නාරායණීයං දශක 23 – දක්ෂචරිතං තථා චිත්රකේතූපාඛ්යානම්

ප්රාචේතසස්තු භගවන්නපරෝ හි දක්ෂ-
ස්ත්වත්සේවනං ව්යධිත සර්ගවිවෘද්ධිකාමඃ ।
ආවිර්බභූවිථ තදා ලසදෂ්ටබාහු-
ස්තස්මෛ වරං දදිථ තාං ච වධූමසික්නීම් ॥1॥

තස්යාත්මජාස්ත්වයුතමීශ පුනස්සහස්රං
ශ්රීනාරදස්ය වචසා තව මාර්ගමාපුඃ ।
නෛකත්රවාසමෘෂයේ ස මුමෝච ශාපං
භක්තෝත්තමස්ත්වෘෂිරනුග්රහමේව මේනේ ॥2॥

ෂෂ්ට්යා තතෝ දුහිතෘභිඃ සෘජතඃ කුලෞඝාන්
දෞහිත්රසූනුරථ තස්ය ස විශ්වරූපඃ ।
ත්වත්ස්තෝත්රවර්මිතමජාපයදිංද්රමාජෞ
දේව ත්වදීයමහිමා ඛලු සර්වජෛත්රඃ ॥3॥

ප්රාක්ශූරසේනවිෂයේ කිල චිත්රකේතුඃ
පුත්රාග්රහී නෘපතිරංගිරසඃ ප්රභාවාත් ।
ලබ්ධ්වෛකපුත්රමථ තත්ර හතේ සපත්නී-
සංඝෛරමුහ්යදවශස්තව මායයාසෞ ॥4॥

තං නාරදස්තු සමමංගිරසා දයාලුඃ
සංප්රාප්ය තාවදුපදර්ශ්ය සුතස්ය ජීවම් ।
කස්යාස්මි පුත්ර ඉති තස්ය ගිරා විමෝහං
ත්යක්ත්වා ත්වදර්චනවිධෞ නෘපතිං න්යයුංක්ත ॥5॥

ස්තෝත්රං ච මංත්රමපි නාරදතෝऽථ ලබ්ධ්වා
තෝෂාය ශේෂවපුෂෝ නනු තේ තපස්යන් ।
විද්යාධරාධිපතිතාං ස හි සප්තරාත්රේ
ලබ්ධ්වාප්යකුංඨමතිරන්වභජද්භවංතම් ॥6॥

තස්මෛ මෘණාලධවලේන සහස්රශීර්ෂ්ණා
රූපේණ බද්ධනුතිසිද්ධගණාවෘතේන ।
ප්රාදුර්භවන්නචිරතෝ නුතිභිඃ ප්රසන්නෝ
දත්වාऽऽත්මතත්ත්වමනුගෘහ්ය තිරෝදධාථ ॥7॥

ත්වද්භක්තමෞලිරථ සෝऽපි ච ලක්ෂලක්ෂං
වර්ෂාණි හර්ෂුලමනා භුවනේෂු කාමම් ।
සංගාපයන් ගුණගණං තව සුංදරීභිඃ
සංගාතිරේකරහිතෝ ලලිතං චචාර ॥8॥

අත්යංතසංගවිලයාය භවත්ප්රණුන්නෝ
නූනං ස රූප්යගිරිමාප්ය මහත්සමාජේ ।
නිශ්ශංකමංකකෘතවල්ලභමංගජාරිං
තං ශංකරං පරිහසන්නුමයාභිශේපේ ॥9॥

නිස්සංභ්රමස්ත්වයමයාචිතශාපමෝක්ෂෝ
වෘත්රාසුරත්වමුපගම්ය සුරේංද්රයෝධී ।
භක්ත්යාත්මතත්ත්වකථනෛඃ සමරේ විචිත්රං
ශත්රෝරපි භ්රමමපාස්ය ගතඃ පදං තේ ॥10॥

ත්වත්සේවනේන දිතිරිංද්රවධෝද්යතාऽපි
තාන්ප්රත්යුතේංද්රසුහෘදෝ මරුතෝऽභිලේභේ ।
දුෂ්ටාශයේऽපි ශුභදෛව භවන්නිෂේවා
තත්තාදෘශස්ත්වමව මාං පවනාලයේශ ॥11॥