නාරායණීයං දශක 28 – ලක්ෂ්මීස්වයංවරං තථා අමෘතෝත්පත්තිඃ

ගරලං තරලානලං පුරස්තා-
ජ්ජලධේරුද්විජගාල කාලකූටම් ।
අමරස්තුතිවාදමෝදනිඝ්නෝ
ගිරිශස්තන්නිපපෞ භවත්ප්රියාර්ථම් ॥1॥

විමථත්සු සුරාසුරේෂු ජාතා
සුරභිස්තාමෘෂිෂු න්යධාස්ත්රිධාමන් ।
හයරත්නමභූදථේභරත්නං
ද්යුතරුශ්චාප්සරසඃ සුරේෂු තානි ॥2॥

ජගදීශ භවත්පරා තදානීං
කමනීයා කමලා බභූව දේවී ।
අමලාමවලෝක්ය යාං විලෝලඃ
සකලෝऽපි ස්පෘහයාංබභූව ලෝකඃ ॥3॥

ත්වයි දත්තහෘදේ තදෛව දේව්යෛ
ත්රිදශේංද්රෝ මණිපීඨිකාං ව්යතාරීත් ।
සකලෝපහෘතාභිෂේචනීයෛඃ
ඍෂයස්තාං ශ්රුතිගීර්භිරභ්යෂිංචන් ॥4॥

අභිෂේකජලානුපාතිමුග්ධ-
ත්වදපාංගෛරවභූෂිතාංගවල්ලීම් ।
මණිකුංඩලපීතචේලහාර-
ප්රමුඛෛස්තාමමරාදයෝऽන්වභූෂන් ॥5॥

වරණස්රජමාත්තභෘංගනාදාං
දධතී සා කුචකුංභමංදයානා ।
පදශිංජිතමංජුනූපුරා ත්වාං
කලිතව්රීලවිලාසමාසසාද ॥6॥

ගිරිශද්රුහිණාදිසර්වදේවාන්
ගුණභාජෝऽප්යවිමුක්තදෝෂලේශාන් ।
අවමෘශ්ය සදෛව සර්වරම්යේ
නිහිතා ත්වය්යනයාऽපි දිව්යමාලා ॥7॥

උරසා තරසා මමානිථෛනාං
භුවනානාං ජනනීමනන්යභාවාම් ।
ත්වදුරෝවිලසත්තදීක්ෂණශ්රී-
පරිවෘෂ්ට්යා පරිපුෂ්ටමාස විශ්වම් ॥8॥

අතිමෝහනවිභ්රමා තදානීං
මදයංතී ඛලු වාරුණී නිරාගාත් ।
තමසඃ පදවීමදාස්ත්වමේනා-
මතිසම්මානනයා මහාසුරේභ්යඃ ॥9॥

තරුණාංබුදසුංදරස්තදා ත්වං
නනු ධන්වංතරිරුත්ථිතෝऽංබුරාශේඃ ।
අමෘතං කලශේ වහන් කරාභ්යා-
මඛිලාර්තිං හර මාරුතාලයේශ ॥10॥