මූක පංච ශති 5 – මංදස්මිත ශතකම්

බධ්නීමෝ වයමංජලිං ප්රතිදිනං බංධච්ඡිදේ දේහිනාං
කංදර්පාගමතංත්රමූලගුරවේ කල්යාණකේලීභුවේ ।
කාමාක්ෂ්යා ඝනසාරපුංජරජසේ කාමද්රුහශ්චක්ෂුෂාං
මංදාරස්තබකප්රභාමදමුෂේ මංදස්මිතජ්යෝතිෂේ ॥1॥

සධ්රීචේ නවමල්ලිකාසුමනසාං නාසාග්රමුක්තාමණේ-
රාචාර්යාය මෘණාලකාංඩමහසාං නෛසර්ගිකාය ද්විෂේ ।
ස්වර්ධුන්යා සහ යුධ්වේන හිමරුචේරර්ධාසනාධ්යාසිනේ
කාමාක්ෂ්යාඃ ස්මිතමංජරීධවලිමාද්වෛතාය තස්මෛ නමඃ ॥2॥

කර්පූරද්යුතිචාතුරීමතිතරාමල්පීයසීං කුර්වතී
දෞර්භාග්යෝදයමේව සංවිදධතී දෞෂාකරීණාං ත්විෂාම් ।
ක්ෂුල්ලානේව මනෝජ්ඤමල්ලිනිකරාන්ඵුල්ලානපි ව්යංජතී
කාමාක්ෂ්යා මෘදුලස්මිතාංශුලහරී කාමප්රසූරස්තු මේ ॥3॥

යා පීනස්තනමංඩලෝපරි ලසත්කර්පූරලේපායතේ
යා නීලේක්ෂණරාත්රිකාංතිතතිෂු ජ්යෝත්ස්නාප්රරෝහායතේ ।
යා සෞංදර්යධුනීතරංගතතිෂු ව්යාලෝලහංසායතේ
කාමාක්ෂ්යාඃ ශිශිරීකරෝතු හෘදයං සා මේ ස්මිතප්රාචුරී ॥4॥

යේෂාං ගච්ඡති පූර්වපක්ෂසරණිං කෞමුද්වතඃ ශ්වේතිමා
යේෂාං සංතතමාරුරුක්ෂති තුලාකක්ෂ්යාං ශරච්චංද්රමාඃ ।
යේෂාමිච්ඡති කංබුරප්යසුලභාමංතේවසත්ප්රක්රියාං
කාමාක්ෂ්යා මමතාං හරංතු මම තේ හාසත්විෂාමංකුරාඃ ॥5॥

ආශාසීමසු සංතතං විදධතී නෛශාකරීං ව්යාක්රියාං
කාශානාමභිමානභංගකලනාකෞශල්යමාබිභ්රතී ।
ඊශානේන විලෝකිතා සකුතුකං කාමාක්ෂි තේ කල්මෂ-
ක්ලේශාපායකරී චකාස්ති ලහරී මංදස්මිතජ්යෝතිෂාම් ॥6॥

ආරූඪස්ය සමුන්නතස්තනතටීසාම්රාජ්යසිංහාසනං
කංදර්පස්ය විභෝර්ජගත්ත්රයප්රාකට්යමුද්රානිධේඃ ।
යස්යාශ්චාමරචාතුරීං කලයතේ රශ්මිච්ඡටා චංචලා
සා මංදස්මිතමංජරී භවතු නඃ කාමාය කාමාක්ෂි තේ ॥7॥

ශංභෝර්යා පරිරංභසංභ්රමවිධෞ නෛර්මල්යසීමානිධිඃ
ගෛර්වාණීව තරංගිණී කෘතමෘදුස්යංදාං කලිංදාත්මජාම් ।
කල්මාෂීකුරුතේ කලංකසුෂමාං කංඨස්ථලීචුංබිනීං
කාමාක්ෂ්යාඃ ස්මිතකංදලී භවතු නඃ කල්යාණසංදෝහිනී ॥8॥

ජේතුං හාරලතාමිව ස්තනතටීං සංජග්මුෂී සංතතං
ගංතුං නිර්මලතාමිව ද්විගුණිතාං මග්නා කෘපාස්ත්රෝතසි ।
ලබ්ධුං විස්මයනීයතාමිව හරං රාගාකුලං කුර්වතී
මංජුස්තේ ස්මිතමංජරී භවභයං මථ්නාතු කාමාක්ෂි මේ ॥9॥

ශ්වේතාපි ප්රකටං නිශාකරරුචාං මාලින්යමාතන්වතී
ශීතාපි ස්මරපාවකං පශුපතේඃ සංධුක්ෂයංතී සදා ।
ස්වාභාව්යාදධරාශ්රිතාපි නමතාමුච්චෛර්දිශංතී ගතිං
කාමාක්ෂි ස්ඵුටමංතරා ස්ඵුරතු නස්ත්වන්මංදහාසප්රභා ॥10॥

වක්ත්රශ්රීසරසීජලේ තරලිතභ්රූවල්ලිකල්ලෝලිතේ
කාලිම්නා දධතී කටාක්ෂජනුෂා මාධුව්රතීං ව්යාපෘතිම් ।
නිර්නිද්රාමලපුංඩරීකකුහනාපාංඩිත්යමාබිභ්රතී
කාමාක්ෂ්යාඃ ස්මිතචාතුරී මම මනඃ කාතර්යමුන්මූලයේත් ॥11॥

නිත්යං බාධිතබංධුජීවමධරං මෛත්රීජුෂං පල්ලවෛඃ
ශුද්ධස්ය ද්විජමංඩලස්ය ච තිරස්කර්තාරමප්යාශ්රිතා ।
යා වෛමල්යවතී සදෛව නමතාං චේතඃ පුනීතේතරාං
කාමාක්ෂ්යා හෘදයං ප්රසාදයතු මේ සා මංදහාසප්රභා ॥12॥

ද්රුහ්යංතී තමසේ මුහුඃ කුමුදිනීසාහාය්යමාබිභ්රතී
යාංතී චංද්රකිශෝරශේඛරවපුඃසෞධාංගණේ ප්රේංඛණම් ।
ජ්ඤානාංභෝනිධිවීචිකාං සුමනසාං කූලංකෂාං කුර්වතී
කාමාක්ෂ්යාඃ ස්මිතකෞමුදී හරතු මේ සංසාරතාපෝදයම් ॥13॥

