ශිව පාදාදි කේශාංත වර්ණන ස්තෝත්රං

කළ්යාණං නෝ විධත්තාං කටකතටලසත්කල්පවාටීනිකුංජ-
-ක්රීඩාසංසක්තවිද්යාධරනිකරවධූගීතරුද්රාපදානඃ ।
තාරෛර්හේරංබනාදෛස්තරළිතනිනදත්තාරකාරාතිකේකී
කෛලාසඃ ශර්වනිර්වෘත්යභිජනකපදඃ සර්වදා පර්වතේංද්රඃ ॥ 1 ॥

යස්ය ප්රාහුඃ ස්වරූපං සකලදිවිෂදාං සාරසර්වස්වයෝගං
යස්යේෂුඃ ශාර්‍ංගධන්වා සමජනි ජගතාං රක්ෂණේ ජාගරූකඃ ।
මෞර්වී දර්වීකරාණාමපි ච පරිබෘඪඃ පූස්ත්රයී සා ච ලක්ෂ්යං
සෝऽව්යාදව්යාජමස්මානශිවභිදනිශං නාකිනාං ශ්රීපිනාකඃ ॥ 2 ॥

ආතංකාවේගහාරී සකලදිවිෂදාමංඝ්රිපද්මාශ්රයාණාං
මාතංගාද්යුග්රදෛත්යප්රකරතනුගලද්රක්තධාරාක්තධාරඃ ।
ක්රූරඃ සූරායුතානාමපි ච පරිභවං ස්වීයභාසා විතන්ව-
-න්ඝෝරාකාරඃ කුඨාරෝ දෘඪතරදුරිතාඛ්යාටවීං පාටයේන්නඃ ॥ 3 ॥

කාලාරාතේඃ කරාග්රේ කෘතවසතිරුරඃශාණශාතෝ රිපූණාං
කාලේ කාලේ කුලාද්රිප්රවරතනයයා කල්පිතස්නේහලේපඃ ।
පායාන්නඃ පාවකාර්චිඃප්රසරසඛමුඛඃ පාපහංතා නිතාංතං
ශූලඃ ශ්රීපාදසේවාභජනරසජුෂාං පාලනෛකාංතශීලඃ ॥ 4 ॥

දේවස්යාංකාශ්රයායාඃ කුලගිරිදුහිතුර්නේත්රකෝණප්රචාර-
-ප්රස්තාරානත්යුදාරාන්පිපඨිෂුරිව යෝ නිත්යමත්යාදරේණ ।
ආධත්තේ භංගිතුංගෛරනිශමවයවෛරංතරංගං සමෝදං
සෝමාපීඩස්ය සෝऽයං ප්රදිශතු කුශලං පාණිරංගඃ කුරංගඃ ॥ 5 ॥

කංඨප්රාංතාවසජ්ජත්කනකමයමහාඝංටිකාඝෝරඝෝෂෛඃ
කංඨාරාවෛරකුංඨෛරපි භරිතජගච්චක්රවාලාංතරාළඃ ।
චංඩඃ ප්රෝද්දංඩශෘංගඃ කකුදකබලිතෝත්තුංගකෛලාසශෘංගඃ
කංඨේකාලස්ය වාහඃ ශමයතු ශමලං ශාශ්වතඃ ශාක්වරේංද්රඃ ॥ 6 ॥

නිර්යද්දානාංබුධාරාපරිමලතරලීභූතරෝලංබපාලී-
-ඣංකාරෛඃ ශංකරාද්රේඃ ශිඛරශතදරීඃ පූරයන්භූරිඝෝෂෛඃ ।
ශාර්වඃ සෞවර්ණශෛලප්රතිමපෘථුවපුඃ සර්වවිඝ්නාපහර්තා
ශර්වාණ්යාඃ පූර්වසූනුඃ ස භවතු භවතාං ස්වස්තිදෝ හස්තිවක්ත්රඃ ॥ 7 ॥

යඃ පුණ්යෛර්දේවතානාං සමජනි ශිවයෝඃ ශ්ලාඝ්යවීර්යෛකමත්යා-
-ද්යන්නාම්නි ශ්රූයමාණේ දිතිජභටඝටා භීතිභාරං භජංතේ ।
භූයාත්සෝऽයං විභූත්යෛ නිශිතශරශිඛාපාටිතක්රෞංචශෛලඃ
සංසාරාගාධකූපෝදරපතිතසමුත්තාරකස්තාරකාරිඃ ॥ 8 ॥

