නාරායණීයං දශක 56 – කාලියගර්වශමනං තථා භගවදනුග්රහම්

රුචිරකංපිතකුංඩලමංඩලඃ සුචිරමීශ නනර්තිථ පන්නගේ ।
අමරතාඩිතදුංදුභිසුංදරං වියති ගායති දෛවතයෞවතේ ॥1॥

නමති යද්යදමුෂ්ය ශිරෝ හරේ පරිවිහාය තදුන්නතමුන්නතම් ।
පරිමථන් පදපංකරුහා චිරං ව්යහරථාඃ කරතාලමනෝහරම් ॥2॥

ත්වදවභග්නවිභුග්නඵණාගණේ ගලිතශෝණිතශෝණිතපාථසි ।
ඵණිපතාවවසීදති සන්නතාස්තදබලාස්තව මාධව පාදයෝඃ ॥3॥

අයි පුරෛව චිරාය පරිශ්රුතත්වදනුභාවවිලීනහෘදෝ හි තාඃ ।
මුනිභිරප්යනවාප්යපථෛඃ ස්තවෛර්නුනුවුරීශ භවංතමයංත්රිතම් ॥4॥

ඵණිවධූගණභක්තිවිලෝකනප්රවිකසත්කරුණාකුලචේතසා ।
ඵණිපතිර්භවතාऽච්යුත ජීවිතස්ත්වයි සමර්පිතමූර්තිරවානමත් ॥5॥

රමණකං ව්රජ වාරිධිමධ්යගං ඵණිරිපුර්න කරෝති විරෝධිතාම් ।
ඉති භවද්වචනාන්යතිමානයන් ඵණිපතිර්නිරගාදුරගෛඃ සමම් ॥6॥

ඵණිවධූජනදත්තමණිව්රජජ්වලිතහාරදුකූලවිභූෂිතඃ ।
තටගතෛඃ ප්රමදාශ්රුවිමිශ්රිතෛඃ සමගථාඃ ස්වජනෛර්දිවසාවධෞ ॥7॥

නිශි පුනස්තමසා ව්රජමංදිරං ව්රජිතුමක්ෂම ඒව ජනෝත්කරේ ।
ස්වපති තත්ර භවච්චරණාශ්රයේ දවකෘශානුරරුංධ සමංතතඃ ॥8॥

ප්රබුධිතානථ පාලය පාලයේත්යුදයදාර්තරවාන් පශුපාලකාන් ।
අවිතුමාශු පපාථ මහානලං කිමිහ චිත්රමයං ඛලු තේ මුඛම් ॥9॥

ශිඛිනි වර්ණත ඒව හි පීතතා පරිලසත්යධුනා ක්රියයාऽප්යසෞ ।
ඉති නුතඃ පශුපෛර්මුදිතෛර්විභෝ හර හරේ දුරිතෛඃසහ මේ ගදාන් ॥10॥