ශ්රීමද්භගවද්ගීතා පාරායණ – නවමෝऽධ්යායඃ

ඕං ශ්රීපරමාත්මනේ නමඃ
අථ නවමෝऽධ්යායඃ
රාජවිද්යාරාජගුහ්යයෝගඃ

ශ්රී භගවානුවාච
ඉදං තු තේ ගුහ්යතමං ප්රවක්ෂ්යාම්යනසූයවේ ।
ජ්ඤානං විජ්ඤානසහිතං යජ්ජ්ඤාත්වා මෝක්ෂ්යසේऽශුභාත්॥1॥

රාජවිද්යා රාජගුහ්යං පවිත්රමිදමුත්තමම් ।
ප්රත්යක්ෂාවගමං ධර්ම්යං සුසුඛං කර්තුමව්යයම් ॥2॥

අශ්රද්දධානාඃ පුරුෂාඃ ධර්මස්යාස්ය පරංතප ।
අප්රාප්ය මාං නිවර්තංතේ මෘත්යුසංසාරවර්ත්මනි ॥3॥

මයා තතමිදං සර්වං ජගදව්යක්තමූර්තිනා ।
මත්ස්ථානි සර්වභූතානි න චාහං තේෂ්වවස්ථිතඃ ॥4॥

න ච මත්ස්ථානි භූතානි පශ්ය මේ යෝගමෛශ්වරම් ।
භූතභෘන්න ච භූතස්ථඃ මමාත්මා භූතභාවනඃ ॥5॥

යථාऽऽකාශස්ථිතෝ නිත්යං වායුඃ සර්වත්රගෝ මහාන් ।
තථා සර්වාණි භූතානි මත්ස්ථානීත්යුපධාරය ॥6॥

සර්වභූතානි කෞංතේය ප්රකෘතිං යාංති මාමිකාම් ।
කල්පක්ෂයේ පුනස්තානි කල්පාදෞ විසෘජාම්යහම් ॥7॥

ප්රකෘතිං ස්වාමවෂ්ටභ්ය විසෘජාමි පුනඃ පුනඃ ।
භූතග්රාමමිමං කෘත්ස්නම් අවශං ප්රකෘතේර්වශාත් ॥8॥

න ච මාං තානි කර්මාණි නිබධ්නංති ධනංජය ।
උදාසීනවදාසීනම් අසක්තං තේෂු කර්මසු ॥9॥

මයාධ්යක්ෂේණ ප්රකෘතිඃ සූයතේ සචරාචරම් ।
හේතුනාऽනේන කෞංතේය ජගද්විපරිවර්තතේ ॥10॥

අවජානංති මාං මූඪාඃ මානුෂීං තනුමාශ්රිතම් ।
පරං භාවමජානංතඃ මම භූතමහේශ්වරම් ॥11॥

මෝඝාශා මෝඝකර්මාණඃ මෝඝජ්ඤානා විචේතසඃ ।
රාක්ෂසීමාසුරීං චෛව ප්රකෘතිං මෝහිනීං ශ්රිතාඃ ॥12॥

මහාත්මානස්තු මාං පාර්ථ දෛවීං ප්රකෘතිමාශ්රිතාඃ ।
භජංත්යනන්යමනසඃ ජ්ඤාත්වා භූතාදිමව්යයම් ॥13॥

සතතං කීර්තයංතෝ මාං යතංතශ්ච දෘඪව්රතාඃ ।
නමස්යංතශ්ච මාං භක්ත්යා නිත්යයුක්තා උපාසතේ ॥14॥

ජ්ඤානයජ්ඤේන චාප්යන්යේ යජංතෝ මාමුපාසතේ ।
ඒකත්වේන පෘථක්ත්වේන බහුධා විශ්වතෝමුඛම් ॥15॥

අහං ක්රතුරහං යජ්ඤඃ ස්වධාහමහමෞෂධම් ।
මංත්රෝऽහමහමේවාජ්යම් අහමග්නිරහං හුතම් ॥16॥

පිතාऽහමස්ය ජගතඃ මාතා ධාතා පිතාමහඃ ।
වේද්යං පවිත්රමෝංකාරඃ ඍක්සාම යජුරේව ච ॥17॥

ගතිර්භර්තා ප්රභුඃ සාක්ෂී නිවාසඃ ශරණං සුහෘත් ।
ප්රභවඃ ප්රලයඃ ස්ථානං නිධානං බීජමව්යයම් ॥18॥

