චර්චා ස්තවඃ

පංචස්තවි – 2 චර්චාස්තවඃ >>

සෞංදර්යවිභ්රමභුවෝ භුවනාධිපත්ය-
-සංකල්පකල්පතරවස්ත්රිපුරේ ජයංති ।
ඒතේ කවිත්වකුමදප්රකරාවබෝධ-
-පූර්ණේංදවස්ත්වයි ජගජ්ජනනි ප්රණාමාඃ ॥ 1 ॥

දේවි ස්තුතිව්යතිකරේ කෘතබුද්ධයස්තේ
වාචස්පති ප්රභෘතයෝऽපි ජඩී භවංති ।
තස්මාන්නිසර්ගජඩිමා කතමෝऽහමත්ර
ස්තෝත්රං තව ත්රිපුරතාපනපත්නි කර්තුම් ॥ 2 ॥

මාතස්තථාපි භවතීං භවතීව්රතාප-
-විච්ඡිත්තයේ ස්තුතිමහාර්ණව කර්ණධාරඃ ।
ස්තෝතුං භවානි ස භවච්චරණාරවිංද-
-භක්තිග්රහඃ කිමපි මාං මුඛරී කරෝති ॥ 3 ॥

සූතේ ජගංති භවතී භවතී බිභර්ති
ජාගර්ති තත්ක්ෂයකෘතේ භවතී භවානි ।
මෝහං භිනත්ති භවතී භවතී රුණද්ධි
ලීලායිතං ජයති චිත්රමිදං භවත්යාඃ ॥ 4 ॥

යස්මින්මනාගපි නවාංබුජපත්රගෞරීං
ගෞරීං ප්රසාදමධුරාං දෘශමාදධාසි ।
තස්මින්නිරංතරමනංගශරාවකීර්ණ-
-සීමංතිනීනයනසංතතයඃ පතංති ॥ 5 ॥

පෘථ්වීභුජෝऽප්යුදයනප්රභවස්ය තස්ය
විද්යාධර ප්රණති චුංබිත පාදපීඨඃ ।
තච්චක්රවර්තිපදවීප්රණයඃ ස ඒෂඃ
ත්වත්පාදපංකජරජඃ කණජඃ ප්රසාදඃ ॥ 6 ॥

ත්වත්පාදපංකජරජ ප්රණිපාතපූර්වෛඃ
පුණ්යෛරනල්පමතිභිඃ කෘතිභිඃ කවීංද්රෛඃ ।
ක්ෂීරක්ෂපාකරදුකූලහිමාවදාතා
කෛරප්යවාපි භුවනත්රිතයේऽපි කීර්තිඃ ॥ 7 ॥

කල්පද්රුමප්රසවකල්පිතචිත්රපූජාං
උද්දීපිත ප්රියතමාමදරක්තගීතිම් ।
නිත්යං භවානි භවතීමුපවීණයංති
විද්යාධරාඃ කනකශෛලගුහාගෘහේෂු ॥ 8 ॥

ලක්ෂ්මීවශීකරණකර්මණි කාමිනීනාං
ආකර්ෂණව්යතිකරේෂු ච සිද්ධමංත්රඃ ।
නීරංධ්රමෝහතිමිරච්ඡිදුරප්රදීපෝ
දේවි ත්වදංඝ්රිජනිතෝ ජයති ප්රසාදඃ ॥ 9 ॥

දේවි ත්වදංඝ්රිනඛරත්නභුවෝ මයූඛාඃ
ප්රත්යග්රමෞක්තිකරුචෝ මුදමුද්වහංති ।
සේවානතිව්යතිකරේ සුරසුංදරීණාං
සීමංතසීම්නි කුසුමස්තබකායිතං යෛඃ ॥ 10 ॥

මූර්ධ්නි ස්ඵුරත්තුහිනදීධිතිදීප්තිදීප්තං
මධ්යේ ලලාටමමරායුධරශ්මිචිත්රම් ।
හෘච්චක්රචුංබි හුතභුක්කණිකානුකාරි
ජ්යෝතිර්යදේතදිදමංබ තව ස්වරූපම් ॥ 11 ॥

රූපං තව ස්ඵුරිතචංද්රමරීචිගෞරං
ආලෝකතේ ශිරසි වාගධිදෛවතං යඃ ।
නිඃසීමසූක්තිරචනාමෘතනිර්ඣරස්ය
තස්ය ප්රසාදමධුරාඃ ප්රසරංති වාචඃ ॥ 12 ॥

සිංදූරපාංසුපටලච්ඡුරිතාමිව ද්යාං
ත්වත්තේජසා ජතුරසස්නපිතාමිවෝර්වීම් ।
යඃ පශ්යති ක්ෂණමපි ත්රිපුරේ විහාය
ව්රීඩාං මෘඩානි සුදෘශස්තමනුද්රවංති ॥ 13 ॥

මාතර්මුහූර්තමපි යඃ ස්මරති ස්වරූපං
ලාක්ෂාරසප්රසරතංතුනිභං භවත්යාඃ ।
ධ්යායංත්යනන්යමනසස්තමනංගතප්තාඃ
ප්රද්යුම්නසීම්නි සුභගත්වගුණං තරුණ්යඃ ॥ 14 ॥

යෝऽයං චකාස්ති ගගනාර්ණවරත්නමිංදුඃ
යෝऽයං සුරාසුරගුරුඃ පුරුෂඃ පුරාණඃ ।
යද්වාමමර්ධමිදමංධකසූදනස්ය
දේවි ත්වමේව තදිති ප්රතිපාදයංති ॥ 15 ॥

