නාරායණීයං දශක 17 – ධ්රුවචරිතම්

උත්තානපාදනෘපතේර්මනුනංදනස්ය
ජායා බභූව සුරුචිර්නිතරාමභීෂ්ටා ।
අන්යා සුනීතිරිති භර්තුරනාදෘතා සා
ත්වාමේව නිත්යමගතිඃ ශරණං ගතාऽභූත් ॥1॥

අංකේ පිතුඃ සුරුචිපුත්රකමුත්තමං තං
දෘෂ්ට්වා ධ්රුවඃ කිල සුනීතිසුතෝऽධිරෝක්ෂ්යන් ।
ආචික්ෂිපේ කිල ශිශුඃ සුතරාං සුරුච්යා
දුස්සංත්යජා ඛලු භවද්විමුඛෛරසූයා ॥2॥

ත්වන්මෝහිතේ පිතරි පශ්යති දාරවශ්යේ
දූරං දුරුක්තිනිහතඃ ස ගතෝ නිජාංබාම් ।
සාऽපි ස්වකර්මගතිසංතරණාය පුංසාං
ත්වත්පාදමේව ශරණං ශිශවේ ශශංස ॥3॥

ආකර්ණ්ය සෝऽපි භවදර්චනනිශ්චිතාත්මා
මානී නිරේත්ය නගරාත් කිල පංචවර්ෂඃ ।
සංදෘෂ්ටනාරදනිවේදිතමංත්රමාර්ග-
ස්ත්වාමාරරාධ තපසා මධුකානනාංතේ ॥4॥

තාතේ විෂණ්ණහෘදයේ නගරීං ගතේන
ශ්රීනාරදේන පරිසාංත්විතචිත්තවෘත්තෞ ।
බාලස්ත්වදර්පිතමනාඃ ක්රමවර්ධිතේන
නින්යේ කඨෝරතපසා කිල පංචමාසාන් ॥5॥

තාවත්තපෝබලනිරුච්ඡ්-වසිතේ දිගංතේ
දේවාර්ථිතස්ත්වමුදයත්කරුණාර්ද්රචේතාඃ ।
ත්වද්රූපචිද්රසනිලීනමතේඃ පුරස්තා-
දාවිර්බභූවිථ විභෝ ගරුඩාධිරූඪඃ ॥6॥

ත්වද්දර්ශනප්රමදභාරතරංගිතං තං
දෘග්භ්යාං නිමග්නමිව රූපරසායනේ තේ ।
තුෂ්ටූෂමාණමවගම්ය කපෝලදේශේ
සංස්පෘෂ්ටවානසි දරේණ තථාऽऽදරේණ ॥7॥

තාවද්විබෝධවිමලං ප්රණුවංතමේන-
මාභාෂථාස්ත්වමවගම්ය තදීයභාවම් ।
රාජ්යං චිරං සමනුභූය භජස්ව භූයඃ
සර්වෝත්තරං ධ්රුව පදං විනිවෘත්තිහීනම් ॥8॥

ඉත්යූචිෂි ත්වයි ගතේ නෘපනංදනෝऽසා-
වානංදිතාඛිලජනෝ නගරීමුපේතඃ ।
රේමේ චිරං භවදනුග්රහපූර්ණකාම-
ස්තාතේ ගතේ ච වනමාදෘතරාජ්යභාරඃ ॥9॥

යක්ෂේණ දේව නිහතේ පුනරුත්තමේऽස්මින්
යක්ෂෛඃ ස යුද්ධනිරතෝ විරතෝ මනූක්ත්යා ।
ශාංත්යා ප්රසන්නහෘදයාද්ධනදාදුපේතා-
ත්ත්වද්භක්තිමේව සුදෘඪාමවෘණෝන්මහාත්මා ॥10॥

අංතේ භවත්පුරුෂනීතවිමානයාතෝ
මාත්රා සමං ධ්රුවපදේ මුදිතෝऽයමාස්තේ ।
ඒවං ස්වභෘත්යජනපාලනලෝලධීස්ත්වං
වාතාලයාධිප නිරුංධි මමාමයෞඝාන් ॥11॥