ගීතගෝවිංදං ඒකාදශඃ සර්ගඃ – සානංද දාමෝදරඃ

॥ ඒකාදශඃ සර්ගඃ ॥
॥ සානංදදාමෝදරඃ ॥

සුචිරමනුනයනේ ප්රීණයිත්වා මෘගාක්ෂීං ගතවති කෘතවේශේ කේශවේ කුංජශය්යාම් ।
රචිතරුචිරභූෂාං දෘෂ්ටිමෝෂේ ප්රදෝෂේ ස්ඵුරති නිරවසාදාං කාපි රාධාං ජගාද ॥ 59 ॥

॥ ගීතං 20 ॥

විරචිතචාටුවචනරචනං චරණේ රචිතප්රණිපාතම් ।
සංප්රති මංජුලවංජුලසීමනි කේලිශයනමනුයාතම් ॥
මුග්ධේ මධුමථනමනුගතමනුසර රාධිකේ ॥ 1 ॥

ඝනජඝනස්තනභාරභරේ දරමංථරචරණවිහාරම් ।
මුඛරිතමණීමංජීරමුපෛහි විධේහි මරාලවිකාරම් ॥ 2 ॥

ශෘණු රමණීයතරං තරුණීජනමෝහනමධුපවිරාවම් ।
කුසුමශරාසනශාසනබංදිනි පිකනිකරේ භජ භාවම් ॥ 3 ॥

අනිලතරලකිසලයනිකරේණ කරේණ ලතානිකුරංබම් ।
ප්රේරණමිව කරභෝරු කරෝති ගතිං ප්රතිමුංච විලංබම් ॥ 4 ॥

ස්ඵුරිතමනංගතරංගවශාදිව සූචිතහරිපරිරංභම් ।
පෘච්ඡ මනෝහරහාරවිමලජලධාරමමුං කුචකුංභම් ॥ 5 ॥

අධිගතමඛිලසඛීභිරිදං තව වපුරපි රතිරණසජ්ජම් ।
චංඩි රසිතරශනාරවඩිංඩිමමභිසර සරසමලජ්ජම් ॥ 6 ॥

ස්මරශරසුභගනඛේන කරේණ සඛීමවලංබ්ය සලීලම් ।
චල වලයක්වණීතෛරවබෝධය හරමපි නිජගතිශීලම් ॥ 7 ॥

ශ්රීජයදේවභණිතමධරීකෘතහාරමුදාසිතවාමම් ।
හරිවිනිහිතමනසාමධිතිෂ්ඨතු කංඨතටීමවිරාමම් ॥ 8 ॥

සා මාං ද්රක්ෂ්යති වක්ෂ්යති ස්මරකථාං ප්රත්යංගමාලිංගනෛඃ ප්රීතිං යාස්යති රම්යතේ සඛි සමාගත්යේති චිංතාකුලඃ ।
ස ත්වාං පශ්යති වේපතේ පුලකයත්යානංදති ස්විද්යති ප්රත්යුද්ගච්ඡති මූර්ච්ඡති ස්ථිරතමඃපුංජේ නිකුංජේ ප්රියඃ ॥ 60 ॥

අක්ෂ්ණෝර්නික්ෂිපදංජනං ශ්රවණයෝස්තාපිච්ඡගුච්ඡාවලීං මූර්ධ්නි ශ්යාමසරෝජදාම කුචයෝඃ කස්තූරිකාපාත්රකම් ।
ධූර්තානාමභිසාරසත්වරහෘදාං විෂ්වඞ්නිකුංජේ සඛි ධ්වාංතං නීලනිචෝලචාරු සදෘශාං ප්රත්යංගමාලිංගති ॥ 61 ॥

කාශ්මීරගෞරවපුෂාමභිසාරිකාණාං ආබද්ධරේඛමභිතෝ රුචිමංජරීභිඃ ।
ඒතත්තමාලදලනීලතමං තමිශ්රං තත්ප්රේමහේමනිකෂෝපලතාං තනෝති ॥ 62 ॥

හාරාවලීතරලකාංචනකාංචිදාම-කේයූරකංකණමණිද්යුතිදීපිතස්ය ।
ද්වාරේ නිකුංජනිලයස්යහරිං නිරීක්ෂ්ය ව්රීඩාවතීමථ සඛී නිජගාහ රාධාම් ॥ 63 ॥

