්වගාත්මා පශුපතිර්වාතරංහා මනෝජවඃ ।
චංදනී පද්මනාලාග්රඃ සුරභ්යුත්තරණෝ නරඃ ॥ 106 ॥

කර්ණිකාරමහාස්රග්වී නීලමෞළිඃ පිනාකධෘත් ।
උමාපතිරුමාකාංතෝ ජාහ්නවීධෘදුමාධවඃ ॥ 107 ॥

වරෝ වරාහෝ වරදෝ වරේණ්යඃ සුමහාස්වනඃ ।
මහාප්රසාදෝ දමනඃ ශත්රුහා ශ්වේතපිංගළඃ ॥ 108 ॥

පීතාත්මා පරමාත්මා ච ප්රයතාත්මා ප්රධානධෘත් । [ප්රීතාත්මා]
සර්වපාර්ශ්වමුඛස්ත්ර්යක්ෂෝ ධර්මසාධාරණෝ වරඃ ॥ 109 ॥

චරාචරාත්මා සූක්ෂ්මාත්මා අමෘතෝ ගෝවෘෂේශ්වරඃ ।
සාධ්යර්ෂිර්වසුරාදිත්යෝ විවස්වාන්සවිතාමෘතඃ ॥ 110 ॥

ව්යාසඃ සර්ගඃ සුසංක්ෂේපෝ විස්තරඃ පර්යයෝ නරඃ ।
ඍතුඃ සංවත්සරෝ මාසඃ පක්ෂඃ සංඛ්යාසමාපනඃ ॥ 111 ॥

කළා කාෂ්ඨා ලවා මාත්රා මුහූර්තාහඃ ක්ෂපාඃ ක්ෂණාඃ ।
විශ්වක්ෂේත්රං ප්රජාබීජං ලිංගමාද්යස්තු නිර්ගමඃ ॥ 112 ॥

සදසද්ව්යක්තමව්යක්තං පිතා මාතා පිතාමහඃ ।
ස්වර්ගද්වාරං ප්රජාද්වාරං මෝක්ෂද්වාරං ත්රිවිෂ්ටපම් ॥ 113 ॥

නිර්වාණං හ්ලාදනශ්චෛව බ්රහ්මලෝකඃ පරා ගතිඃ ।
දේවාසුරවිනිර්මාතා දේවාසුරපරායණඃ ॥ 114 ॥

දේවාසුරගුරුර්දේවෝ දේවාසුරනමස්කෘතඃ ।
දේවාසුරමහාමාත්රෝ දේවාසුරගණාශ්රයඃ ॥ 115 ॥

දේවාසුරගණාධ්යක්ෂෝ දේවාසුරගණාග්රණීඃ ।
දේවාතිදේවෝ දේවර්ෂිර්දේවාසුරවරප්රදඃ ॥ 116 ॥ [දේවාදි]

දේවාසුරේශ්වරෝ විශ්වෝ දේවාසුරමහේශ්වරඃ ।
සර්වදේවමයෝऽචිංත්යෝ දේවතාත්මාऽऽත්මසංභවඃ ॥ 117 ॥

උද්භිත්ත්රිවික්රමෝ වෛද්යෝ විරජෝ නීරජෝऽමරඃ ।
ඊඩ්යෝ හස්තීශ්වරෝ ව්යාඝ්රෝ දේවසිංහෝ නරර්ෂභඃ ॥ 118 ॥

විබුධෝऽග්රවරඃ සූක්ෂ්මඃ සර්වදේවස්තපෝමයඃ ।
සුයුක්තඃ ශෝභනෝ වජ්රී ප්රාසානාං ප්රභවෝऽව්යයඃ ॥ 119 ॥

ගුහඃ කාංතෝ නිජඃ සර්ගඃ පවිත්රං සර්වපාවනඃ ।
ශෘංගී ශෘංගප්රියෝ බභ්රූ රාජරාජෝ නිරාමයඃ ॥ 120 ॥