කාශ්මීරද්රවධාතුකර්දමරුචා කල්මාෂතාං බිභ්රතී
හංසෞධෛරිව කුර්වතී පරිචිතිං හාරීකෘතෛර්මෞක්තිකෛඃ ।
වක්ෂෝජන්මතුෂාරශෛලකටකේ සංචාරමාතන්වතී
කාමාක්ෂ්යා මෘදුලස්මිතද්යුතිමයී භාගීරථී භාසතේ ॥14॥

කංබෝර්වංශපරංපරා ඉව කෘපාසංතානවල්ලීභුවඃ
සංඵුල්ලස්තබකා ඉව ප්රසෘමරා මූර්තාඃ ප්රසාදා ඉව ।
වාක්පීයූෂකණා ඉව ත්රිපථගාපර්යායභේදා ඉව
භ්රාජංතේ තව මංදහාසකිරණාඃ කාංචීපුරීනායිකේ ॥15॥

වක්ෂෝජේ ඝනසාරපත්රරචනාභංගීසපත්නායිතා
කංඨේ මෞක්තිකහාරයෂ්ටිකිරණව්යාපාරමුද්රායිතා ।
ඕෂ්ඨශ්රීනිකුරුංබපල්ලවපුටේ ප්රේංඛත්ප්රසූනායිතා
කාමාක්ෂි ස්ඵුරතාං මදීයහෘදයේ ත්වන්මංදහාසප්රභා ॥16॥

යේෂාං බිංදුරිවෝපරි ප්රචලිතෝ නාසාග්රමුක්තාමණිඃ
යේෂාං දීන ඉවාධිකංඨමයතේ හාරඃ කරාලංබනම් ।
යේෂාං බංධුරිවෝෂ්ඨයෝරරුණිමා ධත්තේ ස්වයං රංජනං
කාමාක්ෂ්යාඃ ප්රභවංතු තේ මම ශිවෝල්ලාසාය හාසාංකුරාඃ ॥17॥

යා ජාඩ්යාංබුනිධිං ක්ෂිණෝති භජතාං වෛරායතේ කෛරවෛඃ
නිත්යං යාං නියමේන යා ච යතතේ කර්තුං ත්රිණේත්රෝත්සවම් ।
බිංබං චාංද්රමසං ච වංචයති යා ගර්වේණ සා තාදෘශී
කාමාක්ෂි ස්මිතමංජරී තව කථං ජ්යෝත්ස්නේත්යසෞ කීර්ත්යතේ ॥18॥

ආරුඪා රභසාත්පුරඃ පුරරිපෝරාශ්ලේෂණෝපක්රමේ
යා තේ මාතරුපෛති දිව්යතටිනීශංකාකරී තත්ක්ෂණම් ।
ඕෂ්ඨෞ වේපයති භ්රුවෞ කුටිලයත්යානම්රයත්යානනං
තාං වංදේ මෘදුහාසපූරසුෂමාමේකාම්රනාථප්රියේ ॥19॥

වක්ත්රේංදෝස්තව චංද්රිකා ස්මිතතතිර්වල්ගු ස්ඵුරංතී සතාං
ස්යාච්චේද්යුක්තිමිදං චකෝරමනසාං කාමාක්ෂි කෞතූහලම් ।
ඒතච්චිත්රමහර්නිශං යදධිකාමේෂා රුචිං ගාහතේ
බිංබෝෂ්ඨද්යුමණිප්රභාස්වපි ච යද්බිබ්බෝකමාලංබතේ ॥20॥

සාදෘශ්යං කලශාංබුධේර්වහති යත්කාමාක්ෂි මංදස්මිතං
ශෝභාමෝෂ්ඨරුචාංබ විද්රුමභවාමේතාද්භිදාං බ්රූමහේ ।
ඒකස්මාදුදිතං පුරා කිල පපෞ ශර්වඃ පුරාණඃ පුමාන්
ඒතන්මධ්යසමුද්භවං රසයතේ මාධුර්යරූපං රසම් ॥21॥

උත්තුංගස්තනකුංභශෛලකටකේ විස්තාරිකස්තූරිකා-
පත්රශ්රීජුෂි චංචලාඃ ස්මිතරුචඃ කාමාක්ෂි තේ කෝමලාඃ ।
සංධ්යාදීධිතිරංජිතා ඉව මුහුඃ සාංද්රාධරජ්යෝතිෂා
ව්යාලෝලාමලශාරදාභ්රශකලව්යාපාරමාතන්වතේ ॥22॥

ක්ෂීරං දූරත ඒව තිෂ්ඨතු කථං වෛමල්යමාත්රාදිදං
මාතස්තේ සහපාඨවීථිමයතාං මංදස්මිතෛර්මංජුලෛඃ ।
කිං චේයං තු භිදාස්ති දෝහනවශාදේකං තු සංජායතේ
කාමාක්ෂි ස්වයමර්ථිතං ප්රණමතාමන්යත්තු දෝදුහ්යතේ ॥23॥

කර්පූරෛරමෘතෛර්ජගජ්ජනනි තේ කාමාක්ෂි චංද්රාතපෛඃ
මුක්තාහාරගුණෛර්මෘණාලවලයෛර්මුග්ධස්මිතශ්රීරියම් ।
ශ්රීකාංචීපුරනායිකේ සමතයා සංස්තූයතේ සජ්ජනෛඃ
තත්තාදෘඞ්මම තාපශාංතිවිධයේ කිං දේවි මංදායතේ ॥24॥

මධ්යේගර්භිතමංජුවාක්යලහරීමාධ්වීඣරීශීතලා
මංදාරස්තබකායතේ ජනනි තේ මංදස්මිතාංශුච්ඡටා ।
යස්යා වර්ධයිතුං මුහුර්විකසනං කාමාක්ෂි කාමද්රුහෝ
වල්ගුර්වීක්ෂණවිභ්රමව්යතිකරෝ වාසංතමාසායතේ ॥25॥

