සකල ජනනී ස්තවඃ

අජානංතෝ යාංති ක්ෂයමවශමන්යෝන්යකලහෛ-
-රමී මායාග්රංථෞ තව පරිලුඨංතඃ සමයිනඃ ।
ජගන්මාතර්ජන්මජ්වරභයතමඃ කෞමුදි වයං
නමස්තේ කුර්වාණාඃ ශරණමුපයාමෝ භගවතීම් ॥ 1 ॥

වචස්තර්කාගම්යස්වරසපරමානංදවිභව-
-ප්රබෝධාකාරාය ද්යුතිතුලිතනීලෝත්පලරුචේ ।
ශිවාද්යාරාධ්යාය ස්තනභරවිනම්රාය සතතං
නමස්තස්මෛ කස්මෛචන භවතු මුග්ධාය මහසේ ॥ 2 ॥

අනාද්යංතාභේදප්රණයරසිකාපි ප්රණයිනී
ශිවස්යාසීර්යත්ත්වං පරිණයවිධෞ දේවි ගෘහිණී ।
සවිත්රී භූතානාමපි යදුදභූඃ ශෛලතනයා
තදේතත්සංසාරප්රණයනමහානාටකමුඛම් ॥ 3 ॥

බ්රුවංත්යේකේ තත්ත්වං භගවති සදන්යේ විදුරස-
-ත්පරේ මාතඃ ප්රාහුස්තව සදසදන්යේ සුකවයඃ ।
පරේ නෛතත්සර්වං සමභිදධතේ දේවි සුධිය-
-ස්තදේතත්ත්වන්මායාවිලසිතමශේෂං නනු ශිවේ ॥ 4 ॥

ලුඨද්ගුංජාහාරස්තනභරනමන්මධ්යලතිකා-
-මුදංචද්ධර්මාංභඃ කණගුණිතවක්ත්රාංබුජරුචම් ।
ශිවං පාර්ථත්රාණප්රවණමෘගයාකාරගුණිතං
ශිවාමන්වග්යාංතීං ශරණමහමන්වේමි ශබරීම් ॥ 5 ॥

මිථඃ කේශාකේශිප්රථනනිධනාස්තර්කඝටනාඃ
බහුශ්රද්ධාභක්තිප්රණතිවිෂයාඃ ශාස්ත්රවිධයඃ ।
ප්රසීද ප්රත්යක්ෂීභව ගිරිසුතේ දේහි ශරණං
නිරාලංබං චේතඃ පරිලුඨති පාරිප්ලවමිදම් ॥ 6 ॥

ශුනාං වා වහ්නේර්වා ඛගපරිෂදෝ වා යදශනං
කදා කේන ක්වේති ක්වචිදපි න කශ්චිත්කලයති ।
අමුෂ්මින්විශ්වාසං විජහිහි මමාහ්නාය වපුෂි
ප්රපද්යේථාශ්චේතඃ සකලජනනීමේව ශරණම් ॥ 7 ॥

තටිත්කෝටිජ්යෝතිර්ද්යුතිදලිතෂඩ්ග්රංථිගහනං
ප්රවිෂ්ටං ස්වාධාරං පුනරපි සුධාවෘෂ්ටිවපුෂා ।
කිමප්යෂ්ටාවිංශත්කිරණසකලීභූතමනිශං
භජේ ධාම ශ්යාමං කුචභරනතං බර්බරකචම් ॥ 8 ॥

චතුෂ්පත්රාංතඃ ෂඩ්දලපුටභගාංතස්ත්රිවලය-
-ස්ඵුරද්විද්යුද්වහ්නිද්යුමණිනියුතාභද්යුතිලතේ ।
ෂඩශ්රං භිත්ත්වාදෞ දශදලමථ ද්වාදශදලං
කලාශ්රං ච ද්ව්යශ්රං ගතවති නමස්තේ ගිරිසුතේ ॥ 9 ॥

කුලං කේචිත්ප්රාහුර්වපුරකුලමන්යේ තව බුධාඃ
පරේ තත්සංභේදං සමභිදධතේ කෞලමපරේ ।
චතුර්ණාමප්යේෂාමුපරි කිමපි ප්රාහුරපරේ
මහාමායේ තත්ත්වං තව කථමමී නිශ්චිනුමහේ ॥ 10 ॥