අභිරාමඃ සුරගණෝ විරාමඃ සර්වසාධනඃ ।
ලලාටාක්ෂෝ විශ්වදේවෝ හරිණෝ බ්රහ්මවර්චසඃ ॥ 121 ॥

ස්ථාවරාණාං පතිශ්චෛව නියමේංද්රියවර්ධනඃ ।
සිද්ධාර්ථඃ සිද්ධභූතාර්ථෝऽචිංත්යඃ සත්යව්රතඃ ශුචිඃ ॥ 122 ॥

ව්රතාධිපඃ පරං බ්රහ්ම භක්තානාං පරමා ගතිඃ । [භක්තානුග්රහකාරකඃ]
විමුක්තෝ මුක්තතේජාශ්ච ශ්රීමාන් ශ්රීවර්ධනෝ ජගත් ॥ 123 ॥

උත්තරපීඨිකා (ඵලශෘති)
යථා ප්රධානං භගවානිති භක්ත්යා ස්තුතෝ මයා ।
යං න බ්රහ්මාදයෝ දේවා විදුස්තත්ත්වේන නර්ෂයඃ ॥ 1 ॥

ස්තෝතව්යමර්ච්යං වංද්යං ච කඃ ස්තෝෂ්යති ජගත්පතිම් ।
භක්ත්යා ත්වේවං පුරස්කෘත්ය මයා යජ්ඤපතිර්විභුඃ ॥ 2 ॥

තතෝऽභ්යනුජ්ඤාං සංප්රාප්ය ස්තුතෝ මතිමතාං වරඃ ।
ශිවමේභිඃ ස්තුවන් දේවං නාමභිඃ පුෂ්ටිවර්ධනෛඃ ॥ 3 ॥

නිත්යයුක්තඃ ශුචිර්භක්තඃ ප්රාප්නෝත්යාත්මානමාත්මනා ।
ඒතද්ධි පරමං බ්රහ්ම පරං බ්රහ්මාධිගච්ඡති ॥ 4 ॥

ඍෂයශ්චෛව දේවාශ්ච ස්තුවංත්යේතේන තත්පරම් ।
ස්තූයමානෝ මහාදේවස්තුෂ්යතේ නියතාත්මභිඃ ॥ 5 ॥

භක්තානුකංපී භගවානාත්මසංස්ථාකරෝ විභුඃ ।
තථෛව ච මනුෂ්යේෂු යේ මනුෂ්යාඃ ප්රධානතඃ ॥ 6 ॥

ආස්තිකාඃ ශ්රද්දධානාශ්ච බහුභිර්ජන්මභිඃ ස්තවෛඃ ।
භක්ත්යා හ්යනන්යමීශානං පරං දේවං සනාතනම් ॥ 7 ॥

කර්මණා මනසා වාචා භාවේනාමිතතේජසඃ ।
ශයානා ජාග්රමාණාශ්ච ව්රජන්නුපවිශංස්තථා ॥ 8 ॥

උන්මිෂන්නිමිෂංශ්චෛව චිංතයංතඃ පුනඃ පුනඃ ।
ශෘණ්වංතඃ ශ්රාවයංතශ්ච කථයංතශ්ච තේ භවම් ॥ 9 ॥

ස්තුවංතඃ ස්තූයමානාශ්ච තුෂ්යංති ච රමංති ච ।
ජන්මකෝටිසහස්රේෂු නානාසංසාරයෝනිෂු ॥ 10 ॥

ජංතෝර්විගතපාපස්ය භවේ භක්තිඃ ප්රජායතේ ।
උත්පන්නා ච භවේ භක්තිරනන්යා සර්වභාවතඃ ॥ 11 ॥

භාවිනඃ කාරණේ චාස්ය සර්වයුක්තස්ය සර්වථා ।
ඒතද්දේවේෂු දුෂ්ප්රාපං මනුෂ්යේෂු න ලභ්යතේ ॥ 12 ॥

නිර්විඝ්නා නිශ්චලා රුද්රේ භක්තිරව්යභිචාරිණී ।
තස්යෛව ච ප්රසාදේන භක්තිරුත්පද්යතේ නෘණාම් ॥ 13 ॥

