මාංගල්ය ස්තවඃ

දාල්භ්යඃ
කාර්යාරංභේෂු සර්වේෂු දුඃස්වප්නේෂු ච සත්තම ।
අමාංගල්යේෂු දෘෂ්ටේෂු යජ්ජප්තව්යං තදුච්යතාම් ॥ 1 ॥

යේනාරංභාශ්ච සිද්ධ්යංති දුඃස්වප්නශ්චෝපශාම්යති ।
අමංගලානාං දෘෂ්ටානාං පරිහාරශ්ච ජායතේ ॥ 2 ॥

ශ්රී පුලස්ත්යඃ:
ජනාර්දනං භූතපතිං ජගද්ගුරුං ස්මරන් මනුෂ්යඃ සතතං මහාමුනේ ।
දුෂ්ටාන්යශේෂණ්යපහංති සාධයති අශේෂකාර්යාණි ච යාන්යභීප්සති ॥ 3 ॥

ශෘණුෂ්ව චාන්යත් ගදතෝ මමාඛිලං වදාමි යත් තේ ද්විජවර්ය! මංගලම් ।
සර්වාර්ථසිද්ධිං ප්රදදාති යත් සදා නිහංත්ය්ශේෂාණි ච පාතකානි ॥ 4 ॥

ප්රතිෂ්ටිතං යත්ර ජගච්චරාචරං ජගත්ත්රයේ යෝ ජගතශ්ච හේතුඃ ।
ජගච්ච පාත්යත්ති ච යඃ ස සර්වදා මමාස්තු මාංගල්යවිවෘද්ධයේ හරිඃ ॥ 5 ॥

ව්යෝමාංබුවාය්වග්නිමහීස්වරූපෛඃ විස්තාරවාන් යෝऽණුතරෝऽණුභාවාත් ।
අස්ථූලසූක්ෂ්මඃ සතතං පරේශ්වරෝ මමාස්තු මාංගල්යවිවෘද්ධයේ හරිඃ ॥ 6 ॥

යස්මාත් පරස්මාත් පුරුෂාදනංතාත් අනාදිමධ්යාදධිකං න කිංචිත් ।
ස හේතුහේතුඃ පරමේශ්වරේශ්වරඃ මමාස්තු මාංගල්යවිවෘද්ධයේ හරිඃ ॥ 7 ॥

හිරණ්යගර්භාච්යුතරුද්රරූපී සෘජත්යශේෂං පරිපාති හංති ।
ගුණාග්රණීර්යෝ භගවාන් ස සර්වදා මමාස්තු මාංගල්යවිවෘද්ධයේ හරිඃ ॥ 8 ॥

පරඃ සුරාණාං පරමෝऽසුරාණාං පරෝ යතීනාං පරමෝ මුනීනාම් ।
පරඃ සමස්තස්ය ච යඃ ස සර්වදා මමාස්තු මාංගල්යවිවෘද්ධයේ හරිඃ ॥ 9 ॥

ධ්යාතෝ මුනීනාමපකල්මෂෛර්යෝ දදාති මුක්තිං පරමේශ්වරේශ්වරඃ ।
මනෝභිරාමඃ පුරුෂඃ ස සර්වදා මමාස්තු මාංගල්යවිවෘද්ධයේ හරිඃ ॥ 10 ॥

සුරේංද්රවෛවස්වතවිත්තපාංබුපස්වරූපරූපී පරිපාති යෝ ජගත් ।
ස ශුද්ධශුද්ධඃ පරමේශ්වරේශ්වරෝ මමාස්තු මාංගල්යවිවෘද්ධයේ හරිඃ ॥ 11 ॥

යන්නාමසංකීර්තනතෝ විමුච්යතේ හ්යනේකජන්මාර්ජිතපාපසංචයාත් ।
පාපේංධනාග්නිඃ ස සදෛව නිර්මලෝ මමාස්තු මාංගල්යවිවෘද්ධයේ හරිඃ ॥ 12 ॥

යේනෝද්ධෘතේයං ධරණී රසාතලාත් අශේෂසෘෂ්ටිස්ථිතිකාරණාදිකම් ।
බිභර්ති විශ්වං ජගතඃ ස මූලං මමාස්තු මාංගල්යවිවෘද්ධයේ හරිඃ ॥ 13 ॥