॥ ගීතං 21 ॥

මංජුතරකුංජතලකේලිසදනේ ।
විලස රතිරභසහසිතවදනේ ॥
ප්රවිශ රාධේ මාධවසමීපමිහ ॥ 1 ॥

නවභවදශෝකදලශයනසාරේ ।
විලස කුචකලශතරලහාරේ ॥ 2 ॥

කුසුමචයරචිතශුචිවාසගේහේ ।
විලස කුසුමසුකුමාරදේහේ ॥ 3 ॥

චලමලයවනපවනසුරභිශීතේ ।
විලස රසවලිතලලිතගීතේ ॥ 4 ॥

මධුමුදිතමධුපකුලකලිතරාවේ ।
විලස මදනරසසරසභාවේ ॥ 5 ॥

මධුතරලපිකනිකරනිනදමුඛරේ ।
විලස දශනරුචිරුචිරශිඛරේ ॥ 6 ॥

විතත බහුවල්ලිනවපල්ලවඝනේ ।
විලස චිරමලසපීනජඝනේ ॥ 7 ॥

විහිතපද්මාවතීසුඛසමාජේ ।
භණති ජයදේවකවිරාජේ ॥ 8 ॥

ත්වාං චිත්තේන චිරං වහන්නයමතිශ්රාංතෝ භෘශං තාපිතඃ කංදර්පේණ තු පාතුමිච්ඡති සුධාසංබාධබිංබාධරම් ।
අස්යාංගං තදලංකුරු ක්ෂණමිහ භ්රූක්ෂේපලක්ෂ්මීලව-ක්රීතේ දාස ඉවෝපසේවිතපදාංභෝජේ කුතඃ සංභ්රමඃ ॥ 64 ॥

සා සසාධ්වසසානංදං ගෝවිංදේ ලෝලලෝචනා ।
සිංජානමංජුමංජීරං ප්රවිවේශ නිවේශනම් ॥ 65 ॥

॥ ගීතං 22 ॥

රාධාවදනවිලෝකනවිකසිතවිවිධවිකාරවිභංගම් ।
ජලනිධිමිව විධුමංඩලදර්ශනතරලිතතුංගතරංගම් ॥
හරිමේකරසං චිරමභිලෂිතවිලාසං සා දදාර්ශ ගුරුහර්ෂවශංවදවදනමනංගනිවාසම් ॥ 1 ॥

හාරමමලතරතාරමුරසි දධතං පරිරභ්ය විදූරම් ।
ස්ඵුටතරඵේනකදංබකරංබිතමිව යමුනාජලපූරම් ॥ 2 ॥

ශ්යාමලමෘදුලකලේවරමංඩලමධිගතගෞරදුකූලම් ।
නීලනලිනමිව පීතපරාගපතලභරවලයිතමූලම් ॥ 3 ॥

තරලදෘගංචලචලනමනෝහරවදනජනිතරතිරාගම් ।
ස්ඵුටකමලෝදරඛේලිතඛංජනයුගමිව ශරදි තඩාගම් ॥ 4 ॥

වදනකමලපරිශීලනමිලිතමිහිරසමකුංඩලශෝභම් ।
ස්මිතරුචිරුචිරසමුල්ලසිතාධරපල්ලවකෘතරතිලෝභම් ॥ 5 ॥

ශශිකිරණච්ඡුරිතෝදරජලධරසුංදරසකුසුමකේශම් ।
තිමිරෝදිතවිධුමණ්දලනිර්මලමලයජතිලකනිවේශම් ॥ 6 ॥

විපුලපුලකභරදංතුරිතං රතිකේලිකලාභිරධීරම් ।
මණිගණකිරණසමූහසමුජ්ජ්වලභූෂණසුභගශරීරම් ॥ 7 ॥

ශ්රීජයදේවභණිතවිභවද්විගුණීකෘතභූෂණභාරම් ।
ප්රණමත හෘදි සුචිරං විනිධාය හරිං සුකෘතෝදයසාරම් ॥ 8 ॥

අතික්රම්යාපාංගං ශ්රවණපථපර්යංතගමන-ප්රයාසේනේවාක්ෂ්ණෝස්තරලතරතාරං පතිතයෝඃ ।
ඉදානීං රාධායාඃ ප්රියතමසමාලෝකසමයේ පපාත ස්වේදාංබුප්රසර ඉව හර්ෂාශ්රුනිකරඃ ॥ 66 ॥

භවංත්යාස්තල්පාංතං කෘතකපටකංඩූතිපිහිත-ස්මිතං යාතේ ගේහාද්බහිරවහිතාලීපරිජනේ ।
ප්රියාස්යං පශ්යංත්යාඃ ස්මරශරසමාකූලසුභගං සලජ්ජා ලජ්ජාපි ව්යගමදිව දූරං මෘගදෘශඃ ॥ 67 ॥

॥ ඉති ශ්රීගීතගෝවිංදේ රාධිකාමිලනේ සානංදදාමෝදරෝ නාමෛකාදශඃ සර්ගඃ ॥