නිර්ගුණ මානස පූජා

ශිෂ්ය උවාච
අඛංඩේ සච්චිදානංදේ නිර්විකල්පෛකරූපිණි ।
ස්ථිතේऽද්විතීයභාවේऽපි කථං පූජා විධීයතේ ॥ 1 ॥

පූර්ණස්යාවාහනං කුත්ර සර්වාධාරස්ය චාසනම් ।
ස්වච්ඡස්ය පාද්යමර්ඝ්යං ච ශුද්ධස්යාචමනං කුතඃ ॥ 2 ॥

නිර්මලස්ය කුතඃ ස්නානං වාසෝ විශ්වෝදරස්ය ච ।
අගෝත්රස්ය ත්වවර්ණස්ය කුතස්තස්යෝපවීතකම් ॥ 3 ॥

නිර්ලේපස්ය කුතෝ ගංධඃ පුෂ්පං නිර්වාසනස්ය ච ।
නිර්විශේෂස්ය කා භූෂා කෝऽලංකාරෝ නිරාකෘතේඃ ॥ 4 ॥

නිරංජනස්ය කිං ධූපෛර්දීපෛර්වා සර්වසාක්ෂිණඃ ।
නිජානංදෛකතෘප්තස්ය නෛවේද්යං කිං භවේදිහ ॥ 5 ॥

විශ්වානංදයිතුස්තස්ය කිං තාංබූලං ප්රකල්පතේ ।
ස්වයංප්රකාශචිද්රූපෝ යෝऽසාවර්කාදිභාසකඃ ॥ 6 ॥

ගීයතේ ශ්රුතිභිස්තස්ය නීරාජනවිධිඃ කුතඃ ।
ප්රදක්ෂිණමනංතස්ය ප්රණාමෝऽද්වයවස්තුනඃ ॥ 7 ॥

වේදවාචාමවේද්යස්ය කිං වා ස්තෝත්රං විධීයතේ ।
අංතර්බහිඃ සංස්ථිතස්ය උද්වාසනවිධිඃ කුතඃ ॥ 8 ॥

ශ්රී ගුරුරුවාච
ආරාධයාමි මණිසංනිභමාත්මලිංගම්
මායාපුරීහෘදයපංකජසංනිවිෂ්ටම් ।
ශ්රද්ධානදීවිමලචිත්තජලාභිෂේකෛ-
ර්නිත්යං සමාධිකුසුමෛර්නපුනර්භවාය ॥ 9 ॥

අයමේකෝऽවශිෂ්ටෝऽස්මීත්යේවමාවාහයේච්ඡිවම් ।
ආසනං කල්පයේත්පශ්චාත්ස්වප්රතිෂ්ඨාත්මචිංතනම් ॥ 10 ॥

පුණ්යපාපරජඃසංගෝ මම නාස්තීති වේදනම් ।
පාද්යං සමර්පයේද්විද්වන්සර්වකල්මෂනාශනම් ॥ 11 ॥

අනාදිකල්පවිධෘතමූලාජ්ඤානජලාංජලිම් ।
විසෘජේදාත්මලිංගස්ය තදේවාර්ඝ්යසමර්පණම් ॥ 12 ॥

බ්රහ්මානංදාබ්ධිකල්ලෝලකණකෝට්යංශලේශකම් ।
පිබංතීංද්රාදය ඉති ධ්යානමාචමනං මතම් ॥ 13 ॥

බ්රහ්මානංදජලේනෛව ලෝකාඃ සර්වේ පරිප්ලුතාඃ ।
අච්ඡේද්යෝऽයමිති ධ්යානමභිෂේචනමාත්මනඃ ॥ 14 ॥

නිරාවරණචෛතන්යං ප්රකාශෝऽස්මීති චිංතනම් ।
ආත්මලිංගස්ය සද්වස්ත්රමිත්යේවං චිංතයේන්මුනිඃ ॥ 15 ॥

ත්රිගුණාත්මාශේෂලෝකමාලිකාසූත්රමස්ම්යහම් ।
ඉති නිශ්චයමේවාත්ර හ්යුපවීතං පරං මතම් ॥ 16 ॥

