මුකුංදමාලා ස්තෝත්රම්

ඝුෂ්යතේ යස්ය නගරේ රංගයාත්රා දිනේ දිනේ ।
තමහං ශිරසා වංදේ රාජානං කුලශේඛරම් ॥

ශ්රීවල්ලභේති වරදේති දයාපරේති
භක්තප්රියේති භවලුංඨනකෝවිදේති ।
නාථේති නාගශයනේති ජගන්නිවාසේ-
-ත්යාලාපනං ප්රතිපදං කුරු මේ මුකුංද ॥ 1 ॥

ජයතු ජයතු දේවෝ දේවකීනංදනෝऽයං
ජයතු ජයතු කෘෂ්ණෝ වෘෂ්ණිවංශප්රදීපඃ ।
ජයතු ජයතු මේඝශ්යාමලඃ කෝමලාංගෝ
ජයතු ජයතු පෘථ්වීභාරනාශෝ මුකුංදඃ ॥ 2 ॥

මුකුංද මූර්ධ්නා ප්රණිපත්ය යාචේ
භවංතමේකාංතමියංතමර්ථම් ।
අවිස්මෘතිස්ත්වච්චරණාරවිංදේ
භවේ භවේ මේऽස්තු භවත්ප්රසාදාත් ॥ 3 ॥

නාහං වංදේ තව චරණයෝර්ද්වංද්වමද්වංද්වහේතෝඃ
කුංභීපාකං ගුරුමපි හරේ නාරකං නාපනේතුම් ।
රම්යාරාමාමෘදුතනුලතා නංදනේ නාපි රංතුං
භාවේ භාවේ හෘදයභවනේ භාවයේයං භවංතම් ॥ 4 ॥

නාස්ථා ධර්මේ න වසුනිචයේ නෛව කාමෝපභෝගේ
යද්යද්භව්යං භවතු භගවන් පූර්වකර්මානුරූපම් ।
ඒතත්ප්රාර්ථ්යං මම බහුමතං ජන්මජන්මාංතරේऽපි
ත්වත්පාදාංභෝරුහයුගගතා නිශ්චලා භක්තිරස්තු ॥ 5 ॥

දිවි වා භුවි වා මමාස්තු වාසෝ
නරකේ වා නරකාංතක ප්රකාමම් ।
අවධීරිත ශාරදාරවිංදෞ
චරණෞ තේ මරණේऽපි චිංතයාමි ॥ 6 ॥

කෘෂ්ණ ත්වදීය පදපංකජපංජරාංත-
-මද්යෛව මේ විශතු මානසරාජහංසඃ ।
ප්රාණප්රයාණසමයේ කඵවාතපිත්තෛඃ
කංඨාවරෝධනවිධෞ ස්මරණං කුතස්තේ ॥ 7 ॥

චිංතයාමි හරිමේව සංතතං
මංදමංද හසිතානනාංබුජං
නංදගෝපතනයං පරාත්පරං
නාරදාදිමුනිබෘංදවංදිතම් ॥ 8 ॥

කරචරණසරෝජේ කාංතිමන්නේත්රමීනේ
ශ්රමමුෂි භුජවීචිව්යාකුලේऽගාධමාර්ගේ ।
හරිසරසි විගාහ්යාපීය තේජෝජලෞඝං
භවමරුපරිඛින්නඃ ඛේදමද්ය ත්යජාමි ॥ 9 ॥

සරසිජනයනේ සශංඛචක්රේ
මුරභිදි මා විරම ස්වචිත්ත රංතුම් ।
සුඛතරමපරං න ජාතු ජානේ
හරිචරණස්මරණාමෘතේන තුල්යම් ॥ 10 ॥

මා භීර්මංදමනෝ විචිංත්ය බහුධා යාමීශ්චිරං යාතනාඃ
නාමී නඃ ප්රභවංති පාපරිපවඃ ස්වාමී නනු ශ්රීධරඃ ।
ආලස්යං ව්යපනීය භක්තිසුලභං ධ්යායස්ව නාරායණං
ලෝකස්ය ව්යසනාපනෝදනකරෝ දාසස්ය කිං න ක්ෂමඃ ॥ 11 ॥

