චාණක්ය නීති – පංචදශෝऽධ්යායඃ

යස්ය චිත්තං ද්රවීභූතං කෘපයා සර්වජංතුෂු ।
තස්ය ජ්ඤානේන මෝක්ෂේණ කිං ජටාභස්මලේපනෛඃ ॥ 01 ॥

ඒකමප්යක්ෂරං යස්තු ගුරුඃ ශිෂ්යං ප්රබෝධයේත් ।
පෘථිව්යාං නාස්ති තද්ද්රව්යං යද්දත්ත්වා සෝऽනෘණී භවේත් ॥ 02 ॥

ඛලානාං කංටකානාං ච ද්විවිධෛව ප්රතික්රියා ।
උපානන්මුඛභංගෝ වා දූරතෝ වා විසර්ජනම් ॥ 02 ॥

කුචෛලිනං දංතමලෝපධාරිණං
බහ්වාශිනං නිෂ්ඨුරභාෂිණං ච ।
සූර්යෝදයේ චාස්තමිතේ ශයානං
විමුංචති ශ්රීර්යදි චක්රපාණිඃ ॥ 04 ॥

ත්යජංති මිත්රාණි ධනෛර්විහීනං
පුත්රාශ්ච දාරාශ්ච සුහෘජ්ජනාශ්ච ।
තමර්ථවංතං පුනරාශ්රයංති
අර්ථෝ හි ලෝකේ මනුෂ්යස්ය බංධුඃ ॥ 05 ॥

අන්යායෝපාර්ජිතං ද්රව්යං දශ වර්ෂාණි තිෂ්ඨති ।
ප්රාප්තේ චෛකාදශේ වර්ෂේ සමූලං තද්විනශ්යති ॥ 06 ॥

අයුක්තං ස්වාමිනෝ යුක්තං යුක්තං නීචස්ය දූෂණම් ।
අමෘතං රාහවේ මෘත්යුර්විෂං ශංකරභූෂණම් ॥ 07 ॥

තද්භෝජනං යද්ද්විජභුක්තශේෂං
තත්සෞහෘදං යත්ක්රියතේ පරස්මින් ।
සා ප්රාජ්ඤතා යා න කරෝති පාපං
දංභං විනා යඃ ක්රියතේ ස ධර්මඃ ॥ 08 ॥

මණිර්ලුංඨති පාදාග්රේ කාචඃ ශිරසි ධාර්යතේ ।
ක්රයවික්රයවේලායාං කාචඃ කාචෝ මණිර්මණිඃ ॥ 09 ॥

අනංතශාස්ත්රං බහුලාශ්ච විද්යාඃ
ස්වල්පශ්ච කාලෝ බහුවිඝ්නතා ච ।
යත්සාරභූතං තදුපාසනීයාං
හංසෝ යථා ක්ෂීරමිවාංබුමධ්යාත් ॥ 10 ॥

දූරාගතං පථි ශ්රාංතං වෘථා ච ගෘහමාගතම් ।
අනර්චයිත්වා යෝ භුංක්තේ ස වෛ චාංඩාල උච්යතේ ॥ 11 ॥

පඨංති චතුරෝ වේදාංධර්මශාස්ත්රාණ්යනේකශඃ ।
ආත්මානං නෛව ජානංති දර්වී පාකරසං යථා ॥ 12 ॥

ධන්යා ද්විජමයී නෞකා විපරීතා භවාර්ණවේ ।
තරංත්යධෝගතාඃ සර්වේ උපරිෂ්ඨාඃ පතංත්යධඃ ॥ 13 ॥

අයමමෘතනිධානං නායකෝऽප්යෝෂධීනාම්
අමෘතමයශරීරඃ කාංතියුක්තෝऽපි චංද්රඃ ।
භවතිවිගතරශ්මිර්මංඩලං ප්රාප්ය භානෝඃ
පරසදනනිවිෂ්ටඃ කෝ ලඝුත්වං න යාති ॥ 14 ॥

අලිරයං නලිනීදලමධ්යගඃ
කමලිනීමකරංදමදාලසඃ ।
විධිවශාත්පරදේශමුපාගතඃ
කුටජපුෂ්පරසං බහු මන්යතේ ॥ 15 ॥

පීතඃ ක්රුද්ධේන තාතශ්චරණතලහතෝ වල්ලභෝ යේන රෝෂා
දාබාල්යාද්විප්රවර්යෛඃ ස්වවදනවිවරේ ධාර්යතේ වෛරිණී මේ ।
ගේහං මේ ඡේදයංති ප්රතිදිවසමුමාකාංතපූජානිමිත්තං
තස්මාත්ඛින්නා සදාහං ද්විජකුලනිලයං නාථ යුක්තං ත්යජාමි ॥ 16 ॥

බංධනානි ඛලු සංති බහූනි
ප්රේමරජ්ජුකෘතබංධනමන්යත් ।
දාරුභේදනිපුණෝऽපි ෂඩංඝ්රි-
ර්නිෂ්ක්රියෝ භවති පංකජකෝශේඃ ॥ 17 ॥

ඡින්නෝऽපි චංදන තරුර්න ජහාති ගංධං
වෘද්ධෝऽපි වාරණපති-ර්නජහාති ලීලාම් ।
හංත්රාර්පිතෝ මධුරතාං න ජහාති චේක්ෂුඃ
ක්ෂීණෝऽපි න ත්යජති ශිලගුණාන් කුලීනඃ ॥ 18 ॥