බිංබෝෂ්ඨද්යුතිපුංජරංජිතරුචිස්ත්වන්මංදහාසච්ඡටා ।
කල්යාණං ගිරිසාර්වභෞමතනයේ කල්ලෝලයත්වාශු මේ ।
ඵුල්ලන්මල්ලිපිනද්ධහල්ලකමයී මාලේව යා පේශලා
ශ්රීකාංචීශ්වරි මාරමර්දිතුරුරෝමධ්යේ මුහුර්ලංබතේ ॥26॥

බිභ්රාණා ශරදභ්රවිභ්රමදශාං විද්යෝතමානාප්යසෝ
කාමාක්ෂි ස්මිතමංජරී කිරති තේ කාරුණ්යධාරාරසම් ।
ආශ්චර්යං ශිශිරීකරෝති ජගතීශ්චාලෝක්ය චෛනාමහෝ
කාමං ඛේලති නීලකංඨහෘදයං කෞතූහලාංදෝලිතම් ॥27॥

ප්රේංඛත්ප්රෞඪකටාක්ෂකුංජකුහරේෂ්වත්යච්ඡගුච්ඡායිතං
වක්ත්රේංදුච්ඡවිසිංධුවීචිනිචයේ ඵේනප්රතානායිතම් ।
නෛරංතර්යවිජෘංභිතස්තනතටේ නෛචෝලපට්ටායිතං
කාලුෂ්යං කබලීකරෝතු මම තේ කාමාක්ෂි මංදස්මිතම් ॥28॥

පීයූෂං තව මංථරස්මිතමිති ව්යර්ථෛව සාපප්රථා
කාමාක්ෂි ධ්රුවමීදෘශං යදි භවේදේතත්කථං වා ශිවේ ।
මංදාරස්ය කථාලවං න සහතේ මථ්නාති මංදාකිනී-
මිංදුං නිංදති කීර්තිතේऽපි කලශීපාථෝධිමීර්ෂ්යායතේ ॥29॥

විශ්වේෂාං නයනෝත්සවං විතනුතාං විද්යෝතතාං චංද්රමා
විඛ්යාතෝ මදනාංතකේන මුකුටීමධ්යේ ච සංමාන්යතාම් ।
ආඃ කිං ජාතමනේන හාසසුෂමාමාලෝක්ය කාමාක්ෂි තේ
කාලංකීමවලංබතේ ඛලු දශාං කල්මාෂහීනෝऽප්යසෞ ॥30॥

චේතඃ ශීතලයංතු නඃ පශුපතේරානංදජීවාතවෝ
නම්රාණාං නයනාධ්වසීමසු ශරච්චංද්රාතපෝපක්රමාඃ ।
සංසාරාඛ්යසරෝරුහාකරඛලීකාරේ තුෂාරෝත්කරාඃ
කාමාක්ෂි ස්මරකීර්තිබීජනිකරාස්ත්වන්මංදහාසාංකුරාඃ ॥31॥

කර්මෞඝාඛ්යතමඃකචාකචිකරාන්කාමාක්ෂි සංචිංතයේ
ත්වන්මංදස්මිතරෝචිෂාං ත්රිභුවනක්ෂේමංකරානංකුරාන් ।
යේ වක්ත්රං ශිශිරශ්රියෝ විකසිතං චංද්රාතපාංභෝරුහ-
ද්වේෂෝද්ධේෂෝණචාතුරීමිව තිරස්කර්තුං පරිෂ්කුර්වතේ ॥32॥

කුර්යුර්නඃ කුලශෛලරාජතනයේ කූලංකෂං මංගලං
කුංදස්පර්ධනචුංචවස්තව ශිවේ මංදස්මිතප්රක්රමාඃ ।
යේ කාමාක්ෂි සමස්තසාක්ෂිනයනං සංතෝෂයංතීශ්වරං
කර්පූරප්රකරා ඉව ප්රසෘමරාඃ පුංසාමසාධාරණාඃ ॥33॥

කම්රේණ ස්නපයස්ව කර්මකුහනාචෝරේණ මාරාගම-
ව්යාඛ්යාශික්ෂණදීක්ෂිතේන විදුෂාමක්ෂීණලක්ෂ්මීපුෂා ।
කාමාක්ෂි ස්මිතකංදලේන කලුෂස්ඵෝටක්රියාචුංචුනා
කාරුණ්යාමෘතවීචිකාවිහරණප්රාචුර්යධුර්යේණ මාම් ॥34॥

ත්වන්මංදස්මිතකංදලස්ය නියතං කාමාක්ෂි ශංකාමහේ
බිංබඃ කශ්චන නූතනඃ ප්රචලිතෝ නෛශාකරඃ ශීකරඃ ।
කිංච ක්ෂීරපයෝනිධිඃ ප්රතිනිධිඃ ස්වර්වාහිනීවීචිකා-
බිබ්වෝකෝऽපි විඩංබ ඒව කුහනා මල්ලීමතල්ලීරුචඃ ॥35॥

දුෂ්කර්මාර්කනිසර්ගකර්කශමහස්සංපර්කතපතං මිල-
ත්පංකං ශංකරවල්ලභේ මම මනඃ කාංචීපුරාලංක්රියේ ।
අංබ ත්වන්මෘදුලස්මිතාමෘතරසේ මංක්ත්වා විධූය ව්යථා-
මානංදෝදයසෞධශෘංගපදවීමාරෝඪුමාකාංක්ෂති ॥36॥

නම්රාණාං නගරාජශේඛරසුතේ නාකාලයානාං පුරඃ
කාමාක්ෂි ත්වරයා විපත්ප්රශමේන කාරුණ්යධාරාඃ කිරන් ।
ආගච්ඡංතමනුග්රහං ප්රකටයන්නානංදබීජානි තේ
නාසීරේ මෘදුහාස ඒව තනුතේ නාථේ සුධාශීතලඃ ॥37॥

කාමාක්ෂි ප්රථමානවිභ්රමනිධිඃ කංදර්පදර්පප්රසූඃ
මුග්ධස්තේ මෘදුහාස ඒව ගිරිජේ මුෂ්ණාතු මේ කිල්බිෂම් ।
යං ද්රෂ්ටුං විහිතේ කරග්රහ උමේ ශංභුස්ත්රපාමීලිතං
ස්වෛරං කාරයති ස්ම තාංඩවවිනෝදානංදිනා තංඩුනා ॥38॥