භවජලධිගතානාං ද්වංද්වවාතාහතානාං
සුතදුහිතෘකළත්රත්රාණභාරාර්දිතානාම් ।
විෂමවිෂයතෝයේ මජ්ජතාමප්ලවානාං
භවතු ශරණමේකෝ විෂ්ණුපෝතෝ නරාණාම් ॥ 12 ॥

භවජලධිමගාධං දුස්තරං නිස්තරේයං
කථමහමිති චේතෝ මා ස්ම ගාඃ කාතරත්වම් ।
සරසිජදෘශි දේවේ තාවකී භක්තිරේකා
නරකභිදි නිෂණ්ණා තාරයිෂ්යත්යවශ්යම් ॥ 13 ॥

තෘෂ්ණාතෝයේ මදනපවනෝද්ධූත මෝහෝර්මිමාලේ
දාරාවර්තේ තනයසහජග්රාහසංඝාකුලේ ච ।
සංසාරාඛ්යේ මහති ජලධෞ මජ්ජතාං නස්ත්රිධාමන්
පාදාංභෝජේ වරද භවතෝ භක්තිනාවං ප්රයච්ඡ ॥ 14 ॥

මාද්රාක්ෂං ක්ෂීණපුණ්යාන් ක්ෂණමපි භවතෝ භක්තිහීනාන්පදාබ්ජේ
මාශ්රෞෂං ශ්රාව්යබංධං තව චරිතමපාස්යාන්යදාඛ්යානජාතම් ।
මාස්මාර්ෂං මාධව ත්වාමපි භුවනපතේ චේතසාපහ්නුවානා-
-න්මාභූවං ත්වත්සපර්යාව්යතිකරරහිතෝ ජන්මජන්මාංතරේऽපි ॥ 15 ॥

ජිහ්වේ කීර්තය කේශවං මුරරිපුං චේතෝ භජ ශ්රීධරං
පාණිද්වංද්ව සමර්චයාච්යුතකථාඃ ශ්රෝත්රද්වය ත්වං ශෘණු ।
කෘෂ්ණං ලෝකය ලෝචනද්වය හරේර්ගච්ඡාංඝ්රියුග්මාලයං
ජිඝ්ර ඝ්රාණ මුකුංදපාදතුලසීං මූර්ධන්නමාධෝක්ෂජම් ॥ 16 ॥

හේ ලෝකාඃ ශෘණුත ප්රසූතිමරණව්යාධේශ්චිකිත්සාමිමාං
යෝගජ්ඤාඃ සමුදාහරංති මුනයෝ යාං යාජ්ඤවල්ක්යාදයඃ ।
අංතර්ජ්යෝතිරමේයමේකමමෘතං කෘෂ්ණාඛ්යමාපීයතාං
තත්පීතං පරමෞෂධං විතනුතේ නිර්වාණමාත්යංතිකම් ॥ 17 ।

හේ මර්ත්යාඃ පරමං හිතං ශෘණුත වෝ වක්ෂ්යාමි සංක්ෂේපතඃ
සංසාරාර්ණවමාපදූර්මිබහුළං සම්යක්ප්රවිශ්ය ස්ථිතාඃ ।
නානාජ්ඤානමපාස්ය චේතසි නමෝ නාරායණායේත්යමුං
මංත්රං සප්රණවං ප්රණාමසහිතං ප්රාවර්තයධ්වං මුහුඃ ॥ 18 ॥

පෘථ්වීරේණුරණුඃ පයාංසි කණිකාඃ ඵල්ගුඃ ස්ඵුලිංගෝऽලඝු-
-ස්තේජෝ නිඃශ්වසනං මරුත්තනුතරං රංධ්රං සුසූක්ෂ්මං නභඃ ।
ක්ෂුද්රා රුද්රපිතාමහප්රභෘතයඃ කීටාඃ සමස්තාඃ සුරාඃ
දෘෂ්ටේ යත්ර ස තාවකෝ විජයතේ භූමාවධූතාවධිඃ ॥ 19 ॥

බද්ධේනාංජලිනා නතේන ශිරසා ගාත්රෛඃ සරෝමෝද්ගමෛඃ
කංඨේන ස්වරගද්ගදේන නයනේනෝද්ගීර්ණබාෂ්පාංබුනා ।
නිත්යං ත්වච්චරණාරවිංදයුගළ ධ්යානාමෘතාස්වාදිනා-
-මස්මාකං සරසීරුහාක්ෂ සතතං සංපද්යතාං ජීවිතම් ॥ 20 ॥