ඉච්ඡානුරූපමනුරූපගුණප්රකර්ෂ
සංකර්ෂිණි ත්වමභිමෘශ්ය යදා බිභර්ෂි ।
ජායේත ස ත්රිභුවනෛක ගුරුස්තදානීං
දේවඃ ශිවෝऽපි භුවනත්රයසූත්රධාරඃ ॥ 16 ॥

ධ්යාතාසි හෛමවති යේන හිමාංශුරශ්මි-
-මාලාමලද්යුතිරකල්මෂමානසේන ।
තස්යාවිලංබමනවද්යමනංතකල්පං
අල්පෛර්දිනෛඃ සෘජසි සුංදරි වාග්විලාසම් ॥ 17 ॥

ආධාරමාරුතනිරෝධවශේන යේෂාං
සිංදූරරංජිතසරෝජගුණානුකාරි ।
දීප්තං හෘදි ස්ඵුරති දේවි වපුස්ත්වදීයං
ධ්යායංති තානිහ සමීහිතසිද්ධිසාර්ථාඃ ॥ 18 ॥

යේ චිංතයංත්යරුණමංඩලමධ්යවර්ති
රූපං තවාංබ නවයාවකපංකපිංගම් ।
තේෂාං සදෛව කුසුමායුධබාණභින්න-
-වක්ෂඃස්ථලා මෘගදෘශෝ වශගා භවංති ॥ 19 ॥

ත්වාමෛංදවීමිව කලාමනුඵාලදේශං
උද්භාසිතාංබරතලාමවලෝකයංතඃ ।
සද්යෝ භවානි සුධියඃ කවයෝ භවංති
ත්වං භාවනාහිතධියාං කුලකාමධේනුඃ ॥ 20 ॥

ශර්වාණි සර්වජනවංදිතපාදපද්මේ
පද්මච්ඡදද්යුතිවිඩංබිතනේත්රලක්ෂ්මි ।
නිෂ්පාපමූර්තිජනමානසරාජහංසි
හංසි ත්වමාපදමනේකවිධාං ජනස්ය ॥ 21 ॥

උත්තප්තහේමරුචිරේ ත්රිපුරේ පුනීහි
චේතශ්චිරංතනමඝෞඝවනං ලුනීහි ।
කාරාගෘහේ නිගලබංධනයංත්රිතස්ය
ත්වත්සංස්මෘතෞ ඣටිති මේ නිගලාස්ත්රුටංති ॥ 22 ॥

ත්වාං ව්යාපිනීති සුමනා ඉති කුංඩලීති
ත්වාං කාමිනීති කමලේති කලාවතීති ।
ත්වාං මාලිනීති ලලිතේත්යපරාජිතේති
දේවි ස්තුවංති විජයේති ජයේත්යුමේති ॥ 23 ॥

උද්දාමකාමපරමාර්ථසරෝජඛංඩ-
චංඩද්යුතිද්යුතිමපාසිතෂඩ්විකාරාම් ।
මෝහද්විපේංද්රකදනෝද්යතබෝධසිංහ-
-ලීලාගුහාං භගවතීං ත්රිපුරාං නමාමි ॥ 24 ॥

ගණේශවටුකස්තුතා රතිසහායකාමාන්විතා
ස්මරාරිවරවිෂ්ටරා කුසුමබාණබාණෛර්යුතා ।
අනංගකුසුමාදිභිඃ පරිවෘතා ච සිද්ධෛස්ත්රිභිඃ
කදංබවනමධ්යගා ත්රිපුරසුංදරී පාතු නඃ ॥ 25 ॥

රුද්රාණි විද්රුමමයීං ප්රතිමාමිව ත්වාං
යේ චිංතයංත්යරුණකාංතිමනන්යරූපාම් ।
තානේත්ය පක්ෂ්මලදෘශඃ ප්රසභං භජංතේ
කංඨාවසක්තමෘදුබාහුලතාස්තරුණ්යඃ ॥ 26 ॥

ත්වද්රූපෛකනිරූපණප්රණයිතාබංධෝ දෘශෝස්ත්වද්ගුණ-
-ග්රාමාකර්ණනරාගිතා ශ්රවණයෝස්ත්වත්සංස්මෘතිශ්චේතසි ।
ත්වත්පාදාර්චනචාතුරී කරයුගේ ත්වත්කීර්තිතං වාචි මේ
කුත්රාපි ත්වදුපාසනව්යසනිතා මේ දේවි මා ශාම්යතු ॥ 27 ॥

ත්වද්රූපමුල්ලසිතදාඩිමපුෂ්පරක්තං
උද්භාවයේන්මදනදෛවතමක්ෂරං යඃ ।
තං රූපහීනමපි මන්මථනිර්විශේෂං
ආලෝකයංත්යුරුනිතංබතටාස්තරුණ්යඃ ॥ 28 ॥

බ්රහ්මේංද්රරුද්රහරිචංද්රසහස්රරශ්මි-
-ස්කංදද්විපානනහුතාශනවංදිතායෛ ।
වාගීශ්වරි ත්රිභුවනේශ්වරි විශ්වමාතඃ
අංතර්බහිශ්ච කෘතසංස්ථිතයේ නමස්තේ ॥ 29 ॥

කස්තෝත්රමේතදනුවාසරමීශ්වරායාඃ
ශ්රේයස්කරං පඨති වා යදි වා ශෘණෝති ।
තස්යේප්සිතං ඵලති රාජභිරීඩ්යතේऽසෞ
ජායේත ස ප්රියතමෝ මදිරේක්ෂණානාම් ॥ 30 ॥

ඉති ශ්රීකාළිදාස විරචිත පංචස්තව්යාං ද්විතීයඃ චර්චාස්තවඃ ।