ශිව භුජංග ස්තෝත්රම්

ගලද්දානගංඩං මිලද්භෘංගෂංඩං
චලච්චාරුශුංඩං ජගත්ත්රාණශෞංඩම් ।
කනද්දංතකාංඩං විපද්භංගචංඩං
ශිවප්රේමපිංඩං භජේ වක්රතුංඩම් ॥ 1 ॥

අනාද්යංතමාද්යං පරං තත්ත්වමර්ථං
චිදාකාරමේකං තුරීයං ත්වමේයම් ।
හරිබ්රහ්මමෘග්යං පරබ්රහ්මරූපං
මනෝවාගතීතං මහඃශෛවමීඩේ ॥ 2 ॥

ස්වශක්ත්යාදි ශක්ත්යංත සිංහාසනස්ථං
මනෝහාරි සර්වාංගරත්නෝරුභූෂම් ।
ජටාහීංදුගංගාස්ථිශම්යාකමෞළිං
පරාශක්තිමිත්රං නමඃ පංචවක්ත්රම් ॥ 3 ॥

ශිවේශානතත්පූරුෂාඝෝරවාමාදිභිඃ
පංචභිර්හෘන්මුඛෛඃ ෂඩ්භිරංගෛඃ ।
අනෞපම්ය ෂට්ත්රිංශතං තත්ත්වවිද්යාමතීතං
පරං ත්වාං කථං වේත්ති කෝ වා ॥ 4 ॥

ප්රවාළප්රවාහප්රභාශෝණමර්ධං
මරුත්වන්මණි ශ්රීමහඃ ශ්යාමමර්ධම් ।
ගුණස්යූතමේතද්වපුඃ ශෛවමංතඃ
ස්මරාමි ස්මරාපත්තිසංපත්තිහේතෝඃ ॥ 5 ॥

ස්වසේවාසමායාතදේවාසුරේංද්රා
නමන්මෞළිමංදාරමාලාභිෂික්තම් ।
නමස්යාමි ශංභෝ පදාංභෝරුහං තේ
භවාංභෝධිපෝතං භවානී විභාව්යම් ॥ 6 ॥

ජගන්නාථ මන්නාථ ගෞරීසනාථ
ප්රපන්නානුකංපින්විපන්නාර්තිහාරින් ।
මහඃස්තෝමමූර්තේ සමස්තෛකබංධෝ
නමස්තේ නමස්තේ පුනස්තේ නමෝऽස්තු ॥ 7 ॥

විරූපාක්ෂ විශ්වේශ විශ්වාදිදේව
ත්රයී මූල ශංභෝ ශිව ත්ර්යංබක ත්වම් ।
ප්රසීද ස්මර ත්රාහි පශ්යාවමුක්ත්යෛ
ක්ෂමාං ප්රාප්නුහි ත්ර්යක්ෂ මාං රක්ෂ මෝදාත් ॥ 8 ॥

මහාදේව දේවේශ දේවාදිදේව
ස්මරාරේ පුරාරේ යමාරේ හරේති ।
බ්රුවාණඃ ස්මරිෂ්යාමි භක්ත්යා ලිනෙ භවංතං තතෝ මේ දයාශීල දේව ප්රසීද ॥ 9 ॥

ත්වදන්යඃ ශරණ්යඃ ප්රපන්නස්ය නේති
ප්රසීද ස්මරන්නේව හන්යාස්තු දෛන්යම් ।
න චේත්තේ භවේද්භක්තවාත්සල්යහානිස්තතෝ
මේ දයාළෝ සදා සන්නිධේහි ॥ 10 ॥

අයං දානකාලස්ත්වහං දානපාත්රං
භවානේව දාතා ත්වදන්යං න යාචේ ।
භවද්භක්තිමේව ස්ථිරාං දේහි මහ්යං
කෘපාශීල ශංභෝ කෘතාර්ථෝऽස්මි තස්මාත් ॥ 11 ॥

පශුං වේත්සි චේන්මාං තමේවාධිරූඪඃ
කලංකීති වා මූර්ධ්නි ධත්සේ තමේව ।
ද්විජිහ්වඃ පුනඃ සෝऽපි තේ කංඨභූෂා
ත්වදංගීකෘතාඃ ශර්ව සර්වේऽපි ධන්යාඃ ॥ 12 ॥

න ශක්නෝමි කර්තුං පරද්රෝහලේශං
කථං ප්රීයසේ ත්වං න ජානේ ගිරීශ ।
තථාහි ප්රසන්නෝऽසි කස්යාපි
කාංතාසුතද්රෝහිණෝ වා පිතෘද්රෝහිණෝ වා ॥ 13 ॥