ක්ෂුණ්ණං කේනචිදේව ධීරමනසා කුත්රාපි නානාජනෛඃ
කර්මග්රංථිනියංත්රිතෛරසුගමං කාමාක්ෂි සාමාන්යතඃ ।
මුග්ධෛර්ද්රුෂ්ටුමශක්යමේව මනසා මූඪසය මේ මෞක්තිකං
මාර්ගං දර්ශයතු ප්රදීප ඉව තේ මංදස්මිතශ්රීරියම් ॥39॥

ජ්යෝත්ස්නාකාංතිභිරේව නිර්මලතරං නෛශාකරං මංඩලං
හංසෛරේව ශරද්විලාසසමයේ ව්යාකෝචමංභෝරුහම් ।
ස්වච්ඡෛරේව විකස්වරෛරුඩුගුණෛඃ කාමාක්ෂි බිංබං දිවඃ
පුණ්යෛරේව මෘදුස්මිතෛස්තව මුඛං පුෂ්ණාති ශෝභාභරම් ॥40॥

මානග්රංථිවිධුංතුදේන රභසාදාස්වාද්යමානේ නව-
ප්රේමාඩංබරපූර්ණිමාහිමකරේ කාමාක්ෂි තේ තත්ක්ෂණම් ।
ආලෝක්ය ස්මිතචංද්රිකාං පුනරිමාමුන්මීලනං ජග්මුෂීං
චේතඃ ශීලයතේ චකෝරචරිතං චංද්රාර්ධචූඩාමණේඃ ॥41॥

කාමාක්ෂි ස්මිතමංජරීං තව භජේ යස්යාස්ත්විෂාමංකුරා-
නාපීනස්තනපානලාලසතයා නිශ්ශංකමංකේශයඃ ।
ඌර්ධ්වං වීක්ෂ්ය විකර්ෂති ප්රසෘමරානුද්දාමයා ශුංඩයා
සූනුසුතේ බිසශංකයාශු කුහනාදංතාවලග්රාමණීඃ ॥42॥

ගාඪාශ්ලේෂවිමර්දසංභ්රමවශාදුද්දාමමුක්තාගුණ-
ප්රාලංබේ කුචකුංභයෝර්විගලිතේ දක්ෂද්විෂෝ වක්ෂසි ।
යා සඛ්යේන පිනහ්යති ප්රචුරයා භාසා තදීයාං දශාං
සා මේ ඛේලතු කාමකෝටි හෘදයේ සාංද්රස්මිතාංශුච්ඡටා ॥43॥

මංදාරේ තව මංථරස්මිතරුචාං මාත්සර්යමාලෝක්යතේ
කාමාක්ෂි ස්මරශාසනේ ච නියතෝ රාගෝදයෝ ලක්ෂ්යතේ ।
චාංද්රීෂු ද්යුතිමංජරීෂු ච මහාංද්වේෂාංකුරෝ දෘශ්යතේ
ශුද්ධානාං කථමීදෘශී ගිරිසුතේऽතිශුද්ධා දශා කථ්යතාම් ॥44॥

පීයූෂං ඛලු පීයතේ සුරජනෛර්දුග්ධාංබුධිර්මථ්යතේ
මාහේශෛශ්ච ජටාකලාපනිගඩෛර්මංදාකිනී නහ්යතේ ।
ශීතාංශුඃ පරිභූයතේ ච තමසා තස්මාදනේතාදෘශී
කාමාක්ෂි ස්මිතමංජරී තව වචෝවෛදග්ධ්යමුල්ලංඝතේ ॥45॥

ආශංකේ තව මංදහාසලහරීමන්යාදෘශීං චංද්රිකා-
මේකාම්රේශකුටුංබිනි ප්රතිපදං යස්යාඃ ප්රභාසංගමේ ।
වක්ෂෝජාංබුරුහේ න තේ රචයතඃ කාංචිද්දශාං කෞඞ්මලී-
මාස්යාංභෝරුහමංබ කිංච ශනකෛරාලංබතේ ඵුල්ලතාම් ॥46॥

ආස්තීර්ණාධරකාංතිපල්ලවචයේ පාතං මුහුර්ජග්මුෂී
මාරද්රෝහිණි කංදලත්ස්මරශරජ්වාලාවලීර්ව්යංජතී ।
නිංදංතී ඝනසාරහාරවලයජ්යෝත්ස්නාමෘණාලානි තේ
කාමාක්ෂි ස්මිතචාතුරී විරහිණීරීතිං ජගාහේතරාම් ॥47॥

සූර්යාලෝකවිධෞ විකාසමධිකං යාංතී හරංතී තම-
ස්සංදෝහං නමතාං නිජස්මරණතෝ දෝෂාකරද්වේෂිණී ।
නිර්යාංතී වදනාරවිංදකුහරාන්නිර්ධූතජාඩ්යා නෘණාං
ශ්රීකාමාක්ෂි තව ස්මිතද්යුතිමයී චිත්රීයතේ චංද්රිකා ॥48॥

කුංඨීකුර්යුරමී කුබෝධඝටනාමස්මන්මනෝමාථිනීං
ශ්රීකාමාක්ෂි ශිවංකරාස්තව ශිවේ ශ්රීමංදහාසාංකුරාඃ ।
යේ තන්වංති නිරංතරං තරුණිමස්තංබේරමග්රාමණී-
කුංභද්වංද්වවිඩංබිනි ස්තනතටේ මුක්තාකුථාඩංබරම් ॥49॥

ප්රේංඛංතඃ ශරදංබුදා ඉව ශනෛඃ ප්රේමානිලෛඃ ප්රේරිතා
මජ්ජංතෝ මංදනාරිකංඨසුෂමාසිංධෞ මුහුර්මංථරම් ।
ශ්රීකාමාක්ෂි තව ස්මිතාංශුනිකරාඃ ශ්යාමායමානශ්රියෝ
නීලාංභෝධරනෛපුණීං තත ඉතෝ නිර්නිද්රයංත්යංජසා ॥50॥

ව්යාපාරං චතුරානනෛකවිහෘතෞ ව්යාකුර්වතී කුර්වතී
රුද්රාක්ෂග්රහණං මහේශි සතතං වාගූර්මිකල්ලෝලිතා ।
උත්ඵුල්ලං ධවලාරවිංදමධරීකෘත්ය ස්ඵුරංතී සදා
ශ්රීකාමාක්ෂි සරස්වතී විජයතේ ත්වන්මංදහාසප්රභා ॥51॥

