නාරායණීයං දශක 89 – වෘකාසුරවධං – භෘගුපරීක්ෂණම්

රමාජානේ ජානේ යදිහ තව භක්තේෂු විභවෝ
න සද්යස්සංපද්යස්තදිහ මදකෘත්ත්වාදශමිනාම් ।
ප්රශාංතිං කෘත්වෛව ප්රදිශසි තතඃ කාමමඛිලං
ප්රශාංතේෂු ක්ෂිප්රං න ඛලු භවදීයේ ච්යුතිකථා ॥1॥

සද්යඃ ප්රසාදරුෂිතාන් විධිශංකරාදීන්
කේචිද්විභෝ නිජගුණානුගුණං භජංතඃ ।
භ්රෂ්ටා භවංති බත කෂ්ටමදීර්ඝදෘෂ්ට්යා
ස්පෂ්ටං වෘකාසුර උදාහරණං කිලාස්මින් ॥2॥

ශකුනිජඃ ස තු නාරදමේකදා
ත්වරිතතෝෂමපෘච්ඡදධීශ්වරම් ।
ස ච දිදේශ ගිරීශමුපාසිතුං
න තු භවංතමබංධුමසාධුෂු ॥3॥

තපස්තප්ත්වා ඝෝරං ස ඛලු කුපිතඃ සප්තමදිනේ
ශිරඃ ඡිත්වා සද්යඃ පුරහරමුපස්ථාප්ය පුරතඃ ।
අතික්ෂුද්රං රෞද්රං ශිරසි කරදානේන නිධනං
ජගන්නාථාද්වව්රේ භවති විමුඛානාං ක්ව ශුභධීඃ ॥4॥

මෝක්තාරං බංධමුක්තෝ හරිණපතිරිව ප්රාද්රවත්සෝऽථ රුද්රං
දෛත්යාත් භීත්යා ස්ම දේවෝ දිශි දිශි වලතේ පෘෂ්ඨතෝ දත්තදෘෂ්ටිඃ ।
තූෂ්ණීකේ සර්වලෝකේ තව පදමධිරෝක්ෂ්යංතමුද්වීක්ෂ්ය ශර්වං
දූරාදේවාග්රතස්ත්වං පටුවටුවපුෂා තස්ථිෂේ දානවාය ॥5॥

භද්රං තේ ශාකුනේය භ්රමසි කිමධුනා ත්වං පිශාචස්ය වාචා
සංදේහශ්චේන්මදුක්තෞ තව කිමු න කරෝෂ්යංගුලීමංගමෞලෞ ।
ඉත්ථං ත්වද්වාක්යමූඪඃ ශිරසි කෘතකරඃ සෝऽපතච්ඡින්නපාතං
භ්රංශෝ හ්යේවං පරෝපාසිතුරපි ච ගතිඃ ශූලිනෝऽපි ත්වමේව ॥6॥

භෘගුං කිල සරස්වතීනිකටවාසිනස්තාපසා-
ස්ත්රිමූර්තිෂු සමාදිශන්නධිකසත්ත්වතාං වේදිතුම් ।
අයං පුනරනාදරාදුදිතරුද්ධරෝෂේ විධෞ
හරේऽපි ච ජිහිංසිෂෞ ගිරිජයා ධෘතේ ත්වාමගාත් ॥7॥

සුප්තං රමාංකභුවි පංකජලෝචනං ත්වාං
විප්රේ විනිඝ්නති පදේන මුදෝත්ථිතස්ත්වම් ।
සර්වං ක්ෂමස්ව මුනිවර්ය භවේත් සදා මේ
ත්වත්පාදචින්හමිහ භූෂණමිත්යවාදීඃ ॥8॥

නිශ්චිත්ය තේ ච සුදෘඪං ත්වයි බද්ධභාවාඃ
සාරස්වතා මුනිවරා දධිරේ විමෝක්ෂම් ।
ත්වාමේවමච්යුත පුනශ්ච්යුතිදෝෂහීනං
සත්ත්වෝච්චයෛකතනුමේව වයං භජාමඃ ॥9॥

ජගත්සෘෂ්ට්යාදෞ ත්වාං නිගමනිවහෛර්වංදිභිරිව
ස්තුතං විෂ්ණෝ සච්චිත්පරමරසනිර්ද්වෛතවපුෂම් ।
පරාත්මානං භූමන් පශුපවනිතාභාග්යනිවහං
පරිතාපශ්රාංත්යෛ පවනපුරවාසින් පරිභජේ ॥10॥