නාරායණීයං දශක 20 – ඍෂභයෝගීශ්වරචරිතම්

ප්රියව්රතස්ය ප්රියපුත්රභූතා-
දාග්නීධ්රරාජාදුදිතෝ හි නාභිඃ ।
ත්වාං දෘෂ්ටවානිෂ්ටදමිෂ්ටිමධ්යේ
තවෛව තුෂ්ට්යෛ කෘතයජ්ඤකර්මා ॥1॥

අභිෂ්ටුතස්තත්ර මුනීශ්වරෛස්ත්වං
රාජ්ඤඃ ස්වතුල්යං සුතමර්ථ්යමානඃ ।
ස්වයං ජනිෂ්යේऽහමිති බ්රුවාණ-
ස්තිරෝදධා බර්හිෂි විශ්වමූර්තේ ॥2॥

නාභිප්රියායාමථ මේරුදේව්යාං
ත්වමංශතෝऽභූඃ ॠෂභාභිධානඃ ।
අලෝකසාමාන්යගුණප්රභාව-
ප්රභාවිතාශේෂජනප්රමෝදඃ ॥3॥

ත්වයි ත්රිලෝකීභෘති රාජ්යභාරං
නිධාය නාභිඃ සහ මේරුදේව්යා ।
තපෝවනං ප්රාප්ය භවන්නිෂේවී
ගතඃ කිලානංදපදං පදං තේ ॥4॥

ඉංද්රස්ත්වදුත්කර්ෂකෘතාදමර්ෂා-
ද්වවර්ෂ නාස්මින්නජනාභවර්ෂේ ।
යදා තදා ත්වං නිජයෝගශක්ත්යා
ස්වවර්ෂමේනද්ව්යදධාඃ සුවර්ෂම් ॥5॥

ජිතේංද්රදත්තාං කමනීං ජයංතී-
මථෝද්වහන්නාත්මරතාශයෝऽපි ।
අජීජනස්තත්ර ශතං තනූජා-
නේෂාං ක්ෂිතීශෝ භරතෝऽග්රජන්මා ॥6॥

නවාභවන් යෝගිවරා නවාන්යේ
ත්වපාලයන් භාරතවර්ෂඛංඩාන් ।
සෛකා ත්වශීතිස්තව ශේෂපුත්ර-
ස්තපෝබලාත් භූසුරභූයමීයුඃ ॥7॥

උක්ත්වා සුතේභ්යෝऽථ මුනීංද්රමධ්යේ
විරක්තිභක්ත්යන්විතමුක්තිමාර්ගම් ।
ස්වයං ගතඃ පාරමහංස්යවෘත්ති-
මධා ජඩෝන්මත්තපිශාචචර්යාම් ॥8॥

පරාත්මභූතෝऽපි පරෝපදේශං
කුර්වන් භවාන් සර්වනිරස්යමානඃ ।
විකාරහීනෝ විචචාර කෘත්ස්නාං
මහීමහීනාත්මරසාභිලීනඃ ॥9॥

ශයුව්රතං ගෝමෘගකාකචර්යාං
චිරං චරන්නාප්ය පරං ස්වරූපම් ।
දවාහෘතාංගඃ කුටකාචලේ ත්වං
තාපාන් මමාපාකුරු වාතනාථ ॥10॥