ෂඩධ්වාරණ්යානීං ප්රලයරවිකෝටිප්රතිරුචා
රුචා භස්මීකෘත්ය ස්වපදකමලප්රහ්වශිරසාම් ।
විතන්වානඃ ශෛවං කිමපි වපුරිංදීවරරුචිඃ
කුචාභ්යාමානම්රස්තව පුරුෂකාරෝ විජයතේ ॥ 11 ॥

ප්රකාශානංදාභ්යාමවිදිතචරීං මධ්යපදවීං
ප්රවිශ්යෛතද්ද්වංද්වං රවිශශිසමාඛ්යං කබලයන් ।
ප්රපද්යෝර්ධ්වං නාදං ලයදහනභස්මීකෘතකුලඃ
ප්රසාදාත්තේ ජංතුඃ ශිවමකුලමංබ ප්රවිශති ॥ 12 ॥

මනුෂ්යාස්තිර්යංචෝ මරුත ඉති ලෝකත්රයමිදං
භවාංභෝධෞ මග්නං ත්රිගුණලහරීකෝටිලුඨිතම් ।
කටාක්ෂශ්චේද්යත්ර ක්වචන තව මාතඃ කරුණයා
ශරීරී සද්යෝऽයං ව්රජති පරමානංදතනුතාම් ॥ 13 ॥

ප්රියංගුශ්යාමාංගීමරුණතරවාසං කිසලයාං
සමුන්මීලන්මුක්තාඵලවහලනේපථ්යසුභගාම් ।
ස්තනද්වංද්වස්ඵාරස්තබකනමිතාං කල්පලතිකාං
සකෘද්ධ්යායංතස්ත්වාං දධති ශිවචිංතාමණිපදම් ॥ 14 ॥

ෂඩාධාරාවර්තෛරපරිමිතමංත්රෝර්මිපටලෛඃ
ලසන්මුද්රාඵේනෛර්බහුවිධලසද්දෛවතඣෂෛඃ ।
ක්රමස්රෝතෝභිස්ත්වං වහසි පරනාදාමෘතනදී
භවානි ප්රත්යග්රා ශිවචිදමෘතාබ්ධිප්රණයිනී ॥ 15 ॥

මහීපාථෝවහ්නිශ්වසනවියදාත්මේංදුරවිභි-
-ර්වපුර්භිග්රස්තාශෛරපි තව කියානංබ මහිමා ।
අමූන්යාලෝක්යංතේ භගවති න කුත්රාප්යණුතමා-
-මවස්ථාං ප්රාප්තානි ත්වයි තු පරමව්යෝමවපුෂි ॥ 16 ॥

කලාමාජ්ඤාං ප්රජ්ඤාං සමයමනුභූතිං සමරසං
ගුරුං පාරංපර්යං විනයමුපදේශං ශිවපදම් ।
ප්රමාණං නිර්වාණං ප්රකෘතිමභිභූතිං පරගුහාං
විධිං විද්යාමාහුඃ සකලජනනීමේව මුනයඃ ॥ 17 ॥

ප්රලීනේ ශබ්දෞඝේ තදනු විරතේ බිංදුවිභවේ
තතස්තත්ත්වේ චාෂ්ටධ්වනිභිරනපායින්යධිගතේ ।
ශ්රිතේ ශාක්තේ පර්වණ්යනුකලිතචින්මාත්ර ගහනාං
ස්වසංවිත්තිං යෝගී රසයති ශිවාඛ්යාං භගවතීම් ॥ 18 ॥

පරානංදාකාරාං නිරවධිශිවෛශ්වර්යවපුෂං
නිරාකාරාං ජ්ඤානප්රකෘතිමපරිච්ඡින්නකරුණාම් ।
සවිත්රීං ලෝකානාං නිරතිශයධාමාස්පදපදාං
භවෝ වා මෝක්ෂෝ වා භවතු භවතීමේව භජතාම් ॥ 19 ॥