තපාම්යහමහං වර්ෂං නිගෘහ්ණාම්යුත්සෘජාමි ච ।
අමෘතං චෛව මෘත්යුශ්ච සදසච්චාහමර්ජුන ॥19॥

ත්රෛවිද්යා මාං සෝමපාඃ පූතපාපාඃ යජ්ඤෛරිෂ්ට්වා ස්වර්ගතිං ප්රාර්ථයංතේ ।
තේ පුණ්යමාසාද්ය සුරේංද්රලෝකම් අශ්නංති දිව්යාංදිවි දේවභෝගාන් ॥20॥

තේ තං භුක්ත්වා ස්වර්ගලෝකං විශාලං ක්ෂීණේ පුණ්යේ මර්ත්යලෝකං විශංති ।
ඒවං ත්රයීධර්මමනුප්රපන්නාඃ ගතාගතං කාමකාමා ලභංතේ ॥21॥

අනන්යාශ්චිංතයංතෝ මාං යේ ජනාඃ පර්යුපාසතේ ।
තේෂාං නිත්යාභියුක්තානාං යෝගක්ෂේමං වහාම්යහම් ॥22॥

යේऽප්යන්යදේවතා භක්තාඃ යජංතේ ශ්රද්ධයාන්විතාඃ ।
තේऽපි මාමේව කෞංතේය යජංත්යවිධිපූර්වකම් ॥23॥

අහං හි සර්වයජ්ඤානාං භෝක්තා ච ප්රභුරේව ච ।
න තු මාමභිජානංති තත්ත්වේනාතශ්ච්යවංති තේ ॥24॥

යාංති දේවව්රතා දේවාන් පිතॄන්යාංති පිතෘව්රතාඃ ।
භූතානි යාංති භූතේජ්යාඃ යාංති මද්යාජිනෝऽපි මාම් ॥25॥

පත්රං පුෂ්පං ඵලං තෝයං යෝ මේ භක්ත්යා ප්රයච්ඡති ।
තදහං භක්ත්යුපහෘතම් අශ්නාමි ප්රයතාත්මනඃ ॥26॥

යත්කරෝෂි යදශ්නාසි යජ්ජුහෝෂි දදාසි යත් ।
යත්තපස්යසි කෞංතේය තත්කුරුෂ්ව මදර්පණම් ॥27॥

ශුභාශුභඵලෛරේවං මෝක්ෂ්යසේ කර්මබංධනෛඃ ।
සන්න්යාසයෝගයුක්තාත්මා විමුක්තෝ මාමුපෛෂ්යසි ॥28॥

සමෝऽහං සර්වභූතේෂු න මේ ද්වේෂ්යෝऽස්ති න ප්රියඃ ।
යේ භජංති තු මාං භක්ත්යා මයි තේ තේෂු චාප්යහම් ॥29॥

අපි චේත්සුදුරාචාරඃ භජතේ මාමනන්යභාක් ।
සාධුරේව ස මංතව්යඃ සම්යග්ව්යවසිතෝ හි සඃ ॥30॥

ක්ෂිප්රං භවති ධර්මාත්මා ශශ්වච්ඡාංතිං නිගච්ඡති ।
කෞංතේය ප්රති ජානීහි න මේ භක්තඃ ප්රණශ්යති ॥31॥

මාං හි පාර්ථ ව්යපාශ්රිත්ය යේऽපි ස්යුඃ පාපයෝනයඃ ।
ස්ත්රියෝ වෛශ්යාස්තථා ශූද්රාඃ තේऽපි යාංති පරාං ගතිම් ॥32॥

කිං පුනර්බ්රාහ්මණාඃ පුණ්යාඃ භක්තා රාජර්ෂයස්තථා ।
අනිත්යමසුඛං ලෝකම් ඉමං ප්රාප්ය භජස්ව මාම් ॥33॥

මන්මනා භව මද්භක්තඃ මද්යාජී මාං නමස්කුරු ।
මාමේවෛෂ්යසි යුක්ත්වෛවම් ආත්මානං මත්පරායණඃ ॥34॥

॥ ඕං තත්සදිති ශ්රීමද්භගවද්ගීතාසු උපනිෂත්සු බ්රහ්මවිද්යායාං
යෝගශාස්ත්රේ ශ්රීකෘෂ්ණාර්ජුනසංවාදේ රාජවිද්යාරාජගුහ්යයෝගෝ නාම නවමෝऽධ්යායඃ ॥