ආරූඪඃ ප්රෞඪවේගප්රවිජිතපවනං තුංගතුංගං තුරංගං
චේලං නීලං වසානඃ කරතලවිලසත්කාංඩකෝදංඩදංඩඃ ।
රාගද්වේෂාදිනානාවිධමෘගපටලීභීතිකෘද්භූතභර්තා
කුර්වන්නාඛේටලීලාං පරිලසතු මනඃකානනේ මාමකීනේ ॥ 9 ॥

අංභෝජාභ්යාං ච රංභාරථචරණලතාද්වංද්වකුංභීංද්රකුංභෛ-
-ර්බිංබේනේංදෝශ්ච කංබෝරුපරි විලසතා විද්රුමේණෝත්පලාභ්යාම් ।
අංභෝදේනාපි සංභාවිතමුපජනිතාඩංබරං ශංබරාරේඃ
ශංභෝඃ සංභෝගයෝග්යං කිමපි ධනමිදං සංභවේත්සංපදේ නඃ ॥ 10 ॥

වේණීසෞභාග්යවිස්මාපිතතපනසුතාචාරුවේණීවිලාසා-
-න්වාණීනිර්ධූතවාණීකරතලවිධෘතෝදාරවීණාවිරාවාන් ।
ඒණීනේත්රාංතභංගීනිරසනනිපුණාපාංගකෝණානුපාසේ
ශෝණාන්ප්රාණානුදූඪප්රතිනවසුෂමාකංදලානිංදුමෞළේඃ ॥ 11 ॥

නෘත්තාරංභේෂු හස්තාහතමුරජධිමිද්ධිංකෘතෛරත්යුදාරෛ-
-ශ්චිත්තානංදං විධත්තේ සදසි භගවතඃ සංතතං යඃ ස නංදී ।
චංඩීශාද්යාස්තථාන්යේ චතුරගුණගණප්රීණිතස්වාමිසත්කා-
-රෝත්කර්ෂෝද්යත්ප්රසාදාඃ ප්රමථපරිබෘඪාඃ පාංතු සංතෝෂිණෝ නඃ ॥ 12 ॥

මුක්තාමාණික්යජාලෛඃ පරිකලිතමහාසාලමාලෝකනීයං
ප්රත්යුප්තානර්ඝරත්නෛර්දිශි දිශි භවනෛඃ කල්පිතෛර්දික්පතීනාම් ।
උද්යානෛරද්රිකන්යාපරිජනවනිතාමානනීයෛඃ පරීතං
හෘද්යං හෘද්යස්තු නිත්යං මම භුවනපතේර්ධාම සෝමාර්ධමෞළේඃ ॥ 13 ॥

ස්තංභෛර්ජංභාරිරත්නප්රවරවිරචිතෛඃ සංභෘතෝපාංතභාගං
ශුංභත්සෝපානමාර්ගං ශුචිමණිනිචයෛර්ගුංභිතානල්පශිල්පම් ।
කුංභෛඃ සංපූර්ණශෝභං ශිරසි සුඝටිතෛඃ ශාතකුංභෛරපංකෛඃ
ශංභෝඃ සංභාවනීයං සකලමුනිජනෛඃ ස්වස්තිදං ස්යාත්සදෝ නඃ ॥ 14 ॥

න්යස්තෝ මධ්යේ සභායාඃ පරිසරවිලසත්පාදපීඨාභිරාමෝ
හෘද්යඃ පාදෛශ්චතුර්භිඃ කනකමණිමයෛරුච්චකෛරුජ්ජ්වලාත්මා ॥
වාසෝරත්නේන කේනාප්යධිකමෘදුතරේණාස්තෘතෝ විස්තෘතශ්රීඃ
පීඨඃ පීඩාභරං නඃ ශමයතු ශිවයෝඃ ස්වෛරසංවාසයෝග්යඃ ॥ 15 ॥

ආසීනස්යාධිපීඨං ත්රිජගදධිපතේරංඝ්රිපීඨානුෂක්තෞ
පාථෝජාභෝගභාජෞ පරිමෘදුලතලෝල්ලාසිපද්මාදිරේඛෞ ।
පාතාං පාදාවුභෞ තෞ නමදමරකිරීටෝල්ලසච්චාරුහීර-
-ශ්රේණීශෝණායමානෝන්නතනඛදශකෝද්භාසමානෞ සමානෞ ॥ 16 ॥