කර්පූරද්යුතිතස්කරේණ මහසා කල්මාෂයත්යානනං
ශ්රීකාංචීපුරනායිකේ පතිරිව ශ්රීමංදහාසෝऽපි තේ ।
ආලිංගත්යතිපීවරාං ස්තනතටීං බිංබාධරං චුංබති
ප්රෞඪං රාගභරං ව්යනක්ති මනසෝ ධෛර්යං ධුනීතේතරාම් ॥52॥

වෛශද්යේන ච විශ්වතාපහරණක්රීඩාපටීයස්තයා
පාංඩිත්යේන පචේලිමේන ජගතාං නේත්රෝත්සවෝත්පාදේන ।
කාමාක්ෂි ස්මිතකංදලෛස්තව තුලාමාරෝඪුමුද්යෝගිනී
ජ්යෝත්ස්නාසෞ ජලරාශිපෝෂණතයා දූෂ්යාං ප්රපන්නා දශාම් ॥53॥

ලාවණ්යාංබුජිනීමෘණාලවලයෛඃ ශෘංගාරගංධද්විප-
ග්රාමණ්යඃ ශ්රුතිචාමරෛස්තරුණිමස්වාරාජ්යතේජෝංකුරෛඃ ।
ආනංදාමෘතසිංධුවීචිපෘෂතෛරාස්යාබ්ජහංසෛස්තව
ශ්රීකාමාක්ෂි මථාන මංදහසිතෛර්මත්කං මනඃකල්මෂම් ॥54॥

උත්තුංගස්තනමංඩලීපරිචලන්මාණික්යහාරච්ඡටා-
චංචච්ඡෝණිමපුංජමධ්යසරණිං මාතඃ පරිෂ්කුර්වතී ।
යා වෛදග්ධ්යමුපෛති ශංකරජටාකාංතාරවාටීපත-
ත්ස්වර්වාපීපයසඃ ස්මිතද්යුතිරසෞ කාමාක්ෂි තේ මංජුලා ॥55॥

සන්නාමෛකජුෂා ජනේන සුලභං සංසූචයංතී ශනෛ-
රුත්තුංගස්ය චිරාදනුග්රහතරෝරුත්පත්ස්යමානං ඵලම් ।
ප්රාථම්යේන විකස්වරා කුසුමවත්ප්රාගල්භ්යමභ්යේයුෂී
කාමාක්ෂි ස්මිතචාතුරී තව මම ක්ෂේමංකරී කල්පතාම් ॥56॥

ධානුෂ්කාග්රසරස්ය ලෝලකුටිලභ්රූලේඛයා බිභ්රතෝ
ලීලාලෝකශිලීමුඛං නවවයස්සාම්රාජ්යලක්ෂ්මීපුෂඃ ।
ජේතුං මන්මථමර්දිනං ජනනි තේ කාමාක්ෂි හාසඃ ස්වයං
වල්ගුර්විභ්රමභූභෘතෝ විතනුතේ සේනාපතිප්රක්රියාම් ॥57॥

යන්නාකංපත කාලකූටකබලීකාරේ චුචුංබේ න යද්-
ග්ලාන්යා චක්ෂුෂි රූෂිතානලශිඛේ රුද්රස්ය තත්තාදෘශම් ।
චේතෝ යත්ප්රසභං ස්මරජ්වරශිඛිජ්වාලේන ලේලිහ්යතේ
තත්කාමාක්ෂි තව ස්මිතාංශුකලිකාහේලාභවං ප්රාභවම් ॥58॥

සංභින්නේව සුපර්වලෝකතටිනී වීචීචයෛර්යාමුනෛඃ
සංමිශ්රේව ශශාංකදීප්තිලහරී නීලෛර්මහානීරදෛඃ ।
කාමාක්ෂි ස්ඵුරිතා තව ස්මිතරුචිඃ කාලාංජනස්පර්ධිනා
කාලිම්නා කචරෝචිෂාං ව්යතිකරේ කාංචිද්දශාමශ්නුතේ ॥59॥

ජානීමෝ ජගදීශ්වරප්රණයිනි ත්වන්මංදහාසප්රභාං
ශ්රීකාමාක්ෂි සරෝජිනීමභිනවාමේෂා යතඃ සර්වදා ।
ආස්යේංදෝරවලෝකේන පශුපතේරභ්යේති සංඵුල්ලතාං
තංද්රාලුස්තදභාව ඒව තනුතේ තද්වෛපරීත්යක්රමම් ॥60॥

යාංතී ලෝහිතිමානමභ්රතටිනී ධාතුච්ඡටාකර්දමෛඃ
භාංතී බාලගභස්තිමාලිකිරණෛර්මේඝාවලී ශාරදී ।
බිංබෝෂ්ඨද්යුතිපුංජචුංබනකලාශෝණායමානේන තේ
කාමාක්ෂි ස්මිතරෝචිෂා සමදශාමාරෝඪුමාකාංක්ෂතේ ॥61॥

ශ්රීකාමාක්ෂි මුඛේංදුභූෂණමිදං මංදස්මිතං තාවකං
නේත්රානංදකරං තථා හිමකරෝ ගච්ඡේද්යථා තිග්මතාම් ।
ශීතං දේවි තථා යථා හිමජලං සංතාපමුද්රාස්පදං
ශ්වේතං කිංච තථා යථා මලිනතාං ධත්තේ ච මුක්තාමණිඃ ॥62॥

ත්වන්මංදස්මිතමංජරීං ප්රසෘමරාං කාමාක්ෂි චංද්රාතපං
සංතඃ සංතතමාමනංත්යමලතා තල්ලක්ෂණං ලක්ෂ්යතේ ।
අස්මාකං න ධුනෝති තාපකමධිකං ධූනෝති නාභ්යංතරං
ධ්වාංතං තත්ඛලු දුඃඛිනෝ වයමිදං කේනෝති නෝ විද්මහේ ॥63॥

නම්රස්ය ප්රණයප්රරූඪකලහච්ඡේදාය පාදාබ්ජයෝඃ
මංදං චංද්රකිශෝරශේඛරමණේඃ කාමාක්ෂි රාගේණ තේ ।
බංධූකප්රසවශ්රියං ජිතවතෝ බංහීයසීං තාදෘශීං
බිංබෝෂ්ඨස්ය රුචිං නිරස්ය හසිතජ්යෝත්ස්නා වයස්යායතේ ॥64॥