යේන යාංති පරාං සිද්ධිං තද්භාවගතචේතසඃ ।
යේ සර්වභාවානුගතාඃ ප්රපද්යංතේ මහේශ්වරම් ॥ 14 ॥

ප්රපන්නවත්සලෝ දේවඃ සංසාරාත්තාන්සමුද්ධරේත් ।
ඒවමන්යේ විකුර්වංති දේවාඃ සංසාරමෝචනම් ॥ 15 ॥

මනුෂ්යාණාමෘතේ දේවං නාන්යා ශක්තිස්තපෝබලම් ।
ඉති තේනේංද්රකල්පේන භගවාන් සදසත්පතිඃ ॥ 16 ॥

කෘත්තිවාසාඃ ස්තුතඃ කෘෂ්ණ තංඩිනා ශුභබුද්ධිනා ।
ස්තවමේතං භගවතෝ බ්රහ්මා ස්වයමධාරයත් ॥ 17 ॥

ගීයතේ ච ස බුද්ධ්යේත බ්රහ්මා ශංකරසන්නිධෞ ।
ඉදං පුණ්යං පවිත්රං ච සර්වදා පාපනාශනම් ॥ 18 ॥

යෝගදං මෝක්ෂදං චෛව ස්වර්ගදං තෝෂදං තථා ।
ඒවමේතත්පඨංතේ ය ඒකභක්ත්යා තු ශංකරම් ॥ 19 ॥

යා ගතිඃ සාංඛ්යයෝගානාං ව්රජංත්යේතාං ගතිං තදා ।
ස්තවමේතං ප්රයත්නේන සදා රුද්රස්ය සන්නිධෞ ॥ 20 ॥

අබ්දමේකං චරේද්භක්තඃ ප්රාප්නුයාදීප්සිතං ඵලම් ।
ඒතද්රහස්යං පරමං බ්රහ්මණෝ හෘදි සංස්ථිතම් ॥ 21 ॥

බ්රහ්මා ප්රෝවාච ශක්රාය ශක්රඃ ප්රෝවාච මෘත්යවේ ।
මෘත්යුඃ ප්රෝවාච රුද්රේභ්යෝ රුද්රේභ්යස්තංඩිමාගමත් ॥ 22 ॥

මහතා තපසා ප්රාප්තස්තංඩිනා බ්රහ්මසද්මනි ।
තංඩිඃ ප්රෝවාච ශුක්රාය ගෞතමාය ච භාර්ගවඃ ॥ 23 ॥

වෛවස්වතාය මනවේ ගෞතමඃ ප්රාහ මාධව ।
නාරායණාය සාධ්යාය සමාධිෂ්ඨාය ධීමතේ ॥ 24 ॥

යමාය ප්රාහ භගවාන් සාධ්යෝ නාරායණෝऽච්යුතඃ ।
නාචිකේතාය භගවානාහ වෛවස්වතෝ යමඃ ॥ 25 ॥

මාර්කංඩේයාය වාර්ෂ්ණේය නාචිකේතෝऽභ්යභාෂත ।
මාර්කංඩේයාන්මයා ප්රාප්තෝ නියමේන ජනාර්දන ॥ 26 ॥

තවාප්යහමමිත්රඝ්න ස්තවං දද්යාං හ්යවිශ්රුතම් ।
ස්වර්ග්යමාරෝග්යමායුෂ්යං ධන්යං වේදේන සම්මිතම් ॥ 27 ॥

නාස්ය විඝ්නං විකුර්වංති දානවා යක්ෂරාක්ෂසාඃ ।
පිශාචා යාතුධානා වා ගුහ්යකා භුජගා අපි ॥ 28 ॥

යඃ පඨේත ශුචිඃ පාර්ථ බ්රහ්මචාරී ජිතේංද්රියඃ । [භූත්වා]
අභග්නයෝගෝ වර්ෂං තු සෝऽශ්වමේධඵලං ලභේත් ॥ 29 ॥

ඉති ශ්රීමහාභාරතේ අනුශාසනපර්වණි මහාදේවසහස්රනාම ස්තෝත්රං නාම සප්තදශෝऽධ්යායඃ ॥