ගීතගෝවිංදං ද්විතීයඃ සර්ගඃ – අක්ලේශ කේශවඃ

॥ ද්විතීයඃ සර්ගඃ ॥
॥ අක්ලේශකේශවඃ ॥

විහරති වනේ රාධා සාධාරණප්රණයේ හරෞ විගලිතනිජෝත්කර්ෂාදීර්ෂ්යාවශේන ගතාන්යතඃ ।
ක්වචිදපි ලතාකුංජේ ගුංජන්මධුව්රතමංඩලී-මුඛරශිඛරේ ලීනා දීනාප්යුවාච රහඃ සඛීම් ॥ 14 ॥

॥ ගීතං 5 ॥

සංචරදධරසුධාමධුරධ්වනිමුඛරිතමෝහනවංශම් ।
චලිතදෘගංචලචංචලමෞලිකපෝලවිලෝලවතංසම් ॥
රාසේ හරිමිහ විහිතවිලාසං ස්මරති මනෝ මම කෘතපරිහාසම් ॥ 1 ॥

චංද්රකචාරුමයූරශිඛංඩකමංඩලවලයිතකේශම් ।
ප්රචුරපුරංදරධනුරනුරංජිතමේදුරමුදිරසුවේශම් ॥ 2 ॥

ගෝපකදංබනිතංබවතීමුඛචුංබනලංභිතලෝභම් ।
බංධුජීවමධුරාධරපල්ලවමුල්ලසිතස්මිතශෝභම් ॥ 3 ॥

විපුලපුලකභුජපල්ලවවලයිතවල්ලවයුවතිසහස්රම් ।
කරචරණෝරසි මණිගණභූෂණකිරණවිභින්නතමිස්රම් ॥ 4 ॥

ජලදපටලවලදිංදුවිනංදකචංදනතිලකලලාටම් ।
පීනපයෝධරපරිසරමර්දනනිර්දයහෘදයකවාටම් ॥ 5 ॥

මණිමයමකරමනෝහරකුංඩලමංඩිතගංඩමුදාරම් ।
පීතවසනමනුගතමුනිමනුජසුරාසුරවරපරිවාරම් ॥ 6 ॥

විශදකදංබතලේ මිලිතං කලිකලුෂභයං ශමයංතම් ।
මාමපි කිමපි තරංගදනංගදෘශා මනසා රමයංතම් ॥ 7 ॥

ශ්රීජයදේවභණිතමතිසුංදරමෝහනමධුරිපුරූපම් ।
හරිචරණස්මරණං ප්රති සංප්රති පුණ්යවතාමනුරූපම් ॥ 8 ॥

ගණයති ගුණග්රාමං භාමං භ්රමාදපි නේහතේ වහති ච පරිතෝෂං දෝෂං විමුංචති දූරතඃ ।
යුවතිෂු වලස්තෘෂ්ණේ කෘෂ්ණේ විහාරිණි මාං විනා පුනරපි මනෝ වාමං කාමං කරෝති කරෝමි කිම් ॥ 15 ॥

॥ ගීතං 6 ॥

නිභෘතනිකුංජගෘහං ගතයා නිශි රහසි නිලීය වසංතම් ।
චකිතවිලෝකිතසකලදිශා රතිරභසරසේන හසංතම් ॥
සඛි හේ කේශිමථනමුදාරං රමය මයා සහ මදනමනෝරථභාවිතයා සවිකාරම් ॥ 1 ॥

ප්රථමසමාගමලජ්ජිතයා පටුචාටුශතෛරනුකූලම් ।
මෘදුමධුරස්මිතභාෂිතයා ශිථිලීකෘතජඝනදුකූලම් ॥ 2 ॥

කිසලයශයනනිවේශිතයා චිරමුරසි මමෛව ශයානම් ।
කෘතපරිරංභණචුංබනයා පරිරභ්ය කෘතාධරපානම් ॥ 3 ॥

අලසනිමීලිතලෝචනයා පුලකාවලිලලිතකපෝලම් ।
ශ්රමජලසකලකලේවරයා වරමදනමදාදතිලෝලම් ॥ 4 ॥

කෝකිලකලරවකූජිතයා ජිතමනසිජතංත්රවිචාරම් ।
ශ්ලථකුසුමාකුලකුංතලයා නඛලිඛිතඝනස්තනභාරම් ॥ 5 ॥

චරණරණිතමනිනූපුරයා පරිපූරිතසුරතවිතානම් ।
මුඛරවිශෘංඛලමේඛලයා සකචග්රහචුංබනදානම් ॥ 6 ॥

රතිසුඛසමයරසාලසයා දරමුකුලිතනයනසරෝජම් ।
නිඃසහනිපතිතතනුලතයා මධුසූදනමුදිතමනෝජම් ॥ 7 ॥

ශ්රීජයදේවභණිතමිදමතිශයමධුරිපුනිධුවනශීලම් ।
සුඛමුත්කංඨිතගෝපවධූකථිතං විතනෝතු සලීලම් ॥ 8 ॥

හස්තස්රස්තවිලාසවංශමනෘජුභ්රූවල්ලිමද්බල්ලවී-වෘංදෝත්සාරිදෘගංතවීක්ෂිතමතිස්වේදාර්ද්රගංඩස්ථලම් ।
මාමුද්වීක්ෂ්ය විලක්ෂිතං ස්මිතසුධාමුග්ධානනං කානනේ ගෝවිංදං ව්රජසුංදරීගණවෘතං පශ්යාමි හෘෂ්යාමි ච ॥ 16 ॥

දුරාලෝකස්තෝකස්තබකනවකාශෝකලතිකා-විකාසඃ කාසාරෝපවනපවනෝऽපි ව්යථයති ।
අපි භ්රාම්යද්භෘංගීරණිතරමණීයා න මුකුල-ප්රසූතිශ්චූතානාං සඛි ශිඛරිණීයං සුඛයති ॥ 17 ॥

॥ ඉති ගීතගෝවිංදේ අක්ලේශකේශවෝ නාම ද්විතීයඃ සර්ගඃ ॥