ජගත්කායේ කෘත්වා තදපි හෘදයේ තච්ච පුරුෂේ
පුමාංසං බිංදුස්ථං තදපි වියදාඛ්යේ ච ගහනේ ।
තදේතද්ජ්ඤානාඛ්යේ තදපි පරමානංදගහනේ
මහාව්යෝමාකාරේ ත්වදනුභවශීලෝ විජයතේ ॥ 20 ॥

විධේ වේද්යේ විද්යේ විවිධසමයේ වේදගුලිකේ
විචිත්රේ විශ්වාද්යේ විනයසුලභේ වේදජනනි ।
ශිවජ්ඤේ ශූලස්ථේ ශිවපදවදාන්යේ ශිවනිධේ
ශිවේ මාතර්මහ්යං ත්වයි විතර භක්තිං නිරුපමාම් ॥ 21 ॥

විධේර්මුංඩං හෘත්වා යදකුරුත පාත්රං කරතලේ
හරිං ශූලප්රෝතං යදගමයදංසාභරණතාම් ।
අලංචක්රේ කංඨං යදපි ගරලේනාංබ ගිරිශඃ
ශිවස්ථායාඃ ශක්තේස්තදිදමඛිලං තේ විලසිතම් ॥ 22 ॥

විරිංච්යාඛ්යා මාතඃ සෘජසි හරිසංජ්ඤා ත්වමවසි
ත්රිලෝකීං රුද්රාඛ්යා හරසි විදධාසීශ්වරදශාම් ।
භවංතී නාදාඛ්යා විහරසි ච පාශෞඝදලනී
ත්වමේවෛකාऽනේකා භවසි කෘතිභේදෛර්ගිරිසුතේ ॥ 23 ॥

මුනීනාං චේතෝභිඃ ප්රමෘදිතකෂායෛරපි මනා-
-ගශක්යං සංස්ප්රෂ්ටුං චකිතචකිතෛරංබ සතතම් ।
ශ්රුතීනාං මූර්ධානඃ ප්රකෘතිකඨිනාඃ කෝමලතරේ
කථං තේ විංදංතේ පදකිසලයේ පාර්වති පදම් ॥ 24 ॥

තටිද්වල්ලීං නිත්යාමමෘතසරිතං පාරරහිතාං
මලෝත්තීර්ණාං ජ්යෝත්ස්නාං ප්රකෘතිමගුණග්රංථිගහනාම් ।
ගිරාං දූරාං විද්යාමවිනතකුචාං විශ්වජනනී-
-මපර්යංතාං ලක්ෂ්මීමභිදධති සංතෝ භගවතීම් ॥ 25 ॥

ශරීරං ක්ෂිත්යංභඃ ප්රභෘතිරචිතං කේවලමචිත්
සුඛං දුඃඛං චායං කලයති පුමාංශ්චේතන ඉති ।
ස්ඵුටං ජානානෝऽපි ප්රභවති න දේහී රහයිතුං
ශරීරාහංකාරං තව සමයබාහ්යෝ ගිරිසුතේ ॥ 26 ॥

පිතා මාතා භ්රාතා සුහෘදනුචරඃ සද්ම ගෘහිණී
වපුඃ ක්ෂේත්රං මිත්රං ධනමපි යදා මාං විජහති ।
තදා මේ භිංදානා සපදි භයමෝහාංධතමසං
මහාජ්යෝත්ස්නේ මාතර්භව කරුණයා සන්නිධිකරී ॥ 27 ॥

සුතා දක්ෂස්යාදෞ කිල සකලමාතස්ත්වමුදභූඃ
සදෝෂං තං හිත්වා තදනු ගිරිරාජස්ය දුහිතා ।
අනාද්යංතා ශංභෝරපෘථගපි ශක්තිර්භගවතී
විවාහාජ්ජායාසීත්යහහ චරිතං වේත්ති තව කඃ ॥ 28 ॥

කණාස්ත්වද්දීප්තීනාං රවිශශිකෘශානුප්රභෘතයඃ
පරං බ්රහ්ම ක්ෂුද්රං තව නියතමානංදකණිකා ।
ශිවාදි ක්ෂිත්යංතං ත්රිවලයතනෝඃ සර්වමුදරේ
තවාස්තේ භක්තස්ය ස්ඵුරසි හෘදි චිත්රං භගවති ॥ 29 ॥