පාදේෂු වේදා ජඨරේ චරාචරං රෝමස්වශේෂා මුනයෝ මුඛේ මඛාඃ ।
යස්යේශ්වරේශස්ය ස සර්වදා ප්රභුඃ මමාස්තු මාංගල්යවිවෘද්ධයේ හරිඃ ॥ 14 ॥

සමස්ත යජ්ඤාංගමයං වපුඃ ප්රභෝඃ යස්යාංගමීශේශ්වරසංස්තුතස්ය ।
වරාහරූපී භගවාන් ස සර්වදා මමාස්තු මාංගල්යවිවෘද්ධයේ හරිඃ ॥ 15 ॥

වික්ෂෝභ්ය සර්වෝදධිතෝයසංභවං දධාර ධාත්රීං ජගතශ්ච යෝ භුවම් ।
යජ්ඤේශ්වරෝ යජ්ඤපුමාන් ස සර්වදා මමාස්තු මාංගල්යවිවෘද්ධයේ හරිඃ ॥ 16 ॥

පාතාලමූලේශ්වරභෝගිසංහතෝ වින්යස්ය පාදෞ පෘතිවීං ච බිභ්රතඃ ।
යස්යෝපමානං න බභූව සෝऽච්යුතෝ මමාස්තු මාංගල්යවිවෘද්ධයේ හරිඃ ॥ 17 ॥

සඝර්ඝරං යස්ය ච බෘංහිතං මුහුඃ සනංදනාද්යෛර්ජනලෝකසංශ්රිතෛඃ ।
ශ්රුතං ජයේත්යුක්තිපරෛඃ ස සර්වදා මමාස්තු මාංගල්යවිවෘද්ධයේ හරිඃ ॥ 18 ॥

ඒකාර්ණවාද් යස්ය මහීයසෞ මහීං ආදාය වේගේන ඛමුත්පතිෂ්යතඃ ।
නතං වපුර්යෝගිවරෛඃ ස සර්වදා මමාස්තු මාංගල්යවිවෘද්ධයේ හරිඃ ॥ 19 ॥

හතෝ හිරණ්යාක්ෂමහාසුරඃ පුරා පුරාණපුංසා පරමේණ යේන ।
වරාහරූපඃ ස පතිඃ ප්රජාපතිඃ මමාස්තු මාංගල්යවිවෘද්ධයේ හරිඃ ॥ 20 ॥

දංෂ්ට්රාකරාලං සුරභීතිනාශකං කෘතං වපුර්දිව්යනෘසිංහරූපිණා ।
ත්රාතුං ජගත් යේන ස සර්වදා ප්රභුඃ මමාස්තු මාංගල්යවිවෘද්ධයේ හරිඃ ॥ 21 ॥

දෛත්යේංද්රවක්ෂඃස්ථලදාරදාරුණෛඃ
කරේරුහෛර්යඃ ක්රකචානුකාරිභිඃ ।
විච්ඡේද ලෝකස්ය භයානි සෝऽච්යුතෝ
මමාස්තු මාංගල්යවිවෘද්ධයේ හරිඃ ॥ 22 ॥

දංතාංතදීප්තද්යුතිනිර්මලානි යඃ චකාර සර්වාණි දිශාං මුඛානි ।
නිනාදවිත්රාසිතදානවෝ හ්යසෞ මමාස්තු මාංගල්යවිවෘද්ධයේ හරිඃ ॥ 23 ॥

යන්නාමසංකීර්තනතෝ මහාභයාත් විමෝක්ෂමාප්නෝති න සංශයං නරඃ ।
ස සර්වලෝකාර්තිහරෝ නෘකේසරී මමාස්තු මාංගල්යවිවෘද්ධයේ හරිඃ ॥ 24 ॥

සටාකරාලභ්රමණානිලාහතාඃ ස්ඵුටංති යස්යාංබුධරාඃ සමංතතඃ ।
ස දිව්යසිංහඃ ස්ඵුරිතානලේක්ෂණෝ මමාස්තු මාංගල්යවිවෘද්ධයේ හරිඃ ॥ 25 ॥

