නාරායණීයං දශක 100 – භගවතඃ කේශාදිපාදවර්ණනම්

අග්රේ පශ්යාමි තේජෝ නිබිඩතරකලායාවලීලෝභනීයං
පීයූෂාප්ලාවිතෝऽහං තදනු තදුදරේ දිව්යකෛශෝරවේෂම් ।
තාරුණ්යාරංභරම්යං පරමසුඛරසාස්වාදරෝමාංචිතාංගෛ-
රාවීතං නාරදාද්යෛර්විලසදුපනිෂත්සුංදරීමංඩලෛශ්ච ॥1॥

නීලාභං කුංචිතාග්රං ඝනමමලතරං සංයතං චාරුභංග්යා
රත්නෝත්තංසාභිරාමං වලයිතමුදයච්චංද්රකෛඃ පිංඡජාලෛඃ ।
මංදාරස්රඞ්නිවීතං තව පෘථුකබරීභාරමාලෝකයේऽහං
ස්නිග්ධශ්වේතෝර්ධ්වපුංඩ්රාමපි ච සුලලිතාං ඵාලබාලේංදුවීථීම් ॥2

හෘද්යං පූර්ණානුකංපාර්ණවමෘදුලහරීචංචලභ්රූවිලාසෛ-
රානීලස්නිග්ධපක්ෂ්මාවලිපරිලසිතං නේත්රයුග්මං විභෝ තේ ।
සාංද්රච්ඡායං විශාලාරුණකමලදලාකාරමාමුග්ධතාරං
කාරුණ්යාලෝකලීලාශිශිරිතභුවනං ක්ෂිප්යතාං මය්යනාථේ ॥3॥

උත්තුංගෝල්ලාසිනාසං හරිමණිමුකුරප්රෝල්ලසද්ගංඩපාලී-
ව්යාලෝලත්කර්ණපාශාංචිතමකරමණීකුංඩලද්වංද්වදීප්රම් ।
උන්මීලද්දංතපංක්තිස්ඵුරදරුණතරච්ඡායබිංබාධරාංතඃ-
ප්රීතිප්රස්යංදිමංදස්මිතමධුරතරං වක්ත්රමුද්භාසතාං මේ ॥4॥

බාහුද්වංද්වේන රත්නෝජ්ජ්වලවලයභෘතා ශෝණපාණිප්රවාලේ-
නෝපාත්තාං වේණුනාලී ප්රසෘතනඛමයූඛාංගුලීසංගශාරාම් ।
කෘත්වා වක්ත්රාරවිංදේ සුමධුරවිකසද්රාගමුද්භාව්යමානෛඃ
ශබ්දබ්රහ්මාමෘතෛස්ත්වං ශිශිරිතභුවනෛඃ සිංච මේ කර්ණවීථීම් ॥5॥

උත්සර්පත්කෞස්තුභශ්රීතතිභිරරුණිතං කෝමලං කංඨදේශං
වක්ෂඃ ශ්රීවත්සරම්යං තරලතරසමුද්දීප්රහාරප්රතානම් ।
නානාවර්ණප්රසූනාවලිකිසලයිනීං වන්යමාලාං විලෝල-
ල්ලෝලංබාං ලංබමානාමුරසි තව තථා භාවයේ රත්නමාලාම් ॥6॥

අංගේ පංචාංගරාගෛරතිශයවිකසත්සෞරභාකෘෂ්ටලෝකං
ලීනානේකත්රිලෝකීවිතතිමපි කෘශාං බිභ්රතං මධ්යවල්ලීම් ।
ශක්රාශ්මන්යස්තතප්තෝජ්ජ්වලකනකනිභං පීතචේලං දධානං
ධ්යායාමෝ දීප්තරශ්මිස්ඵුටමණිරශනාකිංකිණීමංඩිතං ත්වාම් ॥7॥

ඌරූ චාරූ තවෝරූ ඝනමසෘණරුචෞ චිත්තචෝරෞ රමායාඃ
විශ්වක්ෂෝභං විශංක්ය ධ්රුවමනිශමුභෞ පීතචේලාවෘතාංගෞ ।
ආනම්රාණාං පුරස්තාන්න්යසනධෘතසමස්තාර්ථපාලීසමුද්ග-
ච්ඡායං ජානුද්වයං ච ක්රමපෘථුලමනෝජ්ඤේ ච ජංඝේ නිෂේවේ ॥8॥

මංජීරං මංජුනාදෛරිව පදභජනං ශ්රේය ඉත්යාලපංතං
පාදාග්රං භ්රාංතිමජ්ජත්ප්රණතජනමනෝමංදරෝද්ධාරකූර්මම් ।
උත්තුංගාතාම්රරාජන්නඛරහිමකරජ්යෝත්ස්නයා චාऽශ්රිතානාං
සංතාපධ්වාංතහංත්රීං තතිමනුකලයේ මංගලාමංගුලීනාම් ॥9॥

යෝගීංද්රාණාං ත්වදංගේෂ්වධිකසුමධුරං මුක්තිභාජාං නිවාසෝ
භක්තානාං කාමවර්ෂද්යුතරුකිසලයං නාථ තේ පාදමූලම් ।
නිත්යං චිත්තස්ථිතං මේ පවනපුරපතේ කෘෂ්ණ කාරුණ්යසිංධෝ
හෘත්වා නිශ්ශේෂතාපාන් ප්රදිශතු පරමානංදසංදෝහලක්ෂ්මීම් ॥10॥

අජ්ඤාත්වා තේ මහත්වං යදිහ නිගදිතං විශ්වනාථ ක්ෂමේථාඃ
ස්තෝත්රං චෛතත්සහස්රෝත්තරමධිකතරං ත්වත්ප්රසාදාය භූයාත් ।
ද්වේධා නාරායණීයං ශ්රුතිෂු ච ජනුෂා ස්තුත්යතාවර්ණනේන
ස්ඵීතං ලීලාවතාරෛරිදමිහ කුරුතාමායුරාරෝග්යසෞඛ්යම් ॥11॥