අනේකවාසනාමිශ්රප්රපංචෝऽයං ධෘතෝ මයා ।
නාන්යේනේත්යනුසංධානමාත්මනශ්චංදනං භවේත් ॥ 17 ॥

රජඃසත්ත්වතමෝවෘත්තිත්යාගරූපෛස්තිලාක්ෂතෛඃ ।
ආත්මලිංගං යජේන්නිත්යං ජීවන්මුක්තිප්රසිද්ධයේ ॥ 18 ॥

ඊශ්වරෝ ගුරුරාත්මේති භේදත්රයවිවර්ජිතෛඃ ।
බිල්වපත්රෛරද්විතීයෛරාත්මලිංගං යජේච්ඡිවම් ॥ 19 ॥

සමස්තවාසනාත්යාගං ධූපං තස්ය විචිංතයේත් ।
ජ්යෝතිර්මයාත්මවිජ්ඤානං දීපං සංදර්ශයේද්බුධඃ ॥ 20 ॥

නෛවේද්යමාත්මලිංගස්ය බ්රහ්මාංඩාඛ්යං මහෝදනම් ।
පිබානංදරසං ස්වාදු මෘත්යුරස්යෝපසේචනම් ॥ 21 ॥

අජ්ඤානෝච්ඡිෂ්ටකරස්ය ක්ෂාලනං ජ්ඤානවාරිණා ।
විශුද්ධස්යාත්මලිංගස්ය හස්තප්රක්ෂාලනං ස්මරේත් ॥ 22 ॥

රාගාදිගුණශූන්යස්ය ශිවස්ය පරමාත්මනඃ ।
සරාගවිෂයාභ්යාසත්යාගස්තාංබූලචර්වණම් ॥ 23 ॥

අජ්ඤානධ්වාංතවිධ්වංසප්රචංඩමතිභාස්කරම් ।
ආත්මනෝ බ්රහ්මතාජ්ඤානං නීරාජනමිහාත්මනඃ ॥ 24 ॥

විවිධබ්රහ්මසංදෘෂ්ටිර්මාලිකාභිරලංකෘතම් ।
පූර්ණානංදාත්මතාදෘෂ්ටිං පුෂ්පාංජලිමනුස්මරේත් ॥ 25 ॥

පරිභ්රමංති බ්රහ්මාංඩසහස්රාණි මයීශ්වරේ ।
කූටස්ථාචලරූපෝऽහමිති ධ්යානං ප්රදක්ෂිණම් ॥ 26 ॥

විශ්වවංද්යෝऽහමේවාස්මි නාස්ති වංද්යෝ මදන්යතඃ ।
ඉත්යාලෝචනමේවාත්ර ස්වාත්මලිංගස්ය වංදනම් ॥ 27 ॥

ආත්මනඃ සත්ක්රියා ප්රෝක්තා කර්තව්යාභාවභාවනා ।
නාමරූපව්යතීතාත්මචිංතනං නාමකීර්තනම් ॥ 28 ॥

ශ්රවණං තස්ය දේවස්ය ශ්රෝතව්යාභාවචිංතනම් ।
මනනං ත්වාත්මලිංගස්ය මංතව්යාභාවචිංතනම් ॥ 29 ॥

ධ්යාතව්යාභාවවිජ්ඤානං නිදිධ්යාසනමාත්මනඃ ।
සමස්තභ්රාංතිවික්ෂේපරාහිත්යේනාත්මනිෂ්ඨතා ॥ 30 ॥

සමාධිරාත්මනෝ නාම නාන්යච්චිත්තස්ය විභ්රමඃ ।
තත්රෛව බහ්මණි සදා චිත්තවිශ්රාංතිරිෂ්යතේ ॥ 31 ॥

ඒවං වේදාංතකල්පෝක්තස්වාත්මලිංගප්රපූජනම් ।
කුර්වන්නා මරණං වාපි ක්ෂණං වා සුසමාහිතඃ ॥ 32 ॥

සර්වදුර්වාසනාජාලං පදපාංසුමිව ත්යජේත් ।
විධූයාජ්ඤානදුඃඛෞඝං මෝක්ෂානංදං සමශ්නුතේ ॥ 33 ॥