යදීක්ෂණජ්යෝතිෂි රශ්මිමංඩලං ප්රලීනමීෂන්න රරාජ භාස්වතඃ ।
කුතඃ ශශාංකස්ය ස දිව්යරූපධෘක් මමාස්තු මාංගල්යවිවෘද්ධයේ හරිඃ ॥ 26 ॥

අශේෂදේවේශනරේශ්වරේශ්වරෛඃ සදා ස්තුතං යච්චරිතං මහාද්භුතම් ।
ස සර්වලෝකාර්තිහරෝ මහාහරිඃ මමාස්තු මාංගල්යවිවෘද්ධයේ හරිඃ ॥ 27 ॥

ද්රවංති දෛත්යාඃ ප්රණමංති දේවතාඃ නශ්යංති රක්ෂාංසි අපයාංති චාරයඃ ।
යත්කීර්තනාත් සෝऽද්භුතරූපකේසරී මමාස්තු මාංගල්යවිවෘද්ධයේ හරිඃ ॥ 28 ॥

ඍක්පාවිතං යෝ යජුෂා හි ශ්රීමත් සාමධ්වනිධ්වස්තසමස්තපාතකම් ।
චක්රේ ජගත් වාමනකඃ ස සර්වදා මමාස්තු මාංගල්යවිවෘද්ධයේ හරිඃ ॥ 29 ॥

යත්පාදවින්යාසපවිත්රතාං මහී යයෞ වියච්චර්ග්යජුෂාමුදීරණාත් ।
ස වාමනෝ දිව්යශරීරරූපදෘං මමාස්තු මාංගල්යවිවෘද්ධයේ හරිඃ ॥ 30 ॥

යස්මින් ප්රයාතේऽසුරභූභෘතෝऽධ්වරාත් නනාම ඛේදාදවනිඃ සසාගරා ।
ස වාමනඃ සර්වජගන්මයඃ සදා මමාස්තු මාංගල්යවිවෘද්ධයේ හරිඃ ॥ 31 ॥

මහාද්භුතේ දෛත්යපතේර්මහාධ්වරේ යස්මින් ප්රවිෂ්ටේ ක්ෂුභිතං මහාසුරෛඃ ।
ස වාමනෝऽංතස්ථිතසප්තලෝකධෘං මමාස්තු මාංගල්යවිවෘද්ධයේ හරිඃ ॥ 32 ॥

සංඝෛඃ සුරාණාං දිවි භූතලස්ථිතෛඃ තථා මනුෂ්යෛර්ගගනේ ච ඛේචරෛඃ ।
ස්තුතඃ ක්රමාද් යඃ ප්රච්චාර සර්වදා මමාස්තු මාංගල්යවිවෘද්ධයේ හරිඃ ॥ 33 ॥

ක්රාංත්වා ධරිත්රීං ගගනං තථා දිවං මරුත්පතේර්යඃ ප්රදදෞ ත්රිවිෂ්ටපම් ।
ස දේවදේවෝ භුවනේශ්වරේශ්වරෝ මමාස්තු මාංගල්යවිවෘද්ධයේ හරිඃ ॥ 34 ॥

අනුග්රහං චාපි බලේරනුත්ත්මං චකාර යශ්චේංද්රපදෝපමං ක්ෂණාත් ।
සුරාංශ්ච යජ්ඤාංශභුජඃ ස සර්වදා මමාස්තු මාංගල්යවිවෘද්ධයේ හරිඃ ॥ 35 ॥

රසාතලාද් යේන පුරා සමාහෘතාඃ සමස්තවේදා ජලචාරරිරූපිණා ।
ස කෛටභාරිමධුහාऽංබුශායී මමාස්තු මාංගල්යවිවෘද්ධයේ හරිඃ ॥ 36 ॥

නිඃක්ෂත්රියං යශ්ච චකාර මේදිනීං අනේකශෝ බාහුවනං තථාऽච්ඡිනත් ।
යඃ කාර්තවීර්යස්ය ස භාර්ගවෝත්තමෝ මමාස්තු මාංගල්යවිවෘද්ධයේ හරිඃ ॥ 37 ॥

නිහත්ය යෝ වාලිනමුග්රවික්රමං
නිබද්ධ්ය සේතුං ජලධෞ දශානනම් ।
ජඝාන චාන්යාන් රජනීචරාන් අසෞ
මමාස්තු මාංගල්යවිවෘද්ධයේ හරිඃ ॥ 38 ॥