මුක්තානාං පරිමෝචනං විදධතස්තත්ප්රීතිනිෂ්පාදිනී
භූයෝ දූරත ඒව ධූතමරුතස්තත්පාලනං තන්වතී ।
උද්භූතස්ය ජලාංතරාදවිරතං තද්දූරතාං ජග්මුෂී
කාමාක්ෂි ස්මිතමංජරී තව කථං කංබෝස්තුලාමශ්නුතේ ॥65॥

ශ්රීකාමාක්ෂි තව ස්මිතද්යුතිඣරීවෛදග්ධ්යලීලායිතං
පශ්යංතෝऽපි නිරංතරං සුවිමලංමන්යා ජගන්මංඩලේ ।
ලෝකං හාසයිතුං කිමර්ථමනිශං ප්රාකාශ්යමාතන්වතේ
මංදාක්ෂං විරහය්ය මංගලතරං මංදාරචංද්රාදයඃ ॥66॥

ක්ෂීරාබ්ධේරපි ශෛලරාජතනයේ ත්වන්මංදහාසස්ය ච
ශ්රීකාමාක්ෂි වලක්ෂිමෝදයනිධේඃ කිංචිද්භිදාං බ්රූමහේ ।
ඒකස්මෛ පුරුෂාය දේවි ස දදෞ ලක්ෂ්මීං කදාචිත්පුරා
සර්වේභ්යෝऽපි දදාත්යසෞ තු සතතං ලක්ෂ්මීං ච වාගීශ්වරීම් ॥67॥

ශ්රීකාංචීපුරරත්නදීපකලිකේ තාන්යේව මේනාත්මජේ
චාකෝරාණි කුලානි දේවි සුතරාං ධන්යානි මන්යාමහේ ।
කංපාතීරකුටුංබචංක්රමකලාචුංචූනි චංචූපුටෛඃ
නිත්යං යානි තව ස්මිතේංදුමහසාමාස්වාදමාතන්වතේ ॥68॥

ශෛත්යප්රක්රමමාශ්රිතෝऽපි නමතාං ජාඩ්යප්රථාං ධූනයන්
නෛර්මල්යං පරමං ගතෝऽපි ගිරිශං රාගාකුලං චාරයන් ।
ලීලාලාපපුරස්සරෝऽපි සතතං වාචංයමාන්ප්රීණයන්
කාමාක්ෂි ස්මිතරෝචිෂාං තව සමුල්ලාසඃ කථං වර්ණ්යතේ ॥69॥

ශ්රෝණීචංචලමේඛලාමුඛරිතං ලීලාගතං මංථරං
භ්රූවල්ලීචලනං කටාක්ෂවලනං මංදාක්ෂවීක්ෂාචණම් ।
යද්වෛදග්ධ්යමුඛේන මන්මථරිපුං සංමෝහයංත්යංජසා
ශ්රීකාමාක්ෂි තව ස්මිතාය සතතං තස්මෛ නම්සකුර්මහේ ॥70॥

ශ්රීකාමාක්ෂි මනෝජ්ඤමංදහසිතජ්යෝතිෂ්ප්රරෝහේ තව
ස්ඵීතශ්වේතිමසාර්වභෞමසරණිප්රාගල්භ්යමභ්යේයුෂි ।
චංද්රෝऽයං යුවරාජතාං කලයතේ චේටීධුරං චංද්රිකා
ශුද්ධා සා ච සුධාඣරී සහචරීසාධර්ම්යමාලංබතේ ॥71॥

ජ්යෝත්ස්නා කිං තනුතේ ඵලං තනුමතාමෞෂ්ණ්යප්රශාංතිං විනා
ත්වන්මංදස්මිතරෝචිෂා තනුමතාං කාමාක්ෂි රෝචිෂ්ණුනා ।
සංතාපෝ විනිවාර්යතේ නවවයඃප්රාචුර්යමංකූර්යතේ
සෞංදර්යං පරිපූර්යතේ ජගති සා කීර්තිශ්ච සංචාර්යතේ ॥72॥

වෛමල්යං කුමුදශ්රියාං හිමරුචඃ කාංත්යෛව සංධුක්ෂ්යතේ
ජ්යෝත්ස්නාරෝචිරපි ප්රදෝෂසමයං ප්රාප්යෛව සංපද්යතේ ।
ස්වච්ඡත්වං නවමෞක්තිකස්ය පරමං සංස්කාරතෝ දෘශ්යතේ
කාමාක්ෂ්යාඃ ස්මිතදීධිතේර්විශදිමා නෛසර්ගිකෝ භාසතේ ॥73॥

ප්රාකාශ්යං පරමේශ්වරප්රණයිනි ත්වන්මංදහාසශ්රියඃ
ශ්රීකාමාක්ෂි මම ක්ෂිණෝතු මමතාවෛචක්ෂණීමක්ෂයාම් ।
යද්භීත්යේව නිලීයතේ හිමකරෝ මේඝෝදරේ ශුක්තිකා-
ගර්භේ මෞක්තිකමංඩලී ච සරසීමධ්යේ මෘණාලී ච සා ॥74॥

හේරංබේ ච ගුහේ හර්ෂභරිතං වාත්සල්යමංකූරයත්
මාරද්රෝහිණි පූරුෂේ සහභුවං ප්රේමාංකුරං ව්යංජයත් ।
ආනම්රේෂු ජනේෂු පූර්ණකරුණාවෛදග්ධ්යමුත්තාලයත්
කාමාක්ෂි ස්මිතමංජසා තව කථංකාරං මයා කථ්යතේ ॥75॥

සංක්රුද්ධද්විජරාජකෝऽප්යවිරතං කුර්වංද්විජෛඃ සංගමං
වාණීපද්ධතිදූරගෝऽපි සතතං තත්සාහචර්යං වහන් ।
අශ්රාංතං පශුදුර්ලභෝऽපි කලයන්පත්යෞ පශූනාං රතිං
ශ්රීකාමාක්ෂි තව ස්මිතාමෘතරසස්යංදෝ මයි ස්පංදතාම් ॥76॥