ස්තුතිං ධ්යානමර්චාං යථාවද්විධාතුං
භජන්නප්යජානන්මහේශාවලංබේ ।
ත්රසංතං සුතං ත්රාතුමග්රේ
මෘකංඩෝර්යමප්රාණනිර්වාපණං ත්වත්පදාබ්ජම් ॥ 14 ॥

ශිරෝ දෘෂ්ටි හෘද්රෝග ශූල ප්රමේහජ්වරාර්ශෝ ජරායක්ෂ්මහික්කාවිෂාර්තාන් ।
ත්වමාද්යෝ භිෂග්භේෂජං භස්ම ශංභෝ
ත්වමුල්ලාඝයාස්මාන්වපුර්ලාඝවාය ॥ 15 ॥

දරිද්රෝऽස්ම්යභද්රෝऽස්මි භග්නෝऽස්මි දූයේ
විෂණ්ණෝऽස්මි සන්නෝऽස්මි ඛින්නෝऽස්මි චාහම් ।
භවාන්ප්රාණිනාමංතරාත්මාසි ශංභෝ
මමාධිං න වේත්සි ප්රභෝ රක්ෂ මාං ත්වම් ॥ 16 ॥

ත්වදක්ෂ්ණෝඃ කටාක්ෂඃ පතේත්ත්ර්යක්ෂ යත්ර
ක්ෂණං ක්ෂ්මා ච ලක්ෂ්මීඃ ස්වයං තං වෘණාතේ ।
කිරීටස්ඵුරච්චාමරච්ඡත්රමාලාකලාචීගජක්ෂෞමභූෂාවිශේෂෛඃ ॥ 17 ॥

භවාන්යෛ භවායාපි මාත්රේ ච පිත්රේ
මෘඩාන්යෛ මෘඩායාප්යඝඝ්න්යෛ මඛඝ්නේ ।
ශිවාංග්යෛ ශිවාංගාය කුර්මඃ ශිවායෛ
ශිවායාංබිකායෛ නමස්ත්ර්යංබකාය ॥ 18 ॥

භවද්ගෞරවං මල්ලඝුත්වං විදිත්වා
ප්රභෝ රක්ෂ කාරුණ්යදෘෂ්ට්යානුගං මාම් ।
ශිවාත්මානුභාවස්තුතාවක්ෂමෝऽහං
ස්වශක්ත්යා කෘතං මේ¶අධං ක්ෂමස්ව ॥ 19 ॥

යදා කර්ණරංධ්රං ව්රජේත්කාලවාහද්විෂත්කංඨඝංටා ඝණාත්කාරනාදඃ ।
වෘෂාධීශමාරුහ්ය දේවෞපවාහ්යංතදා
වත්ස මා භීරිති ප්රීණය ත්වම් ॥ 20 ॥

යදා දාරුණාභාෂණා භීෂණා මේ
භවිෂ්යංත්යුපාංතේ කෘතාංතස්ය දූතාඃ ।
තදා මන්මනස්ත්වත්පදාංභෝරුහස්ථං
කථං නිශ්චලං ස්යාන්නමස්තේऽස්තු ශංභෝ ॥ 21 ॥

යදා දුර්නිවාරව්යථෝऽහං ශයානෝ
ලුඨන්නිඃශ්වසන්නිඃසෘතාව්යක්තවාණිඃ ।
තදා ජහ්නුකන්යාජලාලංකෘතං තේ
ජටාමංඩලං මන්මනෝමංදිරේ ස්යාත් ॥ 22 ॥

යදා පුත්රමිත්රාදයෝ මත්සකාශේ
රුදංත්යස්ය හා කීදෘශීයං දශේති ।
තදා දේවදේවේශ ගෞරීශ ශංභෝ
නමස්තේ ශිවායේත්යජස්රං බ්රවාණි ॥ 23 ॥

යදා පශ්යතාං මාමසෞ වේත්ති
නාස්මානයං ශ්වාස ඒවේති වාචෝ භවේයුඃ ।
තදා භූතිභූෂං භුජංගාවනද්ධං
පුරාරේ භවංතං ස්ඵුටං භාවයේයම් ॥ 24 ॥

යදා යාතනාදේහසංදේහවාහී
භවේදාත්මදේහේ න මෝහෝ මහාන්මේ ।
තදා කාශශීතාංශුසංකාශමීශ
ස්මරාරේ වපුස්තේ නමස්තේ ස්මරාමි ॥ 25 ॥

යදාපාරමච්ඡායමස්ථානමද්භිර්ජනෛර්වා විහීනං ගමිෂ්යාමි මාර්ගම් ।
තදා තං නිරුංධංකෘතාංතස්ය මාර්ගං
මහාදේව මහ්යං මනෝජ්ඤං ප්රයච්ඡ ॥ 26 ॥

