ගීතගෝවිංදං පංචමඃ සර්ගඃ – සාකාංක්ෂ පුංඩරීකාක්ෂඃ

॥ පංචමඃ සර්ගඃ ॥
॥ සාකාංක්ෂපුංඩරීකාක්ෂඃ ॥

අහමිහ නිවසාමි යාහි රාධාං අනුනය මද්වචනේන චානයේථාඃ ।
ඉති මධුරිපුණා සඛී නියුක්තා ස්වයමිදමේත්ය පුනර්ජගාද රාධාම් ॥ 31 ॥

॥ ගීතං 10 ॥

වහති මලයසමීරේ මදනමුපනිධාය ।
ස්ඵුටති කුසුමනිකරේ විරහිහෘදයදලනාය ॥
තව විරහේ වනමාලී සඛි සීදති ॥ 1 ॥

දහති ශිශිරමයූඛේ මරණමනුකරෝති ।
පතති මදනවිශිඛේ විලපති විකලතරෝऽති ॥ 2 ॥

ධ්වනති මධුපසමූහේ ශ්රවණමපිදධාති ।
මනසි චලිතවිරහේ නිශි නිශි රුජමුපයාති ॥ 3 ॥

වසති විපිනවිතානේ ත්යජති ලලිතධාම ।
ලුඨති ධරණිශයනේ බහු විලපති තව නාම ॥ 4 ॥

රණති පිකසමවායේ ප්රතිදිශමනුයාති ।
හසති මනුජනිචයේ විරහමපලපති නේති ॥ 5 ॥

ස්ඵුරති කලරවරාවේ ස්මරති මණිතමේව।
තවරතිසුඛවිභවේ ගණයති සුගුණමතීව ॥ 6 ॥

ත්වදභිධශුභදමාසං වදති නරි ශෘණෝති ।
තමපි ජපති සරසං යුවතිෂු න රතිමුපෛති ॥ 7 ॥

භණති කවිජයදේවේ විරහවිලසිතේන ।
මනසි රභසවිභවේ හරිරුදයතු සුකෘතේන ॥ 8 ॥

පූර්වං යත්ර සමං ත්වයා රතිපතේරාසාදිතඃ සිද්ධය-ස්තස්මින්නේව නිකුංජමන්මථමහාතීර්ථේ පුනර්මාධවඃ ।
ධ්යායංස්ත්වාමනිශං ජපන්නපි තවෛවාලාපමංත්රාවලීං භූයස්ත්වත්කුචකුංභනිර්භරපරීරංභාමෘතං වාංඡති ॥ 32 ॥

॥ ගීතං 11 ॥

රතිසුඛසාරේ ගතමභිසාරේ මදනමනෝහරවේශම් ।
න කුරු නිතංබිනි ගමනවිලංබනමනුසර තං හෘදයේශම් ॥
ධීරසමීරේ යමුනාතීරේ වසති වනේ වනමාලී ॥ 1 ॥

නාම සමේතං කෘතසංකේතං වාදයතේ මෘදුවේණුම් ।
බහු මනුතේ නනු තේ තනුසංගතපවනචලිතමපි රේණුම් ॥ 2 ॥

පතති පතත්රේ විචලති පත්රේ ශංකිතභවදුපයානම් ।
රචයති ශයනං සචකිතනයනං පශ්යති තව පංථානම් ॥ 3 ॥

මුඛරමධීරං ත්යජ මංජීරං රිපුමිව කේලිෂුලෝලම් ।
චල සඛි කුංජං සතිමිරපුංජං ශීලය නීලනිචෝලම් ॥ 4 ॥

උරසි මුරාරේරුපහිතහාරේ ඝන ඉව තරලබලාකේ ।
තටිදිව පීතේ රතිවිපරීතේ රාජසි සුකෘතවිපාකේ ॥ 5 ॥

විගලිතවසනං පරිහෘතරසනං ඝටය ජඝනමපිධානම් ।
කිසලයශයනේ පංකජනයනේ නිධිමිව හර්ෂනිදානම් ॥ 6 ॥

හරිරභිමානී රජනිරිදානීමියමපි යාති විරාමම් ।
කුරු මම වචනං සත්වරරචනං පූරය මධුරිපුකාමම් ॥ 7 ॥

ශ්රීජයදේවේ කෘතහරිසේවේ භණති පරමරමණීයම් ।
ප්රමුදිතහෘදයං හරිමතිසදයං නමත සුකෘතකමනීයම් ॥ 8 ॥

විකිරති මුහුඃ ශ්වාසාංදිශඃ පුරෝ මුහුරීක්ෂතේ ප්රවිශති මුහුඃ කුංජං ගුංජන්මුහුර්බහු තාම්යති ।
රචයති මුහුඃ ශය්යාං පර්යාකුලං මුහුරීක්ෂතේ මදනකදනක්ලාංතඃ කාංතේ ප්රියස්තව වර්තතේ ॥ 33 ॥

ත්වද්වාම්යේන සමං සමග්රමධුනා තිග්මාංශුරස්තං ගතෝ ගෝවිංදස්ය මනෝරථේන ච සමං ප්රාප්තං තමඃ සාංද්රතාම් ।
කෝකානාං කරුණස්වනේන සදෘශී දීර්ඝා මදභ්යර්ථනා තන්මුග්ධේ විඵලං විලංබනමසෞ රම්යෝऽභිසාරක්ෂණඃ ॥ 34 ॥

ආශ්ලේෂාදනු චුංබනාදනු නඛෝල්ලේඛාදනු ස්වාංතජ-ප්රෝද්බෝධාදනු සංභ්රමාදනු රතාරංභාදනු ප්රීතයෝඃ ।
අන්යාර්ථං ගතයෝර්භ්රමාන්මිලිතයෝඃ සංභාෂණෛර්ජානතෝ-ර්දංපත්යෝරිහ කෝ න කෝ න තමසි ව්රීඩාවිමිශ්රෝ රසඃ ॥ 35 ॥

සභයචකිතං වින්යස්යංතීං දෘශෞ තිමිරේ පථි ප්රතිතරු මුහුඃ ස්ථිත්වා මංදං පදානි විතන්වතීම් ।
කථමපි රහඃ ප්රාප්තාමංගෛරනංගතරංගිභිඃ සුමුඛි සුභගඃ පශ්යන්ස ත්වාමුපෛතු කෘතාර්ථතාම් ॥ 36 ॥

රාධාමුග්ධමුඛාරවිංදමධුපස්ත්රෛලෝක්යමෞලිස්ථලී නේපථ්යෝචිතනීලරත්නමවනීභාරාවතාරාංතකඃ।
ස්වච්ඡංදං ව්රජසුබ්දරීජනමනස්තෝෂප්රදෝෂෝදයඃ කංසධ්වංසනධූමකේතුරවතු ත්වාං දේවකීනංදනඃ॥ 36 + 1 ॥

॥ ඉති ශ්රීගීතගෝවිංදේऽභිසාරිකවර්ණනේ සාකාංක්ෂපුංඩරීකාක්ෂෝ නාම පංචමඃ සර්ගඃ ॥