චික්ෂේප බාලඃ ශකටං, බභංජ යෝ යමාර්ජුනං, කංසමරිං ජඝාන ච ।
මමර්ද චාණූරමුඛාන් ස සර්වදා මමාස්තු මාංගල්යවිවෘද්ධයේ හරිඃ ॥ 39 ॥

ප්රාතඃ සහස්රාංශුමරීචිනිර්මලං කරේණ බිභ්රත් භගවාන් සුදර්ශනම් ।
කෞමෝදකී චාපි ගදාමනංතෝ මමාස්තු මාංගල්යවිවෘද්ධයේ හරිඃ ॥ 40 ॥

හිමේංදුකුංදස්ඵටිකාභනිර්මලං මුඛානිලාපූරිතමීශ්වරේශ්වරඃ ।
මධ්යාහ්නකාලේऽපි ස ශන්ඛමුද්වහන් මමාස්තු මාංගල්යවිවෘද්ධයේ හරිඃ ॥ 41 ॥

තථාපරාහ්ණේ ප්රවිකාසි පංකජං වක්ෂස්ථලේන ශ්රියමුද්වහන් හරිඃ ।
විස්තාරිපද්මායතපත්රලෝචනෝ මමාස්තු මාංගල්යවිවෘද්ධයේ හරිඃ ॥ 42 ॥

සර්වේෂු කාලේෂු සමස්තදේශේෂු අශේෂකාර්යේෂු තථේශ්වරේශ්වරඃ ।
සර්වෛඃ ස්වරූපෛර්භගවාන් අනාදිමාන් මමාස්තු මාංගල්යවිවෘද්ධයේ හරිඃ ॥ 43 ॥

ඒතත් පඨන් දාල්භ්ය සමස්තපාපෛඃ
විමුච්යතේ විෂ්ණුපරෝ මනුෂ්යඃ ।
සිද්ධ්යංති කාර්යාණි තථාऽස්ය සර්වාන්
අර්ථානවාප්නෝති යථේච්ඡතේ තාන් ॥ 44 ॥

දුඃස්වප්නඃ ප්රශමමුපෛති පඨ්යමානේ
ස්තෝත්රේऽස්මින් ශ්රවණවිධෞ සදෝද්යතස්ය ।
ප්රාරංභෝ ද්රුතමුපයාති සිද්ධිමීශඃ
පාපානි ක්ෂපයති චාස්ය දේවදේවඃ ॥ 45 ॥

මාංගල්යං පරමපදං සදාऽර්ථසිද්ධිං
නිර්විඝ්නාමධිකඵලාං ශ්රියං දදාති ।
කිං ලෝකේ තදිහ පරත්ර චාපි පුංසාං
යද්විෂ්ණුප්රවණධියාං න දාල්භ්ය! සාධ්යම් ॥ 46 ॥

දේවේංද්රස්ත්රිභුවනමර්ථමේකපිංගඃ
සංසිද්ධිං ත්රිභුවනගාං ච කාර්තවීර්යඃ ।
වෛදේහඃ පරමපදං ප්රසාද්ය විෂ්ණුං
සංප්රාප්තාඃ සකලඵලප්රදෝ හි විෂ්ණුඃ ॥ 47 ॥

සර්වාරංභේෂු දාල්භ්යෛතද් දුඃස්වප්නේෂු ච පංඩිතඃ ।
ජපේදේකමනා විෂ්ණෞ තථාऽමංගල්යදර්ශනේ ॥ 48 ॥

ශමං ප්රයාංති දුෂ්ටානි ග්රහපීඩාශ්ච දාරුණාඃ ।
කර්මාරංභාශ්ච සිද්ධ්යංති පුණ්යමාප්නෝති චෝත්තමම් ॥ 49 ॥

හරිර්දදාති භද්රාණි මංගල්යස්තුතිසංස්තුතඃ ।
කරෝත්යඛිලරූපෛස්තු රක්ෂාමක්ෂතශක්තිභෘත් ॥ 50 ॥

॥ ශ්රීවිෂ්ණුධර්මෝත්තරාංතර්ගතඃ මාංගල්යස්තවඃ සංපූර්ණඃ ॥