යන්නාදෝ වේදවාචාං නිගදති නිඛිලං ලක්ෂණං පක්ෂිකේතු-
-ර්ලක්ෂ්මීසංභෝගසෞඛ්යං විරචයති යයෝශ්චාපරේ රූපභේදේ ।
ශංභෝඃ සංභාවනීයේ පදකමලසමාසංගතස්තුංගශෝභේ
මාංගළ්යං නඃ සමග්රං සකලසුඛකරේ නූපුරේ පූරයේතාම් ॥ 17 ॥

අංගේ ශෘංගාරයෝනේඃ සපදි ශලභතාං නේත්රවහ්නෞ ප්රයාතේ
ශත්රෝරුද්ධෘත්ය තස්මාදිෂුධියුගමධෝ න්යස්තමග්රේ කිමේතත් ।
ශංකාමිත්ථං නතානාමමරපරිෂදාමංතරංකූරයත්ත-
-ත්සංඝාතං චාරු ජංඝායුගමඛිලපතේරංහසාං සංහරේන්නඃ ॥ 18 ॥

ජානුද්වංද්වේන මීනධ්වජනෘවරසමුද්රෝපමානේන සාකං
රාජංතෞ රාජරංභාකරිකරකනකස්තංභසංභාවනීයෞ ।
ඌරූ ගෞරීකරාංභෝරුහසරසසමාමර්දනානංදභාජෞ
චාරූ දූරීක්රියාස්තාං දුරිතමුපචිතං ජන්මජන්මාංතරේ නඃ ॥ 19 ॥

ආමුක්තානර්ඝරත්නප්රකරකරපරිෂ්වක්තකළ්යාණකාංචී-
-දාම්නා බද්දේන දුග්ධද්යුතිනිචයමුෂා චීනපට්ටාංබරේණ ।
සංවීතේ ශෛලකන්යාසුචරිතපරිපාකායමාණේ නිතංබේ
නිත්යං නර්නර්තු චිත්තං මම නිඛිලජගත්ස්වාමිනඃ සෝමමෞළේඃ ॥ 20 ॥

සංධ්යාකාලානුරජ්යද්දිනකරසරුචා කාලධෞතේන ගාඪං
ව්යානද්ධඃ ස්නිග්ධමුග්ධඃ සරසමුදරබංධේන වීතෝපමේන ।
උද්දීප්තෛඃ ස්වප්රකාශෛරුපචිතමහිමා මන්මථාරේරුදාරෝ
මධ්යෝ මිථ්යාර්ථසධ්ර්යඞ්මම දිශතු සදා සංගතිං මංගළානාම් ॥ 21 ॥

නාභීචක්රාලවාලාන්නවනවසුෂමාදෝහදශ්රීපරීතා-
-දුද්ගච්ඡංතී පුරස්තාදුදරපථමතික්රම්ය වක්ෂඃ ප්රයාංති ।
ශ්යාමා කාමාගමාර්ථප්රකථනලිපිවද්භාසතේ යා නිකාමං
සා මා සෝමාර්ධමෞළේඃ සුඛයතු සතතං රෝමවල්ලීමතල්ලී ॥ 22 ॥

ආශ්ලේෂේෂ්වද්රිජායාඃ කඨිනකුචතටීලිප්තකාශ්මීරපංක-
-ව්යාසංගාදුද්යදර්කද්යුතිභිරුපචිතස්පර්ධමුද්දාමහෘද්යම් ।
දක්ෂාරාතේරුදූඪප්රතිනවමණිමාලාවලීභාසමානං
වක්ෂෝ වික්ෂෝභිතාඝං සතතනතිජුෂාං රක්ෂතාදක්ෂතං නඃ ॥ 23 ॥

වාමාංකේ විස්ඵුරංත්යාඃ කරතලවිලසච්චාරුරක්තෝත්පලායාඃ
කාංතායා වාමවක්ෂෝරුහභරශිඛරෝන්මර්දනව්යග්රමේකම් ।
අන්යාංස්ත්රීනප්යුදාරාන්වරපරශුමෘගාලංකෘතානිංදුමෞළේ-
-ර්බාහූනාබද්ධහේමාංගදමණිකටකානංතරාලෝකයාමඃ ॥ 24 ॥

සංභ්රාංතායාඃ ශිවායාඃ පතිවිලයභියා සර්වලෝකෝපතාපා-
-ත්සංවිග්නස්යාපි විෂ්ණෝඃ සරභසමුභයෝර්වාරණප්රේරණාභ්යාම් ।
මධ්යේ ත්රෛශංකවීයාමනුභවති දශාං යත්ර හාලාහලෝෂ්මා
සෝऽයං සර්වාපදාං නඃ ශමයතු නිචයං නීලකංඨස්ය කංඨඃ ॥ 25 ॥

