නාරායණීයං දශක 4 – යෝගාභ්යාසඃ තථා යෝගසිද්ධිඃ

කල්යතාං මම කුරුෂ්ව තාවතීං කල්යතේ භවදුපාසනං යයා ।
ස්පෂ්ටමෂ්ටවිධයෝගචර්යයා පුෂ්ටයාශු තව තුෂ්ටිමාප්නුයාම් ॥1॥

බ්රහ්මචර්යදෘඪතාදිභිර්යමෛරාප්ලවාදිනියමෛශ්ච පාවිතාඃ ।
කුර්මහේ දෘඪමමී සුඛාසනං පංකජාද්යමපි වා භවත්පරාඃ ॥2॥

තාරමංතරනුචිංත්ය සංතතං ප්රාණවායුමභියම්ය නිර්මලාඃ ।
ඉංද්රියාණි විෂයාදථාපහෘත්යාස්මහේ භවදුපාසනෝන්මුඛාඃ ॥3॥

අස්ඵුටේ වපුෂි තේ ප්රයත්නතෝ ධාරයේම ධිෂණාං මුහුර්මුහුඃ ।
තේන භක්තිරසමංතරාර්ද්රතාමුද්වහේම භවදංඝ්රිචිංතකා ॥4॥

විස්ඵුටාවයවභේදසුංදරං ත්වද්වපුඃ සුචිරශීලනාවශාත් ।
අශ්රමං මනසි චිංතයාමහේ ධ්යානයෝගනිරතාස්ත්වදාශ්රයාඃ ॥5॥

ධ්යායතාං සකලමූර්තිමීදෘශීමුන්මිෂන්මධුරතාහෘතාත්මනාම් ।
සාංද්රමෝදරසරූපමාංතරං බ්රහ්ම රූපමයි තේऽවභාසතේ ॥6॥

තත්සමාස්වදනරූපිණීං ස්ථිතිං ත්වත්සමාධිමයි විශ්වනායක ।
ආශ්රිතාඃ පුනරතඃ පරිච්යුතාවාරභේමහි ච ධාරණාදිකම් ॥7॥

ඉත්ථමභ්යසනනිර්භරෝල්ලසත්ත්වත්පරාත්මසුඛකල්පිතෝත්සවාඃ ।
මුක්තභක්තකුලමෞලිතාං ගතාඃ සංචරේම ශුකනාරදාදිවත් ॥8॥

ත්වත්සමාධිවිජයේ තු යඃ පුනර්මංක්ෂු මෝක්ෂරසිකඃ ක්රමේණ වා ।
යෝගවශ්යමනිලං ෂඩාශ්රයෛරුන්නයත්යජ සුෂුම්නයා ශනෛඃ ॥9॥

ලිංගදේහමපි සංත්යජන්නථෝ ලීයතේ ත්වයි පරේ නිරාග්රහඃ ।
ඌර්ධ්වලෝකකුතුකී තු මූර්ධතඃ සාර්ධමේව කරණෛර්නිරීයතේ ॥10॥

අග්නිවාසරවලර්ක්ෂපක්ෂගෛරුත්තරායණජුෂා ච දෛවතෛඃ ।
ප්රාපිතෝ රවිපදං භවත්පරෝ මෝදවාන් ධ්රුවපදාංතමීයතේ ॥11॥

ආස්ථිතෝऽථ මහරාලයේ යදා ශේෂවක්ත්රදහනෝෂ්මණාර්ද්යතේ ।
ඊයතේ භවදුපාශ්රයස්තදා වේධසඃ පදමතඃ පුරෛව වා ॥12॥

තත්ර වා තව පදේऽථවා වසන් ප්රාකෘතප්රලය ඒති මුක්තතාම් ।
ස්වේච්ඡයා ඛලු පුරා විමුච්යතේ සංවිභිද්ය ජගදංඩමෝජසා ॥13॥

තස්ය ච ක්ෂිතිපයෝමහෝऽනිලද්යෝමහත්ප්රකෘතිසප්තකාවෘතීඃ ।
තත්තදාත්මකතයා විශන් සුඛී යාති තේ පදමනාවෘතං විභෝ ॥14॥

අර්චිරාදිගතිමීදෘශීං ව්රජන් විච්යුතිං න භජතේ ජගත්පතේ ।
සච්චිදාත්මක භවත් ගුණෝදයානුච්චරංතමනිලේශ පාහි මාම් ॥15॥