යදා රෞරවාදි ස්මරන්නේව භීත්යා
ව්රජාම්යත්ර මෝහං මහාදේව ඝෝරම් ।
තදා මාමහෝ නාථ කස්තාරයිෂ්යත්යනාථං පරාධීනමර්ධේංදුමෞළේ ॥ 27 ॥

යදා ශ්වේතපත්රායතාලංඝ්යශක්තේඃ
කෘතාංතාද්භයං භක්තිවාත්සල්යභාවාත් ।
තදා පාහි මාං පාර්වතීවල්ලභාන්යං
න පශ්යාමි පාතාරමේතාදෘශං මේ ॥ 28 ॥

ඉදානීමිදානීං මෘතිර්මේ භවිත්රීත්යහෝ සංතතං චිංතයා පීඩිතෝऽස්මි ।
කථං නාම මා භූන්මෘතෞ භීතිරේෂා
නමස්තේ ගතීනාං ගතේ නීලකංඨ ॥ 29 ॥

අමර්යාදමේවාහමාබාලවෘද්ධං
හරංතං කෘතාංතං සමීක්ෂ්යාස්මි භීතඃ ।
මෘතෞ තාවකාංඝ්ර්යබ්ජදිව්යප්රසාදාද්භවානීපතේ නිර්භයෝऽහං භවානි ॥ 30 ॥

ජරාජන්මගර්භාධිවාසාදිදුඃඛාන්යසහ්යානි ජහ්යාං ජගන්නාථ දේව ।
භවංතං විනා මේ ගතිර්නෛව ශංභෝ
දයාළෝ න ජාගර්ති කිං වා දයා තේ ॥ 31 ॥

ශිවායේති ශබ්දෝ නමඃපූර්ව ඒෂ
ස්මරන්මුක්තිකෘන්මෘත්යුහා තත්ත්වවාචී ।
මහේශාන මා ගාන්මනස්තෝ වචස්තඃ
සදා මහ්යමේතත්ප්රදානං ප්රයච්ඡ ॥ 32 ॥

ත්වමප්යංබ මාං පශ්ය ශීතාංශුමෞළිප්රියේ භේෂජං ත්වං භවව්යාධිශාංතෞ
බහුක්ලේශභාජං පදාංභෝජපෝතේ
භවාබ්ධෞ නිමග්නං නයස්වාද්ය පාරම් ॥ 33 ॥

අනුද්යල්ලලාටාක්ෂි වහ්නි ප්රරෝහෛරවාමස්ඵුරච්චාරුවාමෝරුශෝභෛඃ ।
අනංගභ්රමද්භෝගිභූෂාවිශේෂෛරචංද්රාර්ධචූඩෛරලං දෛවතෛර්නඃ ॥ 34 ॥

අකංඨේකලංකාදනංගේභුජංගාදපාණෞකපාලාදඵාලේऽනලාක්ෂාත් ।
අමෞළෞශශාංකාදවාමේකළත්රාදහං දේවමන්යං න මන්යේ න මන්යේ ॥ 35 ॥

මහාදේව ශංභෝ ගිරීශ ත්රිශූලිංස්ත්වදීයං සමස්තං විභාතීති යස්මාත් ।
ශිවාදන්යථා දෛවතං නාභිජානේ
ශිවෝऽහං ශිවෝऽහං ශිවෝऽහං ශිවෝऽහම් ॥ 36 ॥

යතෝऽජායතේදං ප්රපංචං විචිත්රං
ස්ථිතිං යාති යස්මින්යදේකාංතමංතේ ।
ස කර්මාදිහීනඃ ස්වයංජ්යෝතිරාත්මා
ශිවෝऽහං ශිවෝऽහං ශිවෝऽහං ශිවෝऽහම් ॥ 37 ॥

කිරීටේ නිශේශෝ ලලාටේ හුතාශෝ
භුජේ භෝගිරාජෝ ගලේ කාලිමා ච ।
තනෞ කාමිනී යස්ය තත්තුල්යදේවං
න ජානේ න ජානේ න ජානේ න ජානේ ॥ 38 ॥

අනේන ස්තවේනාදරාදංබිකේශං
පරාං භක්තිමාසාද්ය යං යේ නමංති ।
මෘතෞ නිර්භයාස්තේ ජනාස්තං භජංතේ
හෘදංභෝජමධ්යේ සදාසීනමීශම් ॥ 39 ॥

භුජංගප්රියාකල්ප ශංභෝ මයෛවං
භුජංගප්රයාතේන වෘත්තේන ක්ලෘප්තම් ।
නරඃ ස්තෝත්රමේතත්පඨිත්වෝරුභක්ත්යා
සුපුත්රායුරාරෝග්යමෛශ්වර්යමේති ॥ 40 ॥