හේ ගෝපාලක හේ කෘපාජලනිධේ හේ සිංධුකන්යාපතේ
හේ කංසාංතක හේ ගජේංද්රකරුණාපාරීණ හේ මාධව ।
හේ රාමානුජ හේ ජගත්ත්රයගුරෝ හේ පුංඩරීකාක්ෂ මාං
හේ ගෝපීජනනාථ පාලය පරං ජානාමි න ත්වාං විනා ॥ 21 ॥

භක්තාපායභුජංගගාරුඩමණිස්ත්රෛලෝක්යරක්ෂාමණිඃ
ගෝපීලෝචනචාතකාංබුදමණිඃ සෞංදර්යමුද්රාමණිඃ ।
යඃ කාංතාමණි රුක්මිණී ඝනකුචද්වංද්වෛකභූෂාමණිඃ
ශ්රේයෝ දේවශිඛාමණිර්දිශතු නෝ ගෝපාලචූඩාමණිඃ ॥ 22 ॥

ශත්රුච්ඡේදෛකමංත්රං සකලමුපනිෂද්වාක්යසංපූජ්යමංත්රං
සංසාරෝත්තාරමංත්රං සමුපචිතතමඃ සංඝනිර්යාණමංත්රම් ।
සර්වෛශ්වර්යෛකමංත්රං ව්යසනභුජගසංදෂ්ටසංත්රාණමංත්රං
ජිහ්වේ ශ්රීකෘෂ්ණමංත්රං ජප ජප සතතං ජන්මසාඵල්යමංත්රම් ॥ 23 ॥

ව්යාමෝහ ප්රශමෞෂධං මුනිමනෝවෘත්ති ප්රවෘත්ත්යෞෂධං
දෛත්යේංද්රාර්තිකරෞෂධං ත්රිභුවනී සංජීවනෛකෞෂධම් ।
භක්තාත්යංතහිතෞෂධං භවභයප්රධ්වංසනෛකෞෂධං
ශ්රේයඃප්රාප්තිකරෞෂධං පිබ මනඃ ශ්රීකෘෂ්ණදිව්යෞෂධම් ॥ 24 ॥

ආම්නායාභ්යසනාන්යරණ්යරුදිතං වේදව්රතාන්යන්වහං
මේදශ්ඡේදඵලානි පූර්තවිධයඃ සර්වේ හුතං භස්මනි ।
තීර්ථානාමවගාහනානි ච ගජස්නානං විනා යත්පද-
-ද්වංද්වාංභෝරුහසංස්මෘතිර්විජයතේ දේවඃ ස නාරායණඃ ॥ 25 ॥

ශ්රීමන්නාම ප්රෝච්ය නාරායණාඛ්යං
කේ න ප්රාපුර්වාංඡිතං පාපිනෝऽපි ।
හා නඃ පූර්වං වාක්ප්රවෘත්තා න තස්මින්
තේන ප්රාප්තං ගර්භවාසාදිදුඃඛම් ॥ 26 ॥

මජ්ජන්මනඃ ඵලමිදං මධුකෛටභාරේ
මත්ප්රාර්ථනීය මදනුග්රහ ඒෂ ඒව ।
ත්වද්භෘත්යභෘත්ය පරිචාරක භෘත්යභෘත්ය
භෘත්යස්ය භෘත්ය ඉති මාං ස්මර ලෝකනාථ ॥ 27 ॥

නාථේ නඃ පුරුෂෝත්තමේ ත්රිජගතාමේකාධිපේ චේතසා
සේව්යේ ස්වස්ය පදස්ය දාතරි සුරේ නාරායණේ තිෂ්ඨති ।
යං කංචිත්පුරුෂාධමං කතිපයග්රාමේශමල්පාර්ථදං
සේවායෛ මෘගයාමහේ නරමහෝ මූකා වරාකා වයම් ॥ 28 ॥