ශ්රීකාමාක්ෂි මහේශ්වරේ නිරුපමප්රේමාංකුරප්රක්රමමං
නිත්යං යඃ ප්රකටීකරෝති සහජාමුන්නිද්රයන්මාධුරීම් ।
තත්තාදෘක්තව මංදහාසමහිමා මාතඃ කථං මානිතාං
තන්මූර්ධ්නා සුරනිම්නගාං ච කලිකාමිංදෝශ්ච තාං නිංදති ॥77॥

යේ මාධුර්යවිහාරමංටපභුවෝ යේ ශෛත්යමුද්රාකරා
යේ වෛශද්යදශාවිශේෂසුභගාස්තේ මංදහාසාංකුරාඃ ।
කාමාක්ෂ්යාඃ සහජං ගුණත්රයමිදං පර්යායතඃ කුර්වතාං
වාණීගුංඵනඩංබරේ ච හෘදයේ කීර්තිප්රරෝහේ ච මේ ॥78॥

කාමාක්ෂ්යා මෘදුලස්මිතාංශුනිකරා දක්ෂාංතකේ වීක්ෂණේ
මංදාක්ෂග්රහිලා හිමද්යුතිමයූඛාක්ෂේපදීක්ෂාංකුරාඃ ।
දාක්ෂ්යං පක්ෂ්මලයංතු මාක්ෂිකගුඩද්රාක්ෂාභවං වාක්ෂු මේ
සූක්ෂ්මං මෝක්ෂපථං නිරීක්ෂිතුමපි ප්රක්ෂාලයේයුර්මනඃ ॥79॥

ජාත්යා ශීතශීතලානි මධුරාණ්යේතානි පූතානි තේ
ගාංගානීව පයාංසි දේවි පටලාන්යල්පස්මිතජ්යෝතිෂාම් ।
ඒනඃපංකපරංපරාමලිනිතාමේකාම්රනාථප්රියේ
ප්රජ්ඤානාත්සුතරාං මදීයධිෂණාං ප්රක්ෂාලයංතු ක්ෂණාත් ॥80॥

අශ්රාංතං පරතංත්රිතඃ පශුපතිස්ත්වන්මංදහාසාංකුරෛඃ
ශ්රීකාමාක්ෂි තදීයවර්ණසමතාසංගේන ශංකාමහේ ।
ඉංදුං නාකධුනීං ච ශේඛරයතේ මාලාං ච ධත්තේ නවෛඃ
වෛකුංඨෛරවකුංඨනං ච කුරුතේ ධූලීචයෛර්භාස්මනෛඃ ॥81॥

ශ්රීකාංචීපුරදේවතේ මෘදුවචස්සෞරභ්යමුද්රාස්පදං
ප්රෞඪප්රේමලතානවීනකුසුමං මංදස්මිතං තාවකම් ।
මංදං කංදලති ප්රියස්ය වදනාලෝකේ සමාභාෂණේ
ශ්ලක්ෂ්ණේ කුඞ්මලති ප්රරූඪපුලකේ චාශ්ලෝෂණේ ඵුල්ලති ॥82॥

කිං ත්රෛස්රෝතසමංබිකේ පරිණතං ස්රෝතශ්චතුර්ථං නවං
පීයූෂස්ය සමස්තතාපහරණං කිංවා ද්විතීයං වපුඃ ।
කිංස්විත්ත්වන්නිකටං ගතං මධුරිමාභ්යාසාය ගව්යං පයඃ
ශ්රීකාංචීපුරනායකප්රියතමේ මංදස්මිතං තාවකම් ॥83॥

භූෂා වක්ත්රසරෝරුහස්ය සහජා වාචාං සඛී ශාශ්වතී
නීවී විභ්රමසංතතේඃ පශුපතේඃ සෞධී දෘශාං පාරණා ।
ජීවාතුර්මදනශ්රියඃ ශශිරුචේරුච්චාටනී දේවතා
ශ්රීකාමාක්ෂි ගිරාමභූමිමයතේ හාසප්රභාමංජරී ॥84॥

සූතිඃ ශ්වේතිමකංදලස්ය වසතිඃ ශෘංගාරසාරශ්රියඃ
පූර්තිඃ සූක්තිඣරීරසස්ය ලහරී කාරුණ්යපාථෝනිධේඃ ।
වාටී කාචන කෞසුමී මධුරිමස්වාරාජ්යලක්ෂ්ම්යාස්තව
ශ්රීකාමාක්ෂි මමාස්තු මංගලකරී හාසප්රභාචාතුරී ॥85॥

ජංතූනාං ජනිදුඃඛමෘත්යුලහරීසංතාපනං කෘංතතඃ
ප්රෞඪානුග්රහපූර්ණශීතලරුචෝ නිත්යෝදයං බිභ්රතඃ ।
ශ්රීකාමාක්ෂි විසෘත්වරා ඉව කරා හාසාංකුරාස්තේ හඨා-
දාලෝකේන නිහන්යුරංධතමසස්තෝමස්ය මේ සංතතිම් ॥86॥

උත්තුංගස්තනමංඩලස්ය විලසල්ලාවණ්යලීලානටී-
රංගස්ය ස්ඵුටමූර්ධ්වසීමනි මුහුඃ ප්රාකාශ්යමභ්යේයුෂී ।
ශ්රීකාමාක්ෂි තව ස්මිතද්යුතිතතිර්බිංබෝෂ්ඨකාංත්යංකුරෛඃ
චිත්රාං විද්රුමමුද්රිතාං විතනුතේ මෞක්තීං විතානශ්රියම් ॥87॥

ස්වාභාව්යාත්තව වක්ත්රමේව ලලිතං සංතෝෂසංපාදනං
ශංභෝඃ කිං පුනරංචිතස්මිතරුචඃ පාංඩිත්යපාත්රීකෘතම් ।
අංභෝජං ස්වත ඒව සර්වජගතාං චක්ෂුඃප්රියංභාවුකං
කාමාක්ෂි ස්ඵුරිතේ ශරද්විකසිතේ කීදෘග්විධං භ්රාජතේ ॥88॥