හෘද්යෛරද්රීංද්රකන්යාමෘදුදශනපදෛර්මුද්රිතෝ විද්රුමශ්රී-
-රුද්ද්යෝතංත්යා නිතාංතං ධවලධවලයා මිශ්රිතෝ දංතකාංත්යා ।
මුක්තාමාණික්යජාලව්යතිකරසදෘශා තේජසා භාසමානඃ
සද්යෝජාතස්ය දද්යාදධරමණිරසෞ සංපදාං සංචයං නඃ ॥ 26 ॥

කර්ණාලංකාරනානාමණිනිකරරුචාං සංචයෛරංචිතායාං
වර්ණ්යායාං ස්වර්ණපද්මෝදරපරිවිලසත්කර්ණිකාසංනිභායාම් ।
පද්ධත්යාං ප්රාණවායෝඃ ප්රණතජනහෘදංභෝජවාසස්ය ශංභෝ-
-ර්නිත්යං නශ්චිත්තමේතද්විරචයතු සුඛේනාසිකාං නාසිකායාම් ॥ 27 ॥

අත්යංතං භාසමානේ රුචිරතරරුචාං සංගමාත්සන්මණීනා-
-මුද්යච්චංඩාංශුධාමප්රසරනිරසනස්පෂ්ටදෘෂ්ටාපදානේ ।
භූයාස්තාං භූතයේ නඃ කරිවරජයිනඃ කර්ණපාශාවලංබේ
භක්තාලීභාලසජ්ජජ්ජනිමරණලිපේඃ කුංඩලේ කුංඩලේ තේ ॥ 28 ॥

යාභ්යාං කාලව්යවස්ථා භවති තනුමතාං යෝ මුඛං දේවතානාං
යේෂාමාහුඃ ස්වරූපං ජගති මුනිවරා දේවතානාං ත්රයීං තාම් ।
රුද්රාණීවක්ත්රපංකේරුහසතතවිහාරෝත්සුකේංදිංදිරේභ්ය-
-ස්තේභ්යස්ත්රිභ්යඃ ප්රණාමාංජලිමුපරචයේ ත්රීක්ෂණස්යේක්ෂණේභ්යඃ ॥ 29 ॥

වාමං වාමාංකගායා වදනසරසිජේ ව්යාවලද්වල්ලභායා
ව්යානම්රේෂ්වන්යදන්යත්පුනරලිකභවං වීතනිඃශේෂරෞක්ෂ්යම් ।
භූයෝ භූයෝපි මෝදාන්නිපතදතිදයාශීතලං චූතබාණේ
දක්ෂාරේරීක්ෂණානාං ත්රයමපහරතාදාශු තාපත්රයං නඃ ॥ 30 ॥

යස්මින්නර්ධේංදුමුග්ධද්යුතිනිචයතිරස්කාරනිස්තංද්රකාංතෞ
කාශ්මීරක්ෂෝදසංකල්පතමිව රුචිරං චිත්රකං භාති නේත්රම් ।
තස්මින්නුල්ලීලචිල්ලීනටවරතරුණීලාස්යරංගායමාණේ
කාලාරේඃ ඵාලදේශේ විහරතු හෘදයං වීතචිංතාංතරං නඃ ॥ 31 ॥

ස්වාමින්ගංගාමිවාංගීකුරු තව ශිරසා මාමපීත්යර්ථයංතීං
ධන්යාං කන්යාං ඛරාංශෝඃ ශිරසි වහති කිං න්වේෂ කාරුණ්යශාලී ।
ඉත්ථං ශංකාං ජනානාං ජනයදතිඝනං කෛශිකං කාලමේඝ-
-ච්ඡායං භූයාදුදාරං ත්රිපුරවිජයිනඃ ශ්රේයසේ භූයසේ නඃ ॥ 32 ॥

ශෘංගාරාකල්පයෝග්යෛඃ ශිඛරිවරසුතාසත්සඛීහස්තලූනෛඃ
සූනෛරාබද්ධමාලාවලිපරිවිලසත්සෞරභාකෘෂ්ටභෘංගම් ।
තුංගං මාණික්යකාංත්යා පරිහසිතසුරාවාසශෛලේංද්රශෘංගං
සංඝං නඃ සංකටානාං විඝටයතු සදා කාංකටීකං කිරීටම් ॥ 33 ॥

