නාරායණීයං දශක 25 – නරසිංහාවතාරම්

ස්තංභේ ඝට්ටයතෝ හිරණ්යකශිපෝඃ කර්ණෞ සමාචූර්ණය-
න්නාඝූර්ණජ්ජගදංඩකුංඩකුහරෝ ඝෝරස්තවාභූද්රවඃ ।
ශ්රුත්වා යං කිල දෛත්යරාජහෘදයේ පූර්වං කදාප්යශ්රුතං
කංපඃ කශ්චන සංපපාත චලිතෝऽප්යංභෝජභූර්විෂ්ටරාත් ॥1॥

දෛත්යේ දික්ෂු විසෘෂ්ටචක්ෂුෂි මහාසංරංභිණි ස්තංභතඃ
සංභූතං න මෘගාත්මකං න මනුජාකාරං වපුස්තේ විභෝ ।
කිං කිං භීෂණමේතදද්භුතමිති ව්යුද්භ්රාංතචිත්තේऽසුරේ
විස්ඵූර්ජ්ජද්ධවලෝග්රරෝමවිකසද්වර්ෂ්මා සමාජෘංභථාඃ ॥2॥

තප්තස්වර්ණසවර්ණඝූර්ණදතිරූක්ෂාක්ෂං සටාකේසර-
ප්රෝත්කංපප්රනිකුංබිතාංබරමහෝ ජීයාත්තවේදං වපුඃ ।
ව්යාත්තව්යාප්තමහාදරීසඛමුඛං ඛඩ්ගෝග්රවල්ගන්මහා-
ජිහ්වානිර්ගමදෘශ්යමානසුමහාදංෂ්ට්රායුගෝඩ්ඩාමරම් ॥3॥

උත්සර්පද්වලිභංගභීෂණහනු හ්රස්වස්ථවීයස්තර-
ග්රීවං පීවරදෝශ්ශතෝද්ගතනඛක්රූරාංශුදූරෝල්බණම් ।
ව්යෝමෝල්ලංඝි ඝනාඝනෝපමඝනප්රධ්වානනිර්ධාවිත-
ස්පර්ධාලුප්රකරං නමාමි භවතස්තන්නාරසිංහං වපුඃ ॥4॥

නූනං විෂ්ණුරයං නිහන්ම්යමුමිති භ්රාම්යද්ගදාභීෂණං
දෛත්යේංද්රං සමුපාද්රවංතමධෘථා දෝර්භ්යාං පෘථුභ්යාමමුම් ।
වීරෝ නිර්ගලිතෝऽථ ඛඩ්ගඵලකෞ ගෘහ්ණන්විචිත්රශ්රමාන්
ව්යාවෘණ්වන් පුනරාපපාත භුවනග්රාසෝද්යතං ත්වාමහෝ ॥5॥

භ්රාම්යංතං දිතිජාධමං පුනරපි ප්රෝද්ගෘහ්ය දෝර්භ්යාං ජවාත්
ද්වාරේऽථෝරුයුගේ නිපාත්ය නඛරාන් ව්යුත්ඛාය වක්ෂෝභුවි ।
නිර්භිංදන්නධිගර්භනිර්භරගලද්රක්තාංබු බද්ධෝත්සවං
පායං පායමුදෛරයෝ බහු ජගත්සංහාරිසිංහාරවාන් ॥6॥

ත්යක්ත්වා තං හතමාශු රක්තලහරීසික්තෝන්නමද්වර්ෂ්මණි
ප්රත්යුත්පත්ය සමස්තදෛත්යපටලීං චාඛාද්යමානේ ත්වයි ।
භ්රාම්යද්භූමි විකංපිතාංබුධිකුලං ව්යාලෝලශෛලෝත්කරං
ප්රෝත්සර්පත්ඛචරං චරාචරමහෝ දුඃස්ථාමවස්ථාං දධෞ ॥7॥

තාවන්මාංසවපාකරාලවපුෂං ඝෝරාංත්රමාලාධරං
ත්වාං මධ්යේසභමිද්ධකෝපමුෂිතං දුර්වාරගුර්වාරවම් ।
අභ්යේතුං න ශශාක කෝපි භුවනේ දූරේ ස්ථිතා භීරවඃ
සර්වේ ශර්වවිරිංචවාසවමුඛාඃ ප්රත්යේකමස්තෝෂත ॥8॥

භූයෝऽප්යක්ෂතරෝෂධාම්නි භවති බ්රහ්මාජ්ඤයා බාලකේ
ප්රහ්ලාදේ පදයෝර්නමත්යපභයේ කාරුණ්යභාරාකුලඃ ।
ශාංතස්ත්වං කරමස්ය මූර්ධ්නි සමධාඃ ස්තෝත්රෛරථෝද්ගායත-
ස්තස්යාකාමධියෝऽපි තේනිථ වරං ලෝකාය චානුග්රහම් ॥9॥

ඒවං නාටිතරෞද්රචේෂ්ටිත විභෝ ශ්රීතාපනීයාභිධ-
ශ්රුත්යංතස්ඵුටගීතසර්වමහිමන්නත්යංතශුද්ධාකෘතේ ।
තත්තාදෘඞ්නිඛිලෝත්තරං පුනරහෝ කස්ත්වාං පරෝ ලංඝයේත්
ප්රහ්ලාදප්රිය හේ මරුත්පුරපතේ සර්වාමයාත්පාහි මාම් ॥10॥