පුංභිර්නිර්මලමානසෞර්විදධතේ මෛත්රීං දෘඪං නිර්මලාං
ලබ්ධ්වා කර්මලයං ච නිර්මලතරාං කීර්තිං ලභංතේතරාම් ।
සූක්තිං පක්ෂ්මලයංති නිර්මලතමාං යත්තාවකාඃ සේවකාඃ
තත්කාමාක්ෂි තව ස්මිතස්ය කලයා නෛර්මල්යසීමානිධේඃ ॥89॥

ආකර්ෂන්නයනානි නාකිසදසාං ශෛත්යේන සංස්තංභය-
න්නිංදුං කිංච විමෝහයන්පශුපතිං විශ්වාර්තිමුච්චාටයන් ।
හිංසත්සංසෘතිඩංබරං තව ශිවේ හාසාහ්වයෝ මාංත්රිකඃ
ශ්රීකාමාක්ෂි මදීයමානසතමෝවිද්වේෂණේ චේෂ්ටතාම් ॥90॥

ක්ෂේපීයඃ ක්ෂපයංතු කල්මෂභයාන්යස්මාකමල්පස්මිත-
ජ්යෝතිර්මංඩලචංක්රමාස්තව ශිවේ කාමාක්ෂි රෝචිෂ්ණවඃ ।
පීඩාකර්මඨකර්මඝර්මසමයව්යාපාරතාපානල-
ශ්රීපාතා නවහර්ෂවර්ෂණසුධාස්රෝතස්විනීශීකරාඃ ॥91॥

ශ්රීකාමාක්ෂි තව ස්මිතෛංදවමහඃපූරේ පරිංඵූර්ජති
ප්රෞඪාං වාරිධිචාතුරීං කලයතේ භක්තාත්මනාං ප්රාතිභම් ।
දෞර්ගත්යප්රසරාස්තමඃපටලිකාසාධර්ම්යමාබිභ්රතේ
සර්වං කෛරවසාහචර්යපදවීරීතිං විධත්තේ පරම් ॥92॥

මංදාරාදිෂු මන්මථාරිමහිෂි ප්රාකාශ්යරීතිං නිජාං
කාදාචිත්කතයා විශංක්ය බහුශෝ වෛශද්යමුද්රාගුණඃ ।
සාතත්යේන තව ස්මිතේ විතනුතේ ස්වෛරාසනාවාසනාම් ॥93॥

ඉංධානේ භවවීතිහෝත්රනිවහේ කර්මෞඝචංඩානිල-
ප්රෞඪිම්නා බහුලීකෘතේ නිපතිතං සංතාපචිංතාකුලම් ।
මාතර්මාං පරිෂිංච කිංචිදමලෛඃ පීයූෂවර්ෂෛරිව
ශ්රීකාමාක්ෂි තව ස්මිතද්යුතිකණෛඃ ශෛශිර්යලීලාකරෛඃ ॥94॥

භාෂායා රසනාග්රඛේලනජුෂඃ ශෘංගාරමුද්රාසඛී-
ලීලාජාතරතේඃ සුඛේන නියමස්නානාය මේනාත්මජේ ।
ශ්රීකාමාක්ෂි සුධාමයීව ශිශිරා ස්රෝතස්විනී තාවකී
ගාඪානංදතරංගිතා විජයතේ හාසප්රභාචාතුරී ॥95॥

සංතාපං විරලීකරෝතු සකලං කාමාක්ෂි මච්චේතනා
මජ්ජංතී මධුරස්මිතාමරධුනීකල්ලෝලජාලේෂු තේ ।
නෛරංතර්යමුපේත්ය මන්මථමරුල්ලෝලේෂු යේෂු ස්ඵුටං
ප්රේමේංදුඃ ප්රතිබිංබිතෝ විතනුතේ කෞතූහලං ධූර්ජටේඃ ॥96॥

චේතඃක්ෂීරපයෝධිමංථරචලද්රාගාඛ්යමංථාචල-
ක්ෂෝභව්යාපෘතිසංභවාං ජනනි තේ මංදස්මිතශ්රීසුධාම් ।
ස්වාදංස්වාදමුදීතකෞතුකරසා නේත්රත්රයී ශාංකරී
ශ්රීකාමාක්ෂි නිරංතරං පරිණමත්යානංදවීචීමයී ॥97॥

ආලෝකේ තව පංචසායකරිපෝරුද්දාමකෞතූහල-
ප්රේංඛන්මාරුතඝට්ටනප්රචලිතාදානංදදුග්ධාංබුධේඃ ।
කාචිද්වීචිරුදංචති ප්රතිනවා සංවිත්ප්රරෝහාත්මිකා
තාං කාමාක්ෂි කවීශ්වරාඃ ස්මිතමිති ව්යාකුර්වතේ සර්වදා ॥98॥

සූක්තිඃ ශීලයතේ කිමද්රිතනයේ මංදස්මිතාත්තේ මුහුඃ
මාධුර්යාගමසංප්රදායමථවා සූක්තේර්නු මංදස්මිතම් ।
ඉත්ථං කාමපි ගාහතේ මම මනඃ සංදේහමාර්ගභ්රමිං
ශ්රීකාමාක්ෂි න පාරමාර්ථ්යසරණිස්ඵූර්තෞ නිධත්තේ පදම් ॥99॥

ක්රීඩාලෝලකෘපාසරෝරුහමුඛීසෞධාංගණේභ්යඃ කවි-
ශ්රේණීවාක්පරිපාටිකාමෘතඣරීසූතීගෘහේභ්යඃ ශිවේ ।
නිර්වාණාංකුරසාර්වභෞමපදවීසිංහාසනේභ්යස්තව
ශ්රීකාමාක්ෂි මනෝජ්ඤමංදහසිතජ්යෝතිෂ්කණේභ්යෝ නමඃ ॥100॥

ආර්යාමේව විභාවයන්මනසි යඃ පාදාරවිංදං පුරඃ
පශ්යන්නාරභතේ ස්තුතිං ස නියතං ලබ්ධ්වා කටාක්ෂච්ඡවිම් ।
කාමාක්ෂ්යා මෘදුලස්මිතාංශුලහරීජ්යෝත්ස්නාවයස්යාන්විතාම්
ආරෝහත්යපවර්ගසෞධවලභීමානංදවීචීමයීම් ॥101॥

॥ ඉති මංදස්මිතශතකං සංපූර්ණම් ॥

॥ ඉති ශ්රී මූකපංචශතී සංපූර්ණා ॥

॥ඖං තත් සත් ॥