නාරායණීයං දශක 88 – සංතානගෝපාලම්

ප්රාගේවාචාර්යපුත්රාහෘතිනිශමනයා ස්වීයෂට්සූනුවීක්ෂාං
කාංක්ෂංත්යා මාතුරුක්ත්යා සුතලභුවි බලිං ප්රාප්ය තේනාර්චිතස්ත්වම් ।
ධාතුඃ ශාපාද්ධිරණ්යාන්විතකශිපුභවාන් ශෞරිජාන් කංසභග්නා-
නානීයෛනාන් ප්රදර්ශ්ය ස්වපදමනයථාඃ පූර්වපුත්රාන් මරීචේඃ ॥1॥

ශ්රුතදේව ඉති ශ්රුතං ද්විජේංද්රං
බහුලාශ්වං නෘපතිං ච භක්තිපූර්ණම් ।
යුගපත්ත්වමනුග්රහීතුකාමෝ
මිථිලාං ප්රාපිථං තාපසෛඃ සමේතඃ ॥2॥

ගච්ඡන් ද්විමූර්තිරුභයෝර්යුගපන්නිකේත-
මේකේන භූරිවිභවෛර්විහිතෝපචාරඃ ।
අන්යේන තද්දිනභෘතෛශ්ච ඵලෞදනාද්යෛ-
ස්තුල්යං ප්රසේදිථ දදථ ච මුක්තිමාභ්යාම් ॥3॥

භූයෝऽථ ද්වාරවත්යාං ද්විජතනයමෘතිං තත්ප්රලාපානපි ත්වම්
කෝ වා දෛවං නිරුංධ්යාදිති කිල කථයන් විශ්වවෝඪාප්යසෝඪාඃ ।
ජිෂ්ණෝර්ගර්වං විනේතුං ත්වයි මනුජධියා කුංඨිතාං චාස්ය බුද්ධිං
තත්ත්වාරූඪාං විධාතුං පරමතමපදප්රේක්ෂණේනේති මන්යේ ॥4॥

නෂ්ටා අෂ්ටාස්ය පුත්රාඃ පුනරපි තව තූපේක්ෂයා කෂ්ටවාදඃ
ස්පෂ්ටෝ ජාතෝ ජනානාමථ තදවසරේ ද්වාරකාමාප පාර්ථඃ ।
මෛත්ර්යා තත්රෝෂිතෝऽසෞ නවමසුතමෘතෞ විප්රවර්යප්රරෝදං
ශ්රුත්වා චක්රේ ප්රතිජ්ඤාමනුපහෘතසුතඃ සන්නිවේක්ෂ්යේ කෘශානුම් ॥5॥

මානී ස ත්වාමපෘෂ්ට්වා ද්විජනිලයගතෝ බාණජාලෛර්මහාස්ත්රෛ
රුංධානඃ සූතිගේහං පුනරපි සහසා දෘෂ්ටනෂ්ටේ කුමාරේ ।
යාම්යාමෛංද්රීං තථාऽන්යාඃ සුරවරනගරීර්විද්යයාऽऽසාද්ය සද්යෝ
මෝඝෝද්යෝගඃ පතිෂ්යන් හුතභුජි භවතා සස්මිතං වාරිතෝऽභූත් ॥6॥

සාර්ධං තේන ප්රතීචීං දිශමතිජවිනා ස්යංදනේනාභියාතෝ
ලෝකාලෝකං ව්යතීතස්තිමිරභරමථෝ චක්රධාම්නා නිරුංධන් ।
චක්රාංශුක්ලිෂ්ටදෘෂ්ටිං ස්ථිතමථ විජයං පශ්ය පශ්යේති වාරාං
පාරේ ත්වං ප්රාදදර්ශඃ කිමපි හි තමසාං දූරදූරං පදං තේ ॥7॥

තත්රාසීනං භුජංගාධිපශයනතලේ දිව්යභූෂායුධාද්යෛ-
රාවීතං පීතචේලං ප්රතිනවජලදශ්යාමලං ශ්රීමදංගම් ।
මූර්තීනාමීශිතාරං පරමිහ තිසෘණාමේකමර්ථං ශ්රුතීනාං
ත්වාමේව ත්වං පරාත්මන් ප්රියසඛසහිතෝ නේමිථ ක්ෂේමරූපම් ॥8॥

යුවාං මාමේව ද්වාවධිකවිවෘතාංතර්හිතතයා
විභින්නෞ සංද්රෂ්ටුං ස්වයමහමහාර්ෂං ද්විජසුතාන් ।
නයේතං ද්රාගේතානිති ඛලු විතීර්ණාන් පුනරමූන්
ද්විජායාදායාදාඃ ප්රණුතමහිමා පාංඩුජනුෂා ॥9॥

ඒවං නානාවිහාරෛර්ජගදභිරමයන් වෘෂ්ණිවංශං ප්රපුෂ්ණ-
න්නීජානෝ යජ්ඤභේදෛරතුලවිහෘතිභිඃ ප්රීණයන්නේණනේත්රාඃ ।
භූභාරක්ෂේපදංභාත් පදකමලජුෂාං මෝක්ෂණායාවතීර්ණඃ
පූර්ණං බ්රහ්මෛව සාක්ෂාද්යදුෂු මනුජතාරූෂිතස්ත්වං ව්යලාසීඃ ॥10॥

ප්රායේණ ද්වාරවත්යාමවෘතදයි තදා නාරදස්ත්වද්රසාර්ද්ර-
ස්තස්මාල්ලේභේ කදාචිත්ඛලු සුකෘතනිධිස්ත්වත්පිතා තත්ත්වබෝධම් ।
භක්තානාමග්රයායී ස ච ඛලු මතිමානුද්ධවස්ත්වත්ත ඒව
ප්රාප්තෝ විජ්ඤානසාරං ස කිල ජනහිතායාධුනාऽऽස්තේ බදර්යාම් ॥11॥

සෝऽයං කෘෂ්ණාවතාරෝ ජයති තව විභෝ යත්ර සෞහාර්දභීති-
ස්නේහද්වේෂානුරාගප්රභෘතිභිරතුලෛරශ්රමෛර්යෝගභේදෛඃ ।
ආර්තිං තීර්ත්වා සමස්තාමමෘතපදමගුස්සර්වතඃ සර්වලෝකාඃ
ස ත්වං විශ්වාර්තිශාංත්යෛ පවනපුරපතේ භක්තිපූර්ත්යෛ ච භූයාඃ ॥12॥