මදන පරිහර ස්ථිතිං මදීයේ
මනසි මුකුංදපදාරවිංදධාම්නි ।
හරනයනකෘශානුනා කෘශෝऽසි
ස්මරසි න චක්රපරාක්රමං මුරාරේඃ ॥ 29 ॥

තත්ත්වං බ්රුවාණානි පරං පරස්මා-
-න්මධු ක්ෂරංතීව සතාං ඵලානි ।
ප්රාවර්තය ප්රාංජලිරස්මි ජිහ්වේ
නාමානි නාරායණ ගෝචරාණි ॥ 30 ॥

ඉදං ශරීරං පරිණාමපේශලං
පතත්යවශ්යං ශ්ලථසංධිජර්ජරම් ।
කිමෞෂධෛඃ ක්ලිශ්යසි මූඪ දුර්මතේ
නිරාමයං කෘෂ්ණරසායනං පිබ ॥ 31 ॥

දාරා වාරාකරවරසුතා තේ තනූජෝ විරිංචිඃ
ස්තෝතා වේදස්තව සුරගණෝ භෘත්යවර්ගඃ ප්රසාදඃ ।
මුක්තිර්මායා ජගදවිකලං තාවකී දේවකී තේ
මාතා මිත්රං බලරිපුසුතස්ත්වය්යතෝऽන්යන්න ජානේ ॥ 32 ॥

කෘෂ්ණෝ රක්ෂතු නෝ ජගත්ත්රයගුරුඃ කෘෂ්ණං නමස්යාම්යහං
කෘෂ්ණේනාමරශත්රවෝ විනිහතාඃ කෘෂ්ණාය තස්මෛ නමඃ ।
කෘෂ්ණාදේව සමුත්ථිතං ජගදිදං කෘෂ්ණස්ය දාසෝऽස්ම්යහං
කෘෂ්ණේ තිෂ්ඨති සර්වමේතදඛිලං හේ කෘෂ්ණ රක්ෂස්ව මාම් ॥ 33 ॥

තත්ත්වං ප්රසීද භගවන් කුරු මය්යනාථේ
විෂ්ණෝ කෘපාං පරමකාරුණිකඃ කිල ත්වම් ।
සංසාරසාගරනිමග්නමනංතදීන-
-මුද්ධර්තුමර්හසි හරේ පුරුෂෝත්තමෝऽසි ॥ 34 ॥

නමාමි නාරායණපාදපංකජං
කරෝමි නාරායණපූජනං සදා ।
වදාමි නාරායණනාම නිර්මලං
ස්මරාමි නාරායණතත්ත්වමව්යයම් ॥ 35 ॥

ශ්රීනාථ නාරායණ වාසුදේව
ශ්රීකෘෂ්ණ භක්තප්රිය චක්රපාණේ ।
ශ්රීපද්මනාභාච්යුත කෛටභාරේ
ශ්රීරාම පද්මාක්ෂ හරේ මුරාරේ ॥ 36 ॥

අනංත වෛකුංඨ මුකුංද කෘෂ්ණ
ගෝවිංද දාමෝදර මාධවේති ।
වක්තුං සමර්ථෝऽපි න වක්ති කශ්චි-
-දහෝ ජනානාං ව්යසනාභිමුඛ්යම් ॥ 37 ॥

ධ්යායංති යේ විෂ්ණුමනංතමව්යයං
හෘත්පද්මමධ්යේ සතතං ව්යවස්ථිතම් ।
සමාහිතානාං සතතාභයප්රදං
තේ යාංති සිද්ධිං පරමාං ච වෛෂ්ණවීම් ॥ 38 ॥

ක්ෂීරසාගරතරංගශීකරා-
-ऽऽසාරතාරකිතචාරුමූර්තයේ ।
භෝගිභෝගශයනීයශායිනේ
මාධවාය මධුවිද්විෂේ නමඃ ॥ 39 ॥

යස්ය ප්රියෞ ශ්රුතිධරෞ කවිලෝකවීරෞ
මිත්රේ ද්විජන්මවරපද්මශරාවභූතාම් ।
තේනාංබුජාක්ෂචරණාංබුජෂට්පදේන
රාජ්ඤා කෘතා කෘතිරියං කුලශේඛරේණ ॥ 40 ॥

ඉති කුලශේඛර ප්රණීතං මුකුංදමාලා ।