අෂ්ටාවක්ර ගීතා ප්රථමෝऽධ්යායඃ

॥ ශ්රී ॥
අථ ශ්රීමදෂ්ටාවක්රගීතා ප්රාරභ්යතේ ॥

ජනක උවාච ॥
කථං ජ්ඤානමවාප්නෝති කථං මුක්තිර්භවිෂ්යති ।
වෛරාග්යං ච කථං ප්රාප්තමේතද් බ්රූහි මම ප්රභෝ ॥ 1-1॥

අෂ්ටාවක්ර උවාච ॥
මුක්තිමිච්ඡසි චේත්තාත විෂයාන් විෂවත්ත්යජ ।
ක්ෂමාර්ජවදයාතෝෂසත්යං පීයූෂවද් භජ ॥ 1-2॥

න පෘථ්වී න ජලං නාග්නිර්න වායුර්ද්යෞර්න වා භවාන් ।
ඒෂාං සාක්ෂිණමාත්මානං චිද්රූපං විද්ධි මුක්තයේ ॥ 1-3॥

යදි දේහං පෘථක් කෘත්ය චිති විශ්රාම්ය තිෂ්ඨසි ।
අධුනෛව සුඛී ශාංතෝ බංධමුක්තෝ භවිෂ්යසි ॥ 1-4॥

න ත්වං විප්රාදිකෝ වර්ණෝ නාශ්රමී නාක්ෂගෝචරඃ ।
අසංගෝऽසි නිරාකාරෝ විශ්වසාක්ෂී සුඛී භව ॥ 1-5॥

ධර්මාධර්මෞ සුඛං දුඃඛං මානසානි න තේ විභෝ ।
න කර්තාසි න භෝක්තාසි මුක්ත ඒවාසි සර්වදා ॥ 1-6॥

ඒකෝ ද්රෂ්ටාසි සර්වස්ය මුක්තප්රායෝऽසි සර්වදා ।
අයමේව හි තේ බංධෝ ද්රෂ්ටාරං පශ්යසීතරම් ॥ 1-7॥

අහං කර්තේත්යහංමානමහාකෘෂ්ණාහිදංශිතඃ ।
නාහං කර්තේති විශ්වාසාමෘතං පීත්වා සුඛං චර ॥ 1-8॥

ඒකෝ විශුද්ධබෝධෝऽහමිති නිශ්චයවහ්නිනා ।
ප්රජ්වාල්යාජ්ඤානගහනං වීතශෝකඃ සුඛී භව ॥ 1-9॥

යත්ර විශ්වමිදං භාති කල්පිතං රජ්ජුසර්පවත් ।
ආනංදපරමානංදඃ ස බෝධස්ත්වං සුඛං භව ॥ 1-10॥

මුක්තාභිමානී මුක්තෝ හි බද්ධෝ බද්ධාභිමාන්යපි ।
කිංවදංතීහ සත්යේයං යා මතිඃ සා ගතිර්භවේත් ॥ 1-11॥

ආත්මා සාක්ෂී විභුඃ පූර්ණ ඒකෝ මුක්තශ්චිදක්රියඃ ।
අසංගෝ නිඃස්පෘහඃ ශාංතෝ භ්රමාත්සංසාරවානිව ॥ 1-12॥

කූටස්ථං බෝධමද්වෛතමාත්මානං පරිභාවය ।
ආභාසෝऽහං භ්රමං මුක්ත්වා භාවං බාහ්යමථාංතරම් ॥ 1-13॥

දේහාභිමානපාශේන චිරං බද්ධෝऽසි පුත්රක ।
බෝධෝऽහං ජ්ඤානඛඩ්ගේන තන්නිකෘත්ය සුඛී භව ॥ 1-14॥

නිඃසංගෝ නිෂ්ක්රියෝऽසි ත්වං ස්වප්රකාශෝ නිරංජනඃ ।
අයමේව හි තේ බංධඃ සමාධිමනුතිෂ්ඨසි ॥ 1-15॥

ත්වයා ව්යාප්තමිදං විශ්වං ත්වයි ප්රෝතං යථාර්ථතඃ ।
ශුද්ධබුද්ධස්වරූපස්ත්වං මා ගමඃ ක්ෂුද්රචිත්තතාම් ॥ 1-16॥

නිරපේක්ෂෝ නිර්විකාරෝ නිර්භරඃ ශීතලාශයඃ ।
අගාධබුද්ධිරක්ෂුබ්ධෝ භව චින්මාත්රවාසනඃ ॥ 1-17॥

සාකාරමනෘතං විද්ධි නිරාකාරං තු නිශ්චලම් ।
ඒතත්තත්ත්වෝපදේශේන න පුනර්භවසංභවඃ ॥ 1-18॥

යථෛවාදර්ශමධ්යස්ථේ රූපේऽංතඃ පරිතස්තු සඃ ।
තථෛවාऽස්මින් ශරීරේऽංතඃ පරිතඃ පරමේශ්වරඃ ॥ 1-19॥

ඒකං සර්වගතං ව්යෝම බහිරංතර්යථා ඝටේ ।
නිත්යං නිරංතරං බ්රහ්ම සර්වභූතගණේ තථා ॥ 1-20॥