පුරඃ පශ්චාදංතර්බහිරපරිමේයං පරිමිතං
පරං ස්ථූලං සූක්ෂ්මං සකලමකුලං ගුහ්යමගුහම් ।
දවීයෝ නේදීයඃ සදසදිති විශ්වං භගවතී
සදා පශ්යංත්යාඛ්යාං වහසි භුවනක්ෂෝභජනනීම් ॥ 30 ॥

ප්රවිශ්ය ත්වන්මාර්ගං සහජදයයා දේශිකදෘශා
ෂඩධ්වධ්වාංතෞඝච්ඡිදුරගණනාතීතකරුණාම් ।
පරාමාජ්ඤාකාරාං සපදි ශිවයංතීං ශිවතනුං
ස්වමාත්මානං ධන්යාශ්චිරමුපලභංතේ භගවතීම් ॥ 31 ॥

මයූඛාඃ පූෂ්ණීව ජ්වලන ඉව තද්දීප්තිකණිකාඃ
පයෝධෞ කල්ලෝලාඃ ප්රතිහතමහිම්නීව පෘෂතඃ ।
උදේත්යෝදේත්යාංබ ත්වයි සහ නිජෛඃ සාත්ත්විකගුණෛ-
-ර්භජංතේ තත්ත්වෞඝාඃ ප්රශමමනුකල්පං පරවශාඃ ॥ 32 ॥

විධුර්විෂ්ණුර්බ්රහ්මා ප්රකෘතිරණුරාත්මා දිනකරඃ
ස්වභාවෝ ජෛනේංද්රඃ සුගතමුනිරාකාශමලිනඃ ।
ශිවඃ ශක්තිශ්චේති ශ්රුතිවිෂයතාං තාමුපගතාං
විකල්පෛරේභිස්ත්වාමභිදධති සංතෝ භගවතීම් ॥ 33 ॥

ශිවස්ත්වං ශක්තිස්ත්වං ත්වමසි සමයා ත්වං සමයිනී
ත්වමාත්මා ත්වං දීක්ෂා ත්වමයමණිමාදිර්ගුණගණඃ ।
අවිද්යා ත්වං විද්යා ත්වමසි නිඛිලං ත්වං කිමපරං
පෘථක්තත්ත්වං ත්වත්තෝ භගවති න වීක්ෂාමහ ඉමේ ॥ 34 ॥

ත්වයාසෞ ජානීතේ රචයති භවත්යෛව සතතං
ත්වයෛවේච්ඡත්යංබ ත්වමසි නිඛිලා යස්ය තනවඃ ।
ජගත්සාම්යං ශංභෝර්වහසි පරමව්යෝමවපුෂඃ
තථාප්යර්ධං භූත්වා විහරසි ශිවස්යේති කිමිදම් ॥ 35 ॥

අසංඛ්යෛඃ ප්රාචීනෛර්ජනනි ජනනෛඃ කර්මවිලයා-
-ත්සකෘජ්ජන්මන්යංතේ ගුරුවපුෂමාසාද්ය ගිරිශම් ।
අවාප්යාජ්ඤාං ශෛවීං ශිවතනුමපි ත්වාං විදිතවා-
-න්නයේයං ත්වත්පූජාස්තුතිවිරචනේනෛව දිවසාන් ॥ 36 ॥

යත්ෂට්පත්රං කමලමුදිතං තස්ය යා කර්ණිකාඛ්යා
යෝනිස්තස්යාඃ ප්රථිතමුදරේ යත්තදෝංකාරපීඨම් ।
තස්යාප්යංතඃ කුචභරනතාං කුංඩලීති ප්රසිද්ධාං
ශ්යාමාකාරාං සකලජනනීං සංතතං භාවයාමි ॥ 37 ॥

භුවි පයසි කෘශානෞ මාරුතේ ඛේ ශශාංකේ
සවිතරි යජමානේऽප්යෂ්ටධා ශක්තිරේකා ।
වහසි කුචභරාභ්යාං යාවනම්රාපි විශ්වං
සකලජනනි සා ත්වං පාහි මාමිත්යවාච්යම් ॥ 38 ॥

ඉති ශ්රීකාළිදාස විරචිත පංචස්තව්යාං පංචමඃ සකලජනනීස්තවඃ ।