නාරායණීයං දශක 43 – තෘණාවර්තවධම්

ත්වාමේකදා ගුරුමරුත්පුරනාථ වෝඪුං
ගාඪාධිරූඪගරිමාණමපාරයංතී ।
මාතා නිධාය ශයනේ කිමිදං බතේති
ධ්යායංත්යචේෂ්ටත ගෘහේෂු නිවිෂ්ටශංකා ॥1॥

තාවද්විදූරමුපකර්ණිතඝෝරඝෝෂ-
ව්යාජෘංභිපාංසුපටලීපරිපූරිතාශඃ ।
වාත්යාවපුස්ස කිල දෛත්යවරස්තෘණාව-
ර්තාඛ්යෝ ජහාර ජනමානසහාරිණං ත්වාම් ॥2॥

උද්දාමපාංසුතිමිරාහතදෘෂ්ටිපාතේ
ද්රෂ්ටුං කිමප්යකුශලේ පශුපාලලෝකේ ।
හා බාලකස්ය කිමිති ත්වදුපාංතමාප්තා
මාතා භවංතමවිලෝක්ය භෘශං රුරෝද ॥3॥

තාවත් ස දානවවරෝऽපි ච දීනමූර්ති-
ර්භාවත්කභාරපරිධාරණලූනවේගඃ ।
සංකෝචමාප තදනු ක්ෂතපාංසුඝෝෂේ
ඝෝෂේ ව්යතායත භවජ්ජනනීනිනාදඃ ॥4॥

රෝදෝපකර්ණනවශාදුපගම්ය ගේහං
ක්රංදත්සු නංදමුඛගෝපකුලේෂු දීනඃ ।
ත්වාං දානවස්ත්වඛිලමුක්තිකරං මුමුක්ෂු-
ස්ත්වය්යප්රමුංචති පපාත වියත්ප්රදේශාත් ॥5॥

රෝදාකුලාස්තදනු ගෝපගණා බහිෂ්ඨ-
පාෂාණපෘෂ්ඨභුවි දේහමතිස්ථවිෂ්ඨම් ।
ප්රෛක්ෂංත හංත නිපතංතමමුෂ්ය වක්ෂ-
ස්යක්ෂීණමේව ච භවංතමලං හසංතම් ॥6॥

ග්රාවප්රපාතපරිපිෂ්ටගරිෂ්ඨදේහ-
භ්රෂ්ටාසුදුෂ්ටදනුජෝපරි ධෘෂ්ටහාසම් ।
ආඝ්නානමංබුජකරේණ භවංතමේත්ය
ගෝපා දධුර්ගිරිවරාදිව නීලරත්නම් ॥7॥

ඒකෛකමාශු පරිගෘහ්ය නිකාමනංද-
න්නංදාදිගෝපපරිරබ්ධවිචුංබිතාංගම් ।
ආදාතුකාමපරිශංකිතගෝපනාරී-
හස්තාංබුජප්රපතිතං ප්රණුමෝ භවංතම් ॥8॥

භූයෝऽපි කින්නු කෘණුමඃ ප්රණතාර්තිහාරී
ගෝවිංද ඒව පරිපාලයතාත් සුතං නඃ ।
ඉත්යාදි මාතරපිතෘප්රමුඛෛස්තදානීං
සංප්රාර්ථිතස්ත්වදවනාය විභෝ ත්වමේව ॥9॥

වාතාත්මකං දනුජමේවමයි ප්රධූන්වන්
වාතෝද්භවාන් මම ගදාන් කිමු නෝ ධුනෝෂි ।
කිං වා කරෝමි පුනරප්යනිලාලයේශ
නිශ්ශේෂරෝගශමනං මුහුරර්ථයේ ත්වාම් ॥10॥