වක්රාකාරඃ කලංකී ජඩතනුරහමප්යංඝ්රිසේවානුභාවා-
-දුත්තංසත්වං ප්රයාතඃ සුලභතරඝෘණාස්යංදිනශ්චංද්රමෞළේඃ ।
තත්සේවංතාං ජනෞඝාඃ ශිවමිති නිජයාවස්ථයෛව බ්රුවාණං
වංදේ දේවස්ය ශංභෝර්මුකුටසුඝටිතං මුග්ධපීයූෂභානුම් ॥ 34 ॥

කාංත්යා සංඵුල්ලමල්ලීකුසුමධවළයා ව්යාප්ය විශ්වං විරාජ-
-න්වෘත්තාකාරෝ විතන්වන්මුහුරපි ච පරාං නිර්වෘතිං පාදභාජාම් ।
සානංදං නංදිදෝෂ්ණා මණිකටකවතා වාහ්යමානඃ පුරාරේඃ
ශ්වේතච්ඡත්රාඛ්යශීතද්යුතිරපහරතාදාපදස්තාපදා නඃ ॥ 35 ॥

දිව්යාකල්පෝජ්ජ්වලානාං ශිවගිරිසුතයෝඃ පාර්ශ්වයෝරාශ්රිතානාං
රුද්රාණීසත්සඛීනාං මදතරලකටාක්ෂාංචලෛරංචිතානාම් ।
උද්වේල්ලද්බාහුවල්ලීවිලසනසමයේ චාමරාංදෝලනීනා-
-මුද්භූතඃ කංකණාලීවලයකලකලෝ වාරයේදාපදෝ නඃ ॥ 36 ॥

ස්වර්ගෞකඃසුංදරීණාං සුලලිතවපුෂාං ස්වාමිසේවාපරාණාං
වල්ගද්භූෂාණි වක්රාංබුජපරිවිගලන්මුග්ධගීතාමෘතානි ।
නිත්යං නෘත්තාන්යුපාසේ භුජවිධුතිපදන්යාසභාවාවලෝක-
-ප්රත්යුද්යත්ප්රීතිමාද්යත්ප්රමථනටනටීදත්තසංභාවනානි ॥ 37 ॥

ස්ථානප්රාප්ත්යා ස්වරාණාං කිමපි විශදතාං ව්යංජයන්මංජුවීණා-
-ස්වානාවච්ඡින්නතාලක්රමමමෘතමිවාස්වාද්යමානං ශිවාභ්යාම් ।
නානාරාගාතිහෘද්යං නවරසමධුරස්තෝත්රජාතානුවිද්ධං
ගානං වීණාමහර්ෂේඃ කලමතිලලිතං කර්ණපූරයතාං නඃ ॥ 38 ॥

චේතෝ ජාතප්රමෝදං සපදි විදධතී ප්රාණිනාං වාණිනීනාං
පාණිද්වංද්වාග්රජාග්රත්සුලලිතරණිතස්වර්ණතාලානුකූලා ।
ස්වීයාරාවේණ පාථෝධරරවපටුනා නාදයංතී මයූරීං
මායූරී මංදභාවං මණිමුරජභවා මාර්ජනා මාර්ජයේන්නඃ ॥ 39 ॥

දේවේභ්යෝ දානවේභ්යඃ පිතෘමුනිපරිෂත්සිද්ධවිද්යාධරේභ්යඃ
සාධ්යේභ්යශ්චාරණේභ්යෝ මනුජපශුපතජ්ජාතිකීටාදිකේභ්යඃ ।
ශ්රීකෛලාසප්රරූඪාස්තෘණවිටපිමුඛාශ්චාපි යේ සංති තේභ්යඃ
සර්වේභ්යෝ නිර්විචාරං නතිමුපරචයේ ශර්වපාදාශ්රයේභ්යඃ ॥ 40 ॥

ධ්යායන්නිත්ථං ප්රභාතේ ප්රතිදිවසමිදං ස්තෝත්රරත්නං පඨේද්යඃ
කිං වා බ්රූමස්තදීයං සුචරිතමථවා කීර්තයාමඃ සමාසාත් ।
සංපජ්ජාතං සමග්රං සදසි බහුමතිං සර්වලෝකප්රියත්වං
සංප්රාප්යායුඃශතාංතේ පදමයති පරබ්රහ්මණෝ මන්මථාරේඃ ॥ 41 ॥

ඉති ශ්රීමත්පරමහංසපරිව්රාජකාචාර්යස්ය ශ්රීගෝවිංදභගවත්පූජ්යපාදශිෂ්යස්ය ශ්රීමච්ඡංකරභගවතඃ කෘතෞ ශ්රී ශිව පාදාදිකේශාංතවර්ණන ස්තෝත්රම් ॥