නාරායණීයං දශක 33 – අංබරීෂචරිතම්

වෛවස්වතාඛ්යමනුපුත්රනභාගජාත-
නාභාගනාමකනරේංද්රසුතෝऽංබරීෂඃ ।
සප්තාර්ණවාවෘතමහීදයිතෝऽපි රේමේ
ත්වත්සංගිෂු ත්වයි ච මග්නමනාස්සදෛව ॥1॥

ත්වත්ප්රීතයේ සකලමේව විතන්වතෝऽස්ය
භක්ත්යෛව දේව නචිරාදභෘථාඃ ප්රසාදම් ।
යේනාස්ය යාචනමෘතේऽප්යභිරක්ෂණාර්ථං
චක්රං භවාන් ප්රවිතතාර සහස්රධාරම් ॥2॥

ස ද්වාදශීව්රතමථෝ භවදර්චනාර්ථං
වර්ෂං දධෞ මධුවනේ යමුනෝපකංඨේ ।
පත්න්යා සමං සුමනසා මහතීං විතන්වන්
පූජාං ද්විජේෂු විසෘජන් පශුෂෂ්ටිකෝටිම් ॥3॥

තත්රාථ පාරණදිනේ භවදර්චනාංතේ
දුර්වාසසාऽස්ය මුනිනා භවනං ප්රපේදේ ।
භෝක්තුං වෘතශ්චස නෘපේණ පරාර්තිශීලෝ
මංදං ජගාම යමුනාං නියමාන්විධාස්යන් ॥4॥

රාජ්ඤාऽථ පාරණමුහූර්තසමාප්තිඛේදා-
ද්වාරෛව පාරණමකාරි භවත්පරේණ ।
ප්රාප්තෝ මුනිස්තදථ දිව්යදෘශා විජානන්
ක්ෂිප්යන් ක්රුධෝද්ධෘතජටෝ විතතාන කෘත්යාම් ॥5॥

කෘත්යාං ච තාමසිධරාං භුවනං දහංතී-
මග්රේऽභිවීක්ෂ්යනෘපතිර්න පදාච්චකංපේ ।
ත්වද්භක්තබාධමභිවීක්ෂ්ය සුදර්ශනං තේ
කෘත්යානලං ශලභයන් මුනිමන්වධාවීත් ॥6॥

ධාවන්නශේෂභුවනේෂු භියා ස පශ්යන්
විශ්වත්ර චක්රමපි තේ ගතවාන් විරිංචම් ।
කඃ කාලචක්රමතිලංඝයතීත්යපාස්තඃ
ශර්වං යයෞ ස ච භවංතමවංදතෛව ॥7॥

භූයෝ භවන්නිලයමේත්ය මුනිං නමංතං
ප්රෝචේ භවානහමෘෂේ නනු භක්තදාසඃ ।
ජ්ඤානං තපශ්ච විනයාන්විතමේව මාන්යං
යාහ්යංබරීෂපදමේව භජේති භූමන් ॥8॥

තාවත්සමේත්ය මුනිනා ස ගෘහීතපාදෝ
රාජාऽපසෘත්ය භවදස්ත්රමසාවනෞෂීත් ।
චක්රේ ගතේ මුනිරදාදඛිලාශිෂෝऽස්මෛ
ත්වද්භක්තිමාගසි කෘතේऽපි කෘපාං ච ශංසන් ॥9॥

රාජා ප්රතීක්ෂ්ය මුනිමේකසමාමනාශ්වාන්
සංභෝජ්ය සාධු තමෘෂිං විසෘජන් ප්රසන්නම් ।
භුක්ත්වා ස්වයං ත්වයි තතෝऽපි දෘඪං රතෝऽභූ-
ත්සායුජ්යමාප ච ස මාං පවනේශ පායාඃ ॥10॥